حلقة 54
ليث يحكي
اول ما رجعت لدار و ما لقيتهاش حسيت روحي بش نهبل .. كلمتها قالت الي هي مشات لجبانة مانعرفش كيفاه تخمم الطفلة هاذي .. كيفاه تخرج و ما تقولش .. ماهيش مخممة كانت تصيرلها حاجة و لا يعرضوها يضروها .. اول ما علقت عالتاليفون رجعت طلعت في الكرهبة و شديت الثنية ليها .. حسيت اعصابي فلتت منها و معادش انجم نسيطر على روحي .. نهار كامل عديتو و دمي يفور منها .. قد ما نحب نوسع بالي معاها مانجمش تصرفاتها هاذم ***** .. نرتاح من حاجة تطلعلي بحاجة اخرى ..
.. بقيت نسوق طاير بش نوصللها .. اول ما وصلت شديت فران و راكيت الكرهبة .. خذيت نفس بش نهدي روحي شوي .. مانحبهاش تخاف مني و تترعب .. دورت للكرسي التلاني و هزيت باكو الشكلاطة الي خذيتهولها وقت مرواحي .. حبيت ناخذلها حاجة تفرحها حتى شوي .. هبطت من لكرهبة و قدمت بخطواتي شوي اما وقفت كيف ريتها واقفة معاه .. حسيت بدمي فور و بدني رجف من المشهد الي ريتو قدامي .. عينيا وساعو كيف ريتو قربها ليه ووجوهم لصقت في بعضها و هي تضحك معااه .. حسيت ساقيا شوي و ترخ بيا لا عرفت نقدملهم و نحاسبهم في زوز و لا نبعد و نهرب ..
بقيت نرد في النفس بسيف كيف ريتها بعدت عليه و بقات تقدم بخطواتها ناحيتي و تتبسملي .. للحظة حسيتها تسيب في تبهليلها علياااا .. رجعت لوعيي على صوتها كيف قربتلي اكثر تحكي
" ياخي جيت ؟؟ "
دورت بعينيا على وجها من غير حتى كلمة بقيت نثبت فيها .. للحظة حسيت روحي مانعرفهاش و البراءة الي فيها كانت مجرد كذبة .. هبطت راسها و غزرت لباكو الشكلاطة الي عندي مدت يداها بش تاخذو تبسمت تحكي " ياااا ليث .. هذا ليا انااا ؟؟"
نطرتو من يداها و طيشتو في القاعة .. شديتها من مرفقها بالقوي نكركر فيها للكرهبة نصيح " اطللللع "
طلعتها و نطرت الباب على قوة جهدي .. طلعت بجنبها و خدمت الكرهبة .. بقيت نسوق و مانيش نرا في شي قدامي كان تصويرتهم و الحالة الي كانو فيها مع بعضهم .. كبست عالفولون بيديا زوز كيف سمعت صوتها تحكي " ليث شفما يااخي؟ شبيك تتصرف هكا ؟"
عضيت على شفايفي و غزرتلها نحكي " سكر ** فمك .. اسكتتت .. حسك مانحبش نسمعووو "
علات في صوتها تحكي " ماااانسكتش .. نقص في الفيتاس .. ياخي ناوي تقتلناااا .. لبااس انت ؟"
ضربت عالفولون بالقوي نصييح " قتلللك اسكت .. اسكت خير ما نستجرم فييك السااعه هاذي .. حسابك مش هناااا تسمع فيااا "
" حساب شنية ياخي؟ على شنوة بش تحاسبني زادة ؟؟ انت واحد مريض ليث .. كيفاش تسوق هكا ... نقص خفت راني ... يزيييييي "
على كلمتها شديت فران بالقوي عديت بيديا على وجهي و غزرتلها نحكي "اهبط .. قتلك اهبببببط "
حلت الباب من غير حتى كلمة و هبطت .. خلطت علاها ووقفت مقابلها هزيت بحاجبي نحكي " مالا خفت ؟ خفت مني انا كان نقتلك .. و ما خفتش وقتلي خرجت و جيت هنااا وحدك من غير ما تقولي .. و لاا تطلعش كنت متأكده انك بش تقابل حبيبك هنااا على هذاكا ماخفتش كان تصيرلك حاجة ؟"
عقدت بحواجبها و رمشت عيناها فيا تحكي " فاش تحكي انت ؟ شقاعد تخلوض ؟؟"
تبسمت على جنب نحكي " انا نخلوض ؟؟ "
كبست وجهي و شديتها من مرفقها حليت عينيا فيهاا نحكي " شكان يعمل معاك ***** هذاكا ؟"
" لي..."
قصيت علاهاا كيف شديتها من مرفقها و لصقتها في الكرهبة نصيح " قتلللك سكر فمممك .. مزال عندك عين و تحل في ** فمك و تحكي .. على هاذكا هربت من الدار وخرجت من غير ما تعلمني ؟؟ .. بش تجي تغرم زمانك هنا .. وانا لي خايف تصيرلك حاجة و جيت بش نروح بيك .. هاذا لي كنت تستنا فيه انت اه ؟؟ وقتاش نخرج وتبقى وحدك بش يخلالك الجو و تجي تترمى في حضن الكلب هاذاك .. مصدقتش لي رجع اه ؟؟ مصبرتش بش تجي تشوفو .. ونسيت هو علاه رجع و شعمل فيك ؟؟ نسيت لكلام لي قالو عليك وجيت تجري ليه ؟؟"
نطرت يداها مني و قربتلي تضرب فيا على صدري بالقوي تحكي " فاااش تحكي انت ؟؟ كيفاه تحكي معايا هكاااا ؟؟ "
نطرتلها يداها و دزيتها عالكرهبة قربتلها و هبطت راسي ناحيتها نحكي " شنوووة كلامي غالط للا قمر ؟؟ مش هاذا الراجل لي طيشك و خلاك ملوحة في الشارع وراه ؟؟ وكيف رجع شعمل ؟؟ .. فضحك قدامنا الكل و خلاك وحدة متسواش و ماتصلحش .. اما انت نسيت هذااا الكل وجيت ليه مش هكا ؟؟"
تبسمت على جنب و ضيقت عينيا فيها نحكي "شنوة توحشتو ؟؟ ولا تكونش ناوية تحاولو بش يرجعلك .. اتو توفى المحكمة ممكن يقتنع و يصدق لي انت ما مديتش روحك وبالكشي وقتها يحن عليك ويرجعلك "
طلعت عينيا على يداها الي تهزت بش تضربني شديتها منها بالقوي و كبست علاها هبطتها نحكي " رد بالك يدك تتهز عليا فهمتني ؟؟ رد بالك .. بش ننسى كلشي وننسى انك مرا ووقتها نوجعك و نكسرلك قلبك ..
رد بالك تتعدى حدودك معايا "
بقيت نغزر لدموعها الي هبطو كيف الشتاء .. كبست على عيناها تحكي " سيبني وجعتنييي .. انت واحد مريض و ساقط كيفهم .. يا خسارت ثيقتي فيك .. عمري لا بش نسامحك على كلامك هذااا يا ليث "
نطرتلها يداها بالقوي عليت في صوتي نحكي " ثقة شنوة ؟؟ *** ثقة شنوة الي تحكي علاهااا ؟؟ انت من وقتاااه وثقت فيا فكرني تراه ؟؟ انا لي ندمت وقتلي وثقت فيك .. استغفلتني و استنيتني نخرج بش تجي تقابل خطيبك اللي طيشك على طول يديه .. جيت من وراياا و خليتني ***** .. كان انت معادش يهمك اسمك يا للا انا يهمني .. متنساش لي انت على اسمي .. كان بش نلمحكك مرة اخرى معاااه وقتها بش نحاسبك و مانخليييك تندم يا قمر .. انت لتو لا شفت وجهي الثاني و ماذبيك ما تشوفوش .. متجربنييش احسنلك و ما تختبرش صبري اكثر من هكااا .. بالي معادش بش نوسعوو معاااك فهمتني .. فديت منك و من عمايلك الكل .. و كان مازلت ميتة على ال***** هاذاك .. اتو توفى حكاية المحكمة وقتها كل واحد يمشي على روحو و نخرجك من حياااتي و نعطيك حريتك .. وبعدها برااا اترما تحت ساقيييه بش يرجعك و يعاود يغزر لمنظرك .. اما تو انت بش تلزم حدودك تسمع فيا ؟؟ متخلينيش نندم اكثر اني عطيتك اسمي لالة قمر "
بقات تغزرلي ساكتة كان دموعها هابطين و صوت شهقتها الي مسموع .. كبست عالبونية متاعي نحكي
" و تو اطلع في الكرهبة "
دورت وجها من غير حتى كلمة و طلعت .. خلطت علاها و خدمت الكرهبة نسوق .. ثنية كاملة و انا لعصب يهز فياا و يحط .. و صوت بكاها زاد وترني اكثر .. بقيت نسوق نجري نحس في الدنيا ظلامت في عينيا و نفس وحل في حلقي خنقني اكثر ما انا مخنوق.. اول ما وصلت لدار هبطت من غير ما نكلمها و عطيتها بظهري .. سمعتها كيفاه هبطت و سكرت الباب .. بقات تمشي ورايا ساكتة ..
حليت باب الدار و طلعت نجري في الدروج دخلت للبيت .. بقيت ندور كيف المهبول ...كبست على شعري بالقوي شاد روحي بسيف بش ما نرجعش و نسمعها كلام اخر و نحاسبها على كل شي من جديد نحس في روحي مابردتش منهااا .. صوت بكاها الي قوى اكثر ووصلني للبيت خلاني نخرج من سينتي .. كسرت كل حاجة كانت قدامي .. حاسس اني مغزرل علاهااا و فادد منهاا لدرجة مانيش متحمل وجودها معايا في الدار و لا متحمل نسمع صوتها ..
مانيش مصدق الي عملتو فياااا .. كيفاه خرجتني بوهالي في الاخير .. كيفاه صدقتها و صدقت كلامها متاع الصباح .. كيفاه تخدعت في برائتهااا .. كذبت عليااا و عيني في عيناها .. قتلي نكرهو و اول ما خرجت مشاتلو تجري و تضحكلووو .. عملتها هاذي خلاتني نعيف روحي و نعيفها هي زادة .. خلاتني نرجع الف خطوة لتالي .. كنت عارف و متاكد انو انا و هي شي ما يجمعنا و لا عمرنا بش نتلقاو في ثنية وحدة .. تصرفاتها هاذم اكدولي الفكرة هاذي .. مستحيل كان نسامحهااا و لا نغفرلها الي عملتو المرة هاذي.. بش نخلاها تخرج من حياتي و معادش نتلفت لوجهاا مهما يصييير ..
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
