حلقة 65
فريحة تحكي
من وقت خروج ليث و انا حاسة روحي خرجت معاه .. بعد ما شهدت بالكذب و انا عايشة بعذاب الضمير .. حسيت بخوف من الراجل الي امنتلو على حياتي و حسيت بخوف اكثر من الي يستنى فيا .. من اللحظة الي بش نعرف فيها وجهو الحقيقي .. و تو زاد عليا كلام ليث .. خلاني نحس اني تخدعت .. و انك تتخدع من الراجل الي وهبتلو عمرك و حياتك .. أصعب حاجة تنجم اي وحدة تعيشها .. بقيت نعاود في كلامو .. الأوراق الي ريتهم .. أسئلتو .. هذا الكل مش انا الي عندي اجابتهم .. واحد برك ينجم يجاوبني و يبردلي ناري .. هزيت روحي بسيف و قمت .. مشيت لتوالات .. غسلت وجهي برشة مرات حبيت نفيق من الكابوس هذاا .. و ترجع حياتي لقديمة .. اما هذا مكانش كابوس .. كان واقع مر .. واقع بقيت نتخبط فيه .. لا عارفة نفرق بين الكذب و لا لحقيقة .. خذيت نفس طويييل و حضرت روحي و خرجت .. شديت الثنية الي كان لازمني نشدها من اول نهار بعد الجلسة .. اما وقتها خفت .. خفت اني نواجه حاجة فوق طاقتي .. اما هروبي تو معادش ينفع .. لحقيقة مصيرها تبان .. و بش نحاول نخلاها تبان اليوم .. معادش انجم نصبر .. تعبت .. بقيت ثنية كاملة و انا بين فكرة تهز و فكرة تجيب .. حتى لقيت روحي واقفة قدام الحبس لكبير .. ريت برشة النساء كيفاه كانوا واقفين .. كل واحدة كانت في يداها قفة .. لحظتها ضحكت على روحي .. انا وين وصلت .. ريان شنوة خلاني نعيش .. ريت الباب لكبير الي تحل .. قدمت بخطواتي ناحيتو .. جبدت ورقة الصداق و اعطيتها للعون .. دخلت لداخل .. لبلاصة كلها بلار وفيها تليفونات .. بقيت نغزر مش عارفة شنعمل بالضبط .. قدمت و بقيت على كرسي قدام البار نستنى فيه .. غمضت عينيا نشد في دموعي الي مكبشين في عينيا و يحبو يهبطو .. دموع ما لازمهمش يهبطو قبل ما نعرف اجوبت الأسئلة الي انا هنا على خاطرها .. حليت عينيا ريتو كيفاه خرج و يقدملي .. للحظتها حسيتو غريب علياا .. تبدل لدرجة اني ماعقلتوش .. كان محجم شعرو و لحيتو .. ضعيف .. عينيه ذابلة .. رغم الي سمعتو عليه .. اما لحظتها قلبي وجعني على حالتو .. قدملي وقعد قدامي .. خذا التاليفون تبسملي يحكي " فريحة .. ياروحي.. كيف قالولي الي مرتك جات تزور فيك ما صدقتش "
دورت بعينيا عليه حسيت لكلام هرب من حلقي .. تقويت على روحي نحكي " مرتك ؟؟ كان جيت روحك و مرتك راك ما وصلتنيش لهنا ريان "
هبط راسو و عدا بيديه على وجهو رجع غزرلي يحكي " سامحني فريحة .. سامحني على كل شي .. صدقني ما حبيتش نوصلو لهنا .. نعرف الشي هذا فوق طاقتك .. محكمة و حبس .. كل شي مني "
هبطت دمعة من عيني مسحتها فيسع نحكي " تحبني نسامحك ريان ؟؟ انا مستعدة نسامحك والله .. اما على شرط انك تحكيلي لحقيقة .. ماتخلينش عايشة هكااا ريان .. نحب نسمع كل شي "
بقى يغزرلي من غير حتى كلمة .. سكوتو وترني مانعرفش كيفاه عليت في صوتي نحكي " انننطقققق "
رمش عينيه برشة مرات و بلع ريقو بالقوي لدرجة اني سمعتو من التاليفون يحكي " لحقيقة انت .. انت تعرفها .. سمعتها مني في المحكمة "
هزيتلو براسي لااا نحكي " لااا ريان .. مش هذيكا لحقيقة .. انا نعرفك من عينيك ريان انت مخبي عليا حاجة .. إن.. "
قص عليا يحكي " انا مانيش مخبي شي .. و ماعملت شي "
عضيت على شفايفي نحكي " ماعملت شي ؟؟ تعرف انا بقيت بيني و بين روحي .. تفكرت تصرفاتك اخر مدة .. غبت عليااا .. معادش تكلمني هارب مني .. و كيف نراك كنت ديما سارح و عينيك ضايعة .. وصلت ماعرفتكش .. وصلت شكيت في روحي اني قلقتك و انت فديت مني .. و بعدها نسمع الي راجلي متهم انو اغتصب طفلة .. و كيف قتلي مظلوم صدقتك .. اما انو يوصل يجيني محامي و يقولي بش تشهد بالكذب .. وقتها معادش انجم نصدقك ريان .. هز عينيك و اغزرلي قلي انت ليلتها وين كنت ؟؟؟ قلي و انا من غزرتك و نبرة صوتك نصدقك "
بقى يغزرلي و عينيه مدمعة .. وطى راسو يحكي " فريحة شنوة تحب انت تو ؟؟"
تبسمت على جنب نحكي "شنوة نحب ؟؟ هاني بش نقلك شنوة نحب .. هززززز راسك و اغزرلي "
طلع عينيه فيا و رجعت نحكي " بلحق انت صححت على ورقة طلاقنا ؟؟ هذا شنوة نحب نعرف ... بلحق كنت ناوي تبعد ريان ؟؟ انا ريت الأوراق.. ريت تصحاحتك فيهم "
حط صوابعو على عينيه و كبس علاهم .. ريت دمعتو الي هبطت .. دمعة حسيتها كانت هي الإجابة.. دمعة حرقتني في قلبي و كانت كيف نكتة السم في حلقي .. ميلت راسي و بكيت نحكي " يعني صحيح .. هذا الكل صحيح .. انت اغتصبت الطفلة و كنت بش تأخذها .. علاه ريان ؟؟ علاه اما شعمتلك ؟؟ علاه دمرتني هكاااا .. تخوني بالطريقة الرخيصة هاذي .. تطعني في ظهري وقتلي انا امنتلك على روحي .. عرست بيك من وراء دارنا .. سلمتلك في شرفي .. المهم انت ترضى .. المهم نراك فرحان .. قتلي يا فريحة راني مش حاضر اما معادش انجم نصبر .. قتلك باهي نعملو كيف ماتحب .. كنت مضويتلك صوابعي شمع .. المهم راحتك .. امك كانت في عينيا وقتلي انت تسافر .. سلمت في حياتي على خاطرك .. فنيت عمري معاك .. و هذا باش تكافيني؟؟ تغتصب طفلة ؟؟؟ كيفاه كنت عمية و ما ريتش انك وحش ؟؟ انك انسان تخوف ؟ رضيتها فيااا ريان .. تطلقني و تخليني ملوحة .. ماخممتش شنوة بش نعمل مع دارنا ؟؟ بش ترميني وراك كأني و لا شي ؟؟ و انت قبلت بخدمة جديدة .. فلوس في الكونط و داااار باسمك " ضحكت بالقوي و كملت نحكي " و عروسة جديدة هههه .. الله لا يسامحك يا ريان .. الله لا يربحك على خليتني نعيشو "
هز راسو و مسح دموعو يحكي " سا .. سامحني فريحة.. سامحني .. رغم الي عملتو معاك انت وقفت جنبي و ماخليتنيش .. انت ماسلمتش فيااا و شهدت على خاطري .. كنت و مازلت بنة اصل "
تبسمت على جنب نحكي " لا مش خاطرني بنة اصل .. خاطرني بوهالية .. رغم الي سمعتو اول مرة .. اما صدقتك .. حتى كيف نشك .. نوبخ روحي.. نقول اشش كيفاه تشك فيه ؟ ريان يحبك .. مستحيل يعملها.. ههه اما هو عملها .. عمري لا بش نسامحك يا ريان .. انشالله تخزز في الحبس ووجهك مايراش النور .. بش تبقى ملوح هنا كيف الكلب .. و المرة هاذي انا بش نطلقك .. بش نبعثلك الورقة الي انت كنت ناوي تبعثهالي .. و الله ما نقهرك يا ريان كيف ما قهرتني .. ما نوجعلك قلبك بالطريقة انت ما تتخيلهاش.. ما نخليك ترا وجه فريحة الجديد .. من اللحظة هاذي ما تستنى مني شي .. انت انسان ما تستاهل شي "
سمعت شهقتو من التليفون .. كل دمعة ريتها من عينيه حسيتها تبردلي في النار الي لاهبة فيا ..خذيت نفس و رجعت نحكي " بش نخليك هكااا .. عايش في العذاب .. نحبك تبقى عايشة في الشك الي خليتني عايشة فيه " ضيقت عينيا فيه نحكي " زعمة شهادتي بش تتبدل .. و لااااا .. زعمة شنوة يستنى فيك مني هه مانخليك هكا كيف المهبول لنهار الجلسة .. كيف ما خليتني الفترة هاذي الكل كيف المهبولة .. و تو يا روحي انا بش نمشي.. نتمنالك عذاب ابدي .. حتى كان مش هنا و بش تخرج من الحبس .. بش ترااه لعذاب لبرااا .. يعني كيف حبسك كيف حريتك .. الزوز جهنم بش يكونو .. بيزو يا روحي "
ضحكتلو و غلقت التاليفون ماخليتوش يجاوبني .. بقى يغزرلي باهت فيا .. كيف قمت و بايبتلو بيدي .. مانعرفش منين جاتني القوة هاذي و الدم البارد .. يمكن لحقيقة الي عرفتها خلاتني نرضى بالواقع .. خلاتني نقبلو .. المهم اني تخلصت من الشك و الوهم الي كنت فيه ..
خرجت من الحبس ضربتني نسمة محلاهااا .. بردتني اكثر .. بقيت نمشي و نستحلى فيها .. و مخي يخمم في خطوتي الجاية .. من اللحظة هاذي فريحة البهلولة معادش .. و دموعي الي هبطت ما نخلص حقها ثاني و مثلث
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
