حلقة 13
ريان يحكي
حليت عينيا عالضوء الي داخل من الشباك .. عندي قداه ماخرجتش مالبيت هاذي .. مانحب نقابل حد حاسس روحي مخنوق و مخي بعيد ياسر .. حتى النوم مش شابع بيه نفس الكابوس نرا فيه كل ليلة .. كابوس كابس على صدري خانقني .. نتمنى في الراحة الي عارف اني مش بش نلقاها مرة أخرى .. العذاب هذا مش بش يوفى .. عايف روحي لدرجة مانجمش نغزر لوجهي في المرايا .. قداشني راجل واطي و ما نسواش .. يديا ملطخة بدم طفلة بريئة ذنبها الوحيد انو طريقها قطع طريقنا
هزيت راسي عالتليفون الي ماحبش يسكت عندو قداه .. يكلم فيا وانا مانحبش لا نسمع صوتو ولا نراه .. قمت شوية و شديت التاليفون نفخت بالقوي وهزيت عليه نحكي
" شفما ايهم؟"
" ر** وينك ياخي ؟ جمعة نكلم فيك و انت ريحتك مافماش "
عديت بيديا على رقبتي وغمضت عينيا نحكي " مانحبش نرا حد و لا نحكي مع حد اخطاني هالنهار"
" ريـــان مش وقت الدراما متاعك تو، لازم نتقابلو عنا ما نحكيو اكيد "
نفخت بالقوي وقويت في صوتي نتكلم " ما تفهمش *** قتلك ما نحبش نرا منضرك فوت سمايا "
صاح يحكي " مانيش متوحشك راو وقاتل روحي عليك .. اما يا بابا الطفلة الي شخنا معاها الزوز جاتني لدار هيا وأمها وقالت بش تشكي "
حسيت الدم جمد في عروقي وريقي وحل فحلقي، هزيت روحي شوي وركزت عالفرش حاولت نجمع الحروف الي تشتت بين شفيفي نحكي « شـ شنوة ؟؟ كيفاه جات كيفاه عرفتك وعرفت الفيلا ؟؟ ا اايهم شنية بش نعملو" تنطرت من فرشي وبقيت نمشي كالمهبول خايف ملي يستنى فيا
" تو نلقاو حل ماتخافش أمي وليث بش يتصرفو .. وانت اخرج و ايجا حذايا لكلام هذا مش متاع تاليفون"
علقت عليه من غير لا نجاوبو قعدت، عالفرش و حطيت يديا على راسي وبقيت نرعش .. فقت من الحالة الي فيها على صوت امي الي دخلت قربت مني وقعدت بجنبي مسحتلى على راسي تحكي " شبي بابا ؟ حالتك مش عاجبتني عندك ايامات و انت شاد البيت .. خطيبتك تكلم فيك ماتهزش عليها مستانس تصبر على فريحة انت؟"
غمضت عينيا على كلامها ودموعي هبطو يجريو .. كيفاه بش نهز عليها ونكلمها ..شنية بش نقلوللها ؟؟ نقلها راني اغتصبت طفلة صغيرة، راو الراجل الي انت تحبو طلع وحش في النهاية.. راني خنتك و خنت ثيقتك فيا .. طلعت راسي على يدين امي الي حطتهم على خدي تحكي
" شصار ريان شبيك تبكي؟ ماتحيرنيش عليك عيش ولدي "
حطيت راسي على صدرها ودورت يديا عليها نبكي و نحكي " ماتسيبنيش امي خليني عندك امان.. تاعب يا أمي حاسس روحي مخنوق و خايف، خايف من غدوة والي يستنى فيا"
شدتلي وجهي ومسحتلي دموعي تحكي" علاه خايف ؟ صارت حاجة ياخي ؟؟ متعرك مع فريحة؟ عندك مشكلة فخدمتك .. احكي "
" لا لا مصار شي .. اما حاسس روحي مستحقلك نحب نحط راسي على حجرك و نرتاح من كل شي"
هبطت و تكيت عليها لقات تمسحلي على شعري تحكي " سماالله على ولدي .. ماتعملش في روحك هكا و كان صارت حاجة احكيلي فرغ قلبك لأمك .. انا موجودة ديما بش نسمعك حط هذا فبالك"
غمضت عينيا وكبست عليها كان لقيت ندخل بين ضلوعها ومانخرجش.. ريحتها هداتني شوي غمضت عيني .. استحليت يديها على شعري و للحظة حاولت نتناسى كل شي.
بعدتني عليها قامت و قومتني معاها تبسمتلي تحكي " هيا قوم اعمل دوش وبدل دبشك واهبط افطر .. وبعد برا قابل خطيبتك الطفلة كلمتني متحيرة عليك"
هزيتلها براسي باهي و دخلت لدوش سيبت عليا الماء و غمضت عينيا بقيت سوايع هكاكا لين عصابي ترخفت شوي .. بدلت دبشي هزيت تاليفوني و خرجت شديت ثنيتي للأيهم قبل فريحة ... لازمني نحكي معاه و نعرف شنوة الحل قبل ما تتفضح الحكاية بقيت نمشي بخطوات رزينة خايف ملي يستنى فيا و الشي الي بش نسمعو .. فيسع ماوصلت دقيت الباب اول مادخلت عارضتني خالتي وجيهة قحرتلي تحكي" عسلامة سي الشباب "
نحكي " اهلا خالتي .. ايهم الفوق "
" أي امشيلو ..برا احكي معاه و القاو حل لمصيبتكم في زوز"
هزيتلها براسي باهي مالقيت مانجاوبها عندها حق احنا في مصيبة و تنجم تكبر مع الوقت لازم نلحقو نلمو الحكاية قبل لاتسمع امي وفريحة .. طلعت في الدروج نجري حليت الباب نلقاه قاعد عالفرش وشاد التاليفون قربت منو وفكيتلو التاليفون من يديه رميتو بعيد قعدت بجنبو نغزرلو نحكي " احكيلي كيفاه جات الطفلة لهنا ؟ كيفاه عرفتك و شنية قالت؟؟"
هز راسو معايا غزرلي يحكي " مش مرة قتلك راني ضيعت الشركة متاعي هدية مماتي .. مشى في بالي نسيتها في أمريكيا اما طلعت طيحتها في البلاصة وين الطفلة وهيلقاتها .. اما كيفاش عرفتني و طلعتني انا وين لتو لا نعرف لحكاية لتو لا فهمت شي "
تنطرت من الفرش نصيح " ياخي بوهالي انت كيفاه طيحتها وشبيه ماجاش البالك انها تنجم تكون غادي .. بش نتفضحو جرايرك"
وقف قدامي ووجه بش يطرشق " اسمع *** .. الي فيا مكفيني ريان، انا الي اسمي تجبد و الطفلة عرفتني انا و جات قدامي واجهتني هي وامها قالو بش يشكيو .. صحيح يعرفو معايا شكون اما اسمك لتو لا تجبد و لا يعرفوك .. في عوض ما جاي تعارك القى حل معايا .. خاطر صدقني كان اسمي يتجبد وقتها عليا وعلى اعدائي ماتنساش لا نقول صاحبي و لاعشرة .. "
حطيت يدايا على صدرو دزيتو بالقوي ونحكي" تهدد فيا *** .. نعرفك ساقط من قبل مش من تو وتهنى منيش ***** بش نخليك تهزها وحدك مستعد نتحمل مسؤوليتي .. اما حط في بالك زادة مش خاطرك باسمك صاحبي وولد محمود بن سعيد بش نكون انا كبش فداء كيف ما قلت انت عليا وعلى اعدائى"
بقى يغزرلي عدا يديه على شعرو وكبس على رقبتو من تالي نفخ يحكي " تهنى بش نلقاو حل اكيد امي قالت بش تعاونا وليث جاء زادة "
" حكيتلو ؟ وكان يحكي لبوك.. "
" لا امي وصاتو لحكاية بش تتحل بيناتنا ماتخافش و لازمها تتحل قبل مايرجع بابا مالسفر"
" ربي يستر .. "
قعدت عالفرش و طلعت راسي معاه بلعت ريقي نحكي " ايهم .. نحب نسالك .. ريتها الطفلة كيفاه كانت حالتها؟ شقتلك؟ "
غمض عينيه وحلهم فيسع غزرلي غزرة ذابلة وقعد بجانبي حط راسو بين يديه يحكي " الخوف كان مالي عيناها كانت ترعش .. دموعها ماكفوش يا ريان .. قربت مني و قتلي علاه عملت فيا هكا .. لحظتها حسيت الدنيا وقفت بيا .. الجروح الي كانو في وجهها حسيتهم ترسمو في قلبي من داخل .. تمنيت كان الوقت يرجع بالتوالي و معملناش هكاكا .. ضعفها للحظة ضعفني حبيت نقلها سامحني اما الكلمة ماكنتش بش تبردلها نارها"
بكيت على كلام ايهم كل دمعة كانت تهبط نحسها كيف الجمرة في قلبي .. صحيح احنا غلطنا وقاعدين نتعذبو على عذابها .. خلتنا خايفين من غدوة و الي يستنى فينا قمت من نغير لا نجاوبو دموعي كانت إجابة كافية عالشي الي سمعتو منو خرجت من الفيلا وشديت ثنيتي لفريحة .. ماشي بخطوة لقدام وعشرة لتالي كيفاه بش نغزر في عينيها ضميري يأنب فيا و قلبي واجعني عليهم الزوز.. عارف انو باب جهنم تحل و نارها بش تشعل فينا الكل .. مش بش ترحم حد فينا لا الظالم ولا المظلوم.
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
