حلقة 93
#ليث_يحكي
طلعت ف الكرهبة وخذيت الملف.. حليتو و رجعت نقرا ف المعلومات الي قدامي من جديد.. وين حسيت روحي ضعت اكثر.. تو عندي نهارين من وقت الي وصلت.. نهارين و انا ندور من بلاصة لبلاصة اما منغير فايدة.. شفت كل العناوين الي قلي علاهم مازن اما ماوصلت لحتى شي من خلالهم يخصها.. دورت بعينيا على آخر عنوان مازال ف القائمة.. و الي هو ميتم ف منطقة " تورنت " خدمت الكرهبة و شديت الثنية ليه.. فتحت نظام تحديد المواقع و بقيت نتبع ف الثنية.. طريق كامل عديتو وانا نخمم ف كل الاحتمالات الي ممكن نسمعهم ورغم هكا حسيت روحي رافض اي احتمال اخر غير اني نلقاهاا.. سوى ف العناوين الي قدامي و لا غيرهم.. خاطر ماعنديش استعداد نرجع و هي مش معاياا.. راكيت الكرهبة قدام دار الايتام ونزلت.. خذيت نفس طويل حاولت نضبط بيه نفسي و دخلت.. قدمت بخطواتي ناحية الطفلة الي كانت ف الاستقبال نحكي
انا :" بونجور.. حبيت نقابل مدام "اليخاندرا سورن" المسؤولة عالميتم "
هي :" عندك موعد معاهاا ؟"
انا :" لا.. اما لازمني نقابلهاا اكيد "
هي :" شكون نقوللها ؟"
انا :" المحامي ليث بن مراد من تونس "
جبدت الكارط متاعي حطيتها قدامها ورجعت نحكي
انا :" قلها حاجتي بيها ف موضوع مهم "
هزتلي براسها باهي.. خذات الكارط ووقفت من بلاصتها.. دخلت ناحية البيرو الي كان مقابلنا.. شوي وقت ورجعت خرجت.. اشرتلي بيداها تحكي
هي :" تفضل مسيو "
هزيتلها براسي باهي وقدمت دخلت وسكرت الباب ورايا.. قربت ناحية البيرو نحكي
انا :" بونجور "
هي :" بونجور مسيو.. تفضل "
قعدت عالكرسي مقابلهاا.. غزرتلي ورجعت تحكي
هي :" كيفاه انجم نعاونك ؟؟"
عديت بيديا على شعري وغزرتلها نحكي
انا :" انا هنا خاطر وصلتني معلومة انو اختى كانت ف الميتم هذاا.. حبيت نتاكد و فرد وقت نعرف وين انجم نلقاها تو "
جبدت التصويرة من جيبي و حطيتها قدامهاا ورجعت نحكي
انا :" هاذ تصويرتهاا و اسمها "
هي :" باهي .. دقيقة نشوف "
هزتلها براسي باهي وين ريتها وقفت من بلاصتها و بقات تلوج ف الأرشيف.. مانعرفش قداه تعدا وقت ورجعتلي.. غزرتلي تحكي
هي :" لا مسيو.. الطفلة هاذي مكانتش عندنا "
انا :" متأكدة ؟؟"
هي :" وي للاسف "
حسيت روحي ترهوجت على بلاصتي.. هذا كان آخر امل عندي هنا.. قمت من بلاصتي بالسيف نحكي
انا :" باهي.. مرسي مدام "
هي :" ماعملت شي.. و انشالله تنجم توصل لاختك "
هزيتلها براسي باهي وخرجت فيسع.. قدمت ناحية الكرهبة ووقفت.. ماعرفتش اناهي الثنية الي بش نشدها تو حسيت كلشي تسكر قدامي.. مش عارف وين و لا منين بش نبدأ تو.. خصوصا ف بلاد ك هاذي كبيرة اصلا الشك بدا يسيطر عليا خفت لا نكون نلوج ف بلاصة غالطة و المعلومات الي تحصلت علاهم جيست بس نتشتت.. عديت بيديا الزوز على وجهي وهزيت راسي شوي.. عقدت بحواجبي مستغرب الكرهبة الي كانت مراكية ف النهج الي كان قدامي.. من اول ما وصلت و انا نشوف فيها وراياا.. اما ماكنتش مركز ياسر معاها.. اما ف اللحظة هاذي عرفت انو فما حكاية قاعدة تصير الشي الي خلاني نتاكد اني ف البلاصة الصحيحة .. طلعت ف الكرهبة وخذيت التاليفون حطيت رقم مازن و نزلت عليه.. شوي وقت وهز علياا يحكي
مازن :" اهلا ليث .. وينك من بكري نستنى ف اتصالك "
انا :" هاني مازن.. تو وين خرجت مالميتم "
مازن :" شعملت ؟"
انا :" شي.. حتى الميتم هذا ماوصلت لشي فيه "
مازن :" باهي شنوة بش تعمل تو ؟ بش ترجع ؟"
غزرت للكرهبة الي كانت قدامي نحكي
انا :" لا مازال شوي وقت على رجوعي.. بش نكمل نبحث "
مازن :" باهي.. و انا تو نشوف شنوة انجم نعمل من هنا و نكملك "
انا :" باهي نستناك "
علقت عليه وخدمت الكرهبة وشديت الثنية.. هزيت راسي شوي نغزر من المراياا.. وين ريت نفس الكرهبة تحركت وراياا.. كبست عالفيتاس اكثر وشديت ثنية الاوتال.. مسافة الطريق ووصلت راكيت الكرهبة ونزلت..
طلعت فيسع لبيتي نحيت الفازت متاعي وترميت عالفرش.. تكيت براسي لتالي وغمضت عينيا حسيت وجيعة راسي قوات كيما حسيت روحي تهديت من وراء الي صار النهارين هاذم.. رجعت حليتهم على صوت التاليفون كيف نوقز.. خذيتو وشفت رقمها عالشاشة.. تقعدت شوي رديت عليها نحكي
انا :" اهلا قمر "
قمر :" وينك ليث.. طلبتك قبيلا ماتحصلتش عليك "
انا :" كنت لاهي شوي "
قمر :" اه فهمتك.. قلي وينك تو ؟؟ "
انا :" هاني ف اللاوتال "
قمر:" لييث احزر.. خالتي ولدت البارحة.. كان ترا محلاه ياا ليث ياسر صغير ومزيان.. عمي ياسر فرحان و سماه كرم.. ..ياريتك كنت معانا زادة "
انا :" مبروك.. يتربى في عزهم"
قمر :" ليث.. شبيك ؟ شبيه صوتك هكا ؟"
تنهدت بالقوي ورجعت تكيت براسي لتالي نحكي
انا :" شي قمر.. جيست تاعب شوي "
قمر :" وصلت لحاجة بخصوص اختك "
انا :" لا.. شي "
قمر :" باهي يا روحي ميسالش اكيد بش تلقاها الايامات الجاية.. امان ليث متعبش روحك وتتقلق.. صوتك ياسر تاعب "
انا :" مانظنش لي بش نلقاها جملة "
قمر :" علاش تقول هكا ليث.. خلي املك في ربي.. وزيد ما زلت ما لوجتش في الأماكن لكل "
انا :" ليوم كان اخر ميتم في المنطقة..ما نجمت نوصل لشي"
قمر :" و شنوة بش تعمل تو؟"
انا : منعرفش حاسس روحي ضايع "
قمر :" يعني بش ترجع ؟؟"
انا :" لا.. بش نمشي نلوج في المدن لقريبة لهنا "
قمر :" فهمت ليث بش نقلك شي ومتعصبش عليا "
انا :" شفما قمر ؟؟"
قمر :" انت علاش مسالتش خالك ليث.. ن.. نقصد يمكن هو يخبرك "
رسيت على سنيا بالقوي نحكي
انا :" كان جا يحبني نعرف وينها مايبعدهاش عليا قمر من الاول.. اما خليني نلقاها.. وبعدها حسابو عندي الا ماندفعو ثمن اللي عيشهولي اضعاف.. وكان نعرف لي عندو يد في مق-تل عيلتي ما ندفنو حي "
قمر :" ليث.. امان يزي متقولش هكا متخوفنيش عليك "
خذيت نفس بالقاوي ورجعت نحكي
انا :" مفما حتى شي يخوف وتو اعلق تصبح بخير "
قمر :" باهي وانت بخير "
علقت علاهاا ورميت التاليفون على جنب.. كبست على جبيني بالقوي وفرد وقت بقيت نسترجع ف الي صار النهارين هاذم وين لقيت روحي نخمم شنوة بش نعمل من غدوة كيما رجعت تفكرت الكرهبة الي بقات ورايا.. الي ممكن منها هي نوصل لأي خيط يوصلني لأختي..
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
