حلقة 34
أيوب يحكي
اول ما كلمني سي محمود و طلب مني بش نتلها بقضية ايهم حسيت بفرحة عندي قدااه نستنى فيها .. و زدت فرحت اكثر كيف عرفت اني في القضية هاذي بش نواااجه اكثر انسان ناقم عليه في حياتي الي هو سي ليث بن مرااد .. حياتيي الكل و انا وراه .. كان هو الكل في الكل .. الخدمة داخل الشركة و خارجها في يديه هو .. غرورو الي حسسني بالنقص خلاني نكرهو ..
و تو جات الفرصة الي بش نثبت فيها للناس الكل الي انا نستحق بلاصتو و اولى بيهااا و بش نعمل المستحيل بش نخرج انااا الرابح الوحيد من الحكاية هاذي ..
انا أيوب رحماني الي بش نكون السبب في طيحة ليث بن مرااد و مستحيل كان نخليه ياقف منهاا.. و بش يذوق طعم الخسارة على يدي انااا ..
بعد ما سمعت الي ايهم و ريان توقفو .. مشيت و طلبت اذن بش نقابلهم .. خدمتي تو بداات معاهم و لازم نكون حاضر و مركزز في كل خطوة ناوي نعملهااا ..
خذيت نفس و استويت الفازت متاعي ودخلت للبيرو العون نحكي
" عسلامة .. انا المحامي ايوب رحماني ماذابيا كان نقابل الموكلين متاعي سي ايهم بن سعيد و سي ريان الغربي "
" باهي .. تفضل معايا "
قدمت معاه للبيت الي بش نقابلهم فيها .. قعدت عالكرسي وبقيت نستنى فيهم .. حى ريتهم دخلو وقعدو مقابليني .. استويت قعدتي و غزرت لأيهم الي كان يرعش بكلو هز راسو معايا يحكي " لوقتااه بش نبقاو موقفين هكاا ؟؟ لازمني نخرج من هناا .. انا قلت الي حكيتهولي انت بالحرف و في اللخر توقفت "
" ماتخافش .. انتوما بش تبقاو حتى لنهار الجلسة موقفين هناا .. و انا بش نحاول نخلي نهار الجلسة قريب بش تروحو .. المهم كلامكم ما يتبدلش.. ايهم انت امك و بوك بش يشهدو انك الليلة هاذيكا انت ماخرجتش من الدااار .."
تلفت لريان نحكي " و انت زادة ريااان .. انا بش نحكي مع امك و خطيبتك بش يشهدو معااك .. انا بش نعمل كل شي بش تخرجو في اول جلسة .. على هذاكا مذابيا كان تسمعو لكلام و غلطة لااا"
" اما هي عندها دليل .. عندها شركة ايهم .. حتى كان بش ننكرو .. الدليل هذا ينجم ينهينااا "
عقدت حواجبي استغربت من معلومة كيف هاذي انا ماعنديش علم باها .. دورت بعينيا لأيهم نحكي " شنوة حكاية الدليل ؟؟ كيفاه ماتقوليش حاجة كيف هكا ؟؟"
رمش عينيه برشة مرات و خذا نفس يحكي " هي عندها الشركة متاعي صحيح .. طيحتها انا النهار هذاكا بجنبها "
رسيت على سنيا نحكي بالشوي " رد بالك تجبد عالنهار هذاكا حتى بينك و بين روحك .. مصااار شي .. و الحكاية هاذي خلاها علياا .. انت شركتك تسرقت"
ريان: " كيفااه تسرقت ؟ و احنا قلنا الي قمر مانعرفوهااش "
تبسمتلو نحكي " اما ليث يعرف ايهم و ايهم كيف كيف مش هكااا ؟؟"
ريان:" معناها الحكاية بش تلصق في ليث ؟؟"
" هذاكا الي بش يصييير .. خلي لحكاية عندي اناا و بش نرجع نشوفكم و نحكييو .. و تو لازم تمشيو وكيف ماوصيتكم حتى بينات بعضكم لحكاية مفماش و ماصارتش"
اول ما كملت معاهم هزيت روحي و خرجت .. وقفت كيف سمعت صوت ورايا نعرفو ملييح يحكي " كنت متأكد الي انت بش تعوضني .. كالعادة ماعندكش بلاصة لييك ديما تعوض بلاصتي.. "
كبست عالبونية متاعي من كلامو دورتلو نتبسم قدمت بخطواتي ناحيتو نحكي " ههه سي ليث .. عندنا برشة متقابلناش .. و ماتصورتش بش نراك هنااا و في حكاية كيف هاذي "
" لحكاية الي انت دخلت فيهاا اكبر منك سي أيوب.. مواجهتي ديما تخرج منها خاسر .. و لا نسيت "
" صدقني غرورك هذاا بش يخليك تخسر لمرة هاذي .. و من اول جلسة زادة "
" ماتكونش متاكد برشة .. انا ربحت في ما أصعب .. و المرة هاذي بش نربح زادة.. تعرفني عمري ما ندخل في حكاية خاسرة "
بسمتلو نحكي " لازمك تحكي هكااا .. مدام لحكاية فيها المدااام لازمك تقنع روحك بالفكرة هاذي "
قرب مني يجري و شدني من الفازت متاعي غزرلي بعينيه الي كانو شاعليين يحكي
" **** رد بالك تجبد اسمها اخر مرة تحكي علاهاا .. صحيح مش انا الي بش نشد القضية اما بش نكون حارس على خسارتك المرة هاذي زادة .. انت تعرفني مليييح .. ابعد على شري خير "
نطرتلو يديه من فوقي نحكي " تهديداتك ماتخوفنيش .. تنساش الي احنا دافنين كل شي مع بعضنا.. ماتكذبش على روحك و تمثل انك محامي شريف سي ليث .. اغلاطك الكل انا نعرفها .. "
" عمري ما كذبت على روحي و نعرف انا شنوة عملت مليح .. و مستحيل نخلي ***** كيفك يهددني بشنوة عملت .. على هذاكا من اللحظة هاذي بيناتنا المحكمة.. و قد ماتعمل بش تبقى ديما ورايااا و عمرك لا توصل للمكانة متاعي .. رد بالك تفرح بالقضية هاذي خاطر انا الي سلمت فيهااا بكيفي .. و ما وصلت سلمت فيها كان ماكنت متاكد انهااا خاسرة "
" المواجهة هاذي مازالت في اولها.. و الرابح مايتكلمش في الأول.. الرابح هو الي يضحك في الاخر سي ليث .. القاعدة هاذي تعلمتها منك انت "
ماخليتوش يجاوبني عطيتو بظهري ومشيت .. بعد كلامي معااه عرفت الي قمر هي نقطة ضعفو و بش نخليه خاسر لازم نمسو في النقطة هاذيكااا .. مانخليه يخلص حق كل كلمة قالها قبل و لا تو .. و من اللحظة هاذي القضية صارت بالنسبة ليا اهم قضية عندي بش نعلن فيها ربحي قدام سي ليث بن مرااد .. و اول خطوة انا عارف ملييح منين نبداهااا ..
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
