#قمر_تحكي
اسبوعين تعداو واحنا على نفس الحال.. من ليلتها وانا بعيدة عليه لا كلمتو ولا رجعت قربتلو.. اصلا حتى هو كان مطفيني مارضاش حتى يسأل علياا ولا يحكي معاياا بش يصلح غلطتو.. عايشين فرد دار اما كنا بعاد ياسر على بعضناا والشي هذا خلاني بلحق على عصابي.. غير وجودي ف الدار 24ساعة الي زاد وترني حتى لدار خالتي مارضاش يهزني..كيما بقى مصر اني مانرجعش نقرا بلحق حسيت روحي خسرت كل شي ك وقفت على قرايتي بعد ماقلت اخيرا الدنيا تحلت قدامي لقيت روحي رجعت بالتوالي.. بقيت شادة تلفون نقلب قيه حليت عينيا كيف ريتهم حطو انو غدوة بش يكون امتحان مادة #### نفخت بالقوي وهزيت روحي بقيت نخمم شنعمل ملازمنيش نفوتو الامتحان هاذا..تو نحاول نحكي معاه بالكشي يخليني نعدي.. خرجت من لبيت ونزلت قي الدروج..عديت بلساني على شفايفي عالريحة الي شميتهاا اول مانزلت تحت.. ريحة العجة لي يعملها كان فايحة..
انا :" اففف ما يعنلها كان كيف نتعاركو "
حسيت روحي بش نبكي خاطر خفت يعملي كيف لمرة لي تعدات.. قدمت فيسع للكوجينة وين شفتو قاعد يتعشا وحدو.. عينيا ترشقت ف صحن العجة كان قدامو..فركت يديا في بعضهم وزدت قربتلو اكثر..هز راسو معاياا دوب غزرلي على جنب ورجع طبس راسو ياكل.. عضيت على شفايفي نحكي
انا :" ليث جيعانة "
ليث :" شنعملك ؟"
قحرتلو نحكي
انا :" نحب ناكل معاك..امان خليلي شوي "
ليث :" برا اسكب لروحك وكول وحدك ماكش مكسرة "
مشيت نجري للمقلة..ضحكت كيف ريتو قرالي حسابي معاه وخلالي بايتي.. هزيت الصحن ف يدي بعد ماسكبت شوي.. رجعت حذاه جبدت الكرسي وقعدت مقابلتو.. هزيت الخبز من قدامو نحكي
انا :" صحيت هاك تعلمت درسك المرة هاذي "
نزلت راسي بسرعة اول ماقحرلي.. كليت لقمتين ورجعت غزرتلو نحكي
انا:" ليث ميسالش نحكي معاك"
كبست عالبونية متاعي من الغزول كيف بقا ياكل من غير ما يجاوبني.. تنهدت بالشوي ورجعت نحكي
انا :" ليث قاعدة نحكي راني "
هز راسو معاياا وغزرلي يحكي
ليث :" شتحب ؟"
عضيت على شفايفي نحكي
انا :" حبيت نقلك انو غدوة عندي امتحان..لازمني نمشي للفاك امان... "
قص علياا يحكي
ليث :" جرب حط ساقك لبرا وتشوف "
ضميت على شفايفي شديت دمعتي بالسيف نحكي
انا :" امان ليث الامتحان هذا مهم ياااسر.. مانجمش نفوتو امان "
ليث :" ماو قلنا لااا "
شهقت بالشوي وين دموعي نزلو بالوقت.. حطيت الخبز من يدي وبقيت نبكي..سمعتو كيف نفخ يحكي
ليث :" شبيك تبكي تو؟ تعمل عمايلك وتجي تنوح "
هزيت روحي وقمت من بلاصتي غزرتلو.. وحاولت نتحكم في لغصة لي شدتني نحكي
انا :"ميسالش اصلا تعودت.. الحق مش عليك علياا انا اللي صدقتك ك قتلي بش نعوضك على كل شي خ..خليتني نرجع نقرا ونصدق اني م..ممكن نعمل لي نحب عليه.. ك عارف روحك بش تبطلني علاش خليتني نتأمل وحدي هكاا..علاش طمعتني وجبدت بياا.. لقراية كان لازمني ن..ننساها مع بابا..هو كهو لي حب يقريني بلحق...كلكم استكثرتوها عليا "
طرشقت نبكي بعد ما كملت كلامي ريتو كيف بقى يغزرلي ساكت..عطيتو بظهري بش نخرج تلفت اول ماحسيت بيديه شدتني قعدني عالكرسي وقعد بجنبي.. رجعت نبكي كيف سمعتو يحكي
ليث :" هذا لكل من صحت راسك.. تستاهل بش تعود تسمع لكلام "
هزيت راسي معاه وغزرتلو من غير حتى كلمة..حط يديه على خدي مسحلي دمعتي يحكي
ليث :" باهي..تنجم ترجع تقرا "
انا :"ب بلحق!؟؟"
ليث:" اما لمرة هاذي كان رجعت غلطت حسابي معاك بش يكون كبير فهمت انا لتو لا وريتك الوجه الثاني مني قمر وقت يتعلق الموضوع براجل اخر وحاط عينو عليك وانت مخبية لموضوع كانو مكان شي متستناش مني نتفهم.. مرة اخرى نقت-لك ونقت-لو وما يهمني في شي فهمت ما توصلنيش للشي هاذا !!"
انا :"ب باهي..نوعدك معادش نخبي عليك شي ا..اخر مرة والله "
ليث :" و بش ترجع تقرا.. اما بشرط "
انا :" ش..شنوة ؟"
ليث :" تمشي للإدارة تشكي بيه "
عقدت بحواجبي نحكي
انا :" ك..كيفاه؟؟"
قحرلي يحكي
ليث :" الي سمعتو..بش كان المرة جاية رجع يتعرضلك ولا يقربلك مرة اخرى نرفع عليه قضية ونخليه يخسر خدمتو لكل "
فركت يديا في بعضهم نحكي
انا :"اما.. اما هو هكا بش يتغشش "
تهزيت وتحطيت على صوتو كيف صاح يحكي
ليث :" شبي *** خايفة عليه انت "
بلعت ريقي بالسيف نحكي
انا :" مش خايفة عليه والله.. انا جيست مانحبش تصير مشكلة ف الفاك كهو "
كبس على وجهو يحكي
ليث :" المشكلة صايرة صايرة.. وهذا الي بش يصير .. مفهوم ؟؟"
هزيتلو براسي اي نحكي
انا :" مفهوم "
عدا بعينيه عليا يحكي
ليث :" كمل عشاك وبرا ارقد "
هزيت راسي معاه اول ماوقف يحكي
اانا :" وانت كمل عشاك زادة "
قحرلي وقام من الكرسي يحكي
ليث :" شاهيتي طارت منك "
غزرتلو على جنب نحكي
انا :" برا لفريحة تحلهالك..ظاهرلي تعودت تاكل معاها فرد طاولة"
رس على سنيه يحكي
ليث:"قمررر"
قمت من بلاصتي ووقفت قدامو.. حليت عينيا فيه وصحت نحكي
انا :"شنووووة مش صحيح..انت تحاسبني على مهدي وانا كيف نحاسبك عليها نطلع غالطة "
ريتو كيف هد عليا ضرب على الحيط ورايا يحكي
ليث :" شبي*** تجبد في اسمو و تصحح في وجهك "
حسيت رجليا فشلو من الخوف وانا نرا في وجهو كيفاش تكبس.. تقويت على روحي بالسيف نحكي
انا :" م.. متبدلش لموضوع"
ليث:" موضوع شنية *** ريت كان تجيب سيرتو على لسانك مرة اخرى نطلع بروحك "
انا :" هاذاكا لي فالح فيه انت..انت تحاسبني وانا لا مش هكا..حتى انا بش نحاسبك ومانيش خايفة منك.. علاش ماشي عندها انت اه.. هاي هي حاطة عينها عليك..اما انا كيف نحكي عليها تسكتني"
هز بحاجبو يحكي
ليث:" والله انا وقت تعدات حدودها معاك وقفتها عند حدها ومن يومها ماعادش دارت بيك ولا بيا..انا عارف مليح شنعمل..اما انت شعملت اه بقيت تخبي عليا حتى كبرت لحكاية "
وخرت بخطواتي لتالي بعدت عليه شوي نحكي
انا:" حتى انا.. انا حاولت نوقفو عند حدو "
هز بيديه قدامي يحكي
ليث:" اتفضل..هاو لصق اكثر.. متحاولش تحل مشكلة انت مش قدها وتخليني انا برا لحكاية راني راجلك.. مفكرة روحك بش تقدر على **** هاذاكا..ماهوش شي يتخبى هذا "
عديت بعينيا عليه نحكي
انا :" بااهي قتلك معادش نخبي عليك..اما مانيش بش نعديهالك مشيتك ليها بش تقهرني فهمت!! والله لا نسامحك على لفازة..رغم تعرف قداشها وجعتني يومها انت مشيتلها بش توجعني"
حطيت يدي على وجهي بعد ماكملت كلامي..بقيت نبكي بالصوت وأنا نتخيل فيه قاعد معاهاا.. حسيت روحي تقهرت وقت تفكرت مشيانو ليها.. حسيت بيه كيف قربلي ومد يديه فكلي يديا وهزلي راسي يحكي
ليث :" مصغر مخك تو هاذا لي طلع معاك ؟"
حاولت نفك روحي منو نحكي
انا:"ابعدني"
كبس علياا اكثر يحكي
ليث:" اركحح..امها لي جاتني طلبت السماح على عملت بنتها..وامها معندهاش ذنب قتلها ماصار شي.. استدعاتني للعشاء ورفضت..بقات تلح عليا محبيتش نكسر بخاطرها كهو ..مانيش فرخ كيفك بش نعمل هكا قال شنوة نقهرك.. انا نعرف مليح كيفاش نحاسبك..و كان على فريحة حتى هي طلبت سماح وقالت تحب تطلبو منك زادة"
انا :" منحبها لا تطلب سماح مني لا شي تبعدني وكهو"
ليث "امورك..مانيش بش نقلك سامحها..خبرتك لي صار كهو"
انا :" وانت معادش بش تمشيلهم فهمت اخر مرة"
هز بحاجبو يحكي
ليث"" بالله؟"
انا :" اي ولا والله لا تتعادلك بالساهل..وتشوف قمر شتعمل "
حط يدو جنب راسي وطبس علياا.. عدا بعينيه عليا يحكي
ليث :" شتعمل وريني تراه "
بلعت ريقي بالسيف قدامو حسيت روحي تربثت من قربو لياا... غزرت ف عينيه نحكي
انا :" ب..بش نخليك..ونمشي والله لاعاد تلقاني مرة اخرى لا انا لا ولدي "
تبسم وعدا بيدو على شعري يحكي
ليث :" صار ونهون عليك ؟"
انا :" اي كيف ما انا هنت عليك وجرحتني..ع..علاش حتى تمشيلهم حرام عليك "
عقد بحواجبو يحكي
ليث :" ياخي شبيك تبكي تو..ماو قلنا مشيت على خاطر امها..و باهي يا لالة معادش نمشيلهم تهنى "
ذبلت عينيا فيه نحكي
انا :"باهي قلي..قعدت عندهم برشا انت...بقيت تحكي معاها ؟؟ "
ليث:"لا جيست تعشيت وخرجت..وحكيت مع امها مش معاها ارتاح "
هزيت يديا مسحت دموعي نحكي
انا:" ب..باهي اخر مرة هاني قتلك..وانا راهو مزالت مسامحتكش بش يكون في بالك "
عدا بيدو على وجهو يحكي
ليث:"الصبرر..وعندك وجه تحكي"
هزيت بكتافي نحكي
انا :" زوز غالطين لمرة هاذي..شعندي فيك..حتى انت لازم تطلب مني سماح "
بعدت عليه وقعدت على لكرسي..جبدت الصحن قدامي
ريتو كيف قعد مقابلني يحكي
ليث:" كول واسكت"
بقيت ناكل ونتبنن فيها مركزتش معاه..هزيت راسي معاه كيف قام بش يغسل صحنو
انا:"شبعت ؟!"
ليث:" امم"
فركت يديا في بعض نحكي
انا :" ياخي بش ترقد انت ؟"
ليث :" اي "
حط صحن وتلفت بش يخرج قمت وفركت يديا.. عرضتو ووقفت قدامو نحكي
انا :" ليث ياخي متوحشتنيش انت"
تبسم على جنب ودور بيدو على جنبي جبددني ليه يحكي
لبث:" نظن انا لي لازم نسال.. شكون خلا لبيت ومشى للبيت الاخرى!! "
حطيت يدي على صدرو نحكي
انا:"يعني توحشتني "
عدا بعينيه على وجهي وركزهم ف شفايفي يحكي
ليث:"امممم ..شرايك نجاوبك في بيتنا"
قمر:"مش قبل ما تطلب السماح"
ضحك وحط خشمو على خشمي يحكي
ليث:"يطلعلك تتشرط ..باهي حبي سامحني "
تبسمت وهزيتلو براسي باهي نحكي
انا:"باهي سماح "
اول ما قرب مني وحط شفافو على شفافي بش يبوسني جبدت روحي منو ورجعت للطاولة نحكي
قمر:"مزلت مشبعتش انا "
رس على سنيه بالقوي يحكي
لبث:"قمرررر"
غزرتلو على جنب نحكي
انا "شنوة نحب ناكل وولدك زادة مازال جيعان"
ليث:"ربي يصبرني وكهو..وقتها لماكلة تو "
انا :" محسوب انت شبعت انا بش نشبع معاك انت بديت قبلي "
جبد الكرسي قدامي وقعد مقابلني يحكي
ليث :" كول برك "
ضحكت وبقيت شايخة على وجهو كيفاش مغشش ومكبوس..اصلا يستهل خليه يتعلم كيفاش يمشي يتعشا عندها..بقيت ناكل ونتبنن بالصوت بش نوترو..وهو مازال يقحر ويسأل فيا كان مازلت..
تكيت بظهري لتالي عالكرسي وحطيت يدي على كرشي نحكي
انا :" الحمدالله شبعت "
تبسم يحكي
ليث :" صحة.. الحمدلله عليك "
انا :" ليث ميسالش انت تهز الصحن انا تعبت "
ريتو كيف تنهد ووقف هز الصحن ومشى وين الرخامة.. قمت بعدو نحكي
انا :" انا طالعة بش نرتاح "
ليث :" باهي "
عطيتو بظهري و طلعت فيسع للبيت..حسيت روحي توحشتهاا عاللخر.. اصلا اسبوعين عديتهم مانيش نرقد مليح غير غياب ليث علياا..سكرت الباب وراياا وقربت فيسع لدريسينغ.. جبدت روبة نومي ودخلت لسال دوبان..غسلت سناني و غيرت ثيابي وريقلت اموري لكل..حليت شعري فردتو على كتافي ورشيت برفان وخرجت.. تبسمت اول ماريتو واقف قدامي يغير ف ثيابو.. هز راسو معاياا وهزني وحطني بعينيه.. قربلي اكثر وحصرني مع الكوافوز يحكي
ليث :" نورت البيت حبي "
غمضت عينيا على ريحتو لي تغلغلت فيا ولي عندي برشا عليها..حطيت يدي على صدرو الي كان عريان وطلعتهاا لرقبتو نحكي
انا :" معادش تغششني تو معادش نخليك وحدك "
حط يديه على خدي وبعدلي خصلات من قصتي يحكي
ليث :" والله مايهونش علياا غشك قمرتي "
انا :" يعني سامحتني؟"
بدني رعش اول ماطبس علياا وباسني من جنب شفايفي.. قربلهم وهمس بيناتهم يحكي
ليث :" اي "
لحظتهاا قربتلو فيسع وبستو منهم..تبسم بعد مابعدت عليه.. يحكي
ليث :" شوي ونرجعلك "
عضيت على شفايفي نحكي
انا :" ماتبطاش "
تنهد بالشوي ودخل لسال دوبان.. ترميت عالفرش وانا حاسة روحي بش نموت بالفرحة خاطر رجعت مع ليث.. اصلا غيابو علياا كان اكبر عقاب.. مانحبش نعيش بعدو عليا مرة اخرى..يكفي الايامات الي تعداو.. تبسمت اول ماريتو خرج وقدم ناحيتي.. طلع بجنبي عالفرش وجبدني عندو يحكي
ليث :" ايجا عندي تراه "
لحظتهاا حطيت راسي على صدرو فيسع نحكي
انا :" توحشتك برشة ليث "
باسني من راسي يحكي
ليث :" حتى انا ياروح ليث "
هزيت راسي معاه نحكي
انا :" تعرف خفت لا تبقى ماتحكيش معاياا.. ماحبيتش نبقاو هكاا متعاركين "
قرصني من خشمي يحكي
ليث :" عود اسمع كلامي تو معادش نتعاركو "
عوجت شفايفي نحكي
انا :" امم وانت زادة "
تبسم وطبس علياا.. قلبي ضرب بقوة اول ماحط شفايفو على شفايفي وبقى يبوس فياا..بعدت عليه ننهج نحكي
انا :" ليث ابعد بش.. بش نرد "
ليث :" شنوووة ؟"
بعد عليا فيسع وين شديت فمي بيديا وقمت نجري دخلت للسال دوبان وبقيت نرد ورا بعضو حسيت بيه كيف دخل وعاوني غسلت حالتي..مشيت معاه للبيت وتسطحت.. طلع بجنبي يحكي
ليث:"ريت شعملت ف روحك قتلك معادش تاكلها خاطرها حارة"
انا :"شنعمل تشهيتها انا "
ليث:"لباس تو"
انا:" اي احسن اما دايخة"
ليث:"باهي ارتاح "
هزيتلو براسي باهي وبقيت نغزرلو كيف رجع تسطح بجنبي تبسمت اول ما جبدني عندو و حط يدو على كرشي يحكي
ليث:"متعبك برشة ولدي ظاهرلي"
انا :" اي كيف بوه "
ليث:"صار يا فرخة "
انا:"تعرف بقاولي اسبوعين ونخرج من لوحم..وبعدها نجمو نعرفو جنس البيبي "
ليث :"بلحق..شبيك مقتليش !؟"
قمر:"خاطر كنا متعاركين"
ليث:"زايد فرخة الامور هاذي تحطها على جنب "
ضحكت نحكي
انا:"تعرف متحمسة علخر نعرف شنوة بش يجينا "
ليث:"والله انا زادة فرحان ونحب نعرف ليوم قبل غدوة"
انا:"انا نحبو يجي بسرعة بش يصير يونسني اصلا الايامات الي تعداو وانت بعيد علياا بقيت نحكي معاه "
هز بحاجبو يحكي
ليث :" بالله ؟ وشنوة حكيت معاه"
انا :" شكيت بيك.. قتلو بوك غششني وخلانا بعاد عليه "
ضحك يحكي
ليث :"علاش انا شكون عندي غيركم في الدنيا انت وولدي..انتو حياتي..وكان على لغش نظن نعرفو شكون غلط الاول "
هربت عينيا منو قربت بستو من شفايفو نحكي
انا :" نحبك ليث "
جبدني عندو و غزرلي في عينيا يحكي
ليث :" هاك تعلمت تهرب من لكلام لي ميعجبكش "
انا :"يزي ليث عاد منحبش نتعاركو مرة اخرى"
تنهد وكبس عليا يحكي
ليث:" ارقد ارقد..جيت وحيرتني اكثر"
تبسمت كيف فهمت قصدو حطيت راسي على صدرو.. غمضت عينيا وبقيت مستحلية ليديه الي كانت تمسح علياا غير حضنو الي بلحق توحشتو.. تو وين حسيت روحي انجم نرقد مرتاحة ومانخمم ف شي.. كان انو ليث معاياا وف عيلتي الي بش تكبر معاه.. اصلا فرحتي تو مانجمش نوصفهااا..
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
