#قمر_تحكي
#بعد_ستة_أشهر
حطيت المشط عالكوافوز وغزرت لروحي ف المرايا..
تبسمت اول ماعديت بيديا على كرشي لي ظهرت اكثر..الشهور هاذم كانو احلى شهور عديتهم فحياتي لكل..فكرة انو بنتي قاعدة تكبر داخلي وايام قليلة ونهزها ف يدي خلاتني طايرة من الفرحة..زادة حسيت روحي شايخة على لهوة ليث بيا وانو مش منقص عليا شي صحيح خدمتو هاذي صارت تاخو وقت كبير منو اما اول ما يرجع يحاول يرتحني ويسالني كان نحب شي..يتعامل معاياا كاني طفلة صغيرة.. لي نحب عليه نلقاه ومرتحني ف تعبي..زادة تحمل مزاجي لي بقى يتقلب كل مرة على حال..بلحق حسيت انو ربي عوضني على كل شي فقدتو وقت دخل هو لحياتي..عشت معاه كل شي كنت متمنيتو واكثر.. الشهور هاذم عديتهم مرتاحة من كل شي كان يقلقني من قبل ويخوفني اول مرة نعيش حياة طبيعية من غير خوف من لي جاي..خاصة بعد ما مهدي خرج من حياتي وبعدني.. تنهدت بالشوي وقت استرجعت لي صار معاه..
#فلاش_باك (قبل اربع اشهر)
هزيت ساكي وخرجت نجري من الحصة وانا حاطة يدي على كرشي من الجوع لي كنت حاستو.. اول ما شديت الثنية وقفت وقت حسيت بجهامة عارضتني..
حليت عينيا على وسعهم اول ماهزيت راسي وغزرتلو واقف قدامي وين حسيت خوف تمكن مني فاللحظة هاذي ومعرفتش شنعمل..رجعت بخطواتي التالي من غير حتى كلمة.. قلبي ضرب بقوة وقت رجع قرب مني يحكي
مهدي:"ميسالش نحكي معاك متخافش منيش بش نضرك "
انا:"م.. ماعندي منحكي معاك... "
قص علياا يحكي
مهدي:"قمر اسمعني نعرف روحي غلطت فحقك برشا وتجاوزت حدودي معاك..اما انا ليوم مانيش بش نضرك جيست نحب نطلب منك انك تسامحني صدقني منعرفش كيفاش وصلت روحي لهنا اما صدقني انا عرفت غلطتي ونادم برشا"
عديت بعينيا عليه من غير حتى كلمة.. للحظة حسيت روحي تصدمت من كلامو وين لقيت روحي مازلت واقفة نسمع فيه يحكي
مهدي:"نعرف مهما نقول مش بش يصلح لي عملتو.. اما حبيتك تعرف لي انا بلحق نادم على لي عملتو معاك..وخاطر دخلت لحياتك وسببتلك مشاكل..نظن انت تعرف لي انا معادش بش نخدم هنا وخاطرني بش نسافر حبيت نحكي معاك لآخر مرة..ياريت تنجم تسامحني على لي صار ونوعدك معادش بش نرجع لحياتك جملة"
هزيتلو براسي باهي من غير حتى كلمة منعرفش من خوفي انو يصير شي ولا خاطر منيش مصدقة كلامو
ريتو كيف تبسم وغزرتلي يحكي
مهدي:"كنت نعرف انك بش تسامحني..انت تستاهل كل خير قمر..ربي يوفقك فحياتك ومنوصيكش على قرايتك انت بلحق عندك قدرات ركز اكثر وبش توصل وين حابة "
بلعت ريقي بالسيف نحكي
انا:"باهي عيشك "
اول ما عطاني بظهرو ومشا حسيت روحي تنفست براحة منعرفش اذا كلامو صح ولا لا اما ياريت بلحق يكون ماشي ويبعدني ويخليني نعيش مرتاحة خاطر ليث لتو مش ناسي والشي هذا مخوفني..
#باك_اند
فقت من سرحتي عالضربة لخفيفة لي حسيتها ف كرشي ولي تعودت بيهاا وصرت نشيخ علاهاا.. تبسمت نحكي
انا :" صحة النوم ياروحي..جعت مش هكاا؟ هاني ماشية تو بش نحضر عشاناا..بابا راو ف الثنية "
رجعت شعري لتالي وخرجت.. بقيت نازلة ف الدروج دبة دبة من كثر ما صرت ثقيلة..دخلت طول للكوجينة وحليت لفريجيدار نشوف شنوة عندي.. الفترة هاذي لكل خالتي هي لي تبعثلي ف الماكلة ماخلاتني نمس حتى شي رغم انو ليث مش مقصر وانا نقوم ساعات نعمل حاجات خفيفة اما هي ماحبتش خاطرني ثقلت شوي..حتى لمان الدار ساعات تجيني خالتي فاطمة تعاوني.. تبسمت وقت لقيت مازالت عندي صالصة المقرونة.. جبدتهاا حطيتها عالغاز بش نسخنهاا وحطيت المقرونة تتسمط حذاهاا..عارفة انو ليث مسكين بش يفد ك يلقى مقرونة خاطر شبع بيهاا الفترة هاذي اما ماعندي مانعمل هاذي أسهل حاجة.. جبدت السلاطة لي كانت عندي زادة وبقيت انظم ف الطاولة حتى كملت.. لحظتهاا قربت للمقرونة بش نصفيهاا ونمرقهااا.. تبسمت وقت سمعت صوت الباب تحل وصوتو يحكي
ليث :" قمرتي وينك "
انا :" ف الكوجينة ياروحي "
بدني رعش وقت حسيت بيه وقف وراياا ودور بيديه على كرشي.. باسني من راسي يحكي
ليث :" شوصيتك انت عالوقفة هاذي ؟ مش قتلك النهارين هاذم ارتاح قمر ؟"
تكيت براسي على صدرو وتبسمت نحكي
انا :" مرتاحة ياروحي.. من بكري وانا راقدة تو قمت بش نحضرلك لعشاء "
عضيت على شفايفي وقت دورني قدامو وريتو.. عديت بعينيا عليه وخذيت نفس من ريحتو لي صرت نعشقهاا اكثر من وقت حبالتي.. دقات قلبي قوات وقت طبس علياا وباسني من جنب شفايفي يحكي
ليث :" برا ارتاح وتو نجي انا نكمل لعشاء.... "
انا :" ليث والله مرتاحة.. اصلا مابقاش برشة نصفي المقرونة وكهو "
حل عينيه فيا يحكي
ليث :" الليلة زادة مقرونة ؟"
ضحكت بالصوت نحكي
انا :" تحمل النهارين ياروحي كهو.. نولد ونرجع ندلل رويجلي "
ضيق عينيه فيا يحكي
ليث :" لحبالة والمتك انت.. الدلال ولكلام لحلو لكل سمعتو الشهور هاذم "
دورت بيديا على رقبتو وقربتلو.. ذبلت عينيا فيه نحكي
انا :" ياخي كان ماندللش راجلي شكون ندلل "
حط يديه على كرشي يحكي
ليث :" ك هكاا تولد مناا لازمك تحبل مناا.. مانيش ناويي نتحرم من الدلال "
شهقت بالشوي نحكي
انا :" تفدلك مش هكا ؟ لاا دبر على روحك..انا نحب نرتاح تعبت ليث شوفني كيفاه نتحرك بالسيف وليت "
ضحك يحكي
ليث :" ساعة اميرتي عاقلة ماتعبتكش جملا "
هزيت بحاجبي نحكي
انا :" يعني انا نتبلا على اميرتك "
قرصني من خشمي يحكي
ليث :" اي يا ظالمة انت "
ضحكت نحكي
انا :" برا برا بدل حوايجك وايجاا تو نتفاهمو ف موضوع اميرتك لي بديت نغير منو من تو "
كبست بيديا على رقبتو وقت نزل على شفايفي باسني بوسة خفيفة.. بعد علياا شوي وين حسيت بانفاسو تخلطو بانفاسي يحكي
ليث :" هي اميرتي وانت روحي "
تبسمت نحكي
انا :" ربي يخليك ليناا حبيبي "
بعد علياا وغزرلي يحكي
ليث :" اياا حط المقرونة قدر علياا ربي تو ناكلها مدام انا بدلت حوايجي "
هزيتلو براسي باهي نحكي
انا:" باهي ماتبطاش "
بقيت نتبع فيه بعينيا حتى طلع للبيت.. حاسة روحي مش منجمة نهبط عينيا من عليه كان نلقى نخليه قدامي طول الوقت بش نشبع بقربو وحنانتو لياا ولمساتو.. خذيت نفس طويل ورجعت نصفي ف المقرونة مرقتها بالصالصة وحطيتهاا عالطاولة.. عضيت على شفايفي بالقوي اول ماتحركت وحسيت بضربة ف كرشي وجعتني..شديت ف الطاولة وطبست نرد ف النفس.. حطيت يدي على كرشي وقت حسيت بضربة اخرى ف ظهري لحظتهاا جبدت الكرسي وقعدت بالسياسة.. تكيت بظهري لتالي ودوب حليت ساقياا شوي بش نبقى مرتاحة.. عديت بيديا على كرشي نحكي
انا :" صغرونتي قاعدة تلعب..."
قصت علياا ك دوب عليت ف صوتي شوي وقت حسيت بضربة اخرى اما كانت اقوى.. غمضت عينيا بالقوي و رجعت حليتهم نحكي
انا :" ياربي مش مستانسة نحس بوجيعة هكاا "
استندت عالطاولة وتقويت على روحي قمت وقت ريت ليث هبط.. ضميت على شفايفي من وجيعة كرشي لي شدت علياا.. تبسمت بالسيف ك ريتو قربلي.. حط يديه على خدي وعدا بعينيه عليا يحكي
ليث :" شبيك قمرتي ؟"
انا :" شي ياروحي.. هياا نتعشاو قبل ماتبرد المقرونة"
قعدت بجنبو وغرفتلو وانا ساكتة حسيت روحي بش نبكي من الوجيعة لي كانت تتعدا بين ظهري وكرشي.. للحظة خفت كان نقول ليث ويخاف كيف آخر مرة وقتها مسكين هزني طاير ك المهبول للكليبنك ياخي طلع مفما شي.. فقت من سرحتي على صوت ليث يحكي
ليث :" قمر تعشى "
كبست عالمغرفة نحكي
انا :" هاني ناكل ياروحي.. قلي كيفاه تعدا نهارك ليوم ؟؟"
ليث :" من المحكمة تعديت طول الشركة "
عوجت شفايفي نحكي
انا :" ليث الشركة خذاتك مني بلحق.. كنت تروح بكري اول مرة تو لا "
شدني من يدي يحكي
ليث :" قمرتي قتلك لازمني نصفي لحسابات ونكمل الصفقة لي عندي بش نبقى معاك ك تولد.. ايامات ونشد جنبك انت واميرتي "
ضحكت نحكي
انا :" هههه والله رغم خوفي من لولادة اما هاذي اكثر حاجة مخليتني نستنى وقتاه نولد بش انت تبقى حذاياا "
هز بحاجبو يحكي
ليث :" كهو ؟"
انا :" لا بالطبيعة بش نشوف بنتي زادة "
شد لمغرفة ورجع ياكل ويحكي
ليث :" نخاف هي تجي تناسني"
انا :" مستحيل ننساك.. انتوما حياتي ونحبكم الزوز كيفكيف "
ليث :" تونشوفو "
تبسمت وطبست راسي بش نكمل ناكل.. اول ماهزيت لمغرفة مانعرفش كيفاه طيحتها من يدي وصحت من الضربة لقوية لي حسيتهاا قسمتلي ظهري.. غمضت عينيا بالقوي وكبست على كرشي نصيح نحكي
انا :" اااااه لييييث... "
حسيت بيه ك وقف بجنبي وشدني من مرفقي يحكي
ليث :" قمر شبيك ؟"
عضيت على شفايفي نحكي
انا :" ليث ظاهرلي بش نولد.. اااا بش نموووت "
طبس على ركايبو بجنبي ومسح على شعري يحكي
ليث :" قمر ماتخافش ياروحي هاني معاك.. تنفس كيما قتلك الطبيبة ماتخاافش "
ضميت على شفايفي وين دمعتي نزلت على خدي من قوة لوجيعة لي تمكنت مني نحكي
انا :" ليث بش نموووت معادش أنجم لوجيعة قاعدة تزيييد "
ريتو ك وقف ويدور داخل بعضو.. عليت ف صوتي نحكي
انا :" يااا ليث فاش تعمل ؟"
ليث :" نشوف ف تاليفوني بش نطلب الطبيبة "
ضربت بيديا على فخذي نحكي
انا :" هذاااا وقتووو ايجااا هزني للكلينيك خير مانولد هنا ااااااا... "
قربلي يجري وطبس علياا.. هزني بالسياسة ف حملتو يحكي
ليث :" باهي باهي هاني بش نهزك تحمل شوي كهو "
دورت بيديا على رقبتو وصحت على علو صوتي نحكي
انا :" ماتقليييش تحمممل.. ااا يااااربي بش نموووت "
حشيت راسي ف رقبتو وين دموعي نزلو اكثر حسيت روحي معادش أنجم نتحمل لوجيعة اكثر لدرجة اني نرد ف النفس بالسيف.. ضميت على شفايفي وقت حطني على كرسي الكرهبة من تالي يحكي
ليث :" قمر تنفس ماتخافش ماتخافش "
هزيتلو براسي باهي من غير حتى كلمة كان دموعي بقاو نازلين.. ريتو ك طلع وخدم الكرهبة.. شد الثنية يحكي
ليث :" درجين ونكونو ف الكلينيك.. تحمل ياروحي "
شديت ف الكرسي وحليت ساقياا من لوجيعة لي حسيتها تحتي نحكي
انا :" ليث امان ازرب "
غمضت عينيا بالقوي وبقيت ننهج وين حسيت بورقيبة تسرسب تحت حوايجي ودقات قلبي قوات من الخوف لوجيعة.. عضيت على شفايفي وحطيت يدي على كرشي نحكي
انا :"" يااا ربي ااااه "
ليث :" قمر تحمل شوي كهو.. خمم ف بنتنااا لي بش تجي.. شوي وقت وبش تحضنهاا وتشم ريحتهاا.. تحمل لوجيعة على خاطرها هي.. اميرتك جاية تووو هي توجع فيك خاطر تحب تخرج وتراك.... "
تكيت براسي لتالي ورديت النفس وراء بعضو وين حسيت روحي هديت شوي رغم قوة لوجيعة اما كلام ليث حسسني براحة غريبة.. ف اللحظة هاذي نسيت كل شي ماخممت كان ف بنتي لي تجي هي تستحق لوجيعة لكل.. لازمني نتحمل على خاطرهاا.. النهار هذاا ليا قداه نستنى فيه ونحلم بيه ليل ونهار.. للحظة حسيت روحي مش مصدقة انو بنتي سايي بش تخرج وترا النور.. بش نضمهااا لصدري ونشم ريحتهاا.. بش نشد يداها الصغرونة ونلبسها روبهاا لي حضرتهملهاا..
حليت عينيا على وسعهم وقت حسيت بحاجة سخونة نزلت من بين ساقياا لحظتهاا صحت على قوة صوتي نحكي
انا :" ليييييث الماااا نزل علياا.. ازرب امااان "
ليث :" سايي وصلنااا وصلناا.. مابقاش برشة "
حطيت يدي على كرشي نحكي
انا :" صغرونتي امان تحمل شوي.. هانا وصلنااا امان"
غمضت عينيا بالقوي وبقيت نطبطب على كرشي وندعي ف قلبي ربي يوصل بنتي سالمة ونحملهاا بين يديا وهي ف صحة وعافية.. للحظة حسيت روحي نسيت لوجيعة وبقيت نخمم كان فيهاا هي وف اللحظة لي بش نشيلهاا فيهاا..
VOUS LISEZ
#ليس_ذنبي ❤️🔥
عاطفية" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
