#قمر_تحكي
تكيت براسي عالبلار نغزر للطريق.. تبسمت من غير مانشعر كيف قربنا من الفيلا متاع خالتي.. طيارتنا هبطت بكري على هذاكا روحنا ارتحنا شوي وحضرنا رواحنا حتى طلع النهار مليح بش شدينا الثنية لخالتي.. حسيت روحي توحشتهم برشة نستنى وقتاه نوصل ونشوفهم.. مسافة الطريق ووصلنا.. نزلت من الكرهبة بعد ماهزيت الهدايا.. ريت ليث كيف لف ناحيتي وقدمنا الباب.. فتحتلنا خالتي فاطمة تحكي
فاطمة :" مرحبا بيكم.. الحمدالله على سلامتكم "
دخلت وقربتلهاا سلمت عليهاا نحكي
انا :" عيشك خالتي "
ريت ليث كيف دخل وسكر الباب وراه.. قدم حذانا وغزر لخالتي يحكي
ليث :" شحالك خالتي لباس ؟"
فاطمة :" الحمدلله عيش ولدي.. تفضلو ادخلو.. الجماعة ف الصالة "
تبسمت وهزيتلها براسي باهي من غير حتى كلمة.. قدمت بخطواتي فيسع ناحية الصالة ودخلت وين شفت خالتي وعمي قاعدين وكرم يلعب ف المشاي متاعو.. قربت لخالتي فيسع بعد ماحطيت الهدايا من يدي اول ماشفتني وقفت تحكي
رفيقة :" قمر مرحبا ببنتي "
عنقتها بالقوي نحكي
انا :" توحشتك برشة خالتي "
بعدت عليا شوي وباستني من خدي تحكي
رفيقة :" حتى انا توحشتك ياروحي "
تبسمت وتلفتت للعمي الي كان يسلم على ليث.. قربتلو وعنقتو نحكي
انا :" شحالك عمي.. توحشتك برشة "
مسح بيديه على شعري يحكي
مصطفى :" حتى انا توحشتك خليت علينا بلاصة "
بعدت عليه وتبسمت نحكي
انا :" عيشك عمي "
قربت للكرم وطبست على ركايبي وين المشاي متاعو بستو من خدو ويديه نحكي
انا :" كرومتي ياروحي انت توحشتك برشة.. محلاك ياروحي هاك كبرت فيسع "
تلفتت على صوت الجماعة كيف يحكيو
ليث :" شحالكم لباس عليكم؟"
رفيقة :" الحمدالله على حالنا.. غير والله خليتو بلاصتكم علينا.. الدار فرغت بعدكم "
قمت من حذا كرم وقربت قعدت بجنب خالتي وشديتهاا من يداهاا نحكي
انا :" والله ماعندكش فكرة ياخالتي قداه توحشتكم.. من اول ماوصلنا الصباح وانا نستنى وقتاه نجي بش نشوفكم "
هزيت راسي على صوت ليث يحكي
ليث :" اي توحشتكم برشة بلحق.. على هذاكا هي حبت تزيد شهر اخر "
تبسمت نحكي
انا :" والله لا ياخالتي جيست عجبتني لبلاد قلت هكاكا اما لحق انا حبيت نروح ونشوفكم "
تلفتت على صوت عمي يحكي
مصطفى:" سيبلي بنتي ليث.. وزيد عندها لحق حقك خليتها تزيد تتفرهد شوي "
ليث :" والله انا حبيت اما كان لازم ترجع وراها قراياا "
تبسمت كيف حسيت بخالتي كبست على يدي تحكي
رفيقة :" المهم قلي تفرهدت مش هكا ؟ بدلت جو ؟"
انا :" اي عاللخر ياخالتي.. ياريتك كان كنتو معاناا انتم زادة "
رفيقة :" تو نعملو مرة ونمشيو كلنا مع بعضنا "
انا :" اي انشالله "
تلفتت على صوت عمي يحكي
مصطفى:" انا لازمني نمشي تو عندي اجتماع.. خليكم الليلة عشاكم حذانا "
غزرتلو نحكي
انا :" دقيقة عمي خليني نعطيك هديتك قبل "
قمت من بلاصتي وخذيت الهدية الي خذيتها لعمي قدمت حذاه وقعدت بجنبو..عطيتهالو نحكي
انا :" هاذي مني انا وليث.. انشالله تعجبك "
خذاها من يدي وتبسم يحكي
مصطفى:" عيش بنتي.. علاش تعبتو رواحكم هكا "
ليث :" مفما حتى تعب عمي.. صحة "
مصطفى:" عيش ولدي "
غزرت لليث يحكي
ليث :" كان خارج عمي خليني نخرج معاك عندي مانحكي معاك "
ريتهم كيف وقفو مع بعضهم.. غزرت لليث كيف غزرلي يحكي
ليث :" قمر انا ماشي للبيرو بش نكمل شوي خدمة ونرجع "
هزيتلو براسي باهي نحكي
انا :" باهي "
ريتهم كيف خرجو مع بعضهم.. لحظتها قمت من بلاصتي وقربت لخالتي.. ريتها كيف دارت بكلها قدامي وعدات بعيناها علياا تحكي
رفيقة :" قلي ياروحي كيفاه تحس ف روحك تو ؟ خير مش هكا "
تبسمت نحكي
انا :" انا مليحة خالتي.. وين كنت ووين صبحت الحمدلله "
حطت يداها على خدي تحكي
رفيقة :" الحمدالله ياربي.. حتى وجهك خير من اخر مرة ريتك فيهاا.. ورجعتي ربيتي صحتك تو وين تهنيت عليك "
ضحكت نحكي
انا :" اي تهنى.. والله المشية هاذي فادتني برشة حسيت روحي تنفست من جديد "
رفيقة :" اي احكيلي شعملتو وين مشيتو "
انا :" مشينا لبرشة بلايص.. كان ترا يا خالتي باريس محلاهاا.. كل بلاصة تنسيك ف الي قبلها.. شهر عديناه واحنا كل يوم ف بلاصة.. ليث عمل كل شي بش خلاني نرتاح "
رفيقة :" يعطيه الصحة والله.. فكرتو جات ف الصلاح "
انا :" اي والله وزيد كان ترا عرفت صحابو الي غادي.. وتفاهمنا بش يجيو هوما هناا ف عطلة الشتاء "
رفيقة :" احسن ماعملت ك عرفتهم.. اي اعمل أصحاب وأخرج وعيش شبابك يزيك من حسرة الدار "
انا :" اي عندك حق "
جبدت تاليفوني من ساكي وقربتلها نحكي
انا :" استنى خليني نوريك التصاور الي عملناهم "
قربتلي هي زادة وبقات تشوف معاياا.. ريتها كيف ضحكت تحكي
رفيقة :" محلاكم هناا.. انشالله نراكم ديما فرحانين هكا وتضحكو انت وليث تستحقو هذا "
انا :" انشالله.. المرة هاذي حاسة انو حياتنا تحسنت اكثر خالتي وبعدنا عالمشاكل لكل "
رفيقة :" مشاكل شنوة زادة؟"
انا :" مش ليث طرد فريحة "
حلت عيناها فيا تحكي
رفيقة :" تحكي بجدك؟"
انا :" اي هو قلي هكا "
رفيقة :" والله تستاهل مالا.. هي جابتها لروحها بعد اخر عملة.. ارتحتو منها وحدة حقودية "
انا :" اي والله حاسة روحي حمل وانزاح علياا.. تهنيت كيف هي خرجت من حياتنا "
رفيقة :" اهم شي تو نحبك ترجع كيف قبل وخير وتلهى براجلك ماترجعش تعاود صنعتك قمر "
هزيتلها براسي اي نحكي
انا :" اي خالتي تهنى والله "
هزيت راسي على صوت خالتي فاطمة كيف دخلت.. ريتها كيف قدمت حطت الصينية قدامي تحكي
فاطمة :" هاذي الكيك الي تحبها انت بزهرك عملتها لبارح "
تبسمت نحكي
انا :" يعطيك الصحة يا خالتي.. حتى انا توحشتك وتوحشت ماكلتك "
فاطمة :" صحة لبنتي "
ريتها كيف كلمت كلامها وبش تخرج..وقفت من بلاصتي نحكي
انا :" دقيقة خالتي "
قربت للهدايا وعطيتها هديتها نحكي
انا :" هاذم ليك خالتي انت وعم محسن.. وهاذم للايمن وملوكة.. نخاف كان نروح ومانراهوش "
فاطمة :" عيشلي بنتي.. علاش تتعب ف روحك هكا "
قربت بستها من خدها نحكي
انا :" مفماش تعب خالتي.. صحة وفرحة ليكم "
فاطمة :" عيش بنتي ربي يعطيك على قد قلبك "
تبسمت ورجعت قعدت حذا خالتي.. ضحكت كيف ريت كرم قربلي شوي بالمشاي.. طبست هزيتو ف حملتي وبستو من خدو نحكي
انا :" كبرت ياروحي انت ووليت تمشي شوي.. كرم صار راجل هو "
رفيقة :" اهوكا عامل بعمايلو صار هايج شوي "
ضحكت نحكي
انا :" هذاكا خاطر توحشني.. هاني رجعت وبش يرجع يسمع كلامي "
رجعت غزرتلو وشديتو من يديه الصغرونين نحكي
انا :" ف بالك انت زادة خذيتلك هدية محلاهاا.. نلعبو بيها مع بعضناا "
تبسمت كيف ريتو ضحك على كلامي وبقى يلاغي فياا ويلعب بيديه..رجعتو للمشاي وقمت من بلاصتي وكملت خذيت بقية الهدايا.. تلفتت لخالتي نحكي
انا :" خالتي هاذم ليك انت "
خذاتهم من يدي ورجعت قعدت حذاهاا.. غزرتلي تحكي
رفيقة:" عيش بنتي ياربي.. تعيش وتجيبلي "
قربت بستها من خدها نحكي
انا :" صحة لخالتي "
ريتها كيف حلت الكيس وين شافت الفستان الي شريتهولها وقت شريت لروحي انا زادة.. غزرتلي تحكي
رفيقة :" محلاها الروبة "
انا :" بلحق عجبتك ؟"
رفيقة :" اكيد بش تعجبني مدامها منك انت.. عيش بنتي "
انا :" خرجت مع لبنات غادي للمول.. وليت خذيت فستان ليا وفستان ليك لعرس آمنة "
رفيقة :" احسن ماعملت "
تبسمت كيف ريتها رجعت تغزر للفستان.. طبست على ركايبي وين كرم وغزرتلو نحكي
انا :" هياا ايجا ياصغرون خلينا نشوفو هديتك انت "
هزيت الباكو فتحتو وجبدت السيارة.. تبسمت نحكي
انا :" هاذي ليك انت.. فك عليك من المشاي وتعلم سوق الكرهبة بش نخرجو نحوسو انا وانت وحدنا "
ضحكت كيف ريتو يضحك وماد يديه يحب يمسها جبدتو من المشاي وحطيتو ف القاعة بجنبي وبقيت نلعب معاه.. حسيت روحي عملت جو وانا نشوف كيفاه يتحرك و يلاغي بالكلام.. قعدتي مع كرم تخليني نشيخ وننسى كل شي.. تكيت بظهري عالفوتاي ف القاعة وحطيتو على حجري وبقيت نلعب معاه بالكرهبة وخالتي تغزرلنا.. مانعرفش قداه تعدا وقت واحنا هكا مرة نلعب مع كرم مرة نحكي مع خالتي.. هزيت راسي على صوت امنة كيف دخلت تحكي
آمنة:" قميرة الحمدلله على سلامتك "
هزيت كرم وقمت قربتلها فيسع بستها نحكي
انا :" امونتي وينك يا طفلة شحالك "
آمنة:" هاني الحمدلله.. بكري طلبت امي قتلي راك رجعت وليت سيبت كل شي من يدي وجيت بش نشوفك.. توحشتك برشة "
رجعت بستها من خدها نحكي
انا :" والله كان ترا انا قداش توحشتك "
ريتها كيف قربت من خالتي سلمت عليهاا.. وقفت خالتي تحكي
رفيقة :" اعطيني كرم خليني نمشي نرضعو وانتوما ابقاو على راحتكم احكيو شوي "
حطيت كرم ف حضنها نحكي
انا :" باهي خالتي "
قعدت عالفوتاي وبجنبي آمنة بعد ماخالتي خرجت.. تلفتت على صوتها تحكي
آمنة:" اي احكيلي على فرنسا و جو فرنسا "
انا :" ههه والله فرنسا تهبل.. عديت ايامات يهبلو غادي "
ضيقت عينياها فيا تحكي
آمنة :" مالا عاودتو شهر العسل غاديكا يا وحيدة ؟"
ضحكت نحكي
انا :" اي تنجم تقول هكا "
آمنة :" صحة صحة.. حتى هي مدينة العشاق.. تمشي غادي حبك يتجدد مرة اخرى "
انا :" مبلدك "
آمنة:" اي احكيلي بالتفصيل وين مشيتو وشنوة عملتو "
انا :" تو نحكيلك..اما فكرني قداش بقا للعرس؟"
آمنة:" اقل من اسبوع.. اربع ايام شبيك نسيت "
شديتها من يداها نحكي
انا :" والله متفكرة قريب اما بعدد مرضي نسيت دات بالتحديد مبروك "
آمنة:" عيش أختي.. شوف مالا مدامك روحت نحبك انت تمشي تختار معاياا الروبة "
انا :" وقتاه ؟"
آمنة:" غدوة "
انا :" اي نمشيو.. قلي ساعة شنوة مازللكم تحضيرات.. كان فما حاجة نعملها قلي امان "
آمنة:" لا والله حمزة لاهي بكل شي.. اصلا مانيش بش نعمل حاجة كبيرة.. قتلو لفلوس نعملو بيهم فوياج خير"
انا :" احسن ماعملتو والله.. امشيو تفرهدو مع بعضكم "
آمنة:" هههه اي ياريت نجمو نمشيو لفرانسا اما هو مشغول بش نمشيو للحمامات نتمتع شوي مع حموزتي "
ضحكت نحكي
انا :" صار انت تتربج بيه هكا ؟"
هزتلي براسها أي تحكي
أمنة :" اي رغم أنها ماتعجبوش برشة "
انا :" والله عندو لحق مسكين "
آمنة:" تي اخطاك منو.. احكيلي قلي انت شحالك تو ؟"
عديت بعينيا عليهاا نحكي
انا :" مليحة لباس.. السفرة فادتني عاللخر "
عضيت على شفايفي ورجعت نحكي
انا :" آمنة سامحني خاطر الفترة الي فاتت ماحبيتش نقابلك كيف جيتني.. والله ماقصدت شي جيست كنت تاعبة "
آمنة:" نعرف ياروحي ماعندك علاش تطلب ف السماح.. اصلا الي تعدا ننساوه.. اهم شي تو انك انت مليحة ورجعت كيف قبل وخير "
انا :" اي الحمدلله.. حاسة روحي خير.. اصلا هاني على قريب بش نرجع للفاك معاك.. نوليو نتقابلو كل يوم "
عدات بعيناها علياا وغزرتلي درا كيفاه تحكي
آمنة:" فكرتني ف الفاك.. طلع شكون سألني عليك "
عقدت بحواجبي مستغربة نحكي
انا :" رامي ؟"
آمنة:" تي اما رامي متاعك.. هذاكا مايتفكر حد فكني منو... "
قصيت علاهاا نحكي
انا :" مالا شكون ؟"
آمنةة" مهدوش "
حليت عينيا على وسعهم نحكي
انا :" علاش حتى يسأل علياا ؟"
آمنة:" والله مانعرف.. قلي ياخي ويني قمر غايبة تو اكثر من شهر..عرفت انها تاعبة شبيها.. قتلو مريضة اما مانعرفش شبيها بالضبط "
انا :" اي شقلك؟"
آمنة؛" والله حسيتو ماصدقنيش برشة.. قلي قلها انشالله لباس.. وتحاول ترجع كان تحب تنجح "
عوجت شفايفي نحكي
انا :" افف منو.. مانعرفش علاش باقي وراياا المنظر هذا.. والله بش نرجع بالسيف لا نحب نرا خليقتو "
آمنة:" شيهمك فيه.. ارجع وتلهى بقرايتك العام قريب يوفى..وهو طفيه "
انا :" اي هذاكا شبش نعمل "
آمنة:" اي اقلب علينا سيرتو.. انا نكرهو مانحبش نحكي عليه "
ضحكت نحكي
انا :" هههه كان ترا انا "
آمنة:" هياا وريني وين مشيتو وشنوة عملتو.. احكيلي عالشهر بالتفصيل.. وقلي امورك انت وليث سافا "
فركت يديا في بعضهم نحكي
انا :" اي سافا.. استنى خليني نوريك التصاور "
خذيت التاليفون من بجنبي وقربتلها بقيت نوري فيها ف التصاور ونحكيو كل مرة ف حاجة.. فرد وقت بقيت نخمم ف رجوعي للفاك.. موضوع مهدي حسيتو رجع قلقني كل مانتفكر شصار اخر مرة نحس روحي نخاف منو..
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
