#ليس_ذنبي ❤️‍🔥

حلقة 127

#قمر_تحكي

تكيت بظهري عالفرش وخذيت تاليفوني الي كان بجنبي.. حليت اخر تصويرة عملتهاا مع ليث وبقيت نغزرلو وين استرجعت كل نهار عشتو مع ليث.. معاه هو كهو وين رجعت حسيت بمعنى الدنيا وذقت طعم الفرحة الي بلحق.. مانيش عارفة كيفاه بش نتحمل بعدو علياا بالطريقة هاذي.. طفيت ضو الفايوز بجنبي وتكيت وفرد وقت مازلت نغزر لتصويرة اما الليلة حاسة روحي غمضت عينيا و انا مرتاحة شوي اول مارجعت تفكرت كلام المحامي
#فلاش_باك
قعدت بجنب خالتي وغزرت للعمي كيف سالو يحكي
مصطفى:" استاذ عادل فما خبر جديد ؟"
عادل :" اي.. نجمت ناخذ اذن زيارة بش تقابلو مسيو ليث "
تبسمت من غير مانشعر اول ماسمعت كلامو.. شديت يدي خالتي وكبست عليهاا نحكي
انا :" ب..بلحق ؟؟ و..وقتاه؟"
عادل :" غدوة مع 13 "
حطيت يدي على قلبي الي دق بالقوي من الفرحه الي حسيتها اني بش نراه بعد المدة هاذي لكل.. حسيت بدني رعش وماعرفتش شنوة نقول بقيت كان نتخيل ف ليث قدامي.. تلفتت للمحامي يحكي
عادل :" و زادة بش تكون زيارة مباشرة.. يعني تنجمو تشوفوه وجه لوجه مش من البلار و التاليفون "
ضحكت مع دمعتي الي نزلت من الخبر هذا وين لقيت روحي ندعي انو نهار غدوة يجي فيسع.. تلفتت لعمي يحكي
مصطفى:" هذا احلى خبر.. يعطيك الصحة استاذ عادل "
عادل :" ماعملت شي هاذي خدمتي.. كيما حبيت نطمنكم اني قدمت مطلب الاستئناف انشاالله بعد اسبوعين نقلكم شصار "
تنهدت بالقوي اول ماسمعت كلامو الي خلاني نحس بخيبة مرة اخرى.. كيفاه بش نصبر للاسبوعين مش عارفة.. عديت بيديا على وجهي نحكي
انا :" و..و من هناا للاسبوعين بش نزيد نرا ليث غير نهار غدوا؟"
عادل :" اي اكيد.. بش تصير عندكم نهارين ف الاسبوع زيارة ليه "
هزيتلو براسي باهي من غير حتى كلمة.. بقيت نغزرلهم كيفاه يحكيو وانا تفكيري لكل مع ليث.. حبيت ننسى كل ف اللحظة هاذي ونخمم كان ف غدوة..
#باك_اند
رجعت حليت عينيا على ضو الشمس الي ضرب فياا.. هزيت روحي وغزرت للوقت.. مانعرفش لبارح كيفاه رقدت.. قمت فيسع خذيت دبشي ودخلت لسال دوبان بش نحضر روحي.. عملت دوش خفيف وريقلت اموري.. لبست حوايجي وخرجت بسرعة جبدت ساك صغيرة وبقيت نحضر ف حوايج لليث بش نهزهم معايا ليه..اول ماكملت نزلت وين شفت عمي وخالتي قاعدين يفطرو.. قدمت بخطواتي ناحيتهم نحكي
انا :" صباح الخير "
هزو رؤوسهم معاياا وتبسمولي يحكيو
" صباح الخير "
جبدت الكرسي قعدت معاهم..غزرت للخالتي كيف حطت فنجان قهوة قدامي تحكي
رفيقة :" ايا افطر نحبك ليوم تكمل فطورك ماتعملش كيما الايامات الي فاتو "
عديت بعينيا عليهاا نحكي
انا :" خالتي والله ماعيني... "
قص عليا عمي يحكي
مصطفى :" اسمع كلام خالتك.. لازمك تاكل شوف وجهك كيفاه تاعب.. اصلا خمم ف ليث الي بش يراك ليوم ماتخليهوش يتحير عليك "
كبست على فنجان قهوة وغزرت لعمي نحكي
انا :" وقتاه بش نمشيو عمي ؟"
مصطفي:" كمل فطورك ونخرجو بش نخلطو بكري خاطر فما إجراءات تتحضر قبل "
هزيتلو براسي باهي من غير حتى كلمة وطبست راسي ناكل.. بقيت نغصب على روحي على خاطر ليث كيما قال عمي مانحبوش يبقى متحير.. اول ماكملت غزرت لعمي وخالتي نحكي
انا :" الحمدالله شبعت..نطلع نجيب ساك الي حضرتهاا لليث ونمشيو بش مانخلطوش مخر عمي "
تبسملي يحكي
مصطفى:" باهي بنتي برا جيب ساكك وتو نخرجو تو "
انا :" عيشك عمي ربي يخليك لياا "
طلعت فيسع للبيت حطيت بطاقتي ف الساك وخذيت الجيلي متاعي لبستها وخرجت فيسع وين شفت عمي وخالتي واقفين يستناو فياا.. خرجت معاهم وانا قلبي يدق بالقوي كان لقيت راي طرت وكنت حذا ليث.. طلعت ف الكرهبة وشدينا الثنية ليه وين حسيت روحي تخنقت من فكرة اني بش نزورو ف السجن.. فركت يديا ف بعضهم وانا نغزر للطريق وسارحة كالعاده حسيت الثنية طوالت عاللخر.. غصة شدتني ف حلقي اول ما الكرهبة وقفت وشفت السجن قدامي.. للحظة هاذي مانيش مصدقة انو ليث هنا واني انا جيت بش نزورو.. شديت دمعتي بالسيف ونزلت مع عمي وانا نرعش..ريت عمي كيف حكى مع العون ودخلناا.. غزرت لعمي يحكي
مصطفى:" خليكم هناا انا بش نمشي مع استاذ عادل ونكملو الإجراءات بش قمر تدخل وحدها وقبلنا "
تبسمت بالسيف نحكي
انا :" عيشك عمي "
طبطب على زندي ومشى.. بقيت واقفة مع خالتي ساكتة نسمع فيها كيفاه تحكي معايا وتهدي فيا وانا مانجمتش نجاوبهاا.. تلفتت لعمي والمحامي الي قدمو ناحيتي غزرت للمحامي يحكي
عادل :" مدام قمر بش تخلي ساكك وساك الي حضرتهاا لمسيو ليث عند العون وتاليفونك زادة وتدخل للبيت هذيكاا.. بش يكون معاكم عون على جنب للحراسة.. ومدة الزيارة بش تكون 15دق "
حليت عينيا على وسعهم نحكي
انا :" 15دق كهو ؟ مانجمش اكثر امان ؟ شوي هكا "
هزلي براسو لا يحكي
عادل :" صدقني ماتنجمش.. ممنوع اكثر من 15دق "
خذيت نفس طويل حاولت نشد دموعي وهزيتلو براسي باهي من غير حتى كلمة.. تبعت العون الي جاء وعطيتو كل شي.. حل الباب قدامي يحكي
العون :" تفضل هنا "
قدمت بخطواتي لداخل وغزرت للعون الي كان واقف على جنب.. عديت بعينيا عالبيت الي كانت ظلمة شوي وفارغة فيها كان طاولة وزوز كراسي.. جبدت الكرسي  قعدت نستنى فيه يدخل ونشوفو.. عديت بيديا الزوز على وجهي حاولت نهدي روحي وانظم دقات قلبي الي بقات تضرب.. تلفتت بسرعة اول ماسمعت صوت الباب  وراياا تحل.. قمت من بلاصتي وتبسمت من غير ما نشعر اول ماريتو قدامي.. عديت بعينيا وبقيت واقفة نغزرلو كاني مش مصدقة الي ليث قدامي تو.. فقت من سرحتي على صوتو الي اخترق قلبي قبل مسمعي يحكي
ليث :" قمرتي "
لحظتهاا جريت ناحيتو وعنقتو بالقوي.. حشيت راسي ف صدرو وخذيت نفس طويل من ريحتو الي فقدتهاا.. غمضت عينيا وطرشقت بالبكاء اول ماحسيت بيديه دارت علياا ولزني ليه بالقوي.. بقيت نبكي على علو صوتي ونلز ف روحي ليه اكثر كاني حبيت ندخل بين ضلوعو.. باسني من راسي يحكي
ليث :" قمرتي يزي من لبكا ياروحي.. اغزرلي خليني نشوفك "
جبدت روحي منو شوي وهزيت راسي معاه نحكي
انا :" ل..ليث.. ت..توحشتك برشة... "
غصة شدتني من لبكا خلاتني مانجمش نكمل كلامي.. مسحلي دموعي يحكي
ليث:" حتى انا توحشتك يا روحي.. ايجا خليناا نقعدو ونحكيو اما يزي من لبكاا تعرفني مانحبش نرا دموعك "
شدني من يدي وقدمنا ناحية الطاولة.. جبد الكرسي وخلاني نقعد.. قعد هو قدامي وشدني من يدي باسني من كفها يحكي
ليث :" شحالك قمر ؟"
عديت بعينيا عليه ودمعة نزلت مني نحكي
انا :" م..مانيش مليحة ليث.. غيابك تعبني برشة والله.. الدنيا كلها خايبة من غيرك "
تنهد بالشوي يحكي
ليث :" قمر اغزرلي نحب مرتي قوية صدقني ازمة وبش تتعدا.. ماتخلينيش متحير عليك عيش روحي "
انا :" انت مليح مش هكا ؟ ياخي ماكش قاعد تاكل كانك ضعفت ليث ؟ قلي مرتاح ف نومك و البلاصة الي انت فيهاا كيفاه "
كبس على يدي يحكي
ليث :" اشش بالشوي قمر.. اانا مليح صدقني وك ريتك تو صرت مليح اكثر.. انا قاعد ناكل ونرقد زادة مانحبكش تخمم علياا "
انا :" ليث انا كان مانخممش عليك انت على شكون بش نخمم.. انت ف تفكيري ف كل لحظة ماتغيبش على بالي جملا.. ايامات عديتهم على نار حتى جيت وريتك ليوم "
ليث :" صدقني وراس روحي انا مليح.. حتى انا كيفك بقيت نستنى وقتاه نراك بش نشبع عينيا بيك.. قلي شعاملة ف قرايتك ؟"
انا :" لباس.. تو فترة امتحانات قاعدة نعدي "
ليث :" وسافا عديت ؟'
انا :" اي سافا.. مش انت ديما تقلي نحبك تقرا بش نكون فخور بيك انا ماشية بكلامك انت "
مسحلي دمعتي الي نزلت يحكي
ليث :" صحيت هكا نحبك وانا ديما فخور بيك قمر.. قلي مفما حد يقلق فيك ف الفاك ؟"
هزيتلو براسي لا نحكي
انا :" لا لا مفما حد.. اصلا عمي يوصلني ويروح بيا "
ليث :" اي خير هكا نكون مطمن اكثر "
انا :" اي ماتخافش علياا..المهم انا جبتلك حوايج نضاف و خالتي بعثتلك ماكلة زادة.. امان ليث كول مليح واستحفظ على صحتك وروحك "
تبسم يحكي
ليث :'حاضر ياروحي "
شديتو من يديه وبستو منها نحكي
انا :" نحبك برشة ليث.. نموت عليك "
غمض عينيه بالقوي ورجع حلهم غزرلي درا كيفاه يحكي
ليث :" حتى انا نموت عليك "
شهقت بالقوي نحكي
انا :" انت بش ترجعلي مش هكا ؟"
عدا بعينيه عليا وهزلي براسو اي يحكي
ليث :" نوعدك بش نرجعلك "
طرشقت بالبكا اكثر نحكي
انا :" وانا بش نستناك.. بش نستناك للاخر لحظة ونفس ف حياتي ليث "
حسيتو قلبي وجعني من نظرتو الي غزرلي بيهاا وبقى ساكت.. مسحت دموعي نحكي
انا :" المحامي تو بش يدخلك هو قدم مطلب الاستئناف.. وبقدرة ربي انت بش تخرج ليث ف المحاكمة الجاية.. انا حاسة هكا.. الحق بش يظهر قدام الناس لكل وانت بش تخرج من هناا "
دوب تبسم يحكي
ليث :" انشالله قمر انشالله.. انت ديما ادعيلي "
انا :" والله ديما ندعي ومتأكدة ربي بش يقبل مني خاطر انت باهي ليث وعمرك ماضريت حد.. "
قص علياا صوت العون يحكي
العون :" الزيارة وفات "
هزيت براسي لا برشة مرات ودموعي نزلو.. ريت ليث كيف وقف وقرب ناحيتي.. شدني من وجهي  باسني من جبيني يحكي
ليث :" قمرتي.. اسمعني مليح نحبك ترد بالك على روحك وتركز ف قرايتك وتحقق حلمتك.. نحبك تهنيني عليك وتبقى تحت عينين عمي ورفيقة.. ونحبك تعرف زادة اني عمري ماحبيت غيرك و نوعدك بش يجي نهار ونرجعلك المهم يزي من البكا هذاا خاطر دموعك يحرقولي ف قلبي "
بستو من كف يديه الي كان على خدي نحكي
انا :" ب..باهي نوعدك.. وانت زادة كيما وصيتك رد بالك على روحك وانا بش نرجعلك المحامي قلي بش نرجع نزورك مرة اخرى.. قلي ماتحب نطيبلك شي ونجيبهولك ؟"
ليث :" اي حاجة من يديك نحبها "
ترميت ف حضنو وعنقتو.. دور بيديه عليا وكبس علياا.. حشيت راسي ف صدرو وبقيت نتنفس من ريحتو مالقيتش القوة بش نخرج من حضنو ونبعد عليه رغم كلام العون وراياا.. بعد علياا وغزرلي درا كيفاه يحكي
ليث :" ايا امشي تو "
عديت بعينيا عليه وطلعت بستو من خدو.. دموعي نزلو اول مابعدت عليه وخرجت وين حسيت روحي تسحبت مني وبقات معاه.. وجيعة قلبي حسيتها ذبحتني.. اول ماخرجت ترميت ف حضن خالتي وبقيت نبكي على علو صوتي.. للحظة تمنيت كان بقيت معاه ومانرجعش نفارقوش.. مانيش عارفة كفاه بش نخرج من هناا ونرجع نخليه وراياا..