حلقة 75
#قمر_تحكي
بقيت مرمية في الفرش لا نجمت نقوم و نتحرك و لانجمت نغمض عينيا و نرقد .. بقيت نغزر في الفراغ هكاكا .. حسيت روحي نتخبط وحدي .. صوت صياحي كان عمال يعلى فيا من داخل .. دموعي ماحبتش تهبط بقات محصورة ف عينيا تحرق فيا .. بقيت بين كلامو الي سمعتو منو و جرحني .. و بين خوفي انو لا يكون كل شي وفا بلحق كيف ما قال .. فكرة اني معادش بش نشوفو و لا نسمع صوتو وجعتلي قلبي و قسمتو طروف طروف .. يمكن اكثر حاجة وجعتني الطريقة الي وفات بيها علاقتنا .. حتى الشوفة معادش يحب يشوف وجهي .. يمكن هاذي اصح طريقة .. هذا الي كان لازم يصير .. رغم اني كنت نستنى في النهار هذا و محضرة روحي ليه .. اما لقيت قلبي عندو راي اخر .. لقيتو غرق في حبو و ماينجمش ينساه .. ما ينجمش يبعد عليه و ننزعو منو .. يا ريت بقينا حتى صحاب .. كنت راضية باي حاجة منو .. المهم نره و نشبع بيه حتى من بعيد كنت راضية .. راضية خاطر نعرف انو حاجة اخرى مستحيل كان بش تصير .. حطيت يدي على فمي بش مانسمعش صوت شهقاتي و صوت بكايا .. مانحبش نضعف لدرجة هاذي .. حبو الي تملكني خلاني نعرف نوع جديد من لعذاب .. كيفاه عملت هكا في روحي .. حاولت نقوم و انسي روحي شوي .. مسحت دموعي الي هبطو و خذيت نفس .. لازمني نتعود على هذا الكل .. ليث مش ليا و انا مش ليه .. هاذي الحقيقة الثابتة .. هذا الي لازمني نصدقو و نامن بيه .. اما لكلام الي بقيت حاصرتو بقاا يخنق فياا .. كان لازمني نخرجو و نحكي مع اي انسان بالك نرتاح .. جات في بالي طبيبتي .. هزيت روحي لميت شعري و هبطت في الدروج بالسياسة .. ماحبيتوش يراني .. هكاكا و عرضتني خالتي تحكي " صباح الخير بنتي " عقدت حواجبها و قربتلي تحكي " شبيه وجهك هكاا ؟"
حسيت بالغصة مكنت في حلقي من سوالها هزيت براسي لا نحكي " شي خالتي شي "
جبدتني من يدي و دخلتني للكوجينة سكرت الباب و قربتلي مسحت على خدي تحكي " شنوة شي ؟ احكيلي شبيك .. علاش كل مرة و انت في الحالة هاذي يا قمر ؟ مش كل شي وفا .. علاش قاعدة تقتل في روحك ؟؟'
ترميت عالكرسي نحكي " انا مت من الليلة هاذيكا .. وكل مرة نحب نفرح ونحلم بعيشة كيف الناس الكل .. نرجع نفيق من الحلمة هاذي على كابوس اخر "
قعدت بجنبي و حطت يداها فوق يدي تحكي " مش صحيح انت لي تحب تبقى عايشة هكااا.. شوف الحاجات لي دايرين بيك و افرح "
تبسمت على جنب نحكي " كيف فرحت وخذيت حقي لي ستنيتو برشا .. جا يحيى ودمر كلشي ... وانا لبارح ببهامتي كملت كل شي ياخالتي.. ليث ماحبش يسامحني.. قلي سايي كلشي وفا .. وبش يخرج من حياتي .. حتى صحاب مناش بش .. بش نكونو" حطيت يدي على فمي و طرشقت نبكي .. دخلتني في حضنها تحكي " يزي.. هو مغشش وكهو و تو يبرد "
حشيت راسي في صدرها نحكي " ل.. لا انت مشفتوش.. ا.. انا خسرتو ديما هكا يصير معايا كل مرة بش نخسر حد ..تعبت "
بقات تعدي في يداها على ظهري و تحكي " باهي بنتي اهدى... انا بش نكلم ليث "
بعدت علاها و قصيت على كلامها نحكي " لاا خالتي مانحبكش تكلمو .. هو حر يعمل لي يحب .. غير نحبك تحكي معاه خاطر نحب نمشي للطبيبة الموعد متاعي لمفروض لبارح ومامشيتش .. قاتلي ايجاني بعد المحكمة .. وهو قالي س.. ساقك معادش تحطها برا .. كان انت تمشي معايا .. بالكشي يخليني نمشي "
تنهدت تحكي " باهي يا بنتي .. اما امتى تتعلم ما تصححش راسك هاك جبتها لروحك .. قوم تو اغسل وجهك وافطر من البارح ما كليت شي.. ومنيش بش نقبل اعذارك هيا "
هزيتلها براسي باهي وقمت بش نمشي لتوالات .. اول ما خرجت قابلني في الصالة واقف يحكي في التاليفون وهي وقفة بجنبو .. بقيت نغزرلهم من بعيد .. نزل التلفون وغزرلها يضحك و يحكي معاها منعرفش شقالها ... شفتها كيف ضحكت ليه هي زادة .. حسيت بغصة كيف شفتهم هكا مع بعضهم .. ياريتو سمعني بالكشي بقينا صحاب حتى احناا ... اما يمكن هو زادة فد مني ومن مشاكلي.. اصلا عندو حق .. كان انا تعبت مالا هو كيفاش ... دورت وجهي و بعدت علاهم .. دخلت لتوالات غسلت وجهي برشة مرات .. دموعي ماحبتش تكف .. بقيت نبل في وجهي بش يتخلطو مع الماء .. مانحبش نرا حتى دمعة .. خاطر ماعنديش لحق اني نبكي عليه .. خذيت نفس و خرجت .. رجعت شفتو يحكي مع خالتي مقدرتش نقدم .. بقيت واقفة بعيد نسمع فيهم يحكيو
" باهي رفيقة اما متمشو لحتى بلاصة "
" لا اتهنى ولدي"
" باهي انا بش نوصل فريحة للسبيطار امها فاقت .. وبعد ما تخرج بش نوصلهم لدارهم انتوما ارجعو بعد ما تكملو حتى عم مصطفى جاي "
" صار مصطفى جاي... مقليش "
" ايه انا استدعيتو نحب نحكي معاه .. ونوصيه عليكم .. الاسبوع الجاي لازمني نرجع نسافر "
قلبي خض مع الكلمة .. حطيت يدي على صدري و يدي لخرا شديت بيها عالحيط .. حاولت نتنفس اما مانجمتش .. مقدرتش نسمع اكثر من هكااا .. طلعت لبيتي نجري .. سكرت الباب تكيت عليه و طرشقت بالبكااا .. للدرجة هاذي هو مزروب بش يتخلص مني .. لدرجة هاذي مش طايقني .. كان يستنى في الغلطة مني بش يهرب .. ديما كنت نحس روحي حمل ثقيل عليه .. اما ماتصورتش لهدرجة .. لحظتها ضحكت على روحي .. شكنت نسخايل هو عمل معاك الواجب وكهو
.. انا البوهالية الي خليت مخي يسرح لبعيد .. انا الي غلطت .. و سمحت لروحي نحس حاجات مش من حقي .. بقيت عايشة في الاوهام و التخيلات وحدي ..
مسحت دموعي كيف سمعت صوت خالتي من وراء الباب تحكي " قمر حضر روحك انا هاني في بيتي نلبس وبعد نخرجو "
هزيت روحي نكركر في ساقيا بالسيف .. خذيت حوايجي و دخلت لبيت لبانو .. دخلت في وسط الدوش و سيبت الماء فوقي .. حسيت روحي تاعبة علخر طرف القوة الي بقاتلي وفات كيف سمعت لي بش يرجع يسافر ... لخبر هذا استنزفني .. ك
لشي وفا .. ومرة اخرى انا خسرت شخص حبيتو ... و المرة هاذي الوجيعة حسيتها اضعاف و أقوى من كل مرة .. فقت من سرحتي على قلبي الي خظ بالقوي .. حسيت بحاجة بش تصير .. هزيت راسي بقيت نستحلى في الماء الي هابط فوقي .. اصلا مفما شي ينجم يصير اكثر من الي صاار البارح و اليوم ..
#يحيى_يحكي
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
