الحلقة 33
ريان يحكي
الفترة هاذي الي تعدات حسيت انو الدنيا عطاتني فرصة اخرى .. قرار ليث على قد ما استغربتو على قد ما حسيتو كان في صالحي .. رغم اني كنت مستعد نتحمل مسؤوليتي الكاملة و نخلص حق اغلاطي .. بعد الي صاار قررت اني نحاول ننسى و نتجاوز اما الكابوس الي نرا فيه كل ليلة مانعني .. صوتها و عيناها الي بقاو ورايا كل مانغمض عينيا يخليوني نرجع من الصفر منين بدات لحكاية .. الايامات هاذم حاولت اني نعيش في كذبة .. نوهم روحي انو حياتي رجعت كيف قبل .. بش نبدا من جديد مع فريحة و ننسا كل شي معاهااا ..
هزيت راسي وتبسمت على يداها الي دورتهم على كرشي و حاوطتني تحكي " ماتتصورش قداه توحشتك .. الفترة الي تعدات حسيتك بعدت علياا ياسر رياان "
دورتلها و عنقتها نحكي " حتى انا توحشتك فريحة .. الفترة الي تعدات كانت صعيبة عليا شوي اما صدقني بش نعوضك يا روحي "
بعدت عليا شوي طلعت راسها غزرتلي تحكي " نعرف يا روحي .. اما للحظة خفت لاتكون معادش تحبني خليتني عايشة في الخوف "
طبست علاها بوستها بوسة خفيفة من شفايفها نحكي
" سامحني فريحة .. سامحني على كل شي يا روحي..."
تبسمتلي تحكي " مسامحتك حبيبي .. و هيا نخرجو كان تشوفنا امك .. و هز الكيسان معااك "
تبسمتلها و هزيتلها براسي باهي .. خرجنا و قعدنا عالطاولة .. بقيت نغزر لأمي و فريحة الي قاعدين قدامي .. للحظة قلبي وجعني كيفاه كنت ناوي نفرط فيهم .. كيفاه كنت بش نوجعلهم قلبهم و نخسرهم.. تو وين تاكدت انو يمكن بلحق الدنيا عطاتني فرصة بش نعوض كل شي عملتو معاهم هوما .. هزيت راسي على صوت امي تحكي " فريحة بنتي تفاهمتو عالعرس وقتاه ؟"
" أي خالتي .. كان سهل ربي في الشتاء .. مش هكا ريان ؟"
تبسمتلها و شديتها من يداها بوستها نحكي " اي هكا يا روحي .. غير نكمل نحضر مشروعي الجديد مبقالوش برشة و نعرسو .. و نبعدو من هناا .."
غزرت لأمي الي تتكلم " انشالله ربي يهنيكم .. فرحتكم هي فرحتي يا روحي "
" عيشك امي .. ربي يخليك لينا و ان.."
قص عليا صوت الباب الي دق قمت من بلاصتي و قدمت بخطواتي ناحيتو .. اول ما حليتو عقدت بحواجبي مستغرب من الاعوان الي واقفين قدامي .. بلعت ريقي نحكي " تفضل .. كيفاه انجم نعاونكم "
" انت السيد رياان لغربي ؟؟"
خذيت نفس نحكي " ا.. أي انا .. تفضل "
" لازم تتفضل معانا .. بش ناخذو ايفادتك بناء على طلب من السيد وكيل الجمهورية "
دورت راسي لفريحة الي قدمتلي تجري تحكي " رياان ... شفما هناا ؟؟ شنوة صاير ؟؟"
للحظة حسيت لكلام هرب عليا مانجمتش نجاوبها اصلا مالقيتش شنوة نقول.. حسيت برعشة سرات في بدني من الخوف اول ماتفكرت شنوة انا عملت و كان نتكششف قدام فريحة ..
" قمر بن منصور رافعة دعوى ضدك .. لازمك تتفضل معايا "
اول ماسمعت اسمها حسيت يدني ترهوج و الدنيا دارت بياا .. غمضت عينيا و شديت في الباب بالقوي محاولة مني بش مانطيحش .. شدتني فريحة و غزرتلي تحكي " ريان شكون قمر ؟؟ و علاه شاكية بيك ؟؟؟ ريان تكلم ؟؟" مانجمتش نجاوبها صوتها حسيتو بعيييد عليااا .. حسيت الدنيا الكل وقفت بقات تخض فيا و تحكي و تسأل و انا عاجز حتى بش نجاوبها و نطمنها حتى بالكذب ..
" تفضل معانا سي رياان "
هزيتلو براسي باهي من غير مانزيد حتى كلمة .. تلفت غزرت لعيناها الي كانو مزغللين بالدموع الي زادو في وجيعة قلبي نحكي " ف.. فريحة يا روحي.. انت خليك هنااا .. امي أمانة عندك .. و انا بش نحاول نرجعلكم "
شديتلها راسها من تالي و قربتها ليا بوستها من جبينها بالقوي .. بعدت عليا تحكي " لااا ريان .. مستحيل نخليك بش نمشي معاااك .. امان قلي شفماا .. ماخلينيش وراك هكا مش فاهمة شي "
لحظتها هبطو دموعي على حالتها و الرعشة الي في صوتها نحكي "ماتخافش .. نوعدك نرجعلك .. غير انت سامحني فريحة.. نحبببك برشة نحبك قد الدنيااا الكل و عمري لا حبيت حد كيف ما حبيتك "
" رياان ماتخوفنيش اماان "
مسحت دموعي على صوت العون الي يحكي " تفضل معانا سي ريااان "
هزيتلو براسي باهي و قدمت معاه بزربة حاولت اني نبعد و نهرب من صوت فريحة و بكاها .. لول ماطلعت في الكرهبة معاهم شيعت عينيا علاها كيفاه كانت تجري ناحيت الكرهبة و تبكي .. غمضت عينيا و تكيت راسي لتالي و انا خايف من الي يستنى فياا .. خايف من الحكاية الي مشى في بالي وفاات اما رجعت و تحلت من جديد و المرة هاذي قدام فريحة .. ماكنتش حاضر للي صاار .. الي صاار قدامها كان كافي بش يهدني .. مواجهتها بحقيقة عملتي كافية انها تنهيني .. خسارتها هي خسارة روحي و حياتي .. فقت من سرحتي عالكرهبة الي وقفت قدام المحكمة .. هبطت بخطوات رزينة بدني مش مطاوعني اني نتحرك .. هزيت راسي و اول ما ريت كرهبة سي محمود حسيت الدم جمد في عروقي .. عرفت انو حتى ايهم هنااا .. و انو لحكاية بدات من جديد و رجعنا لنقطة البداية .. قدمت معاهم لداخل .. تلفتت للعون الي يحكي
" استنى هناا .. شوي و تدخل "
هزيتلو براسي باهي و غزرت لسي محمود الي قدم ناحيتي هو و راجل .. وقف قدامي بش يحكي اما انا سبقتو نحكي " سي محمود شصاير هناا ؟ شفماا بالضبط ؟؟ "
" ليث و قمر رفعو دعوي ضدكم .. ايهم لداخل تو قاعدين ياخذو في ايفدتو من جديد .. و انت زادة بش تدخل .. ريااان رد بالك تقول حاجة تغرقك و لا تغرق ولدي .. هاني انبه علييك.. خمم في الناس الي وراك قبل ماتخمم في روحك "
تكيت عالحيط حسيت بغصة في حلقي تقويتزعلى روحي نحكي " ش.. شنوة بش نقول .. حاسس روحي خايف و مانعرفش شنعمل "
" ماتخافش .. هذا سي أيوب المحامي هو بش يفهمك شنوة تحكي بالضبط .. و هو بش يتصرف بش يخرجكم من هنااا .. المهم انت ش
د روحك و ماتبين شي فهمتني ؟؟"
هزيتلو براسي باهي غزرت للمحامي الي قدملي و بقى يفسرلي شنوة بش نحكي بالضبط بقيت نسمع فيه اما مخي كان بعيد ياااسر .. حاسس اني فمتاهة و قاعد نضيع ماكنتش حاضر لهذا الكل .. بعدت عليه و قدمت بخطواتي ناحية الباب الي تحل و العون الي عيطلي بش ندخل .. هزيت روحي نكركر في ساقيا بسيف .. اول ما دخلت حسيت النفس تقطع عليا .. قعدت قدام وكيل الجمهورية نسمع فيه يحكي
" سي ريان الغربي .. انت هنا بناء على الشكوى الي تقدمت ضدك من المدعوة قمر بن منصور .. الي تتهمك فيها انها تعرضت لعملية اغتصاب من قيبلك انت و صديقك ايهم بن سعيد .. شنوة ردك عالاتهام هذا ؟"
خذيت نفس و على يديا الزوز نحكي " هذا الكل افتراء .. انا اول مرة نسمعو الاسم هذااا و اصلا انا و ايهم ماتقبلناش برشة من نهار الي جاء فيه ريتو مرتين كهو "
قص عليا يحكي " نهار 28 افريل انت و سي ايهم عرضتو الانسة قمر في السانية ** و اعتديتو علاهاا صحيح هذااا ؟؟"
كان عندي صوت لداخل يقلي احكي و قول لحقيقة .. انت وصلت لنهاية و ماعندكش مهرب .. احكي كل شي بالك ترتاح و كابوس كل ليلة يبعد عليك و يرحمك .. اما كان فما صوت أقوى منو يقلي خمم في امك و في فريحة.. خمم في شنوة ينجم يصيرلهم و شنوة ينجمو عيلة بن سعيد يعملوه فيهم ..
عديت بلساني على شفايفي حاولت نبين قوتي و ثباتي.. حاولت نبين عكس الي نحس فيه هزيت براسي لاا برشة مرات نحكي " لااا .. مش صحيح .. كيف ماقتلك انا اسم قمر اول مرة نسمعو .. و الي تحكي فيه ماصارش منو .. هذا الكل افتراء منهاا هي و سي ليث "
" و علاه بش يتهموك التهمة هاذي .. منين يعرفوك ؟"
" اجابة السوال هذا ماعنديش .. انا زادة باهت كيفاه اسمي تجبد في حكاية كيف من هاذي من عند ناس مانعرفهمش "
غزرلي من غير ما يجاوبني تلفت يحكي
" أكتب .. بناءا على ادعاء قمر بحق السيد ريان الغربي و بعد الادلاء بشهادته .. اتخذت القرار بتوقيف المدعي عليه الي ان يتم تحديد موعد الجلسة الاولى "
كلامو بقا يتعاود مرة و ثنين في وذنيا ماصدقتش الي سمعتو .. هزيت روحي ووقفت مع العون الي قدملي بش يهزني معاه .. اول ماخرجت ريت فريحة وامي الي قدمو ناحيتي يبكيو .. بكاهم حسيتو كيف الجمرة حرقتني في قلبي .. قربت من فريحة عنقتني و تبكي صوت شهقتها قسمتلي قلبي طروف طروف .. كبست فيا تحكي " وين بش يهزووك ؟ ماتخلينيش امااان .. قلي شفمااا .. احكيلي اماان "
كبست علاها بيديا الزوز اكثر نحكي " ماتخافش يا روحي بش نرجعلك .. و رد بالك تسلم فيااا .. خلي في بالك الي انا نحبك و عمري لا قصدت نبكيك .. دموعك غالين عليااا و ما يهونش عليااا نراهم "
بعدت عليا بقيت نغزر لوجهها لحمر و عيناها المدمعين.. شفايفها الي كانو يرعشو تحكي " قلي شكون قمر ؟؟ و علاه عملت هكا ؟ انت شعملتلها "
بقيت نغزرلها و ساكت مالقيتش حتى اجابة و مانجمتش نكذب علاها و انا نغزر في عيناها .. حسيت روحي تنفست مع صوت العون الي يحكي " لازم تتفضل معانا سي ريان " شدني من يدي دورت وجهي علاها و هربت عينيا منها و بقيت نمشي معاه من غير حتى كلمة .. ماشي لثنية مش عارف اخرتها شنوة .. كل شي عاود تهد من جديد و الفرصة الي كنت فرحان باها .. كانت مجرد هدنة عالنار الي بش تلهب من جديد ..
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
