#ريان_يحكي
الحكم الي صدر في حقي اللحظة هاذي رتحني .. خلاني عذاب الضمير الي عشتو شهور يوفى .. عمري الي بش يتعدا وراء القضبان ما يجي شي قدم الي انا خسرتو .. غزرت فريحة الي ريتها و هي تشهد ضدي ذبحتني .. صوتها الي كان يرعش و دمعتها خلاوني نرمي كل شي وراياا و نخمم كان اني نخلص الي عملتو فيها و في قمر ..
اول ما خرجت من القاعة .. ريت غزرتهم ليااا .. غزرت ناس ناقميين .. اما انا مش خايف .. يمكن تو وين ارتحت .. تو وين تنفست .. كان لازم الحق يظهر .. تو ولا مبعد .. و انا اخترت تو .. لكلام الي كنت كاتمو خنقني .. كان لازمني نخرجو و نتحرر ..
اول ما خرجت من المحكمة .. خذيت نفس طويييل.. كان لازم نستغل الفرصة و نملي رواريا بهواء نظيف .. قبل ما نتحبس في زنزانة و نتحرم من النفس و النور ..طلعت في الكرهبة مع الاعواان و شدينا ثنية الحبس لكبير .. ثنيية كاملة و انا مخي بين فريحة و امي .. نخمم في شنوة يستنى فيهم من وراء قراري هذاا .. حسيت الخوف سيطر علياا .. اما هذا مخلانيش نندم .. بالعكس كيف ما انا كان لازمني نتحاسب .. هو زادة كان لازمو يتحاسب ..
اول ما وصلت شدوني الاعوان و دخلنا للحبس .. المرة هاذي انا في بيت اخرى مش مع ايهم .. يمكن هذا احسن قرار .. كل واحد في بيت .. كل واحد يتحاسب وحدو .. من غير ما نلومو بعضنا و لا نحاسبو بعضنا .. يكفي عذاب السنين الي نعيشوه هناا .. مش ناقص هم و حمل اخر وفق ظهري .. اول مادخلت للبيت .. وراوني فرشي .. قدمت ناحيتو و ترميت عليه .. غمضت عينيا حبيت نرتاح شوي .. اما لقيت الجلسة بقات كيف الشريط يتعاود قدامي .. حليت عينيا على صوت العون الي نادى باسمي " ريان غربي .. زيارة "
هزيت روحي ووقفت .. ماعرفتش شكون الي جاني الوقت هذا بعد الجلسة بسوايع .. خرجت مع العون و قدمت معاه للبيت الخاصة .. تبسمت على جنب كيف عرفت شكون زارني .. مصبرش عليااا ..
اول ما تخل الباب ريتو قاعد .. كان يتهز و يتحط من الغش .. وجهو احمر و عروقو بش تطرشق .. قدمتلو.. بعدت الكرسي و قعدت قدامو .. تكيت بظهري عالكرسي و ضيقت عينيا فيه نحكي " شنوة ؟ فيسع توحشتني؟ "
ضرب بيديه عالطاولة و حل عينيه فيا يحكي " *** شنوة الي عملتو انت ؟؟ هذا الي تفاهمنا فيه ؟"
بقيت نغزرلو كيفاه مغشش و يصيح وحدو .. حكيت على جبيني نحكي " و احنا تفاهمنا على حاجة؟؟"
" ***** علياا سيادتك ؟ مش قتلك لكلام الي لازمك تقولو ؟ انت شنوة عملت ؟ شنوة الي خممت فيه ؟؟"
قمت لطاولة و ربعت يدي.. حطيت عينيا فعينيه نحكي " نقلك الي خممت فيه .. خممت اني ما نكونش كبش فيداء .. انت قتلي استعرف بعملتك و انا استعرفت اما بعملتنااا .. ايهم معاياا .. احنا الزوز اغتصبناها "
تبسم على جنب يحكي "و الظاهر نسيت لكلام الي قلتهولك مع لكلام هذا ؟"
هزيتلو براسي لا نحكي " لاااا ما نسيتش.. اما انا خممت في الحالات الكل انا خاسر .. فريحة و خسرتها كيف شهدت ضدي و بش نطلقها... و امي في الحالات الكل بش تتبرأ مني .. يعني علاه انا خاسر و نزيد نهزها وحدي.. ياسر عليااا هكااا .. لازم سي ايهم يذوق كيفي مش هكا سي ايوب "
" في بالك هكا انت ربحت و لويتلي يدي ؟؟ انا نبهت عليك وقتها .. قتلك خمم في امك و فريحة .. مساكن الي عملتو انت تو هوما بش يخلصوه .. بش تعيش بذنبهم سي ريان "
" انا اصلا عايش بالذنب .. و قاعد نخلص في حقو .. خسراتي الجايه ماتجي شي قدام خسراتي تو .. العب كيف ما تحب سي ايوب .. انا شهادتي مش ناوي نبدلها .. على جثتي كان هذا يصير "
ضيق عينيه فيا يحكي " باهي و كيف نقلك على جثة امك ؟؟ شتعمل ؟؟"
كبست عالبونية متاعي من لعصب الي مكني من كلامو .. رسيت على سنيا بالقوي نحكي " رد بالك تخمم تقربلهااا و لا تمسهااا .. ماتكونش نذل ايوب .. العب معايا انا مش امي "
" انت بين أربع حيوط .. لعبي معاك بش يكون ماسط.. انا نحب نلعب لبرااا و امك هي لبرااا " كمل كلامو و غمزني الشي الي خلاني نقوم من بلاصتي و نشدو من سوريتو .. قربت وجهي لوجهو نحكي " خمم برك انك تمسها.. ووقتها رقبة ايهم بش تبقى تحت يدي لعمر الكل .. انت العب و انا نلعب .. كان امي تصيرلها حاجة .. ايهم مش بش يخرج و انا مانبدل حتى كلمة .. يعني موت امي مش بش يبدل شي .. بالعكس بش يخليني ننقم اكثر .. و ريت نخرجشي بعد 20 سنة موتك بش تكون على يدي "
حط يدو فوق يدي ونطرها .. دزني يحكي " مازلنا بش نتقابلو برشة سي ريان .. و حسابك مازال معايااا .. ماذبيك ترجع تخمم و تتراجع عالي عملتو مدامنا في الأول "
هزيت بحاجبي نحكي " شي ماهو بش يتبدل .. انا و ايهم بش نخلصو الي عملناه .. اما اني نهزها وحدي تمضمض "
كملت كلامي و اعطيتو بظهري.. دقيت عالباب بالقوي .. حلي العون و خرجت للشمبر متاعي .. صحيح كلام ايوب خوفني .. اما ماهوش بش يخليني نتراجع .. تو نحاول نلقى حل كيفاه نحمي امي و نبعدها على ايوب .. اما ني نهزها وحدي و نكون انا كبش فيداء ليهم .. هذا مستحيل كان يصير .. كيف ما اما بش نخلص ايهم زادة لازمو يخلص
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
