حلقة 87
#قمر_تحكي
نهارين تعداو من اخر مرة ريتو فيهاا .. نهارين عديتهم ف الدار .. لا خرجت و لا رجعت للفاك .. حبيت نهرب شوي من اسئلة امنة و رامي الي عارفتهم مش بش يوفاو .. وفرد وقت هاربة منو هو .. خايفة لا يرجع و نراه من جديد ..معادش حاملة شوفتو و لا نسمع منو كلمة .. يا ريتو بقى بعييد و مارجعش .. ساعة انا تعودت على غيابو .. اما هو مصر كل مرة يرجع و يشتتني ..
الامتحانات قربت و كان لازمني نرجع للفاك .. مش وقتو هذا بش نبقى هاربة ومتخبية .. قمت حضرت روحي وهزيت ساكي و خرجت .. لقيت امنة واقفة تستنى فياا .. قربت منهاا نحكي
انا:" صباح الخير "
امنة :" صباح النور .. شحالك قمر "
انا :" مليحة عيش اختى .. خلينا نمشيو معادش وقت "
طلعنا في الكرهبة و شدينا ثنية الفاك .. هكاكا و سمعت تاليفوني كيف نوقز .. جبدتو من الساك لقيت ميساج من زكرياا .. حليتو وبقيت نقرأ فيه
" صباح النور قمر .. حبيت نطمن عليك .. قلي خممت ف كلامي ورجعت للفاك ؟"
تبسمت على كلامو وجاوبتو
" صباح الخير زكرياا .. اي انا ف الثنية للفاك .. عيشك خاطر وقفت معاياا النهارين هاذم و سمعتني .. و سامحني خاطر ماركزتش معاك ف الدروس "
شوي وقت و رجعلي على ميساجي ..
" ف اي وقت تلقاني معاك .. احنا صرنا صحاب ماتنساش هذا .. و الدروس تو يتعوضو .. اصلا انا على قريب بش نكون حذاك و نحضر معاك ف الدروس .. استناني وقتها بلحق نحبك تركز معاياا و تفهمني كل شي "
ضحكت على كلامو و بقيت نحكي معاه ..
" غير انت صحتك ترجع لباس و انا حاضرة بش نفهمك كل شي .. انا وصلت للفاك نحكيو بعد .. باي "
سكرت التاليفون وخبيتو في الساك و هبطت من الكرهبة .. اول ما دخلت عرضني رامي واقف مع صحابو .. قرب ناحيتي ووقف قدامي يحكي
رامي:" ميسالش نعرف وينك النهارين هاذم ؟ حتى على تاليفون ماتهزش "
انا :" كنت متقلقة شوي رامي على هذاكاا "
رامي :" خذيت ف خاطرك مني كيف سألتك على ليث ؟"
انا:" رامي امان خلينا مانرجعوش للموضوع هذاكا .. بلحق نتقلق منو امان "
رامي :" باهي .. باهي .. أيا شقولك تجي معاياا و نعرفك على صحابي "
انا :" مش كنت ترا فياا معقدة ؟ تو تحبني نعرف صحابك ؟"
رامي:" قمر سامحني على كلامي نهارتهاا صدقني ماقصدتش الكلمة "
انا :" ماصار شي .. خلينا نمشيو حذاهم "
تبسملي وهزلي براسو باهي .. قدمنا ناحيتهم و بقيت واقفة معاهم ساكتة .. هزيت راسي على صوت طفلة الي كانت معانا تحكي
" قمر حتى انت نحبك تحضر الليلة "
غزرت لرامي و رجعت غزرتلها مستغربة نحكي
انا :" وين بش نحضر؟"
" الليلة عيد ميلادي و رامي بش يحضر .. نحبك تجي معاه "
انا :" مانعرفش لحق .. يعني مش عارفة كان انجم نحضر .. "
قص عليا رامي كيف غزرلها يحكي " ماتخافش قمر بش تحضر معاياا .. استناوناا "
كمل كلامو و شدني من مرفقي و بعدنا علاهم .. غزرلي يحكي
رامي " شنوة حكينا قمر .. مش قتلك لازمك تخرج و تبدل الجو .. تي جرد عيد ميلاد لازم تخمم عليه ؟"
انا :" رامي انا صحابك مانعرفهمش بش نحضر لحفلاتهم .. وزيد قتلك جوكم مش جوي "
رامي:" صحابي شيهمك فيهم .. هاك معاياا انا و امنة .. امان قمر وافق .. و لا بش نرجع نقلك معقدة و المرة هاذي نقصدهاا راو "
تبسمت على كلامو و الطريقة الي يحكي بيهاا .. غزرتلو نحكي
انا:" باهي غير اسكت "
رامي :" ههه عيشو الي يسمع لكلام "
انا :" خليني نمشي معادش وقت عالدرس .. و انشالله انت زادة تكون حاضر ف دروسك كيف الحفلات "
ضحك و مشى رجع حذا صحابو .. دخلت للكلاس و بقيت مركزة مع الأستاذة حتى تعدا الوقت .. اول ما خرجت ريت امنة كيف كانت واقفة و تستنى فياا .. قربتلي مبتسمة تحكي
امنة :" بلحق بش تحضر للحفلة ؟"
انا :" تطلعش الحفلة هاذي معمولة على خاطري و انا ما فيباليش .. كلكم فرحانين بوجودي فيهاا "
امنة :" هههه لاا اما كيف قلي رامي استغربت وفرد وقت فرحت خاطرك واخيرا حنيت على روحك و قررت تخرج "
انا :" و الله انا ماعينيش غير رامي شد صحيح "
امنة :" ك هكاا .. خلينا نمشيو و ناخذولك روبة "
انا:" من تو ؟؟"
شدتني من يدي و بقات تكركر فيا معاهاا .. بقيت نتبع فيهاا و ساكتة .. اول ما وصلنا قدام البوتيك .. دخلنا بقيت واقفة نغزر للروب و لامنة الي تدور من بقعة لبقعة و كل مرة تقيس ف روبة .. قربتلي تحكي
امنة :" تي تحرك شوي و شوف شنوة بش تاخذ "
انا :" لا انا تو نلبس من الي عندي .. مانحبش نشري "
امنة :" صدقني الي عندك مايتلبسوش لوين انت ماشية .. استنى هنااا "
بقيت واقفة نغزرلها كيفاه تقلب ف الروب حتى جبدت وحدة .. قربتلي و حطتها فوقي تحكي
امنة :" نتصور هاذي بش تخرج عليك "
خذيت الروبة من يداها و بقيت نغزرلهاا .. كانت قصيرة و عريانة بكلهاا .. اصلا مش عارفة هاذي شنوة بش تغطي بالضبط .. قحرت لامنة نحكي
انا :" شنوة هاذي ؟؟؟ شد شد مستحيل نلبس هكاا .. شوف كيفاه قصيرة و عريانة "
امنة :" صدقني كلهم يلبسو هكاا .. تو تشوفهم من بعد "
انا:" اي انا شيهمني فيهم .. كل حد حر امنة "
امنة :" امان قمر على خاطري خوذهاا .. تي البسها المرة هاذي و بعد معادش تلبسهااا .. شوف محلاها و صدقني بش تواتيييك .. و زيد البس معاها كبوط طويل باهيشي هكااا "
نفخت بالقوي و خذيتهاا من يداهاا .. عارفتها بش تبقى تحاول و مش بش تسكت .. كملنا خلصنا و خرجنا .. خليتها هي روحت و انا خذيت تاكسي و شديت الثنية للفيلا ..
اول ماوصلت لقيت خالتي قاعدة ف الفيرانداا .. قربت ناحيتها و بستها من خدها نحكي
انا :" خالتي ميسالش نحكي معاك شوي ؟"
رفيقة :" اي بنتي اقعد "
قعدت بجنبهاا و غزرتلها نحكي
انا:" خالتي.. الليلة فما عيد ميلاد طفلة تقرأ معانا و استدعاتني .. و رامي بش يمشي .. ميسالش نمشي معاه "
رفيقة :" ووين العيد ميلاد ؟"
لحظتهاا وين تفكرت اني ماسالتش على التفاصيل هاذم .. عضيت على شفايفي نحكي
انا :" اكيد ف دارهم .. رامي بش يجي يهزني و هو يروح بياا .. امان خالتي "
رفيقة :" باهي امشي مدام رامي معاك .. و ماتبطاش "
قمت من بلاصتي بستها من خدها نحكي
انا:" عيشك خالتي ربي يخليك ليااا "
طلعت فيسع لبيتي .. رميت الساك و باكو الروبة و ترميت عالفرش و جبدت تاليفوني .. حطيت رقم زكرياا و بقيت نكتب
" اهلا زكرياا .. لباس؟ الليلة انا خارجة ميسالش الدرس غدوة نعوضوه ؟"
ماتعداش برشة وقت حتى جاوبني
" اهلا قمر .. اكيييد .. قلي وين خارجة ؟ "
" الليلة عيد ميلاد صاحبتي .. لازمني نمشي على هذاكاا .. مش قتلي لازمك تخرج هاني سمعت برأيك "
" هههه هكاكا نحبك .. قلي شنوة بش تلبس ف العيد ميلاد ؟"
" قبيلا تعديت شريت روبة .. بش نلبسهاا هي .. خليني نقوم نحضر روحي و تو نرجع و نحكيو مليح .. باي "
سكرت التاليفون و دخلت لبيت البانو عملت دوش خفيف و خرجت .. مشيت حليت الباكو و جبدت الروبة .. بقيت مترددة من اني نلبسهاا .. نحيت المنشفة و لبستهاا .. اول ماكملت و غزرت لروحي ف المراياا حسيت روحي تصدمت من تصويرتي .. بدني كان بلكو عريان و كل شي ظاهر و طالع لبرا .. عديت بيديا على بدني و بقيت خايفة كان نخرج بيهااا هكااا .. خذبت نفي و قعدت قدام المراياا لميت شعري لفوق و كملت مكياجي .. لبست كبوطي و هزيت بوشاتي و خرجت .. حكيت شوي مع خالتي و خرجت لرامي الي كان واقف لبراا .. طلعت بجنبو و شدينا ثنية الحفلة .. ثنية كاملة و انا نرعش .. مش فاهمة شبيني متقلقة .. حسيت روحي ندمت خاطر سمعت كلامو .. فقت من سرحتي على صوت رامي يحكي
" وصلنا "
هزيت راسي و غزرت للبلاصة .. حسيت روحي جمدت في بلاصتي .. غزرتلهم نحكي
انا :" شنوة هذااا ؟؟ ياخي الحفلة ف بار ؟؟"
رامي :" اي .. ماتخافش هاك معايااا "
انا :" علاش ماقتليش ؟؟"
رامي :" انت ماسالتنيش "
هزيت بحاجبي و بقيت نغزرلو باهتة فيه
رامي:" أيا اهبط .. شوي و نروحو والله ماتخافش "
حسيت روحي تحطيت قدام الأمر الواقع .. هبطت معاه و انا مغزلة .. اول مادخلناا تلفت لرامي يحكي
رامي :" نحي كبوطك و حطو هناا "
انا :" لازم انحيه ؟؟"
رامي :" اي ناوية تدخل بيه لداخل ؟"
قحرتلو و نحيت الكبوط من فوقي .. شفتو كيف غزرلي و زفر يحكي
رامي :" شنوة هذاا قمر .. محلاااك "
حطيت يدي و طلعت الروبة شوي و دخلت .. بقيت ندور بعينيا عالبلاصة .. كانت ياسر مليانة و صوت لغناء قوي .. حسيت روحي حشمت من غزرت الي كانو موجودين ليااا .. لحظتهاا بلحق ندمت خاطر سمعت كلامهم .. قعدت عالطاولة مع الجماعة و بقيت نغزر ساكتة .. حليت عينيا على كيسان الشرب الي كانو قدامي .. و تصرفات لبنات و الاولاد .. ف اللحظة هاذي خممت ف كلام ليث .. يمكن هو عندو الحق .. الشي هذاا مش متاعي .. و الناس هاذم مش من طبقتي .. مستحيل كان نرتاح ف الجو هذاا و لا نصير هكا .. بش تكون هاذي آخر مرة
فقت من سرحتي على صوت رامي يحكي
رامي :" قمر قوم نشطحو "
انا :" مانحبش خليني "
شدني من يدي وقومني يحكي
رامي " تي مرة وحدة وافق على حاجة فيسع "
وقفت معاه نغزلو كيفاه يشطح و مش واعي بشي .. حكيت على جبيني من العصب .. هكاكا و نحس بيد تحطت فوقي و جبدتني بالقوي و بقات تكركر فيااا .....
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
