#ليس_ذنبي ❤️‍🔥

حلقة119

#قمر_تحكي
نهارين تعداو علينا من وقت جينا لباريس.. نهارين حسيت فيهم براحة وفرحة.. تصرفات ليث معاياا خلاوني نرتاح ونطمن اكثر.. معاه نجمت نتجاوز الحالة الي كنت فيهاا شوي.. حطيت المشط فوق لكوافوز وغزرت لروحي ف المراياا.. عديت بعينيا على وجهي فرق كبير كيفاه كنت وكيفاه صرت.. رجعت شعري لتالي وقمت هزيت تاليفوني وخرجت من البيت.. عديت بعينيا عالدار وين شفتو مقابلني ف الكوجينة يشرب ف قهوتو.. قدمت بخطواتي ناحيتو نحكي
انا :" بونجور ياروحي "
حط الفنجان وهز راسو معايااا.. تبسملي يحكي
ليث :" بونجور.. صحة النوم "
قربت بستو من خدو وجبدت الكرسي.. قعدت بجنبو نحكي
انا :" يعطيك الصحة.. علاش مافيقتنيش معاك ؟"
قربلي كاسة العصير قدامي يحكي
ليث :" حبيتك ترتاح شوي"
هزيت كاسة العصير شربت منها شوي ورجعتها عالطاولة نحكي
انا :" شنوة بش نعملو ليوم ؟"
عدا بعينيه عليا يحكي
ليث:" بش نكملو فطور تو ونخرجو.. ساعة انا وعدتك بش نهزك لديزني.. ليوم بش نمشيو "
تبسمت نحكي
انا :" بلحق؟؟"
هزلي براسو اي وقرصني من خدي يحكي
ليث:" اي بلحق.. بش نهز صغرونتي تلعب شوي "
ضحكت نحكي
انا :" ههه عيشك ياروحي.. حتى انا شاهية نمشي نشوفو ونلعب شوي "
ليث:" مالا كمل فطورك مدام انا قمت كملت حضرت روحي "
هزيتلو براسي باهي وطبست راسي ناكل.. حسيت روحي فرحت عاللخر اني ماشية لديزني.. خاطر هي اكثر بلاصة متشوقة بش نراها ف باريس.. فقت من سرحتي على صوت ليث وراياا يحكي
ليث :" هياا كملت ؟"
حطيت الفنجان من يدي وهزيتلو براسي اي نحكي
انا :" اي جيست نلم الطاولة و نمشيو "
ليث :" باهي فيسع "
قمت من بلاصتي فيسع وهزيت الفناجن بقيت نلم ف الطاولة حتى كملت.. غسلت يدي وغزرت لليث الي كان قاعد عالطاولة يستنى فياا.. قربتلو شوي نحكي
انا :" كملت خلينا نمشيو "
غزرلي على جنب يحكي
ليث:" الحمدالله عليك.. تعدا النهار واحنا مازلنا ف الدار "
تبسمت نحكي
انا :" يزي عاد ليث.. هاني كملت "
مشيت فيسع هزيت ساكي وخلطت عليه.. شديتو من يديه وخرجنا.. خذيت نفس من النسمة الي ضربتني ولعبت بشعراتي وبقيت نتمشى مع ليث.. ريتو كيف وقف وغزرلي يحكي
ليث :" ايجا خلينا ناخذو ماكرون قبل.. المحل هذا مشهور بيه لازمك تذوقو "
هزيتلو براسي باهي وكبست على يديه.. دخلت معاه لمحل الحلويات وقدمنا وين الفترينا.. عديت بعينيا على أنواع الحلويات الي كانت عندهم واغلبهم الماكرون.. تلفتت لليث يحكي
ليث :" اختار شنوة المذاق الي تحبو "
عضيت على شفايفي ورجعت غزرت.. نحكي
انا :" ميسالش ناخذ مذاق الشوكولا و الفستق زادة "
ليث :" اكيد ياروحي "
ريتو كيف عطا الطلبية للعاملة.. شوي وقت وعطاتنا علبة صغيرة فيها 6 قطع.. عطهالي وخرجنا من المحل يحكي
ليث :" ذوق اكيد بش تعجبك "
فتحت العلبة وخذيت وحدة بطعم الشكلاطة.. غمضت عينيا ورجعت حليتهم وانا نتطعم ف بنتها كانت ياسر بنينة تذوب ف الفم.. عديت بلساني على شفايفي نحكي
انا :' بلحق ياسر بنينة.. عجبتني اكثر من لي كليناهم ف المقهى اكا نهار "
ليث :" اي هاذم مشهورين بيهم.. قتلك بش يعجبوك "
خذيت قطعة وقربتلو اكثر.. هزيت يدي نحكي
انا :" ذوق انت تراه "
ضيق عينيه فيا يحكي
ليث :' مالا انت بش تذوقني ؟"
هزيتلو براسي اي نحكي
انا :" اي نحبك تاكل من يدي انا "
عدا بعينيه عليا وغزرلي بخبث يحكي
ليث :" والله انا مذابياا ناكل من بلاصة أخرى غير يديك"
تبسمت من غير مانشعر نحكي
انا :" يزي من بلادتك ليث.. رانا ف الشارع "
تنهد بلقاوي يحكي
ليث :" رجعنا لحكاية الشارع... باهي وكلني واسكت "
طلعت شوي على طراطيش صوابعي وحطيتو القطعة ف فمو.. هز بحاجبو يحكي
ليث:"مزلت عند رايي.. بش تكون ابن من شفايفك "
ضحكت وقربتلو بقينا نتمشاو وفرد وقت ناكل.. شوي وقت ووصلنا قدام ديزني.. حليت عينيا على وسعهم اول مادخلنا وشفت المنظر الي كان قدامي.. عبارة على قصر كبيير كانو من فيلم خيالي.. عديت بعينيا عالالعاب والعروض الي كانو موجودين.. تلفتت على صوت ليث يحكي
ليث :" بشنوة تحب تبدأ تلعب ؟"
هزيت بكتافي وتبسمت نحكي
انا :" مانعرفش.. كل شي محلاه هناا ليث.. نحب نشوف لبلاصة لكل ميسالش ؟"
ليث :" اي اكيد.. باهي شرايك نقصو تذاكر كل اللعاب الي هناا.. نحبك تجربهم لكل "
انا :" اي ميسالش "
قصينا التذاكر لكل وقربنا وين الألعاب.. ريتو كيف اشرلي على قطار يحكي.. خلينا نبداو بهذا.. هزيت راسي وغزرتلو نحكي
انا :" لا ليث خلينا نشوفو لعبة اخرى.. هاذي ظاهرة تخوف "
شدني من يدي وقربلي يحكي
ليث:" تو انت تخاف من كل شي "
اتا:" باهي نطلعو فيها اما اقعد حذاياا "
ضحك يحكي
ليث :" ههه باهي تهنى "
ريتو كيف قدم وعطا التذاكر.. قلبي ضرب بقوة اول ماطلعت ف القطار الي كان ف السكة العالية.. ربطت لحزام ف وسطي وشديت ف يد ليث الي قعد حذاياا.. طبست راسي ورجعت هزيتو فيسع مانجمتش نغزر تحتي من كثر ماهي عالية.. غمضت عينيا بالقوي و رجعت حليتهم اول ماتحركت اللعبة حسيت قلبي شوي وياقف من السرعة متاعهاا.. مانعرفش كيفاه نزلت بظوافري على يد ليث من الخوف.. ضميت على شفايفي كيف سمعتو يحكي
ليث :" قمر حل عينيك وماتخافش "
غزرتلو غلى جنب نحكي
انا :"ياسر تجري ليث.. حاسة روحي بش نطيح.. خايفة "
غزلت عليه كيف سمعتو ضحك يحكي
ليث :" ماتطيحش ماتخافش "
حليت عينيا على وسعهم اول ماالقطار دخل ف بلاصة ظلمة و كلها زجاج كانو بحر مليئ بالاسماك.. للحظة نسيت شوي خوفي وبقيت سارحة مع المنظر الي كان قدامي.. لبلاصة كانت كاني تحت لبحر.. بقيت شادة ف يد ليث ونغزر للبلاصة حاولت نهدي روحي ونتحكم ف خوفي شوي.. مانعرفش قداه من لفة عملها القطار حتى وقفنا.. اول مانزلت شديت ف مرفق ليث نحكي
انا :" والله راسي دار بياا.. اخر مرة نسمع كلامك ونطلع معاك ف لعبة كيف هاذي "
هز بحاجبو يحكي
ليث :" ساعة انا حبيت نجربو اللعبة الثانية مع بعضنا "
انا :" الي هي شنوة ؟"
اشرلي بيديه يحكي
ليث :" هذيكا "
حليت عينيا على وسعهم وغزرتلو بالوقت نحكي
انا :" تفدلك ليث ؟ اهيكا بيت رعب هذيكا.. مستحيل ندخللها ولا نلعب فيها "
غزرلي على جنب يحكي
ليث :" والله هاذم هوما العاب لكبار حبي.. لازمك تجربهم "
انا :" لا والله نخاف.. خلينا نشوفو حاجة اخرى أخف "
ضحك يحكي
ليث :" باهي خلينا نطلعو ف العجلة هاذي ماتخوفش برشة "
انا :" اي ميسالش "
شديتو من يديه وقصينا وين العجلة.. طلعنا مع بعضنا وقعدنا.. قربتلو اكثر وين هو دور بيديه عليا وجبدني عندو باسني من راسي يحكي
ليث :" زايد معرسة بطفلة صغيرة وزيد خوافة "
ضحكت نحكي
انا :" الله غالب لازمك تتحملني حبي "
عدا بصوابعو على شعري وغزرلي ف عينيا من غير حتى كلمة..تبسمت اول ماحسيت بالعجلة صارت تدور.. بقيت نغزر للسماء كل ماتطلع الفوق.. حسيت روحي عملت جو باللعبة هاذي لدرجة اني ماحسيتش بالوقت كيفاه تعدا.. اول ما نزلنا بقينا ندورو شوي وين شفنا عرض كان مقابل.. عديت بعينيا عليهم نشوف فيه كان عبارة على عرض استعراضي على اميرات ديزني.. شديت ليث من يديه نحكي
انا :" خلينا نتفرجو شوي "
هزلي براسو باهي وقربنا نتفرجو حتى لين كمل العرض.. اول مابعدنا شوي لمحت بائع قدامي.. هزيت يدي واشرت لليث نحكي
انا :" ليث نحب هذيكاا "
هز راسو وغزر للي يبيع غزل البنات.. تبسم يحكي
ليث :' باهي ايجا تو ناخولك "
قربت معاه فيسع وين هو طلب منو يحضرلي وحدة.. بقيت نغزرلها كيفاه تدور ونستنى فيها تكمل بش ناكل.. ريحتها كانت تشهي عاللخر.. ضحكت اول ماعطهالي الراجل.. دوب خذيت طرف منها وغزرت لليث يحكي
ليث :" اعطيني نذوق شوي "
تبسمت وهزيت يدي ف بالي بش ياكل من عندي.. ريتو كيف خذاه من يدي وبقى ياكل من غير ما يرجعلي.. عوجت شفايفي نحكي
انا :" مش قلت بش تذوق "
هز بحاجبو يحكي
ليث :"اي هاني نذوق "
انا :" لا انت قاعد تاكل.. رجعلي متاعي "
ليث:" نزيد شوي كهو.. عجبتني ياسر بنينة "
عديت بعينيا عليه كيفاه رجع ياكل فيهاا.. حسيت روحي بش نبكي كيف ريتو قريب يكملها.. نحكي
انا :" ياا ليث هاك كملتها.. علاش هكاا ساعة انا اشتهيتها حرام عليك "
تبسم على جنب وغزرلي درا كيفاه يحكي
ليث :" حتى انا اشتهيتها حبي.. ميسالش تو نخليلك شوي "
ربعت يديا نحكي
انا :" معادش عيني.. كولها وحدك "
دور بيديه عليا وجبدني عندو يحكي
ليث:" بلحق طلعت فر-خة.. تو بش تبكي على شوية حلوة "
عوجت شفايفي نحكي
انا:" اي خاطرك فكيتها مني..علاش مشريتش ليك كي هكا "
ضحك يحكي
ليث :" تو هكا ف عوض تقلي صحة تقوم تتغشش"
عضيت على شفايفي نحكي
انا:" اي هو صحة وعافية اما حتى انا حبيت ناكل منها وانت ماذوقتنيش اصلا "
قرصني من خشمي وضحك يحكي
ليث :" باهي ايجا هاني بش نعوضلك "
انا :" بلحق ؟"
ليث :" مالا بش نخلي حبي بشهوتها.. حبيت نتبولد عليك وانت كالعادة كل شي يجد عليك "
ضحكت نحكي
انا :" ههه لا عرفتك تتبولد "
ليث :"اي صدقتك.. شوي وكنت بش تبكيلي هناا "
شدني من يدي وقدمنا وين الراجل مرة اخرى.. ريتو كيف طلب وحدة اكبر من الي خذيتها الأولى.. خذاها من الراجل وعطهالي يحكي
ليث :" تفضل يا بكاية "
خذيتها من يديه وكليت منها شوي نحكي
انا:"مابنهاا.. عشيك "
تبسم على جنب وهز يديه مسحلي شوي من خشمي الي توسخ يحكي
ليث :" صحة "
شدني من يدي وبقينا نتمشاو.. ريتو كيف سيبني وقدم لراجل الي كان على جنب.. بقى يحكي معاه شوي ورجعلي يحكي
ليث :" خلينا ناخذو تصويرة هناا "
ريت الراجل الي كان ياخذ صور فورية قربلنا.. قربت من ليث الي دور بيديه عليا وجبدني عندو.. وقفنا قدام القصر لكبير و شديت ف ليث خذينا زوز تصاور.. ريتو كيف بعد عليا خلص الراجل ورجعلي ف يديه زوز تصاور.. خذيتهم يديه وعديت بعينيا عليهم نحكي
انا :" محلاناا.. حبيتهم التصاور..هاذم بش يبقاو ديما عندي التصاور.. بش نخليهم ف البورتفوي متاعي "
ضحك يحكي
ليث:" صار تو وين تفكرت تخبي صورتي.. هاني طلعت نحبك اكثر و عندي تصويرة متاعك ديما معاياا "
هزيت بحاجبي نحكي
انا :" بلحق انت حاطط تصويرتي عندك ؟"
هزلي براسو اي يحكي
ليث :" اكيد..شكون عندي غيرك"
انا :" وانا نحبك والله..عندي تصوريتك فتاليفوني وقت نتوحشك نغزرلها "
ليث:"حمد الله لي طلعت متفكرتني"
انا :"بزي ليث عااد..هاني بش نحط هاذي"
ليث:"باهي ..غير متشقهاش وقت تتغشش "
ضحكت وقربت حضنتو نحكي
انا :" هأه منشقهاش..اصلا كل شي عطيتهولي مخبيتو البراسلي والعروسة حتى وقت طلقنا خبيتهم..غير العروسة معادش رقدتها بجنبي خاطر تغششت منك ومعادش نحب نراها "
ريتو كيف ضحك وعدا بيدو على شعرو يحكي
ليث:"صاار وانا نقول كيفاه كبرت ومعادش ترقدها بجنبها..مالا مليح لي صار هكاك وبعدتها من جنبك..كان تو راني نرقد فالصالة"
ضحكت وضربتو على صدرو نحكي
انا:"مبلدك والله"
ضحك وشدني من يدي يحكي
ليث:"ايا ايجا ..مزالو برشة حاجات مريناهمش"
هزيتلو براسي باهي ورجعنا نتمشاو.. الدنيا بدأت تظلام شوي وين الاضواء ظهرت اكثر..وقفنا على جنب و بقينا نغزرو الالعاب النارية الي ظهرت ف السماء.. قربت لليث حطيت راسي على صدرو وبقيت نغزرلهم حسيت روحي تفرهدت عاللخر ليوم وماحسيتش بالنهار كيفاه تعدا هكا..