#ليث_يحكي
خذيت نفس حاولت نهدي بيه روحي شوي وحليت الباب دخلت حذاها.. هزيت راسي نغزرلها كيفاه محشية في الغطاء تبكي.. عديت بيديا على وجهي وسكرت الباب وراياا وقدمت بخطواتي ناحيتها.. حشات راسهاا ف المخدة تبكي اول ماقعدت بجنبها.. حطيت يدي على شعرها نمسح علاهاا نحكي
انا :" قمر ياروحي هز راسك واغزرلي "
غمضت عينيا بالقوي و رجعت حليتهم على صوت شهقتها الي علات.. تنهدت بالشوي ورجعت نحكي
انا :" قمر يزي من لبكا امان واسمعني.. صدقني لكلام الي سمعتو مفماش منو.. انا مستحيل نهزك لحتى بلاصة ونبعدك علياا "
بعدت الملحفة شوي على وجهها ودوب غزرتلي بعيناها لمدمعين تحكي
قمر :" س..سيبني.. انت قاعد تكذب علياا..علاش ب بش تهزني غادي "
حطيت يدي على خدها ومسحتلها دمعتها نحكي
انا :" ياروحي صدقني مانيش نكذب.. مفماش منها لحكاية انت بش تبقى هناا بجنبي انا ورفيقة وكرم "
عدات بعيناها علياا من غير حتى كلمة ورجعت حشات راسها ف المخدة.. بعدت الملحفة من فوقها نحكي
انا :" أيا شرايك كان تقوم تغسل حالتك وتبدل ثيابك مدام جبتلك عشاك "
هزتلي براسها لا تحكي
قمر :" ما..مانحبش.. نحب نبقى و..وحدي.. خليني وحدي "
انا :" اما انت لازمك تتعشى بش تشرب دواك "
تلفتت لشيرة لخرى وهزت الملحفة غطات وجهها من غير ماتجاوبني.. بقيت نغزرلها مانيش عارف كيفاه بش نتصرف معاهاا.. تنهدت بالشوي وقمت من حذاهاا وخرجت.. نزلت تحت وعديت بعينيا عالدار وين شفت رفيقة ف الكوجينة.. قدمت بخطواتي ناحيتهاا جبدت الكرسي وقعدت قدامهاا.. هزت راسها معاياا تحكي
رفيقة :" شحالها تو ؟"
خذيت كاسة الماء شربت منها شوي ورجعتها عالطاولة نحكي
انا :" كيف ماخليتها.. ماحبتش تحكي معاياا ولا تغزرلي.. مصدقة كلام لخرى "
رفيقة :" مانيش عارفة كيفاه فريحة عملت هكاكا.. والله استغربت من تصرفها "
رسيت على سنيا بالقوي من لعصب الي حسيتو كيف تفكرتهاا.. خذيت نفس طويل حاولت نهدي روحي نحكي
انا :" رفيقة انا ليلة بش نبات هناا.. مانجمش نروح ونخليهاا "
هزتلي براسها أي تحكي
رفيقة :" اي ولدي.. اصلا خليك الفترة هاذي هنا حذانا.. ماتغيبش على مرتك "
انا :" باهي "
رفيقة :" خليني نظلع نحضرلك غرفتك و اطلع ارتاح شوي "
هزيتلها براسي باهي من غير حتى كلمة.. ريتها كيف وقفت من حذاياا وطلعت للبيت.. تكيت بظهري لتالي وكبست بيديا على رقبتي بلحق حسيت روحي تهديت ومخي تحرق من التخمام.. وقفت على صوت رفيقة وراياا تحكي
رفيقة :"ليث ولدي هاني حضرتلك الغرفة الي بجنب غرفة قمر.. برا ارتاح "
تلفتتلها نحكي
انا :" عيشك رفيقة.. أيا تصبح بخير "
رفيقة :" انت بخير "
طلعت نكركر ف ساقياا بالسيف للبيت.. اول مادخلت سكرت الباب وراياا ونحيت دبشي.. مزية بقاو شوي حوايجي هناا خاطر ماكنتش انجم نروح.. دخلت لسال دوبان نحيت بقية دبشي ودخلت تحت الدوش استندت بيديا عالحيط بقيت نستحلى ف الماء البارد فوقي وفرد وقت نخمم ف شنوة بش نعمل تو.. غير دمي الي بقى مفور من عملت السا-قطة لخرى الي زادت تعبتها.. سكرت السبالة وخرجت من الدوش لفيت روحي بالمنشفة ورجعت للبيت.. غيرت ثيابي فيسع وترميت عالفرش.. بقيت سارح من حكاية لحكاية حتى غفيت من غير ما نحس....
رجعت حليت عينيا على ضو الشمس الي سطع فياا.. مانعرفش كيفاه رقدت لبارح من كثرة التعب.. هزيت روحي شوي وكبست بيديا على راسي من لوجيعة الي حسيتها.. بعدت الملحفة من فوقي وقمت دخلت لسال دوبان غسلت حالتي وريقلت اموري ورجعت للبيت.. غيرت ثيابي وخرجت.. اول ماخرجت عديت بعينيا عل بابا غرفتها لي خلاني نقدم بخطواتي ناحيتهاا فتحتو ودخلت وين شفتها مازالت راقدة.. قربتلها شوي غطيتها مليح وطبست بستها من راسها.. للحظة حبيت نبقى بجنبها ومانخليهاش لين تفيق ونرجع نحكي معاها رغم اني عارف انها بش ترفض على هذاكا بش نخليهاا ترتاح ليوم بعد الي عاشتو لبارح.. خرجت من حذاها ونزلت تحت وين شفت رفيقة وعمي يفطرو.. قدمت بخطواتي ناحيتهم نحكي
انا :" صباح الخير "
هزو رؤوسهم معاياا وغزرلي عمي يحكي
مصطفى:" صباح النور ولدي "
رفيقة :" صباح الخير.. ايجا اقعد خليني نحطلك تفطر "
هزيتلها براسي لا نحكي
انا :" لا عيشك رفيقة.. لازمني نخرج عندي خدمة.. اما مانوصيكش على قمر.. حاول معاهاا بش تفطر امان "
رفيقة:"تهنى ولدي قمر ف عينيا "
تبسمت نحكي
انا :" عيشك.. نخلكيم تو صحة ليكم "
مصطفى:" ربي معاك ولدي "
تبسمت وعطيتهم بظهري خرجت.. طلعت ف كرهبتي فيسع وشديت ثنية البيرو.. كان لازمني نكمل الخدمة الي عندي فيسع ونرجع حذاهاا.. مانحبش نغيب عليها برشة.. مسافة الطريق ووصلت راكيت الكرهبة على جنب ونزلت.. دمي فور اول مادخلت ولمحت خليقتهاا قدامي.. كبست عالبونية متاعي حاولت نسيطر على عصابي ودخلت طول لبيروياا من غير مانسمع صوتها.. سكرت الباب وراياا ونحيت الفاست متاعي علقتها وقدمت للمكتب ترميت عالكرسي وحطيت الملف قدامي نشوف فيه..هكاكا وسمعت صوت الباب كيف تفتح وصوت خطواتها قاعدة تقربلي.. ماهزيتش راسي معاهاا ولا حبيت نغزر لمنظرهاا..كبست عالقلم ف يدي اول ماسمعت صوتها تحكي
فريحة:" ل..ليث ن..نحب نحكي معاك عالبارح انا.... "
هزيت راسي معاها وحليت عينيا فيهاا.. قصيت علاهاا نحكي
انا :" اخرج "
#فريحة_تحكي
تهزيت وتحطيت عالباب الي لطخو ف وجهي..بقيت جامدة ف بلاصتي مانجمتش نتحرك.. قلبي بقى يضرب بقوة شوي ويخرج من بلاصتو.. مش مصدقة الي عملو ليث فياا.. دمعتي هبطت بالوقت اول ماتفكرت كلامو وغزرتو وكيفاه طردني.. هزيت يدي وكبست على مرفقي الي بقى يوجع من كبسة يديه وين دموعي نزلو اكثر.. كركرت ساقياا بالسيف ناحية بيروياا واستندت بيديا عليه نرد ف النفس وفرد وقت بقيت نخمم شنعمل تو كيفاه بش نخرج من هناا ومعادش نرجع ونشوفو.. فكرة خسارتي لليث خلاتني نحس بخنقة ووجيعة قوية ف قلبي..مسحت دموعي وتلفتت غزرت لبيروه.. مش انا الي بش نخسر ونخليه يبعد علياا.. مستحيل كان نستسلم ونخليه ليها هي.. عديت بيديا على وجهي وخذيت نفس طويل حاولت نهدي روحي شوي وقدمت هزيت الجيلي متاعي وساكي وخرجت نجري.. غمضت عينيا بالقوي و رجعت حليتهم عالنسمة لخفيفة الي ضربتني حاولت نتمالك اعصابي ووقفت اول تاكسي عرضتني.. طلعت فيهاا وجبدت تاليفوني حطيت رقمو وطلبتو.. شوي وقت ورد عليا يحكي
أيوب:" فروحة ؟"
انا :" وينك تو ؟"
أيوب:" شفما ؟؟"
رسيت على سنيا بالقوي نحكي
انا :" قتلك انت وين ؟؟"
أيوب:" ف مستودع وين **** "
انا :" ربع ساعة ونكون حذاك "
علقت عليه التاليفون قبل مايجاوبني.. عطيت العنوان لتاكسي وشدينا الثنية.. تكيت براسي عالبلار نفكر ف شنوة بش نعمل تو.. دمي فور وعصابي فلتت كيف تفكرت كلامو معاياا وكيفاه اختارهاا هي علياا انا بعد كل شي عملتو معاه.. كيفاه رضى يطردني بالطريقة الرخيصة هاذي من غير مايحس بياا ولا يسمعني.. مشى ف بالي بش يقدر حبي ليه اما هو معمي بيهاا هي.. فقت من سرحتي على التاكسي الي وقفت.. خلصت الراجل ونزلت بسرعة.. كبست على ساكي وقدمت ناحية المستودع ضربت الباب بقوة شوي وقت وفتحلي واحد.. عديت بعينيا عليه نحكي
انا :" أيوب وين ؟"
اشرلي بيديه يحكي
هو :" غادي "
هزيتلو براسي باهي من غير حتى كلمة ودخلت.. قدمت بخطواتي ناحية الغرفة الي كانت على جنب دزيت الباب من غير استئذان ودخلت وين شفتو كيفاه كان متسطح عالفرش.. هزيت بحاجبي نحكي
انا :" والله صحة سي ايوب.. مرتاح كانو مفما شي "
هز روحو وتقعد.. عقد بحواجبو مستغرب يحكي
أيوب:" شفما زادة شبيك داخلة هادة عليا "
رميت على ساكي على طول يدي وقدمتلو.. حليت عينيا فيه نحكي
انا:" تحب تعرف شفما؟ الي فما انو خطتك العبقرية ماجابت حتى نتيجة "
وقف قدامي يحكي
أيوب:" شتقصد ؟"
عديت بيديا على وجهي وطلعتها لشعري كبست عليه نحكي
انا :" ليث طردني "
حل عينيه فيا يحكي
أيوب:" شنووة ؟ علاش حتى طردك؟"
ترميت عالفرش وراياا نرد ف النفس.. حسيت روحي شوي ونبكي كيف رجعت تفكرت الي صار.. ريتو كيف قعد بجنبي وحط يديه فوق يدي يحكي
أيوب:" فريحة اهدا وخوذ نفس واحكيلي شصار خليني نفهم معاك بش انجم نعاونك "
جبدت يدي من يديه وعديتها على وجهي.. خذيت نفس طويل وغزرتلو نحكي
انا :"بسبب المجنونة مرتو.. من وقت سقطت الصغير وهي تاعبة.. مشى ف بالي هكاكا بش يبعد عليهاا ياخي هو بقى مكبش اكثر فيها.. رغم انها بعدت ومعادش تحب تغزرلو ف وجهو "
عقد بحواجبو مستغرب يحكي
أيوب:" علاش ؟"
انا :" خاطرها عرفت انو ايهم قت-ل امها.. ولامت ليث كيفاه خبى عليها لحقيقة هاذي وفوق هذا قتلو انت السبب خاطرني تبعتك.. يعني بعد هذا لكل ومازال يحبها ويحب يبقى معاهاا "
ايوب:"اي وانت شمدخلك في هاذا لكل"
انا:"ماو انا استغليت لوضع وحبيت نخليه يحطها في لمصحة"
ايوب :"مصحة شنوة فهمني وحدة وحدة"
هزيتلو براسي باهي ورجعت حكيتلو كلشي من الاول
تبسم على جنب يحكي
أيوب:"يعني رفضك... اي خليه يحبها ويبقى معاها ميسالش "
حليت عينيا على وسعهم مصدومة من كلامو و دمو البارد نحكي
انا :" شتحكي انت ؟؟؟"
عدا بعينيه عليا يحكي
أيوب:" قتلك خليه معاهاا ميسالش اما بش نخليو مرتو لي تبعثو "
عقدت بحواجبي نحكي
انا :" كيفاه؟"
أيوب:" والله بعد الي حكيتهولي باين انو قمر معندهاش ثقة ف ليث..مالا خلينا نلعبو عالنقطة هاذي "
رجعت شعري لتالي ودرتلو بكلي نحكي
انا :" فسرلي اكثر..مفهمتكس"
تنهد بالشوي يحكي
أيوب:" يعني بش نخليو قمر تشك فيه و انت الي بش تعمل هذا فروحة "
هز يديه وبعدلي خصلات شعري ورجع يحكي
أيوب:" استغل جمالك هذا وانوثتك وحاول تجبدو ليك شوي.. ووقتهاا ناخذو كم صورة ليكم وانتم قراب لبعضكم ومرتو تشوفهم وقتها هي بش تصدق انو ليث خانها.. وهي الي بش تبعد عليه وحدها ..يعني لا يزي خبى عليهاا ومفكرة بش يحطها في مصحة ويخلالو الجو معاك هكا نظمنلك قمر بش تخرجو من حياتهاا جملا "
تبسمت على جنب نحكي
انا:" هي فكرة مليحة اما كيفاه بش نقربو ليا قتلك راو طردني وقلي معادش توريني وجهك "
حك على جبينو و غزرلي يحكي
أيوب :" خليني نخمم وانا تو نقلك شتعمل.. ماتخافش كل شي بش يصير كيما خططنا تو...جيست لوقت لجاي معادش تظهر قدامو خليه يبرد "
ضحكت نحكي
انا :" اي امان أيوب خمم.. نحب ليث يرجعلي مانحبوش يبقى بعيد علياا.. اعمل الي تحب المهم خرج قمر من حياتنا "
عدا بعينيه عليا يحكي
أيوب:" قتلك باهي تهنى "
هزيتلو براسي باهي من غير حتى كلمة وبقيت نتخيل ف كلام أيوب.. للحظة حسيت روحي رجعت هديت ودقات قلبي تنظمت فكرة انو ليث ممكن يرجعلي خلاتني ننسى الي صار الصباح لكل..
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
