#قمر_تحكي
حطيت لقلم عالطاولة وقمت من بلاصتي.. هزيت ورقة الامتحان وقدمتهاا للبروف.. لقيت روحي مش منجمة نركز اكثر.. جاوبت كيف ماعرفت فيسع وخرجت من القاعة.. هذا الامتحان الثاني الي نعديه بالطريقة هاذي من وراء الظروف الي انا فيها تو.. حاسة روحي مش منجمة نركز ف حتى شي ولا حابة نجي للفاك اصلا اما خالتي وعمي جبروني عالشي هذاا غير اني فكرت ف ليث و كيفاه ديما يوصيني على قرايتي حبيتو يبقى فخور بياا كالعاده..بقيت نكركر ف ساقياا بالسيف ناحية الكافتيار.. قعدت على طاولة متطرفة وتكيت براسي عالحيط وين لقيت روحي رجعت سرحت ف الايامات الي عديتهم هاذم من غير مانشوف ليث.. تفكيري لكل معاه هو وحالتو تو.. كل مانتخيلو وهو محبوس بين اربع حيوط مع لمجرمة نحس قلبي يتقطع الف مرة.. غير فكرة انو يبقى الوضع هكا ومانلقاوش حل يساعدو وقتهاا بلحق مانيش عارفة شنعمل ولا كيفاه بش نكمل حياتي من بعدو.. فقت من سرحتي على اليد الي تحطت فوق كتفي.. مسحت دمعتي فيسع وهزيت راسي وين شفت امنة بجنبي.. عقدت بحواجبها مستغربة تحكي
امنة :" قمر عندي ساعة وانا واقفة جنبك "
تنهدت بالشوي نحكي
انا :" سامحني ماسمعتكش امنة "
جبدت الكرسي وقعدت بجنبي تحكي
امنة :" ميسالش عزيزتي.. المهم قلي شعملت ف امتحان ليوم ؟"
تكيت بظهري لتالي وعديت بعينيا عليهاا نحكي
انا :" مانعرفش.. عديت كيف ما جاء وخرجت انا اول وحدة "
حطت يداها فوق يدي تحكي
امنة :" قمر علاش عاملة ف روحك هكاا.. صدقني ازمة وبش تتعدا وليث بش يخرج زادة... "
غمضت عينياا بالقوي ورجعت حليتهم على دمعتي الي نزلت مني.. قصيت علاهاا نحكي
انا :" مانجمش امنة.. شي اقوى مني والله.. كل مانتفكر انو ليث مسجون نحس روحي نتخنق.. تفكيري لكل معاه هو زعمة شعامل وكيفاه حالو.. قلبي يتقطع كل مانتخيل انو ممكن معادش يطلع ويعدي حياتو غادي.. مستحيل انجم نعيش بعدو والله.. ليث هو حياتي لكلها "
كبست على يدي تحكي
امنة :" صدقني بش يجي نهار وليث يخرج.. الحق مصيرو يبان مهما تطاول المدة.. ليث انسان باهي واكيد ربي بش ياقف معاه.. انت ارمي حملك على ربي ادعيلو وماتعملش ف روحك هكاا بش مايراكش ب الحالة هاذي ويزيد يتحير عليك مسكين"
مسحت دموعي بكف يدي وهزيتلهاا براسي باهي من غير حتى كلمة.. عدات بعيناها علياا تحكي
امنة :" قلي وقتاه الزيارة ؟"
انا :" لبارح المحامي كلمناا طلب منا نقابلوه ليوم.. بعد مانكمل بش نمشيلو للمكتب "
امنة :" وقتاه بش تمشي ؟"
انا :" بعد ساعتين.. تو عندي مراجعة ف المكتبة مع جماعة كلاسي.. ماو ف بالك بحكاية لقروب ماحبيتش نحضر اما مهدي اكد علينا لكل نحضرو "
امنة :" اي خير امشي لازمك تحضر معاهم وتراجع ونحبك تركز امان خاطر الإمتحان الجاي عنجو وهو اهم امتحان "
تنهدت بالشوي نحكي
انا :" انشالله "
امنة :" قلي فطرت ؟ نطلبك حاجة تاكلها "
هزيتلها براسي لا نحكي
انا :" لا لا ماعينيش والله.. اصلا لازمني نقوم تو..معادش وقت "
قامت بعد ما انا قمت وقربت مني.. باستني من خدي تحكي
امنة :" باهي برا امشي ورد بالك على روحك "
تبسمت بالسيف نحكي
انا :" باهي "
هزيت ساكي وعطيتهاا بظهري بقيت نمشي ناحية المكتبة سارحة.. اول ماوصلت لقيت جماعة كلاسي قاعدين يستناو ف مهدي.. قدمت حذاهم وجبدت الكرسي وقعدت ساكتة.. كبست على جبيني وغمضت عينيا بالقوي من الدوخة الي حسيتهاا مكنتني فجأه.. لحظتها تكيت براسي لتالي وغمضت عينيا وين لقيت خيال ليث قدامي لحظتهاا حسيت وجيعة قلبي غلبت على اي وجيعة انا حاستها تو.. دمعتي نزلت مرة اخرى من غير مانحس حسيت روحي معادش عندي قوة لشي هذاا غير ةحساس العجز الي خلاني مخنوقة اكثر.. رجعت حليت عينيا على يديه الي تحطت على كتفي وصوتو يحكي
مهدي :" قمر شبيك ؟"
خذيت نفس طويل وعديت بيديا الزوز على وجهي نحكي
انا :" شي.. جيست راسي يوجع فيا شوي "
مهدي :" تحب نعطيك حربوشة تاع وجيعة "
هزيتلو براسي لا نحكي
انا :" لا عيشك "
عدا بعينيه عليا يحكي
مهدي :" باهي على راحتك.. حاول تركز مالا تو واحنا اصلا ماناش بش نطولو.. تفاهمناا ؟"
انا :" باهي "
طبست راسي وبقيت نتبع فيه وهو يشرح.. حاولت نركز على قد مانقدر اما لقيت روحي نسمع كلمة وكلمة لا.. لميت أوراقي بسرعة وقمت اول ماكملناا.. هزيت ساكي وبعدت عليهم فيسع بش نخرج للمحامي ونعرف وقتاه بش نرا ليث.. خاطر لازمو يتصرف مستحيل نتحمل اكثر من هكاا.. لازمنر نراه ونسمع صوتو بش قلبي يطمن حتى شوي.. خمس ايام تعداو من بعد المحاكمة مستحيل نزيد بعدهم نهار..
فقت من سرحتي على صوتو وراياا يحكي
مهدي :" قمر.. قمر اقف "
نفخت بالقوي ووقفت.. تلفتت وهزيت بحاجبي نحكي
انا :" تفصل مسيو "
قدم ناحيتي ووقف قدامي.. عدا بعينيه عليا وغزرلي درا كيفاه يحكي
مهدي :"قمر شبيك ؟ علاش كنت تبكي بكري ؟"
انا :" مابياا شي نبكي وحدي هكاكاا "
عقد بحواجبو يحكي
مهدي :" فما حد قلقك من زملائك ؟ ولا صارت حاجة اخرى "
كبست على ساكي وغزرتلو نحكي
انا :" ماقلقني حد وماصار شي.. خليني نمشي امان "
مهدي :" ماكش بش تمشي حتى تقلي شبيك.. صرت ديما سارحة وتبكي.. الوضع هذاا صار يقلق قمر "
عقدت بحواجبي مستغربه كلامو نحكي
انا :" سامحني مفهمتكش ؟ غاش قلقتك انا "
مهدي :" قلقتني كيف تخليني نعاود الدرس مرة وثنين على خاطرك ف عوض مانقدم.. صحابك شنوة ذنبهم معاك.. كان بش تبقى هكاا معادش تحضر للمراجعة عندي وتعطل صحابك اكثر من هكاا "
حليت عينيا على وسعهم من كلامو غير الغصة الي حسيتهاا شدتني وخلات عينيا تدمع.. بلعت ريقي بالسيف نحكي
انا :" باهي.. ك هكا معادش بش نحضر بش معادش نقلق حضرتكم "
شدني من مرفقي اول ماجيت نتحرك ووقفني يحكي
مهدي :" قمر احكيلي كان عندك سبب مقنع انا مستعد نساعدك.. خاطر كان بش تغيب انت الوحيدة الي بش تخسر "
نطرت مرفقي منو نحكي
انا :" ماعندي مانحكيلك خاطر شي مايخصكش.. و دروسك انا معادش بش نحضرلهاا "
خليتو واقف ف بلاصتو عطيتو بظهري وخرجت نجري.. لحظتها دموعي نزلو اكثر.. حسيت روحي تخنقت من كلامو الي زاد على مابياا.. اصلا معادش يهمني ف شي.. خليني نخسر كيف ماقال اهم شي تو ليث.. قدمت للكياس فيسع ووقفت اول تاكسي عرضتني.. ركبت وعطيتو عنوان المحامي وين تحركنا بالوقت.. تكيت براسي عالبلار وغمضت عينياا وندعي ف سري انو المحامي يعطيني خبر باهي اني بش نرا ليث غدوة..
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
