حلقة 36
ليث يحكي
كل ما نقدم خطوة مع قمر نلقا روحي راجع الف خطوة بالتوالي .. الي بنيتو الكل تهد في لحظة .. مشى في بالي الي انا صلحت اغلاطي و خليتها تنسى .. اما بعد الي صاار عرفت انها شايلة مني و مستحيل تنسى و لا تسامحني.. و حتى انا المرة هاذي مستحيل نسامحها .. بعد الي عملتو الكل كان لازمها تعطيني فرصة و تسمعني انا نستحق من عندها الفرصة هاذي .. كلامها مستحيل ننساه و مهما يصير مش بش نغفرلها ..
خرجت من الداار نجري حبيت نبعد علاهاا .. مانجمتش نغزر في عيناها اكثر .. في لحظة حسيت الدنيا ظلامت قدامي و معادش نعرف كيفاه نتصرف خفت لا نجرحها بكلمة و نوجعها رغم الي وجعتني .. اول ما خرجت طلعت في الكرهبة و بقيت ندور.. كل ما نقول الي انا لقيت ثنيتي نلقى روحي ضايع اكثر .. ماعرفتش كيفاه دورت بالكرهبة و شديت ثنية المزرعة .. حبيت نبعد على كل شي صاير هنااا .. و خاصة نبعد علاها هي .. معادش انجم نبقى في بلاصة تفكرني بيهاا ..
اول ماوصلت عرضني عم مصطفى تبسمتلو و قدمت بخطواتي ناحيتو عنقني يحكي " مرحباا بولدي الغالي .. وينك هالغيبة "
بعدت عليه ضحكتلو نحكي " هاني رجعت " كملت كلامي و هبطت راسي .. قربلي و شدني من كتفي يحكي " شصارلك .. شبيها حالتك هكاا "
" خلينا ندخلو و تو نحكيلك .. مستحق اني نحكي و نرتاااح "
اشرلي بيدو بش ندخل قدمت معاه للمزرعة لداخل و قعدنا عالطاولة غزرلي يحكي " تحب تاكل و لا تشرب حاجة "
مسحت على جبيني و تبسمتلو نحكي " هات خلي نشربو .. توحشت قاعدتي معااك "
" تدلل "
اول ما حضرت الطاولة قعدنا .. طول القعدة و انا ساكت اما مخي يحكي .. نخمم في الحالة الي خليتها فيها .. حتى كان هي غالطة اما خليتها وحدها تتخبط في حكاية جديدة .. حكاية اقوى منها و مستحيل كان تنجم تتحملها .. فقت من سرحتى على عم مصطفى كيف حط الكاسة و غزرلي بعينيه يثبت فيا يحكي " احكيلي شباها حالتك هكا .. شصار طول المدة هاذي؟ مش قلت الي مستحيل كان ترجع ؟؟"
كبست عالكاسة الي في يدي نحكي " رجعت و ندمت .. يا ريتني بقيت بعيييد .. الوحدة الي عايشها غادي خير بالف مرة عالشي الي نحس فيه هناا"
" انا وجيعتك نعرفها مليييح ماتنساش الي انا ربيتك و حافظك .. اما المرة هاذي غير .. غزرت عينيك متبدلة ليث "
عضيت على شفايفي و غمضت عينيا و حليتهم فيسع نحكي " حاسس روحي ضايع .. دخلت في حكاية مانيش عارف ثنية الخروج منها "
" لحكاية فيها طفلة مش هكااا .. غزرتك و نبرت صوتك يقولو وراء وجيعتهم طفلة "
هزيت الكاسة شربت منها و غزرتلو نحكي " اي .. فيها طفلة .. طفلة صغيرة دخلتها في حياتي مشى في بالي بش نحماها و نكونلها سند .. بش ناقف معاها في وجه الدنيا الي ظلمتهاا .. اما مانجمتش بالعكس انا زدت في وجيعتها .. كل مرة نخلاها تبكي ورايا .. كل مرة نخلاها تضيع معايا اكثر .. "
" و انت علاه رضيت تتحمل المسؤولية هاذي .. شنوة الي خلاك تقربلها "
" ما نعرفش .. يمكن خاطرها فكرتني في وجيعتي و حبيت نكونلها اليد الي انا مالقيتهاش .. يمكن الي صار معاها و عاشتو خلاني نحس روحي مسؤول عليه حتى انا و لو شوي .. هي تو مبقالها حد كان انا و انا شعملت ؟؟ خليتها تندم كيفاه وثقت فيااا .. كل حاجة عايشتها هي تو مني انااا .. قد ما نعمل ديما نحس روحي فاشل و عاجز قدامهاا "
" علاه عايش حياتك الكل و انت تلوم في روحك ؟ا انت قلت الي هي طفلة صغيرة انا مانعرفش شنوة صاير اما مهما يصير خليك معاها انا نعرفك راااجل مدامها وحدها رد بالك تسلم فيهاا .. خليك في ظهرها و احميها "
"مانجمش نبقى معاهااا .. مانجمش نتحمل غزرت عيناها الذابلة .. دموعهااا تهبط كيف الجمرة في قلبي يحرقوني في جواجياا .. ضعفهااا يخليني ضعيف معاهاا و يهدني .. كلامها و هي تلوم فياا يقسملي ظهري قوتي تتلغى قدامهاا .. قمر صارت نقطة ضعفي يا عم مصطفى .. و انت تعرف الي كيفي ما لازمش يكون عندو نقطة ضعف .. مانجمش نخلاها معايا .. قربي بش يتعبها .. ثنيتي غامضة و اخرتها مش ساهلة و انت تعرف هذااا .. لا عايلتي و لا الماضي متاعي بش يخلوها في امان .. برائتها متقابلش الشر متاعي "
" ما سالتش روحك شنوة سبب وراء كلامك هذاا ؟؟ مسالتش روحك شنوة سبب وجيعتك هاذي علاهاا ؟؟ "
" سببهم تأنيب الضمير الي عايش فيه تو .. سببهم اني خذلتها الف مرة و خليتها بين المد و الجزر لا تعرف تقدملي و لا تهرب مني .. انا زدت في عذابها كيف ماوفيتش بوعدي لها .. وعدتها بش نخلي جروحها تبرا اما انا ديما نحيير فيهم .. علا هذاكا لازمني نبعد علاها هي من غيري بش ترتاح اكثر "
" ليث الي نعرفو عمرو ماهرب .. الهروب مش هو الحل .. تعرف علاه ؟؟ خاطرها بش تبقى ديما في بالك و في قلبك .. قد ماتهرب و تبعد بش تبقى هي وراك .. كل كلمة حكيتها و كل غزرة منك تو تبين حاجة وحدة انك حبيتها "
" لااا .. مستحيل " ضربت على قلبي بالقوي نحكي " هذا مستحيل كان يحب .. هذا ماااات عندو سنين .. انا و الحب ثنيتنا ماتقابلش بعضها .. هي ماتستاهلش حب من واحد كيفي انا .. واحد ماضيه مسخ بالدم قد ما يحاول يبرا روحو بش يبقى ديما مجرم و متهم .. بعدي علاها هو الحل .. اول ما نكمل معاها بش نخلاهاا و ننساها "
"و متاكد الي تنجم تنساها و تخلاها وراك "
" متاكد .. لازمني نبعد .. نبعد لدرجة لا نراها و لا نسمع صوتها .. وجودي معاها بش يضرها اكثثثر و الشي هذا بش يضرني انا معاها .. على هذاكا القرار هذا احسن لينا الزوز .. "
" زيد خمم .. رد بالك تظلم روحك و لا تظلمهاا معاك " هزيتلو براسي باهي و كبست عالكاسة شربتها الكل من غير نفس .. هكاكا و سمعت التاليفون نوقز ..
هزيتو استغربت من النومرو الي مانعرفوش هزيت نحكي
" الوو .. تفضل ؟"
" اهلا ليث .. معاك جيداء "
" اهلا جيداء .. لباس ؟؟"
" لباس .. اما نطلب في قمر ماجاوبتنيش .. حبيت نقوللها الي غدوة بش تخرج اللجنة و لازمها تكون حاضرة "
غمضت عينيا و كبست علاهم بيدي نحكي " تنجم تمشي معاها جيداء .. ماتخليهاش وحدهاا "
" مانجمش و الله عندي جلسة الصباح .. انت مانجمش تمشي معاها ؟؟ ليث حاول ماتخليهاش وحدها حالتها تنجم تتعكر "
خذيت نفس نحكي " باهي تو نحاول .. عيشك جيداء .. على خير "
" تصبح على خير "
علقت عالتليفون و هزيت راسي مع عم مصطفى يحكي " تحكي على قمر ماتخليهاش وحدها "
عضيت على شفايفي نحكي " اي علاها هي.. غدوة عندها وين ماشية .. و البلاصة الي ماشيتلها هي السبب في الي صايرلها تو "
تبسملي و حط يديه فوق يدي يحكي " امشي انت معاها .. انسى الي صاير تو و خليك معاها ماتحاسبهاش بالطريقة هاذي "
هزيتلو براسي باهي نحكي " انشالله.. سامحنى عم مصطفى اما الليلة بش نبات حذااك "
" بالطبيعة مرحبا بولدي .. بيتك متاع العادة حاضرة برا ارتاح "
" عيشك .. اي تصبح على خير "
هزيت روحي و قمت بسيف مشيت للبيت ترميت عالفرش و غمضت عينيا تعدات تصويرتها قدامي .. بقيت ندور و مانجمتش نرقد نحس في راسي بش يطرشق .. بقيت بين كلامها و كلام عم مصطفى و الي نحس فيه .. ماعرفتش نرسي على بر و ضعت اكثر ..
اول ما طلع الصباح حضرت روحي و خرجت شديت الثنية الدار .. ثنية كاملة و انا نخمم كيفاه بش نقابلها بعد الي صاار البارح و نفس الوقت كان نلقى نطير و نوصللها .. فقت من سرحتي عالتليفون الي نوقز هزيت وحليت نلقاه ميساج اول ماحليتو شديت فران بالقوي .. حسيت بالدم غلى في عروقي كبست عالتليفون ورميتو و بدلت ثنيتي للشركة .. ثنية ساعة و صلتها في نصف ساعة .. انا عارف شنوة حب يوصلي من الميساج الي بعثو اما مستحيل نخليه يخوفني و يخليني نتراجع على خطوتي .. اول ما وصلت هبطت نجري وقفتني السكريتار الي تحكي " سي ليث .. سي محمود ..."
ماخليتهاش تكمل قربت للباب و حليتو بالقوي قدمت بخطواتي ناحيتو نجري " شنوة الي بعثتهولي ؟؟"
تكا بظهرو عالكرسي و تبسملي يحكي " قول صباح الخير قبل "
ضربت بيديا عالبيرو و غزرتلو نصيح " في بالك بش تخوفني هكاكاا .. الفيديو هذاكا كان بش يضرني بش يضرك انت معايا ماتنساش "
" شكون قال الي انا بش نضرك بيه ؟؟ اما انا حبيت نذكرك انت شكون و شنوة حقيقتك "
شد التاليفون و حل الفيديو و حطو قدامي يحكي " شوف ليث .. هذا انت.. انت قاااتل .. قلت لقمر عالمعلومة هاذي زادة و لا خبيت علاها كيف ما خبيت علاها حقيقة عايلتك ؟؟ و لا تستنى فينا احنا نقولولها؟؟"
فكيت من يدو التاليفون و رميتو عالحيط نحكي " *** رد بالك تخمم تقربلها و لا تكلمهاا .. وقتها و الله الي الفيديو نعاودو فيييك انت "
" باهي مانقولش اما بشرط ؟"
رسيت على سنيا نحكي "الي هو ؟؟"
قام من الكرسي و قدم ناحيتي يتبسم و يحكي " انك تبعد علاهاا و توفى الحكاية هاذي من الجلسة الأولى "
" تحلممم .. قمر مانيش باعد علاها و الجلسة الاولي بش تمشي على كيفي انااا "
" مالا ماتلومنيش عالي بش يصير "
قربتلو قدام وجهو و غزرتلو في عينيه نحكي " انت زادة ماتلومنيش .. ماتنساش الدوسيات الي عندي كان نخرج ورقه وحدة منهم لإنتخابات تنساها و فضيحتك تولي في البلاد كاملة .. انا يمكن الفيديو بش يخليني نخسر كان قمر .. اما انت بش تخسر كل شي .. فلوسك قيمتك منصبك كل شي .. خمم مليح خالي "
خليتو يغزرلي مصدوم من كلامي ضحكت على جنب على وجهو الي تقلب عطيتو بظهري نطرت الباب و خرجت .. طلعت في الكرهبة خذيت نفس و عاودت شديت التاليفون غزرت الفيديو بقيت نعاود فيه مانعرفش قداه من مرة .. قد ما نتمنى نصلح الي صاار الماضي بش يبقى وراياا و مش بش يعطيني الفرصة هاذي .. عديت بيديا الزوز على وجهي و حليت فلس الشوميز تنفست شوي و شديت ثنية الدار .. اول ماوصلت الحس كان بايت .. طلعت في الدروج قدمت ناحية بيتها دفيت الباب اما مجاوبتنيش .. حليت الباب بشوي دورت راسي اما البيت كانت فارغة حسيت بقلبي خظ بالقوي .. خرجت نجري ناحية بيت رفيقة بقيت ندق حتى خرجتلي .. غزرتلها مستغرب نحكي
" قمر ويني ؟؟ "
هزت صبعها على شفايفها تحكي " اششش.. قمر راقدة حذايا .. للصباح و عيناها ماتغمضتش تو وين ارتاحت شوي "
نفخت بالقوي و عديت بيديا على شعري نحكي " صدقني تفجعت .. برا فيقها بش تحضر روحها و تخلط عليا اللوطة .. عندنا وين ماشين "
" باهي "
هبطت بقيت نستنى فيها البرا .. غمضت عينيا و خذيت نفس عالريحة الي شميتها و بقيت نستحلى فيها .. ريحة مستحيل كان ننساها .. ريحة بقات راسخة فياا و كل مرة تسبقها و تخليني نحس بقربها مني .. تلفتلها و للحظة سرحت في تفاصيلها حسيت روحي غرقت فيهاا .. كل ما نقول نحب نبعد نلقى حاجة تجذبني ليها اكثر .. عيناها الشهل و رموشها كل مرة نضيع فيهم و مانلقاش روحي .. شعرها الاكحل الطويل يسحرني مع النسمة الي تخليه يطير .. فقت من سرحتي فيها كيف قربتلي تحكي " وين ماشين .. مش قتلك مانحبش نرااك "
عطيتها بظهري نمشي و نحكي " كلمتني جيداء البارح .. اليوم اللجنة بش تخرج و نمشيو لغادي "
تلفتت نلقاها مازالت واقفة في بلاصتها جامدة تغزرلي من غير حتى كلمة .. كبست على يدي و عاودت قربتلها نحكي " ماتخافش .. انا معااك .. هي اطلع في الكرهبة "
هزتلي براسها باهي و عيناها زغللت بالوقت للحظة قلبي وجعني عليها.. طلعنا في الكرهبة و شدينا الثنية .. ثنية كاملة و هي ترعش و تفرك في يداها مانجمتش نحكي معاها حتى كلمة بش نهديه
ا بيها .. اول ما وصلنا غزرت من الشباك و عاودت غزرتلي تحكي " ليث .. مانحبش نهبط امااان .. هي نرجعو "
طلعت يدي حبيت نحطها على يدها و نشدها اما تراجعت غزرتلها نحكي " رد بالك ترجع قمر .. انت وصلت لهنا و بش تكمل و انا معاك باهي؟؟"
هزتلي براسها باهي و هبطت من الكرهبة اول ما هبطت قربت مني و شدتني من مرفقي و كبست عليا هبطت راسي ليداها و عاودت طلعت نغزر لوجها و شفايفها الي كانو يرعشو .. مانجمتش نبعدها عليا .. خوفها حسيتو تعدالي من شدت يداها .. لول ما قربنا للبلاصة .. قدملنا راجل يحكي " صباح الخير .. مدام قمر احنا معاك هنا .. انت بش تحكيلنا كل شي و تورينا الي صار منين بدا "
ماجاوبتوش و هزت راسها تغزرلي تحكي " ليث شمعناها نوري ااي صار ؟؟"
" معناها بش تفسر الي صار منين بدا .. انت منين مشيت و هوما وين عرضوك .. فهمت قمر ؟؟"
" اي فهمت "
قدمت معاه و بقيت انا وراها نتبع فيها و نغزرلها كيفاه تحكي و ترعش .. قربتلها نشوف فيها كيفاه تمثل بيداها و تحكي " ا.. انا قصيت من هنااا .. و هوما وقفو غادي بالكرهبة كيف حبيت نهرب .. قربولي و شدوني بالسيف .." قوات في بكاها تحكي " و.. و هزوني غادي تحت الشجره هاذيكاا.."
غمضت عينيا ووهرت بخطواتي لتالي بعدت علاها مانجمتش نكمل نسمعها و لا نغزر للبلاصة .. مجرد اني نتخيل انهم مسوها و الي عاشتو خلاني نرعش و نغزل .. لبلاصة هذيكا فكرتني في النهار الي حبت تقتل فيه روحها و الي انا سبب في خطوتها هذيكا .. بالنسبة ليا لبلاصة هاذي جهنم متاعي انا زادة مش كان لقمر .. تلفتت على صوتها الي يرعش كانت تبكي و تحكي " نحب نمشي من هنا .. هزني امان من هنااا "
حليتلها باب الكرهبة و طلعنا ثنية كاملة و صوت شهقتها الي قاعد يعلى كان يعذب فيااا .. وقفت الكرهبة عالبحر في بلاصة المرة الأخرى غزرتلها نحكي "
تحب تهبط ترتاح شوي هناا ؟؟"
غزرتلي و دورت راسها غزرت للبلاصة هبطت من غير حتى كلمة .. خلطت عليها نمشي وراها و انا ساكت .. ريتها وقفت و تلفتتلي تحكي " بعد الي صار اليوم شنوة مازال اخر؟؟"
" مازال انك تقابل الاخصائي النفسي و بعدها تصير الجلسة"
دورت بعيناها على وجهي تبسمت على جنب باستهزاء تحكي " تصدق معادش نستنى في الجلسة .. فرحتي ضاعت مع الدليل الي ضااع .. مستحيل كان نربحها الجلسة " قحرتلي بعيناها و دورت وجهها لناحية الاخرى قدمتلها نجري وشديتها من كتفها نحكي
" انت بش تربحها بالدليل و لا بلاش .. انا بش نشهد معاك ورفيقة زادة "
" معادش يهم .. لبارح تاكدت انو لا الفرحة مكتوبتلي و لا الربح .. استانست بالخسارة .. و هذا بفضلكم انتوما "
" لتو شادة صحيح الي انا سرقتها ؟؟؟ كان سرقتها انا علاه معاك تو ؟؟ علاه عامل المستحيل بش نخليك تربح القضية ؟؟"
نطرت يداها مني و صاحت تحكي " هذاكا الي مهبلني .. الي صاير يقول حاجة و تصرفاتك و كلامك حاجة .. ليث حاسة روحي بش نهبل .. مانيش عارفة شنوة نصدق و شكون نصدق .. حرت و ضعت و مش عرفة نميز من الحقيقة للكذب .. "
" تحب تعرف الحقيقة ؟؟ لحقيقة هي اني مستحيل كان نغدرك بالطريقة الرخيصة هاذيكا ,, لحقيقة هي اني معاااك انا تو .. لحقيقة هي انك بش تربح بالدليل و لا بلاش ,, هاذي لحقيقة و لازمك تصدقها "
هبطت راسها و شبكت يداها في بعضهم تحكي بصوت واطي " الي قلتو البارح ماقصدتوش ان.."
قصيت علاها نحكي " الي صار صار .. انا مازلت عند وعدي بش نخليك تربح القضية و ترجع حياتك كيف قبل و نبعد عليك "
هزت راسها معايا غزرتلي من غير حتى كلمة بعدت علاها شوي نحكي " هيا لازمنا نمشيو ,, الدنيا بردت "
قدمنا للكرهبة و شدينا ثنية الدار اول ماوصلنا غزرتلها نحكي " اهبط ,, انا بش نمشي "
" مش بش تهبط معايا ؟؟"
" لا ,, خليكم على راحتكم ,, تو بعد نتعدا نهز دبشي ونمشي .. ايا اهبط "
اول ما هبطت خدمت الكرهبة و طرت عجاجة حبيت نبعد علاها قد ما نقدر,, لكلام الي نحكيه بيني و بين روحي قدامها نتصرف عكسو و ننساه,, لازمني نتعود ببعدها و ننساها ,, حتى شي ما يربطني بيها بش نخلي بيناتنا كان موضوع القضية و اول ما تتحل بش نشد ثنية بعيدة علاها
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
