#ليس_ذنبي ❤️‍🔥

حلقة 32

الحلقة 32
#قمر_تحكي

ليلة البارح كانت اطول ليلة في حياتي .. القرار الي خذاه ليث رغم الي هو وعدني بيه قبل اما ماتوقعتش منو بش يوفي بيه بالسرعة هاذي خاصة بعد الي صار .. بعد الي سمعتو تمنيت كان بلحق كنت نعرفو ملييح .. صوتو الي كان يرعش و الغصة الي كان يحكي بيها حسيتهم خلوني بين المد والجزر ..خفت لا نكون ظلمتو وزدت في وجيعتو الي حسيت بيها البارح من نبرة صوتو ومن كلامو .. اما انا شنوة ذنبي بقيت بيناتهم خلوني عايشة في الشك معادش عارفة نفرق بين الغالط و الصحيح .. كل مرة نتوه اكثر و مانلقاش ثنية الخروج  ..
عديت الليلة على ناار بقيت نكلم فيه اما مجاوبنيش للحظة حسيت روحي تحيرت عليه و كان نلقى نطير و نمشيلو ونفهم منو كل كلمة قالها وحب يوصلهالي.. نمشيلو ونعطيه فرصة الي حرمتو منها قبيلا و يحكيلي العذر متاعو بالك انجم نسامحوو .. اما حتى الوقت شمت فيا و صار يتعدا بسيف .. الروح رجعتليي مع طلوع النهار و حس الباب الي تحل .. هبط في الدروج نجري بش نشوفو .. اما وقفت مانجمتش نقربلو بقيت نغزر للحالة الي كان فيها .. للحظة ماعرفتوش .. سوريتو الي كانت محلولة وجهو التاعب و عينيه المنفوخة خلات قلبي يوجعني عليه .. كان يكركر في ساقيه بسيف قدم ناحيتي و غزرلي يحكي " برا حضر روحك عندنا وين ماشين "
مخلانيش نجاوبو و عطاني بظهرو ومشى قدمت ناحيتو نجري وقفت قدمتو منعتو بش يتحرك بلعت ريقي نحكي " ل.. ليث شباها حالتك هكا ؟؟ ووين ماشين ؟؟ "
دور عينيه لناحية لخرى ماغزرليش يحكي " ماشين للمحكمة .. انا قدمت شكوى ليوم الصباح وانت لازم تمشي تعطي افادتك وتحكي كل شي صاار معااك "
" ليث .. خلينا نحكيو قبل مانمشيوو"
غزرلي و دور بعينيه على وجهي جاوبني ببرود يحكي
" معندنا فاش نحكيو قمر .. كل واحد قال الي عندو البارح .. وتو اطلع حضر روحك و عيط لرفيقة بش تمشي معاناا  "
مشى وخلاني واقفة في بلاصتي من غير مانجاوبو حسيت دموعي بش تهبط من كلامو معايا و طريقة الي عاملني باها .. هزيت روحي بسيف و طلعت للبيت حضرت روحي فيسع و تعديت لخالتي دخلت لبيتها نحكي
" صباح الخير خالتي .. حضر روحك بش نمشيو للمحكمة "
وقفت قدامي مستغربة تحكي " صباح الخير .. محكمة شنوة ؟؟ ياخي علاه حد فيكم مايحب يحكيلي شصاير هنا ؟؟"
قعدت عالفرش هزيت راسي معاها هبطو دموعي نحكي
" البارح تعاركت مع ليث .. وهو مشى وعاود حل الشكوى من جديد "
قعدت قدامي شدتني من يدي تحكي " علاه تعاركتو ؟؟ وزيد مش هذا الي انت تحب علييه انو ياخذلك حقك منهم ؟"
هزيتلها براسي لا نحكي " هذااكا قبل .. اما تو وليت خايفة .. ل..ليث طلع يقربلهم .. ايهم يكون ولد خالو "
"شنوة ؟؟؟"
" هاذيكا لحقيقة الي تعاركنا علاها البارح .. قتلو الي هو كذب عليا وعمل هذا الكل مش على خاطري .. و بش يخليني نصدقو مشى و شكا بيهم .. اما خالتي قد ما يعمل مانجموش ننكرو الحقيقة هاذي .. مهما يصير هاذم عايلتو .. ينجم يكون يعمل في هذا الكل بش يخلص حكاية بيناتهم وبعد يرجعلهمم .. خايفة لا نرجع نصدقو و بعد نلقا روحي في كذبة اخرى و يطلع مخبي حاجة اخرى عليااا.. حايرة و خايفة من الي يستنى فيااا .. احساسي يقلي صدقو اما عقلي رافض الفكرة .. وتو كان بش نحل الحكاية هاذي من جديد خايفة لا نلقى روحي في شطر الطريق وحدي"
دورت يداها على ظهري تكيت على صدرها تحكي
" حتى كان هو خلاك انا مستحيل نخليك .. اما ميسالش اعطيه فرصة يحكييلك علاه خبا علييك بالك عندو سبب .. وبعد قرر كان تحب تكمل و لا ماتكملش اعمل الي يرتحك  "
مسحت دموعي و قمت من حذاها نحكي
" باهي خالتي ..هياا نمشيو.. هو اللوطة يستنى فينا "
اول ماهبطت نلقاه واقف البرا يستنى تكلم من غير ما يغزرلي يحكي " اطلع في الكرهبة "
طلعت من غير ما نكلمو .. طول الثنية و انا حاسة قلبي بش ياقف .. كل مانقربو للمحكمة كل ما دقاتو تقوى .. غمضت عينيا و سرحت في ليلة البارح مرة اخرى بكامل تفاصيلها .. بقيت بين كلامها هي و كلامو و افعالو هو .. كل مانوصل لقرار نحس اخرتو مسكرة .. فقت من سرحتى على صوتو يحكي
" وصلنا "
هزيت راسي و غزرت للمحكمة .. لميت طرف القوة الي بقات عندي وهبطت بقيت نتبع فيه من غير حتى كلمة حتى وصلنا قدام بيرو .. تلفتلي و شدني من مرفقي يحكي " تو بش تدخل .. و بش تحكي كل شي صار معاااك حتى للنهار هذا .. رد بالك تخبي حاجة ولاتنسى حاجة"
غزرتلو نترجى فيه بعينيا نحكي " ليث .. ماتخلينيش ندخل وحدي اماان .. ادخل معاياا "
بقى يغزرلي ساكت قربت يدي ناحيت يدو و شديتو نحكي " اماان ليث .. حاسة روحي خايفة "
هزلي براسو باهي و سبقني دخل نسمع فيه يحكي
" اهلا سي فتحي "
" مرحباا سي ليث .. تفضلو "
غزرلي و اشرلي بعينيه يحكي " اقعد قمر "
خذيت نفس بالقوي قعدت قدامو و هبطت راسي في القاعة غمضت عينيا على صوت وكيل الجمهورية يحكي " قمر بنتي .. سي ليث حكالي الي انت بش تعاود تشكي بيهم .. صحيح هذا ؟؟"
طلعت راسي و غزرت في عينين ليث هبطو دموعي معاه كيف هزلي براسو اي بش نحكي عديت بلساني على شفايفي حسيت ريقي شااح مانجمتش ننطق حرف تقويت على روحي نحكي "يعني كيف نشكي بش تاخذولي حقي منهم "
" اكييد .. انت اول ما تقدم شكوى انا بش نوقفهم و تتحل القضية من جديد "
هزيتلو براسي باهي نحكي" بااهي .. صحيح انا نحب نشكي بيهم "
" باهي ياسر .. انا كيف وصلتني الشكوى متاعك من عند المحامية قريت الي صاار .. و ايهم بن سعيد كيف جاء هناا نكر كل كلمة انت قلتها "
كبست بيديا الزوز عالروبة متاعي و هبطو دموعي اكثر حسيت روحي تخنقت لمجرد اني سمعت اسمو  هزيت راسي معاه كيف كمل يحكي
" و قبل ما انا نبعثلك بش تقدم افادتك .. انت تنازلت عالشكوى .. على هذاكا انت بش تحكيلي الي صاار معاك من الاول من غير خووف "
هبطت راسي في القاعة و غمضت عينيا تعدا النهار هذاكا من اول وجديد قدامي.. صوتهم و ريحتهم حسيت بيهم قراب مني من جديد قاومت رعشة شفايفي نحكي " و.. وقتها كنت ماشية بش نعرض خطيبي في المحطة .. تعديت عالسانية بش .. بش نقصر الثنية ونربح الوقت ماحسيت كا..كان بالكرهبة إلى وقفت قدامي و هبطو هوما الاثنين منها .. حاولت نهرب .. اما شدوني بسيف و دخلوني في بلاصة فارغة في السانية .."
حطيت يديا على صدري و حاولت ناخذ نفس مرة و ثنين بش انجم نكمل .. " و .. وبعدها عملو الي عملووه و خلاوني مطيشة .. حتى لقاتني خالتي رفيقة و هي الي هزتني لسبيطاار "
طلعت عينيا في ليث الي كان يغزرلي بشفقة  لحظتها سخفتني روحي و كرهت اني كل مرة نتجبر بش نتفكر الي صارلي من جديد و نحكيه
قرب مني يحكي " كمل قمر .. كمل الي صاار .. كيف انت شكيت شصار بعدها "
دورت وجهي لوكيل جمهورية نحكي " ب.. بعد ماخرجت من السبيطار .. قدمت شكوى بيهم .. اما امو هددتني و قتلي .. قتلي تنازل خاف على امك و خالتك و تنازل و عرس بريان  "
قص عليا ليث الي صاح يحكي " لااا .. احكي الي صاار قبل هذاا .."
هزيتلو براسي لااا و دموعي هبطو اكثر من غير حتى كلمة علا في صوتو اكثر يحكي " تكلللم .. " تلفت لسي فتحي يحكي " قبل ما تهددها امو .. انا مشيتلهااا و هددتها خوفتهااا و قلتلها تتنازل و تعرس بريان قلتلها بش نعطيك تعويض " عاود غزرلي يحكي " مش هذا الي صاار قمر .. حل فمك ..."
" ليث امااان "
" قتلك حل فمك ماتهبلنيش "
حطيت يديا على وجهي و صوت شهقاتي قوات نحكي " هذا الي صااار .. هذا الي صااار ..اماا "
تلفت لسي فتحي نحكي " اما انا عرست بيه بارادتي انااا .. ليث حماني منهم خاطر كانو ناوين يعرسولي بريان و يبعدوني على دارنا .. ليث هددني صحيح أما هو ماجبرني على شي والله  .. "
عاودت غزرتلو كيفاه كان مهبط راسو و يرعش في ساقيه بقيت نغزرلو و كملت نحكي " انا نحب نشكي بايهم و ريان كهو  هوما الي ضروني و دمروني .. ليث رغم كل شي هو وقف معايا وقتلي صار ماعندي حد .. رغم اني مستحيل كان ننسى كذبتك .. " لحظتها هز راسو و غزر في عينيا كيف نحكي " اما انا مسامحتك خاطرني مانسيتش وقفتك معايا .. و مستعدة نعطيك فرصة وناثق فيك مرة اخرى كاان عندك عذر لهذا الكل ..كان تنجم تخرجني من المتاهة هاذي  .. وقتها انا بش نمدلك يدي مرة اخرى و نكمل معاك في الثنية هاذي "
تبسملي و هزلي براسو اي يحكي " نوعدك نكمل معااك حتى تأخذ حقك و مستحيل كان نكذب عليك قمر "
رجعتلو التبسيمو مسحت دموعي و غزرت لسي فتحي يحكي " انا تو بش نخرج قرار بتوقيفهم الزوز .. و بش ناخذ ايفادتهم .. و بش نخلي الشكوى توصل للقاضي بش تتحل قضية .. انتوما تو كان فما اي دليل او شهدو حضرو رواحكم .. حتى يتم تحديد نهار الجلسة الأولى باهي ؟"
قام ليث من بلاصتو يحكي " بااهي سي فتحي .. عيشك كل شي"
وقفت معاه و قربت منو نحكي " يعطيك الصحة سي فتحي "
وقفلنا و مد يديه سلم علينا يحكي " هاذي خدمتي .. و بش نعمل المستحيل بش ناقف معاكم و تأخذ حقك قمر .. غير خليك قوية "
هزيتلو براسي باهي و خرجت .. اول ما خرجت خذيت نفس بالقوي حسيت بثقل كبير كان على صدري و انزاح قربت مني خالتي تحكي " لباس قمر شصاار ؟"
" بش يوقفهم.. و بش تتحل القضية "
" الحمد الله يا ربيي .. اكييد انت بش تربحها القضية احناا معاك مش هكا ليث "
هزيت راسي نغزرلو يحكي " اكيييد .. هيا نخرجو عندنا وين ماشين مرة اخرى "
غزرتلو مستغربة نحكي " وين ؟؟"
تبسملي يحكي " بش نمشيو نفطرو في بلاصة محلاها .. تخليك ترتاح بعد الي صار لداخل "
" مانحبش نمشي لحتى بلاصة .. مانحب نرا حد اماان"
قرب مني و شدني من مرفقي يحكي " لازمك تخرج .. ساي الحكاية بش يجاها وقت و توفا و انت وقتها بش ترجع لحياتك .. و ماعندك علاه تخبي في وجهك هوما الي لازمهم يتخباو بعد الي سمعتو منك الداخل .. لازم هوما يحشمو من عملتهم "
حسيت براحة بعد كلامو غشي و حقدي عليه حسيتو في لحظة تلاشى .. بعد الي عملو قررت اني نعطيه فرصة و نسمعو بش نحاول نصدقو مدام ثنيتنا وحدة لازمني نحاول نامنلو ونلغي خوفي منو تبسمتلو نحكي
" باهي .. هيا نمشيو "
اول ماخرجنا و شدينا الثنية تكيت راسي لتالي و بقيت كل مرة نغزرلو .. الف سوال طرحتو في بالي .. اسئلة كان نلقى نفك الاجابة متاعهم منو بالوقت .. اول ماوقفت لكرهبة هزيت راسي عالبلاصة الي وقفنا فيها كانت عالبحر محلاها ضحكت من غير ما نشعر .. هبطت من الكرهبة و غمضت عينيا خذيت نفس مليت بيه رواريا .. قداه توحشتها الريحة هاذي .. تحرمت من كل شي حتى ابسط الحاجات الدنيا حرمتني منها .. هبطت دمعة من عينيا قبل مانمسحها حسيت بيد فوق خدي لقفتها و مسحتها حليت عينيا نلقاه قدامي يغزرلي رمشت عينيا فيسع بلعت ريقي و بعدت عليه شوي كيف يحكي " معادش تبكي .. نوعدك انو دموعك معادش تهبط .. انت بش تعوض كل حاجة ضاعت منك .. هياا امشي لازمك تفطر خرجت من غير فطور "
هزيتلو براسي اي مانجمتش نجاوبو .. الحركة الي عملها و كلامو خلاوني جامدة ماتوقعتش حاجة هكاكا منو .. قدمت معاه لطاولة وين ماكانت خالتي قاعدة قعدت مقابلتو غزرلي يحكي " شنوة تحب تاكل ؟ "
هزيتلو بكتافي الزوز نحكي " مانعرفش اي حاجة "
تبسملي و نادا للراجل طلبنا الفطور و بقينا ناكلو من غير حتى كلمة .. كسرت الصمت الي كنا فيه كيف غزرتلو نحكي "ليث .. ميسالش نمشي نقعد شوي عالبحر "
غزرت لخالتي الي تكلمت " الدنيا بدات تبرد تو تمرض "
" اماان خالتي.. حاسة روحي متوحشة البحر .. توحشت الدنياا الكل .. اماان "
تلفتتلو كيف جاوبني " خلاهاا رفيقة .. براا اما رد بالك "
اول ما سمحلي قمت نجري ناحيت البحر حسيت روحي تحررت بعد سنين .. توحشت الحرية توحشت اني ناخذ نفس من غير خوف .. ناحيت سبادريا و قدمت للماء .. خرجت مني ضحكة بالقوي عالماء الي دغدغني و الاحساس الي حسيتو وقتها .. حالتي الي كنت فيها البارح حسيتها تمحات في لحظة ليث عرف كيفاه ينسيني في ليلة البارح و الي عشتوو .. غمضت عينيا وحليت يديا الزوز  بقيت نستحلى في النسمة الي تضرب فياا .. عاودت حليتهم على صوتو ورايا يحكي " علاه ماقلتش الي انا جبرتك بالعرس هذا في المحكمة علاه حكيت هكاكا ؟؟"
غزرتلو كان مربع يديه و يغزرلي قدمتلو نحكي " خاطر هذيكا لحقيقة .. انت صحيح هددتني اما انا اخترتك بارادتي .. مستحيل كان كنت انجم نضرك بالكذب و لا نخليك تتحاسب على حاجة انت معملتهاش "
كملت كلامي و عطيتو بظهري رجعت للماء حسيت بيه كيف قرب مني يحكي " و تو تحس في روحك مرتاحة قمر ؟؟ "
دورت راسي ناحيتو تبسمتلو نحكي " اي مرتاحة .. عندي قداه ماحسيتش هكاا " قدمت بخطواتي ناحيتو نحكي " فكرة اني خذيت الخطوة هاذي مرة اخرى و بش ناخذ حقي و اني نرجع لحياتي خلاتني مرتاحة .. الي ..الي عملتو انت و انك وفيت بوعدك الثاني ليا خلاني مرتاحة رغم الي صار البارح "
" الي صار البارح و الي خليتك تعيشو صدقني ما تمنيتوش ا.."
قصيت عليه نحكي " انا مستعدة ننسى اي كلمة سمعتها منها هي .. المهم اوعدني انك ماتكذبش علياا .. انك ماتخلينيش نندم اني بش ناثق فيك مرة اخرى ليث "
" نوعدك و رحمة بابا و امي نوعدك "
بلعت ريقي و عضيت على شفايفي نحكي
" ليث ميسالش نسالك حاجة ؟؟"
" بالطبيعة "
" انت علاه خبيت علياا؟؟ .. و علاه رضيت تاقف قدام عايلتك على خاطر وحدة ماتعرفهاش "
عدا بيديه على وجه وخذا نفس بالقوي يحكي " خبيت عليك خاطر خفت لا يمشي في بالك الي انا كيفهم و كيف ايهم .. اما و الله كنت بش نحكيلك كنت بش نفهمك اما في الوقت المناسب .. " عينيه زغللت بدموع كمل يحكي " وكيف ما قتلك البارح انت ماتعرفنيش .. هوما عايلتي اما عمرهم مكانو قرابلي قمر .. انا منهم هوما مشيت في الف ثنية انا كنت رافضها.. و المرة هاذي مانجمتش نكمل نمشي .. كان لازمني ناقف معااك و نحميك من شرهم .. تتفكر وقتلي جيتك لداركم و قتلك انا اكثر واحد نعرفهم شنوة ينجمو يعملولك .. وقتها كلامي صحيح .. انا نعرفهم مليح و ماكنتش انجم نخليهم يعملولك هكاكا .. قمر صدقني انا مغدرتكش و ماعرستش بيك على خاطر ايهم .. بالعكس انا عملت و قاعد نعمل في هذا الكل على خاطرك و على خاطر روحي زادة .. حتى انا نحب نتحرر منهم نحب نبعد .. انا طالب منك حاجة وحدة صحيح معادش عندي الحق فيها بعد الي صار اما لاخر مرة .. اثق فيااا و صدقني و النهار الي نخون فيه ثقتك وقتها اعمل فيا الي تحب انا راضي .. "
" انا صدقتك من ليلة البارح كيف كلمتني .. حاجة اقوى مني خلاتني نصدقك .. الي صاار الكل بش نتعدوه و بش نحاول ننسا و نبرأ .. انت و رفيقة معايا مش هكاا .. ا.. انتوما ع..عايلتي تو مش هكاا ؟؟"
تبسملي يحكي " بالطبيعة عايلتك... احنا معاك مستحيل كان نخليوك وحدك .." حط يدو على كتفي يحكي
" هياا نمشيو الدنيا بردت تو تمرض "
هزيتلو براسي باهي و مشيت معاه .. بعد الي صااار الكل .. بقيت نمشي معاه من غير خوف و بثقة كاملة .. الكلام الي ريتو في عينيه خلاني نصدقو قبل الكلام الي خرج من فمو .. الوجيعة الي باينة عليه خلاتني نتأكد انو هو زادة تاعب و عانا في حياتو .. و كيف ماهو بش ياقف معايا و بش يمدلي يدو انا زادة مستعدة نمدلو يدي و نعاونو .. بالك نلقاو الشفاء في بعضنا .. بالك نتجاوزو الي صااار و ننساو كل شي مع بعضنا ..  بش نخلي كل شي للوقت هو وحدو كافي بش يداويلنا جروحنا ..