#ليث_يحكي
بعدتلها خصلة مش شعرة و طبست بستها للحظة هاذي مش مصدق اني عايش هذا مع قمر.. بقيت نعدي ف صوابعي على كامل بدنهاا و شفايفي مازالت ف شفايفها.. مالقيتش قوة بش نبعد علاهاا.. كل حاجة فيا قاعدة تجبد فيا ليها.. نزللت من شفايفها وغطست مابين رقبتها وصدرها.. الاحساس لي قاعد نعيش فيه تو خلاني ننسى كل شي ونركز معاها هي كهو.. حسيت روحي مش منجم نصبر عليها اكثر.. رعشة بدنهاا سراات في بدني من وراء صوابعي الي تعداو فوق فخذهاا وين نزلت المايو اكثر.. كبست علاهاا اكثر وبعدت شفايفي من علاهاا.. لحظتهاا دورت بعينيا عليها وبقيت نغزر لعيناها كيف كانو ذابلين وشفايفهاا لحمر والمنفخة من كثرة مانزلت علاهم.. هبطت بعينيا اكثر وركزتهم ف صدرها.. انفاسها السخونة الي ضربت فياا حسيتهم شعولني اكثر ما شعلت.. رجعت حشيت راسي ف رقبتها وبقيت نبوس فيها.. استغربت كيف سمعت صوتها لي كان واطي وفيه بحة
قمر :" ليث.. ا.. امان "
اول ما هزيت راسي معاها.. حسيت قلبي خض بالقاوي كيف ريتها مسكرة عيناها ودموعهاا نازلين على خدهاا.. هزت يداها الي كانو يرعشو و غطات صدرهاا.. حسيت روحي ترهوجت و انا نشوف ف حالتها الي وصلتلهاا.. جبدت روحي منها فيسع ووقومتها بعدتلها شعارتها الي كانو مغطين وجها وهزيتلها راسها نحكي
انا :" قمر حل عينيك واغزرلي.. اغزرلي يا روحي سايي وفات "
حلت عيناها فيا وطرشقت بالبكاء.. حضنت روحها اكثر وين بدنها زاد رعش.. لحظتها حسيت بالخوف سيطر علياامن وراء حالتها هاذي.. قدمتلها و هزيت الملحفة غطيتها بش تاخذ راحتها ودورت بيديا عليها جبدتها في حضني بقيت نمسح على شعرها من غير حتى كلمة اصلا حسيت روحي عجزت مش لاقي كلام نحكيه..
سمعتها كيف شهقت تحكي
قمر :" ل.. ليث سامحني.. م.. منجمتش.. "
انا :" شش.. يزي يا روحي وفات.. انت سامحني سامحني مانقصدش اني نضرك بالطريقة هاذي..صدقني"
قمر :" م مش ذنبك.. ا.. انا سبب.. رغم كل شي عملتو على خاطري.. انا مانجمت نعطيك ح.. حتى شي.. ص صدقني ا.. انا ن.. نحبك اما هذا رغم عني"
انا :" شش..قتلك يزي.. انت عطيتني كل شي نحلم بيه وقت عطيتني قلبك "
هزيتلها راسها ومسحتلها دموعها.. بستها على جبينها نحكي
انا :" يزي.. قمر.. دموعك هاذوما حرقوني.. كان انا مرغمتكش مكانش صار فيك هكا.. كان كنت نعرف لي بش نوصلك هكا.. عمري ما كنت بش نقربلك.. سامحني يا روحي "
قمر :" ل.. ليث امان متقولش هكا.. مفما حتى شي نسامحك عليه"
انا :" باهي قلي انت مليحة تو..تحب نجيبلك كاس ماء؟"
هزتلي براسها لا تحكي
قمر :" لا.. ن.. نحب نرتاح كهو "
هزيتلها براسي باهي من غير حتى كلمة.. قمت من حذاها خذيت روبة من دبشها وقربت منها نحكي
انا :" شد البس هاذي هكا ترتاح "
هزتلي براسهاا اي وشدتها من عندي.. حسيت روحي مش منجم نغزرلها وهي بالحالة هاذي خليتها ف البيت بش تبدل على راحتهاا ودخلت لبيت لبانو.. غسلت وجهي اكثر من مرة وباقي حاسس روحي مرهوج من الي صاار.. تكيت بيديا عالرخامة وهزيت راسي شوي وغزرت لروحي في المرايا.. بقيت نلوم في روحي على تسرعي.. ندمت لي استعجلت كان لازمني نتذكر انو لي تعدا عليها مش ساهل.. فرد وقت قلبي حسيتو وجعني عليها.. كان معايا وحست بالخوف هذا مالا كيفاش كانت حالتها يومها.. يا ريتني كنت نعرفها وقتها ولا نجمت نحميها من يديهم و ماخليتهاش تعيش هذا الكل.. خذيت نفس طويل حاولت نهدي بيه روحي شوي ورجعت للبيت.. ريتها كيف كانت متسطحة و سارحة بعيناهاا ف شباك.. غزرتها الضايعة حسيتها قسمتلي قلبي.. عديت بيديا على وجهي و قدمت بخطواتي ناحيتهاا..
قعدت على طرف السرير وغطيتهاا اكثر نحكي
انا :" غمض عينيك و حاول ترقد شوي.. انا هاني لبرا نخليك على راحتك "
هزت عيناها معاياا وحطت يداها فوق يدي تحكي
قمر :" ماتمشيش.. خليك حذاياا امان "
انا :" باهي هاني بجنبك.. غمض عينيك "
قمر :" م.. ميسالش تطلع حذاياا.. نحب نرقد عندك "
دورت بعينيا عليها من غير حتى كلمة.. حسيت روحي عاجز بش نرجع نقربلها مرة اخرى.. خفت لا ترجع تنفرني و تخاف من جديد.. فكرة انها تتعب من قربي ليها حسيتها خنقتني انا قبلهاا.. هزيتلهاا براسي باهي وتسطحت بجنبهاا.. دورت بيديا تحتها وجبدتهاا عندي.. بقيت نمسح على شعرها حتي حسيت صوت نفسها هدا.. طبست شوي شفتها كيف غفات.. رجعت تكيت براسي لتالي وغمضت عينيا حاولت نهدي روحي شوي اما مانجمتش باقي مخي معاهاا الي صار دقايق لتالي ماكنتش عامل حسابو.. يعني قد ماتخيلت ما تصورتش بش تتعب بالطريقة هاذي.. بقيت هكاكا نخمم حتى غفيت من غير ما نحس..
رجعت حليت عينيا على صوتهاا الي علاا تحتي.. ريتها كيف تنطرت من فوقي و بعدت علياا غطات بدنها بالملحفة ودموعهاا نازلين.. وجها كان عارق و بدنها يرعش بكلو.. شفايفها يرجفو.. قربتلهاا وحطيت يدي على خدهاا نحكي
انا :" اشش اهدى ماتخافش "
قربتلها اكثر ومديت يدي ناحيتهاا نحكي
انا :" كابوس و مشى.. ايجا عندي "
قربتلي شوي و تكات عالمخدة تحكي
قمر :" ليث شدني من يدي امان.. ماتسيبنيش "
شديتهاا من يداهاا و طلعت بيدي لخرى على جبينهاا.. لقيت سخانتهاا كانت طالعة.. هزيتها شوي نحكي
انا :" حاول تهز روحك وقوم معاياا "
كبست على يدي و بقات تطاوع فياا.. دورت بيديا على جنابهاا و بقيت نمشي فيهاا معاياا لبيت البانو.. كبست علاها أكثر و حليت السبالة.. غسلتهاا وجهاا ورقبتهاا.. بليت المنشفة و خليتها ف يدي ورجعنا للبيت.. سطحتهاا عالفرش بجنبي.. وحطيت المنشفة فوق جبينها نحكي
انا :" هاني بجنبك.. غمض عينيك و ارتاح "
قمر :" باهي "
غمضت عيناها بالوقت وغفات.. رجعت لبيت البانو بليت المنشفة مرة اخرى ورجعت بجنبها بقيت نغزرلها كيف كانت تهتري بكلام مش مفهوم.. طلعت بجنبهاا نكمدلهاا ف جبينهاا و سارح معاها.. لحظتها لعنت روحي الف مرة على لحالة لي وصلت ليها من وراياا.. انا الي خليتها تخاف مني في الوقت لي كان لازم نكون الامان ليها.. نعرف روحي تسرعت و ماخليتلهاش الوقت الكافي بش ترتاح و تكون حاضرة.. بقيت سارح معاهاا و نخمم شباش نعمل تو ولا كيفاه بش نجم نخليها تتحسن وتنسى الي صار...
حليت عينيا شوي شوي اول ماحسيتها بدات تتململ تحتي.. طبست راسي وعديت بصوابعي على خدها نحكي
انا :" صباح النور قمرتي "
هزت راسها معاياا ونزلتو بسرعة تحكي
قمر :" صباح الخير "
حطيت يدي على جبينهاا نشوف ف حرارتها نحكي
انا :" كيفاه تحس ف روحك ؟"
بعدت علياا وتقعدت.. رجعت شعرهاا لتالي وهربت غزرتها مني تحكي
قمر :" لباس "
انا :" باهي هيا قوم اغسل حالتك خليني نمشي نحضرلك حاجة تاكلها "
هزتلي براسها باهي من غير حتى كلمة.. عديت بيديا الزوز على وجهي وقمت.. خرجت من البيت و مشيت لبيت البانو الي كانت البرا حبيت نخليها على راحتها ف البيت مانزيدش نضغطها و لا نقلقها بوجودي..
غسلت حالتي و ريقلت اموري وخرجت ناحية للكوجينة بقيت نحضر ف الفطور ونخمم ف حالتها الي فاقت بيهاا.. كيفاه ماتحبش تغزرلي و لا تحكي.. للحظة خفت لا نلقاها رجعت لحالتها لقديمة وقتها مستحيل كان نسامح روحي.. فرد وقت بقيت حاير ف شنوة لازمني نعمل بش نخليها ترجع مليحة ونخليها تنسى الي صاار.. اول ما كملت هزيت الطبق ف يدي وخرجت لصالة.. لمحتها كيف كانت متسطحة عالفوتاي الي مقابل الشباك وسارحة بغزرتهاا.. حطيت الطبق عالطاولة نظمت الكاسات و الصحون.. وقدمتلهاا.. قعدت على طرف الطاولة مقابلها نحكي
انا :" هياا يا روحي افطر حضرت الماكلة الي تحبهاا "
قمر :" مانحبش ليث.. خليني متسطحة "
قمت من بلاصتي وشديتهاا من يداهاا نحكي
انا :" لا مانخليكش.. هياا قوم لازمك تاكل حاجة ماتبقاش هكاا "
فلتت يداها مني و قامت معاياا من غير حتى كلمة قدمنا ناحية الطاولة جبدتلها الكرسي نحكي
انا :" أيا اقعد "
قعدت مقابلتني.. حطيتلها كاسة القهوة قدامهاا و الصحن نحكي
انا :" نحبك تاكل هذا الكل "
هزتلي براسها باهي وطبست راسها.. بقيت نغزرلها كيفاه كانت تاكل مغصبة على روحهاا و ساكتة.. حتى انا حسيت شاهيتي طارت و انا نشوف فيها هكاا حسيت روحي مانجمت نستطعم شي.. تفكيري الكل بقى معاهاا هي تمنيت كان نعرف هي ف شنوة تخمم و شنوة سبب سكوتها هذاا.. اما كالعادة قمر تهرب بالطريقة هاذي ديما اما المرة هاذي ماحبيتش نلح علاها خاطر الي صار مش ساهل علاهاا و خاصة انها هكا من وراياا انا و هذا الي خلاني نفد اكثر.. هزيت راسي معاهاا اول ماقامت.. عقدت بحواجبي نحكي
انا :" شبيك قمت ؟ كمل افطر "
قمر:" شبعت .. ميسالش نخرج للبلكونة ؟"
انا :" برد عليك ياروحي "
قمر :" لا لا.. هاني لابسة مليح "
انا :" باهي برا "
بقيت نتبع فيها بعينيا حتى خرجت.. ماحبيتش ناقشها اكثر خليتها تتصرف على راحتهاا.. قمت من بلاصتي انا زادة لميت الطاولة ورجعت للبيت بدلت حوايجي ورجعتلهاا.. ريتها كيف مازالت قاعدة ف البلكونة وساكتة.. رجعت للبيت خذيت الكاب متاعها ورجعت عندها.. قدمت بخطواتي ناحيتها ووقفت وراهاا حطيتو على اكتافها نحكي
انا :" برد عليك.. لف روحك بهذا "
هزت راسها معايا شوي.. ورجعت تغزر قدامهاا كبست عالكاب تحكي
قمر :" عيشك "
جبدت الكرسي وقعدت بجنبها نحكي
انا :" وين تحب نمشيو ليوم ؟"
قمر:" لحتى بلاصة.. خلينا هناا "
انا :" علاش ؟ مش قلت تحب تشوف لبلاصة؟"
قمر :" معادش عيني ليث "
شديتها من يداها وكبست علاهاا نحكي
انا :" كيفاه ياروحي؟ هكا بش نعديو شهر العسل هناا من غير لا نخرجو "
غزرتلي وتبسمت على جنب تحكي
قمر :" شهر عسل ؟ مازال فيهاا شهر عسل ؟؟ "
غمضت عيناها ورجعت حليتهم وين دموعها نزلو يجريو على خدهاا تحكي
قمر:" انا خربت كلشي.. فسدت كلشي انت عملتو "
قامت من بلاصتها وعطاتني بظهرها دخلت تجري للصالة.. خلطت علاهاا ريتها كيف قعدت عالفوتاي
حطت يداها على وجها.. تنهدت بالقاوي وقربتلها قعدت بحذاها نحكي
انا :" ايجا ترااه "
دورت بيدي على جنبها وجبدتها في حضني نحكي
انا :" ششش.. يزي يا روحي.. شي ما فسد وماهيش حاجة لي لازم تبقى تفكر فيها.. خاطر معظم الازواج متصيرش بينهم لعلاقة اول ايامهم وعادي مش لازم تتقلق "
قمر :" م مش صحيح.. ا انا فسدت فرحتنا.. ح..حتى انت شوف حالتك كيفاه صارت من ورايا ديما بمشاكلي ديما حالتي هكا وانت تاعب معايا "
انا :" ششش قتلك شي ما فسد.. وكان على حالتي.. مش بسبتك.. اما نادم برشا.. كان مش انا لي ضغطت عليك مكنتش وصلتك لاحالة هاذي.. كان فما حد لازم يتلام هو انا "
هزت راسها معايا وحطت يدها على خدي تحكي
قمر :" لا ا..انت مغلطتش..ا..انا بلحق كنت نحب نصير مرتك..ا..اما منجمتش ليث "
بستها من كف يداها نحكي
انا :" انت بالاساس مرتي.. وفرحتي بيك مش بش تتقص بسبب الشي هذا صدقني.. وكان انت بلحق ماكش متغشة مني نحبك توريني ضحكتك تو خاطر انا عايش على الشي هذا اني نشوفك فرحانة ومطمانة "
بعدت علياا ونزلت راسها تحكي
قمر :" ا.. اما انا خايفة ليث "
انا :" من شنوة خايفة "
دورت وجها عليا وكملت تحكي بغصة
قمر :" ريت روحك كيفاش حبيت تمشي لبارح ومترقدش بجنبي.. ا.. انا خايفة انك تمل مني وتخليني "
حطيت يدي على دقنونتها ودورتلها وجها قدامي نحكي
انا :"مستحيل نمل منك ..انا جيست تصرفت هكاكا خاطر حتى انا خفت.. خفت انك تكرهني.. وتصير تخاف مني بعد ما كنت تطمن بوجودي "
رجعت مسحت دموعها لي تسيبو غزرتلي تحكي
قمر :" ا انا عمري ما بش نكرهك.. انا خايفة نخسر حبك ليا.. ب بلاكشي ح حالتي هاذي طولت.. شباش يصير وقتها "
انا :" انا مستعد نستناك حياتي لكل.. المهم منشوفش نظرة الخوف لي ريتها في عينيك لبارح.. تسمع فيا.. منحبكش تجبر روحك على شي خلي كلشي يجي في وقتو "
قمر :" ب.. بلحق ليث يعني انت مش متغشس مني وبش تبقا تحبني ؟"
حطيت يدي على خدهاا ومسحتلها دمعتها نحكي
انا :" والله منعرفش شكون لي متغشش تو.. اما نظن انا لي قاعد نلحلح بيك بش ترضى معناها انت لمتغشة "
ضحكت وغزرتلي تحكي
قمر :" هأه مش متغشة منك "
قرصتها من خشمها نحكي
انا :" مالا رضات حبي ؟"
قدمت مني وعنقتني بالقوي تحكي
قمر :" نحبك برشا ليث "
كبست عليها في حضني وبستها من راسها نحكي
انا :" وانا نحبك قمر"
بعدت عليا وتبسمتلي تحكي
قمر :" ليث.. مزلت تحبنا نخرجو ؟"
انا :" علاش قاعد نقنع فيك من ساعة.. برا البس فيسع" ضحكت وقامت من جنبي تجري وقفت رجعت باستني من خدي ورجعت طلعت للبيت تجري.. بقيت نضحك على عملتها.. تو وين حسيت اني تنفست مرتاح كيف شفتها رجعت لاباس وما صارش فيها كيف قبل..
قمت من بلاصتي انا زادة وخلطت علاها للبيت.. دقيت الباب نحكي
انا :" قمر ندخل "
قمر :" اي يا روحي "
دورت لبواني ودخلت ريتهاا كيف غيرت ثيابها و قاعدة قدام لكوافوز تمشط ف شعرهاا.. قربتلهاا ووقفت وراهاا غزرتلهاا من لمراياا و حطيت يدي على شعرهاا نحكي
انا :" محلاك قمرتي.. نحبك ديما تضحك وفرحانة هكا "
تبسمت ودارتلي تحكي
قمر :" انا ديما فرحانة مدامك انت معاياا "
انا :" انا بش نبقى حياتي لكل معاك قمرتي "
بستها من جبينها وبعدت علاهاا نحكي
انا :" هياا كمل احضر فيسع ودفي روحك مليح "
قمر :" باهي يا روحي "
خليتها ف البيت ودخلت البيت البانو كملت حضرت روحي فيسع وخرجت.. لقيتها هي زادة حاضرة قريتلها نحكي
انا :" نمشيو ؟"
قمر :" اي هياا "
شديتها من يداها وخرجنا.. غزرتلها كيف تحكي
قمر :" قلي ساعة وين ماشيين "
تبسمت على جنب نحكي
انا :" حتى انا استغربت خاطرك ماسالتش "
قمر :" ههه باهي قلي "
حليتلها بابا الكرهبة نحكي
انا :" اطلع كيف نوصلو تو تعرف "
خليتها طلعت سكرت الباب ودورت الناحية لاخرى طلعت بجنبها خدمت الكرهبة وشديت الثنية.. شفتها كيف كانت تغزر من البلار للطريق وتتبسم وحدهاا.. شديتهاا من يداها بستها منها.. غزرتلي تحكي
قمر :" ليث نقلك حاجة ؟"
انا :" اي قلي "
قمر :" يا ريتنا نبقاو هناا حياتنا الكل.. انا و انت كهو ف البلاصة هاذي "
انا :" علاش ماتحبش نرجعو لدارنا الي حضرناها ؟"
قمر :" لا نحب بالطبيعة.. اما حسيت روحي مرتاحة هناا"
انا :" كيف تحب ترجع هنا انت قلي برك و انا نرجعك "
قمر :" عيشك يا روحي "
انا :" وزيد احنا مازالنا بش نبقاو هناا ايامات.. نحبك تستمع و ترتاح "
تبسمتلي و هزتلي براسها باهي.. اشرتلها بعينيا نحكي
انا :" ايجا عندي تراه "
قربتلي فيسع وحطت راسها فوق صدري.. بستها من راسها وبقيت نسوق.. شوي وقت ووصلنا اول ما شديت فران ريتها كيف بعدت علياا وهزت راسهاا تغزر للبلاصة.. غزرتلها نحكي
انا :" أيا اهبط حبي "
هزتلي براسها باهي و نزلت.. نزلت وراهاا بقيت نغزرلها كيف دور بعيناها عالبلاصة.. قربتلهاا وقفت وراهاا دورت بيديا عليها وجبدتها عندي نحكي
انا :" اليوم بش نتزلج انا و مرتي "
دارتلي ونفخت بالقاوي تحكي
قمر :" اففف.. منعرفش نتزلج زادة.. انت ما تختار كان الحاجات الصعيبة"
انا :" ماهيش صعيبة انا تو نعلمك.. تو تشوف ساهلة لحكاية "
قمر :" باهي هاني نتبع فيك "
بعدت علاهاا وقربت للكرهبة حليت الباب وجبدت أحذية التزلج.. قربتلها نحكي
انا :" شد البس هذا ساعة "
خذاتو من يدي وعقدت بحواجبهاا تحكي
قمر :" كيفاه بش نتحرك بيه انا هذا.. نخاف ليث "
انا :" ماعندك علاش تخاف.. ساهلة.. انت البس و انا هاني معاك مستحيل نسيبك "
قمر :" باهي هاني بش نتبعك ونشوف "
ضحكت على كلمتها وقربتلهاا نحكي
انا :" والبس الخوذة والقفازات هاذم زادة "
قمر :" باهي هات "
ريتهاا كيف قربت للكرهبة تكات علاهاا وبقات تلبس فيهم.. بقيت انا زادة حتى سمعتها تحكي
قمر :" يا ليث ايجا شدني امان "
ضحكت وقربتلها فيسع شديتها من يداها نحكي
انا :" ماتخافش.. جيست تبعني "
قمر:" باهي اما امان ماتسيبنيش "
انا :" اي هاني معاك "
بقيت شدها من يداها و نحرك فيها معاياا.. تبسمت نحكي
انا :" أيا شد روحك حبي "
ماخليتهاش تجاوبني و جبدتهاا معايا بالقوي سمعتهاا كيف صاحت تحكي
قمر :" لا يا ليث اماان بالشوي .. بش نطيح "
انا :" لا ماتطيحش ماتخافش.. غير انت سيب روحك "
قمر :" باهي "
انا :" تو بس نسيبك و هاني وراك.. انت ارخف روحك و ابقى تبعني "
قمر :" باهي نحاول "
سيبتلها يدها شوي و خليتها تحاول وحدهاا.. ريتها كيف كانت تحاول تبقى واقفة وبقات تتزلج.. تبسمت نحكي
انا :" اي صحيت قمرتي.. هاك تعلمت "
قمر :" أي اما خليك ورايا امان "
انا :" باهي يزي من التخرنين برك "
حليت عينيا اول ما ريتها طاحت.. قربتلها فيسع و طبست حذاهاا.. نحيتلها الخوذة نضحك نحكي
انا:" ههه فيسع ماطحت؟ و انا الي كنت نشكر فيك "
طلعت يداها وناحتلي الخوذة متاعي تحكي
قمر :" ياااا ليث قتلك صعيبة.. مستحيل نتعلم نعرف روحي "
انا :" انت الي ماتحبش اما هي ساهلة "
قمر :" ساهلة خاطر انت متعود مش كيفي الي مازلت نتعلم اول مرة.. و زيد انت ماتعرفش تعلم "
هزيت بحاجبي نحكي
انا :" بالله ؟ عندي ساعة نفهم فيك و انت ترعش "
قمر :" أمان يا ليث انا نرعش ؟"
انا :" ايي حبي.. ف الماء ترعش و ف الثلج ترعش و انا هاني موسع بالي معاك "
قمر :" باهي مالا معادش توسع بالك معايا.. مانحبكش تعلمني "
ضحكت نحكي
انا :" والله ظاهرلي بش نعدي عمري و انا نعلم فيك.. وشوف وشوف تتعلم زادة "
ريتها كيف هزت الثلج ف يداها و ضربتني بيه تحكي
قمر :" والله مبلدك ليث "
مسحت وجهي و ضيقت عينيا نحكي
انا :" شعملت انت؟ هكا تضربني ؟"
قمر :" اي تستاهل خاطرك تضحك علياا "
انا :" هاك جبتها لروحك.. ماتلومنيش عالي بش نعملو "
قمر :" شنوة بش تعمل زادة ؟"
انا:" هاك بش تشوف "
وقفت من بلاصتي وشديتها من يداها جبدتهاا بالقوي ووقفتها معاياا.. شديتهاا وبقيت نجري بيهاا بسرعة.. سمعتها كيف صاحت تحكي
قمر :" لييث اااقف شتعمللل يااليث اماااان ...والله نخاااف"
انا :" مش قتلك جبتها لروحك اتحمل نتيجة افعالك "
قمر :" باااهي سااامحني... اقف امان يا ليث "
وقفت وجبدتها عندي اكثر.. بعدتلها خصلات شعرها الي غطولها وجهها نحكي
انا :" مازلت تضرب هكاكا ؟"
هزتلي براسها لا تحكي
قمر :" لا والله لا آخر مرة "
دورت بعينيا علاها وضحكت على خشمها الي كان أحمر من البرد.. ذبلت عيناها فيا تحكي
قمر :" شبيك تضحك "
طبست راسي بستها من خشمها نحكي
انا :" نضحك على خشمك كيفاه صار احمر "
عضت على شفتها اللوطانية وطلعت على طراطيش صوابعها هزت يداها وعداتها على شعري تحكي
قمر :" الثلج بقى ف شعرك خليني نمسحلك "
دورت بيديا على جنابهاا و قربتهاا لياا شوي نحكي
انا:" شكون الي وصل الثلج غادي ؟"
قمر :" تي نفدلك معاك ليث ياخي بش تبقى مغشش ؟"
انا :" والله لازمك ترضيني حبي "
قمر :" قلي كيفاه نرضيك و انا مستعدة نرضيك "
هزيت بحاجبي نحكي
انا :" والله لازمك تتصرف وحدك "
نزلت يداها من شعري و حاوطتلي وجهي.. دورت بعيناها عليا و قربتلي.. حطت شفايفها فوق شفايفي باستني بالقوي.. بعدت علياا تنهج وتحكي
قمر :" حبيت نرضيك هكاا "
انا :" شقولك كان ديما تولي تغششني مالا.. نحبك ترضيني ديما "
قمر :" اممم والله انا موافقة اما على شرط نحبك انت زادة ترضيني "
عالكلمة نزلت علاهاا وغطست ف شفايفها.. كبست على جنبهاا اكثر و لزيتهاا لياا.. بقيت نبوس فيها من غير ما نقطع.. غمضت عينيا على يديها الي دارت وراء رقبتي و شفايفها الي تحركو بين شفايفي.. حسيت روحي مش قادر نبعد علاهاا كل حاجة فيها تجذب فياا اكثر.. جبدت روحي منها شوي وحطيت خشمي فوق خشمها نحكي
انا :" رضات حبي و لا مازالت "
رمشت عيناها برشة مرات تحكي
قمر:" اي رضيت هكاا "
ضحكت على كلمتها و بستها من جنب شفايفهاا نحكي
انا :" هياا خلينا نمشيو "
قمر :" باهي هياا "
بعدت علاهاا و لميت كل شي هزيتو ف يدي و شديتها من يداهاا بقينا نمشيو ناحية الكرهبة.. خليتها هي طلعت و انا كملت خبيت كل شي من تالي ورجعلتهاا طلعت بجنبها نحكي
انا :" شقولك غدوة نزيدو نرجعو ؟"
قمر :" لا لا خلينا نشوفو حاجة اخرى "
انا :" باهي تو نخمم ف برنامج آخر "
دارتلي و غزرتلي تترجى فيا بعيناها تحكي
قمر :" أمان يا روحي خلي برنامجك ساهل.. معادش نحب نتعلم شي "
ضحكت نحكي
انا :" باهي تو نشوف "
قمر :" هياا خلينا نمشيو بردت "
انا :" باهي حبي.. استنى "
حليت شوفاج الكرهبة نحكي
انا :" حل كبوطك بش ماتمرضش "
قمر :" باهي "
ريتها كيف عملت كيف ما قلتلها و تكات براسها عالكرسي.. خدمت الكرهبة وشديت ثنية.. بقيت نغزرلهاا كيفاه تتبسم و تغني مع الغناء الي ف الكرهبة.. شوفتها هكا قدامي حسيتها رجعت فياا روح.. خوفي لكل تلاشى اول ما ريت ضحكتها رجعت ترسمت ف وجهها..
بقيت ثنية كاملة نسوق و نغزرلها لدرجة اني ماحسيتش بالثنية.. اول ماوصلنا شديت فران وغزرتلها نحكي
انا :" أيا اهبط حبي "
هزتلي براسها باهي و نزلت.. خلطت علاهاا ودخلنا للشاليه.. ريتها كيف نحت كبوطها وغزرتلي تحكي
قمر :" برا انت ارتاح.. الليلة انا بش نحضر العشاء "
نحيت كبوطي انا زادة وقربتلها نحكي
انا :" ميسالش خلي عليك انت تو نحضر انا فيسع "
هزت بكتافها تحكي
قمر :" أمان ليث خليني انا نحضر لعشاء.. انت ديما مدللني .. نحب حتى انا ندللك شوي"
حكيت على جبيني نحكي
انا :" والله يا روحي انا نحبك تدللني اما انا نخاف لا ترصالنا بلا عشاء"
قمر :" شتقصد ...انا صحيح منعرفش نطبخ اطباق برشا اما فما لي نعرف نعملها والله ؟؟"
انا :" هاك تعترف "
حلت عيناها فيا وضربتني على صدري تحكي
قمر :" أمان ليث.. ساعة تو تذوق و تشوف "
طبست علاهاا شوي ودورت بعينيا على تفاصيل وجهو وركزتهم ف شفايفها نحكي
انا:" سايي انا ذقت و دخت من البنة "
قمر :" يا ليث يزي انا نحكي عالماكلة "
ضيقت عينيا فيها نحكي
انا :" اي حتي انا نحكي عالماكلة.. قلي مخك وين مشى انت ؟"
رمشت عيناها برشة مرات تحكي
قمر :" اه .. لا ماعندو وين مشى.. انا بش نمشي "
انا :" لوين زادة؟"
قمر :" بش نبدل دبشي و نمشي للكوجينة "
ريتها كيف عطاتني بظهرها ودخلت تجري.. عديت بيديا على شعري وخلطت علاهاا للبيت.. سمعت صوت السبالة عرفتها تدوش.. قربت للخزانة خذيت حوايجي ومشيت البيت الأخرى مانعرفش علاش حتى بعد ما تصلحت الأمور مازلت نحب نخليها على راحتها مانحبهاش تحس بضغط.. دخلت لبيت البانو عملت دوش خفيف و رجعت للبيت بدلت حوايجي وخرجت بش نشوفها وين.. اول ما خرجت سمعت صوت الحس ف المطبخ.. قربت شوي ووقفت قدام الباب تكيت عالحيط وبقيت نغزرلها كيفاه تتحرك.. كانت لابسة روبة قصيرة شعرها وراهاا مبلول و يتمايل وريحتها كالعادة اول حاجة توصلني منهاا..
خذيت نفس وقربت ناحيتهاا وقفت وراهاا وبستها من راسها نحكي
انا :" علاش مانشفتش شعرك تو تمرض ؟"
قمر :" لا دار دافية ماتخافش ياروحي "
بعدت علاهاا ووقفت بجنبها تكيت بظهري عالرخامة ودورت بعينيا علاها نحكي
انا :" شنوة بش تطيبلنا مرتي ؟"
قمر:" بش نحضر تالياتيلي "
هزيت بحاجبي نحكي
انا :" اممم اسمع يا سيدي.. اما ظاهرلي احنا من انواع المقرونة مش خارجين حبي "
غزرتلي على جنب وضحكت تحكي
قمر :" والله هذا الي لقيتو تو مفماش قضية "
انا :" قتلك لبارح هيا نقضيو ماحبيتش "
قمر :" ميسالش يا روحي نعديو رواحنا هنا هكا و كيف نرجعو لدارنا تو ندللك بحاجات اخرى "
حكيت على جبيني نحكي
انا :" والله مانقولش لاا نحب الدلال انا "
هبطت راسها فيسع و بقات تحضر ف الصوص.. تكيت عالرخامة و بقيت نغزرلها مانجمتش نبعد و لا نهبط عيني من علاهاا.. حسيت روحي نحب نعيش التفاصيل الكل معاهاا و نستغل كل دقيقة هي بجنبي بش نملي عينيا بشوفتها وانفاسي بريحتهااا.. شفتها كيف هزت المغرفة وقربتلي تحكي
قمر :" تراه ذوق "
حليت فمي وذقتهاا .. ضيقت عينيا فيها نحكي
انا :" شبيها هكاا ؟"
قمر :" خايبة ؟؟"
انا :" اي و ناقصة برشة حاجات.. قتلك خليني انا نحضرها "
قمر :" ساعة عملت كيف ماتفرجت بالضبط "
انا :" وين تفرجت ؟"
قمر :" ف الفيديو ماو الوصفة هاذي خذيتها من فيديو "
هزيت بحاجبي وضحكت نحكي
انا :" صااار تفرجت فيها ؟"
ريتها كيف حطت المغرفة ف فمهاا ذاقتها وغزرتلي تحكي
قمر :" تي والله مش ناقصة شي "
بقيت نغزر لصوص الي بقات شوي ف شفايفها..دورت بيديا عليها وجبدتها عندي كبست عليها وطبست راسي ناحيتها شوي.. بستها من شفايفها بوسة خفيفة نحكي
انا :" اممم تو صارت بنينة من شفايفك "
قمر :" يعني عجبتك ؟"
انا :" والله كان بش نبقى ناكلها كيف تو من شفايفك بش تعجبني اكثر "
دورت بيداها على رقبتي وغزرتلي ف عينيا تحكي
قمر :" حتى انا نتصور هكاكا تعجبني و تكون ابن "
انا :" شوف الفرخة كيفاه تعلمت ؟"
قمر :" والله قاعدة ناخذ ف دروس منك سي ليث "
انا :" قتلك الصباح ظاهرلي بش نبقى نعلم فيك حياتي الكل.. اما المرة هاذي الدرس نفع "
قمر :" امم نفع شوي "
قربت وحطيت شفافي على شفايفها لقيت روحي سرحت معاهم كاني اول مرة نبوسهاا.. كبست علاهاا اكثر ولزيتها لياا.. شفتها كيف حلت عيناها وبعدت عليا تنهج وتحكي
قمر :" يااا نسيت المقلاة.. من وراك بش نبقاو من غير عشاء "
انا :" ميسالش... اصلا انا شبعت تو "
قمر :" ليث يزي نحكي بلحق "
جبدتها عندي وحملتها حطيتها فوق الرخامة وقربتلها عديت بصبعي على شفايفاه نحكي
انا :" اي حتى انا نحكي بلحق "
رمشت عيناها برشة مرات تحكي
قمر :" والله لعشاء بش يتحر ... "
قصيت عليها كيف رجعت غطست ف شفايفها حسيت روحي مانجمتش نشبع منهاا.. يداها الي دارت وراياا وكبست على رقبتي وظهري خلاوني نزيد نجبدهاا لياا اكثر.. بعدت علاهاا ونزلتها ننهج ونحكي
انا :" برا تو شوف عشاك "
طلعت يداها ورجعت شعرها لتالي وهزتلي براسها باهي من غير حتى كلمة.. ضحكت على وجهها الي حمار نحكي
انا :" خليني انا نحضر الطاولة مدام انت كملت "
قمر :" باهي "
هزيت الكاسات والصحون وبقيت نحضر ف الطاولة.. ريتها كيف قدمتلي وحطت التالياتلي عالطاولة قعدنا مع بعضناا.. ريتها كيف ملاتلي صحني تحكي
قمر :" تفضل ياروحي "
انا :" عيشك قمرتي "
بقينا نتعشى ونغزر لوجهها كيفاه يتبسم عكس الصباح...
شديتها من يداها نحكي
انا :" شقولك بعد لعشاء نحطو فيلم ؟"
قمر :" اي فكرة.. اما على شرط انا نختار الفيلم "
انا :" باهي لالة"
قمر :" ههه ربي يخليك ليا "
اول ماكملنا عشاء ريتها كيف قامت بش تلم الطاولة.. وقفت معااها نحكي
انا :" خلي عليك تو انا نلم كل شي.. برا انت لصالة و اختار الفيلم "
باستني من خدي تحكي
قمر :" باهي عيشك ياروحي "
ريتها كيف مشات تجري لصالة.. بقيت نلم ف الطاولة ومشيت للكوجينة غسلت الصحون و حضرت فشار.. هزيتو وخرجت ناحية الصالة.. تبسمت و انا نشوف فيها مطبسة على ركايبها و تختار ف الفيلم.. قربتلهاا نحكي
انا :" انا كملت كل شي و انت لتو تختار "
هزت راسها معايا ووراتني زوز افلام تحكي
قمر :" والله حرت بين هاذم الزوز مش عارفة شنوة نختار "
حطيت الفشار عالطاولة وطبست حذاها نحكي
انا :" استنى خليني نختار معاك "
قمر :" لا نحب انا نختار.. شقولك نحطو هذا ؟"
انا :" تو نختار و نقول رأيي و لا انت تختار ؟"
قمر :" باهي تراه قلي رايك "
قمر :" خلينا نحطو هذا خاطرو رومانسي و غدوة نحطو لاخر شقولك ؟"
قمر :" اي فكرة "
غزرت لطاولة رجعت غزرتلي تحكي
قمر :" ياا حضرت الفشار زادة "
انا :"اي أيا قوم طفي الضو خليني نحط الفيلم "
قمر :" حاضر يا روحي "
ريتها كيف قامت طفات الضو و قعدت عالفوتاي.. كملت حطيت الفيلم وقربتلهاا ريتها كيف هزت راسها معاياا تحكي
قمر :" ايجا حذاياا "
قعدت بجنبهاا و قرصتها من خدها نحكي
انا :" و انا عندي بلاصة أخرى غير حذاك "
ريتها كيف ضحكت ودارتلي حطت يداها على خدي تحكي
قمر :" تعرف ليث فما برشة حاجات مازالت مانعرفهمش عليك "
دورت بعينيا عليها نحكي
انا :" قلي شنوة تحب تعرف و انا تو نحكيلك "
قمر :" مانعرفش يعني احكيلي على فترة قرايتك مثال و لا على اصحابك و شنوة اكثر حاجة تحبها حاجات هكا "
انا :" قرايتي كانت بين تونس و فرنسا.. جات فترة ف حياتي مانجمتش نبقى هناا على هذاكا سافرت "
قمر :" و بقيت عايش وحدك لبرا ؟"
انا :" اول فترة كان معاياا صاحبي إيطالي الي حكيتلك عليه مرة و بعد صرت نعيش وحدي.. حضرت بيروياا غادي و داري "
قمر :" يعني انت عندك دار غادي ؟"
انا :" اي و خدمتي مازالت شطرها غادي زادة.. كيف يوفى كل شي ناوي نسافر انا وياك و نمشيو قمرتي و كان تحب نستقرو غادي زادة"
قمر :" لا مانحبش خليناا هناا يعني مانجمش نبعد على خالتي زادة.. اما ميسالش نسافرو فترة نحب نشوف دارك غادي "
انا :" تدلل يا روحي "
قمر :" كيف كنت عايش غادي.. يعني كنت ديما وحدك ؟"
انا :" مافهمتكش؟ "
قمر :" يعني نقصد.. كان عندك شكون غادي ؟"
انا :" اي كانو فما صحابي "
ريتها كيف نفخت و كشبرت وجهها تحكي
قمر :" لا يا ليث غير اصحابك.. يعني مفماش شكون غادي حبيتها و لا حبتك "
هزيت حواجبي و ضحكت نحكي
انا :" اه فهمتك تو.. هو كان اما لحكاية قديمة عندها سنين تو "
قمر :" يعني انت حبيت قبلي؟؟ "
انا :" اي و حتى كنت ناوي نعرس بيها زادة "
قمر :" بلحق ؟؟"
انا :" اي.. كانت طفلة فرنساوية كانت يااسر مزيانة "
دورت بعيناها علياا تحكي
قمر :" عالظاهر مازلت مانسيتهاش "
انا :" كيفاش ننسى اول طفلة حبيتها ؟"
حلت عيناها فيا تحكي
قمر :"بربي سي ليث... قاعد تقول فيها في وجهي زادة "
دورت بيديا عليها وجبدتها عندي نحكي
انا :" شبيك غرت ؟"
قمر :" علاش بش نغير ؟ "
انا :" مانعرفش هكا حسيت.. مالا مدامك ماغرتش كيف نمشيو لفرنسا نعرفك بيها... "
بعدت علياا وغزرتلي تحكي
قمر :" يعني كيف سافرت آخر مرة ريتها ؟؟"
انا :" اي "
قمر :" ما نحب لا نتعرف عليها و ولا نحب نسافر من اصلو.. بش نبقى هناا انا و انت زادة بش تبقى هناا معاياا "
انا :" و خدمتي ؟"
قمر :" مايهمنيش "
انا :" هذا الكل و مش غايرة مالا ؟"
قمر :" باهي انا غايرة سافا هكاا.. و رد بالك تقابلها ليث هاني وصيتك والله ما نسامحك"
حلت عيناها فجاة ودارتلي بكلها تحكي
قمر :" ليثث "
عقدت بحواجبي نحكي
انا "شبيك "
قمر "تتفكر مرة خرجت انا وياك مشينا للمطعم الي عالشط.. وقتها انا سألتك كان انت حبيت شكون.. قتلي اي اما هي عمرها لا حبتك.. و انو انت ماتنجمش تحب غيرها .. تتفكر ؟؟"
انا :" اي نتفكر "
قمر :" انت وقتها تحكي عليها هي ؟ يعني وقتها انت مازلت تحبها هي و تخمم فيها ؟"
ضحكت وغزرتلها نحكي
انا :" ههه ماعنتها منسيتهاش لحكاية.. متخافش..مفما لا فرنساوية ولا غيرها انت كنت اول حب في حياتي وبش تكون اخر وحدة"
قحرتلي تحكي
قمر :" هآه تكذب.. انت يومها قتلي فما وحدة "
شديتها من يداها وكبست علاهاا نحكي
انا :" انا وقتها نحكي عليك انت..على هاذاكا ديما نقلك انت طيبة وعلى نياتك خاطر كان وحدة اخرى في بلاصتك.. راهي عرفت لي نقصدها من نظرتي كهو "
قمر :" ب.. لحق ؟ يعني انت حبيتني من وقتهاا ؟"
انا :" انا حبيتك حتى قبل الوقت هذاكا.. اما مانجمتش نقلك خاطرني كنت خايف منك وعليك.. وقتها كنت راضي نبقى نحب فيك من بعيد المهم انت تكون قريبتلي.. شهور عديتهم نخمم فيك و نخمم كيف توفى لحكاية و تبعد علياا شنوة بش نعمل كيما كنت متاكد انو بعدك انت مستحيل كان نحب مرة اخرى "
قمر :" ليث...تعرف.. انا صحيح ماكنتش نعرف حقيقة مشاعري ناحيتك اما صدقني غرت.. فكرة انك تحب وحدة أخرى خلاتني نخاف لا تبعد علياا.. خصوصا بعد كلام عم مصطفى كيف قال يحبك تعرس ويشوف صغارك.. خفت لا بلحق هذا يصير ونخسرك "
انا :" انا مستحيل كان نحب غيرك و لا صغاري يكونو من مرا غيرك "
نزلت راسها ووطات في صوتها تحكي
قمر :" زعمة حياتنا بش تصير كيف ما انت متخيلهاا ؟'
هزيتلها راسها نحكي
انا :" اكييد قمرتي "
قمر :" انا بش نبقى ديما معاك مستحيل كان نسمح لأي حكاية تفرقنا من جديد "
بستها من يداها نحكي
انا :" اكيد يا روحي مهما يصير انا معادش بش نسلم فيك.. بش نتعلمو نواجهو كل شي مع بعضناا و انت بش تتعلم انو مهما تشوف و مهما تسمع بش تهرب عندي انا قبل من غير ما تتردد لحظة "
قمر :" نعرف اصلا انا تعلمت من غلطتي وقتهاا "
انا :" الي صار صار "
قمر :" باهي نسألك اخر سوال ؟"
انا :" أسأل "
قمر :" اما مانحبكش تفهمني بالغالط و لا تتغشش مني "
انا :" احكي قمر "
قمر :" الفيديو الي وراهولي خالك.. ش..؟"
قصيت علاها نحكي
انا :" الي ريتو ف الفيديو صحيح اما لازمك تعرف انو انا اخترت الطريق هاذيك مجبور وقتها ..وضعيف .. قتلك قبل انت كنتلي الدافع والمخرج من الحياة هذيكا ..انت لي عطيتني القوة بش نواجهم "
قربت مني وعدات بيدها على خدي تحكي
قمر :" انا متأكدة ليث انو الي صار لكل من وراء خالك.. ليث الي نعرفو انا و حبيتو مستحيل كان ينجم يعمل هكاا هو الي خلاك تغلط و تشق طريق غالط"
انا :" صحيح يمكن الي صار لكل وقتها من وراء خالي.. و صدقني بقيت عايش حياتي نادم عالشي الي عملتو.. اما بعد ما عرفت لي هو كان سبب في مقتل عيلتي عمري ما بش نندم "
قمر :" الي صار صار ليث اما اوعدني مدام حكاية عيلتك مازلت مفتوحة ماترجعش تغلط هكاكا "
غزرتلها على جنب نفخت نحكي
انا :"سكر على لموضوع تو "
قمر :" و الفيديو ليث ؟ مش بقى عند خالك يعني ينجم ف اي وقت يضرك بيه.. هو وقتها قلي بش يهزو لشرطة "
انا :" قالك هكاك خاطر عارفك بش تصدقو.. والحقيقة لي ما ينجم يعمله شي خاطر يعرف كان بش يشكي بياا..هو اول واحد بش يمشي فيها "
قمر :" يعني هو وقتها كذب عليااا ؟"
انا :" اي كان جيت و حكيتلي راني قتلك ماتخافش ماعندو لوين يوصل "
قمر :" اما وقتها انا خفت عليك حسيت عينيا ظلامت ليث.. هو هددني انو بش يخليك تخسر كل شي و يقتلك وقتها كنت مستعدة نعمل كل شي و ماتتمسش شعرة منك "
هزيت يدي و مسحتلها دمعتها الي نزلت بصبعي نحكي
انا :" علاش الدموع تو؟ احنا نحكيو كهو.. ولي نحبك تفهمو معاد تعمل حتى شي بلا علمي "
قمر :" و مع هذا ديما رد بالك على روحك صدقني ليث مانجمش نعيش كان انت تصيرلك حاجة "
دورت بيديا عليها وجبدتها عندي نحكي
انا :" ماتخافش قمرتي يزي من لبكا "
قمر :" باهي "
انا :" فما سوال اخر ؟"
قمر :" لا يزي لليلة "
انا :" يعني نخدم الفيلم؟؟"
بعدت علياا تحكي
قمر:" ههههه... نسيت الفيلم انا "
انا :" عديناها ليلة صراحة من وراك "
قمر :" اي حبيت نعرفك اكثر ميسالش ؟"
بستها من خدها نحكي
انا :" اكيد ميسالش.. أيا ايجا عندي تراه "
قمر :" لا نحبك انت الي تتكا عندي "
انا :" والله مانقولش لا.. حتى انا تعبت ليوم من وراك "
عوجت شفافها وغزرتلي تحكي
قمر :"والله مش مشكلتي انت لي حبيت تمشي غادي"
انا :" شوف لفرخة كيف طلع عندها لسان "
خدمت الفيلم و تكيت حطيت راسي فوق ساقيهاا و بقيت نتفرج.. تبسمت على يداها الي تحطت فوق شعري تمسح عليه سمعتها تحكي
قمر :" حل فمك تراه "
ضحكت على كلمتها وبقيت ناكل من يداها ف الفشار..
رغم كل شي صار ليلة لبارح حسيت روحي ارتحت شوي انو الأمور ماكبرتش اكثر من هكاا.. و إنو لأول مرة انا وقمر ناقشناا الوضع و حكينا.. خاطر هكا الي كان لازم يصير اغلاط الماضي مانحبهمش يتكررو.. بش نخلي علاقتنا المرة هاذي واضحة.. كيما مستحيل نرجع نخبي عليها شي سوى يخص الماضي و لا الي بش يصير ف المستقبل..
#قمر_تحكي
ايامات تعداو علينا هوني.. كانو من احلى ايام حياتي.. ليث خلاني نعرف معنى السعادة و لامان من جديد.. و خلاني ننسى كل شي تعدينا بيه.. محيت كل ذكرى خايبة عشتها معاه و عوضتها بالايامات الي عشتهم هناا.. رغم الخوف الي بقى مسيطر علياا من وراء الليلة هاكي.. خوفي من اني مانجمش نتعدا لحكاية هاذي ونبقى حارمتو من حقو.. فكرة انو ممكن يمل مني شي نهار مخليتني خايفة على هذاكا انا مستعدة نعمل كل شي المهم مانعيشش خسارة ليث من جديد...
هزيت راسي شوي مع لمراياا وغزرت لروحي و لروبة الي كنت لابستها.. قعدت عالكرسي وكملت اخر لمسات ف الماكياج.. فردت شعري حطيتو على جنب ووقفت.. ريتو كيف خرج من بيت البانو بعد ماحضر روحو هو زادة.. قرب مني شوي ودور بعينيه عليا يحكي
ليث :" صحة قمرتي ياسر محلاك "
انا :" عيشك يا روحي.. انت زادة محلاك "
ليث :" حاضرة خلينا نمشيو ؟"
انا :" ليث.. ميسالش ساعة تقفلي القلادة مانجمتش وحدي "
ليث :" اكييد قمرتي "
حطيت القلادة ف يديه عطيتو بظهري و هزيت شعري شوي.. حسيت بيديه كيف دارت علياا ولبسهالي.. غمضت عينيا على شفايفو الي باستنى بوسة خفيفة من رقبتي.. حط يديه على زنودي ورجع دورني ليه يحكي
ليث :" مابنك قمرتي و مابن ريحتك "
تبسمت وعضيت على شفايفي نحكي
انا :" عيشك "
قرصني من خشمي وضحك يحكي
ليث :" هيا خلينا نمشيو "
شدني من يدي وخرجناا من البيت.. هزيت راسي معاه نحكي
انا :" علاش ماتحبش تقلي وين بش تتعشاو ؟"
ليث :" تو كيل نوصلو تعرف وين حبي "
خذيت كبوطي لبستو وخرجنا مع بعضناا.. تبسمت كيف ريتو فتحلي باب الكرهبة يحكي
ليث :" تفضل حبي "
انا :" مرسي يا روحي "
طلعت ف الكرهبة وسكرت الباب.. ريتو كيف دار ناحيتي وطلع بجنبي.. دورت بكلي ناحيتو نحكي
انا :" تعرف ليث هاذم احلى ايامات ف حياتي "
ليث :" اياماتنا الكل بش يتعداو هكا قميرة.. سوى هنا و لا كيف نرجعو لدارنا "
انا :" قداه مازلنا بش نبقاو هنا ؟"
ليث :" يمكن اسبوع اخر.. و كان تحب أكثر ميسالش "
انا :" لا اسبوع يكفي.. كلمتني خالتي و لازمني نكون بجنبها خاطرها قريب تولد "
ليث :" باهي كيف ماتحب يا روحي"
تبسمتلو ورجعت استويت ف قعدتي.. بقيت نغزر لطريق كيفاه ضاوي و لثلج لمغطي الاشجار.. حسيت براحة غريبة هناا.. لقيت روحي نسيت كل شي تعديت بيه.. هزيت راسي مع الكرهبة كيف وقفت.. دورت بعينيا عالمطعم الي وقفنا قدامو ورجعن غزرتلو كيف يحكي
ليث :" أيا اهبط هانا وصلنا "
حليت الباب ونزلت.. دار ناحيتي وقدملي شدني من يدي ودخلنا مع بعضناا.. قدمنا ناحية الطاولة الي كانت محجوزة ليناا مقابلة للبحر.. جبدلي الكرسي يحكي
ليث :" تفضل يا روحي "
نحيت كبوطي حطيتو على جنب وقعدت وين هو قعد مقابلني.. ريتو كيف خذا المينيو وحطو قدامي يحكي
ليث :" أيا شوف وقلي شنوة تحب تاكل قمرتي "
خذيتو من يديه فتحتو وبقيت نقرأ.. كملنا اخترنا عشانا و طلبناه من السرفور.. غزرتلو كيف يحكي
ليث :" عجبك المطعم ؟"
انا :" عاللخر ليث.. اصلا كل بلاصة زرناها هناا كانت محلاهاا.. معاك انت عشت و شفت حاجات ماكنتش نتخيل اني بش نعيشهم "
شدني من يدي وتبسملي يحكي
ليث :" ومازلت بش تعيش برشة حاجات معاياا.. عندنا حياة طويلة قدامنا بش نعيش و نحققلك اي حاجة تتمناها "
انا :" ربي يخليك لياا يا روحي.. انا اصلا تو عايشة ف اكثر حلمة تمنيتها "
ليث :" و يخليك لياا انت زادة "
ريت السرفور كيف قرب منا حط الاطباق عالطاولة ومشى.. هزيت راسي معاه يحكي
ليث :" أيا تعشى قمرتي "
انا :" ليث ميسالش بعد لعشاء نخرجو شوي و نبقاو عالشط ؟"
ليث:" مش برد عليك ؟"
انا :" لا تو نلبس كبوطي "
اشرتلو بيديا عالمركب الي كان عالشط ورجعت نحكي
انا :" نحب نقعد غادي شوي "
ليث:" باهي يا روحي "
بقينا نتعشاو وكل مرة نحكيو ف حاجة ونضحكو.. حتى بعد الايامات هاذم الكل حاسة روحي مازلت مش مصدقة السعادة الي انا فيها.. كل شي معاه كيف الحلمة حتى أقل حاجة معاه نحسهاا تخليني ف عالم آخر و شايخة..
نزلت لمغرفة من يدي و غزرتلو نحكي
انا :" ليث خلينا نمشيو "
ليث :" كمل عشاك ساعة "
انا :" شبعت والله "
ليث :" باهي حبي .. هياا "
قمت من بلاصتي وخذيت كبوطي.. قدمت معاه وين خلصنا وخرجناا.. لبست كبوطي وقربتلو شديت ف يديه يحكي
انا :" محلاها النسمة لبرا "
دور بيديه عليا وجبدني عندو.. بقينا نمشيو حتى وصلنا للشط.. قربنا ناحية المركب قعدنا فوقو وين بقينا نغزرو للبحر.. حطيت راسي على صدرو وين هو دور بيديه عليا وقربني ليه اكثر نحكي
انا :" محلاها لبلاصة.. تعرف انو كل ما نشوف لبحر نتفكر اول ايامات ليناا.. يعني خاطر هو اول بلاصة جمعتنا و حكينا فيهاا.. على هذاكا انا نحس براحة غريبة و انا نغزرلو "
ليث :" من هنا لقدام اي بلاصة بش تجمعنا بش نخليو فيها ذكرى باهية "
انا :" نحبك برشة ليث برشة "
ضحك يحكي
ليث :" و انا نموت عليك قمرتي "
عالكلمة قربتلو فيسع وترميت عليه عنقتو وحشيت راسي في رقبتو.. حسيت روحي ارتحت اول ما شميت ريحتو و حسيت بدفا حضنو.. يديه الي كانت تمسح على شعري وظهري خلاوني نحس براحة غريبة.. بعدت عليه شوي وغزرتلو ف عينيه.. دور بعينيه عليا هو زادة وركزهم على شفايفي.. طبس علياا وباسني منهم غمضت عينيا وين دقات قلبي قوات اكثر من ملسمهم الي هزني لدنيا اخرى..طلعت يدي دورتها على رقبتو ولزيتو ليا اكثر.. حسيت روحي سرحت معاه و مع النسمة لخفيفة الي كانت تضرب فياا..
بعد علياا ينهج اول ماسمع صوت التاليفون كيف نوقز.. بعدت عليه شوي وعديت بيديا الزوز على وجهي.. ريتو كيف جبد التاليفون من جيبو وغزر مستغرب للرقم.. عقدت بحواجبي نحكي
انا :" شكون يطلب فيك الوقت هذا ؟"
ليث :" دقيقة.. شوي ونرجعلك "
هزيتلو براسي باهي من غير حتى كلمة.. بقيت نتبع فيه بعينيا كيف بعد شوي و بقى يحكي ف التاليفون مانعرفش قداه بقى من دقيقة.. ريتو كيف رجع ناحيتي بقيت نغزر لوجهو كيفاه مقلوب مايتفسرش.. قمت من بلاصتي فيسع نحكي
انا :" ليث شكون الي طلبك ؟ "
ليث :" حد قمر .. خلينا نمشيو تأخر الوقت "
انا :" استنى ساعة قلي شبيك ؟ صارت حاجة ؟"
ليث :" لا ما صار شي.. خلينا نمشيو و بعد تو نحكيلك "
انا :" باهي هياا "
بقيت نتبع فيه حتى وصلنا للكرهبة.. طلعنا مع بعضنا وشدينا الثنية.. طريق كامل و انا نغزرلو كيفاه يسوق ساكت و كابس عالفولون.. لحظتها حسيت بالخوف من وراء الاحتمالات الي حاصروني لدرجة عجزت بش ننطق حرف اخر و نسالو.. شوي وقت ووصلنا غزرلي يحكي
ليث :" أيا اهبط "
هزيتلو براسي باهي ونزلت.. اول ما دخلنا للشاليه شديتو من يديه ووقفتو نحكي
انا :" ليث استنى.. قلي شفما ؟ شبيك ؟"
عدا بيديه على وجهو وتنهد يحكي
ليث :" قمر.. سامحني يا روحي اما مجبورين بش نرجعو غدوة "
انا :" علاش ؟ شنوة صار ؟ "
ليث :" تو نفهمك كل شي .. تو خلينا ساعة نلمو حوايجنا خاطر لازمنا نخرجو بكري الصباح "
انا :" باهي "
نحيت كبوطي و دخلت للبيت معاه.. جبدت الفاليز حطيتها عالفرش وبقيت أنظم ف الحوايج.. قربلي ووقف بجنبي يحكي
ليث :" خليني نعاونك "
انا :" خلي عليك يا روحي.. ارتاح انت "
قرب مني اكثر باسني من جبيني وخرج من غير حتى كلمة.. بقيت نغزرلو كيفاه يتصرف مالقيت مانعمل و لا نحكي حسيت روحي خفت من اني نسالو اكثر خاطر مانحبش نسمع شنوة ينجم يكون صار.. كيما مانحبش نقلقو يكفي وجهو الي تقلب فجأة و رغم هكا ماحبش يوريني.. اول ماكملت الفاليز.. غيرت ثيابي بسرعة وخرجت بش نشوفو.. لمحتو من بعيد كيفاه كان قاعد ف البلكونة و سارح بعينيه.. ضميت على شفايفي و قدمت بخطواتي ناحيتو.. وقفت وراه وطبست عليه بستو من خدو نحكي
انا :" مش برد عليك هنا ؟"
تلفتتلي وشدني من يدي.. حطني فوق حجرو يحكي
ليث :" ايجا عندي تراه "
انا :" شبيك ليث ؟"
ليث :" شي قمرتي.. مانحبكش تخمم ف شي "
انا :" باهي هياا ارقد ارتاح غدوة بش نقومو بكري "
حط يديه على خدي وغزرلي ف عينيا يحكي
ليث :" صدقني ما حبيتش نرجعو هكاا.. اما نوعدك بش نعوضك قمرتي "
انا :" ليث.. انا نعرف لي انت عملت كلشي بش تفرحني.. صدقني ميهمنيش قداش بقينا هوني.. لي يهمني انك تبقا معايا ديما كهو.. انا نعرف لي خليت وجودنا هوني ناقص بسبب خوفي وحرمتك من حقك.. على هاذاكا.. انا خايفة انك بش يجي يوم وتخليني "
ليث :" شقاعدة تحكي انت ؟"
انا :" امان خليني نكمل كلامي.. نحبك توعدني ليث.. اوعدني انو مهما يصير ماكش بش تخليني"
شدني من يدي و باسني من كفهاا يحكي
ليث :" نوعدك لي عمري ما بش نخليك مهما يصير.. الحاجة الوحيدة لي تنجم تخليني نبعد عليك هي لموت"
تبسمت كيف مسحلي دمعتي لي طاحت نحكي
انا :" باهي وبالكشي جا يوم وحبيت غيري.. انت تنجم تحب غيري ليث ؟ "
ليث :" السؤال هاذا منجمش نجاوبك عليه قمر"
عقدت بحواجبي مستغربة نحكي
انا :"ع.. علاش ؟"
قربلي اكثر حط جبينو فوق جبيني وين حسيت بالنفس متاعو ضرب فياا.. تبسملي يحكي
ليث:" انت الوحيدة لي تنجم تعرف اجابت السؤال هاذا خاطر انا من يوم حبيتك.. قلبي صار ملكك انت "
ضحكت على كلامو نحكي
انا :" ههه.. معناتها قلبك ماينجمش يجب غيري هاني نقلك "
ضحك وغزرلي يحكي
ليث :" حتى هو عرف يختار "
هزيت يدو وحطيتها على قلبي نحكي
انا :" حتى انا.. قلبي صار ملكك "
ليث :" هاذي اغلى حاجة ملكتها انا.. "
شدني من جنبي يحكي
ليث :" هيا خلينا نمشيو للبيت.. معادش وقت "
هزيتلو براسي باهي من غير حتى كلمة.. وقمت معاه .. مشينا للبيت مع بعضنا و دخلنا.. ريتو كيف دخل لتوالات.. قعدت على طرف السرير و بقيت سارحة مع التاليفون الي وصل.. على قد ماحبيت نطمن روحي اما حسيت بالخوف سيطر عليااا.. هزيت يدي وحطيتها فوق قلبي الي خظ بالقوي.. غمضت عينيا بالقوي و رجعت حليتهم بقيت نرد ف النفس بالشوي بالشوي محاولة مني بش نهدى روحي ونمحي اي فكرة خايبة ممكن تتملكني ف اللحظة هاذي.. خاطرني المرة هاذي مانحب نفكر ف شي ممكن يصير و يعكرلي فرحتي و يحرمني من ليث..
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
