حلقة 49
ليث يحكي
جلسة كاملة و انا نتبع في قمر بعينيا .. وجيعتها وصلتني من غزرت عيناها .. دموعها طول الجلسة ماكفتش حرقتني كيف ما حرقتها بالضبط و يمكن اكثر .. تمنيت كان نخرجها و نبعدها علاهم الكل .. نهربها من قدامهم و نفسخلها الي عاشتو لحظة هاذي من ذاكرتها .. و مانخليهاش تتجرح من كلامهم .. اما الي صار خلاني حتى انا عاجز .. مفاجأة أيوب انو يخلي خطيبها لقديم يجي و يكذب هكاكا مانيش ناوي نعديها بساهل .. هو بدأ و انا بش نكمل .. من اللحظة هاذي الحرب بدات مع ايوب و يحيى مش كان مع عيلة بن سعيد ..
اول ما كملت الجلسة قربت لقمر و حاولت نوقفها كانت تغزر بعيناها و مسلمة .. كلمة مصدومة ماتعبرش قدام حالتها .. شديتها من يداها و خرجتها نمشي فاها بالشوي حتى وصلتها للكرسي وقعدتها بجنب جيداء بش ترتاح شوي ..
كنت بش نقعد بجنبها اما هزيت راسي نغزرلو كيفاه يحكي معاهم و ماهموش في شنوة تسبب .. قربت بخطواتي ناحيتو و انا حاسس روحي بش نطرشق من الغش اما كان لازمني نتصرف عكس الي نحس فيه .. تبسمتلو على جنب نحكي " مالا قلت الي انت بش تخرج رابح من الجلسة الأولى سي ايوب؟؟"
قربلي اكثر و حط عينو فعيني يحكي " نتصور كان توفر كلامك هذا و تمشي تتلهى بالمدام خير .. حالتها ماتعجبش بعد الي صار فيها لداخل "
حسيت بدمي فور من كلامي و عروقي تكبست اكثر شديتو من كول سوريتو و قربت لوذنيه نحكي بالشوي " * الي صار لداخل مانيش بش نسكتلك عليه .. كيف ما طلعتك كذاب على حكاية التصاور .. بش نطلعك خاسر المرة الجاي .. قتلك رد بالك تلعب معايا .. اما انت مصر تخرج *** من عقلي .. وقتها تحمل الي بش يصير فيك انت و ***** الي جايبو يكذب هنا "
دزيتو عالحيط بالقوي و بعدت عليه من غير ما نخليه يجاوبني .. يحمد ربو اصلا اني مازلت موسع بالي و مبرد عصابي معاه هذا الكل على خاطر قمر بش ما نزيدش في تعبها و خوفهاا .. و لا نخلي حاجة يشدها عليا و تكون في صالحو ..
قربت لقمر و قعدت بجنبها دورت بعينيا على وجها نحكي " شنوة تحس في روحك تو ؟"
حلت عيناها و دورت راسها تغزرلي بعينيها الذابلة تحكي "ل.. ليث هزني من هنا امااان .. م.. مانحبش نغزر لحد فاهم .. بعدني من هنا "
هزيتلها براسي باهي نحكي " باهي هيا قوم معايا "
قمت من بلاصتي و مديتلها يدي بش تشد فيا و نخرجها .. حطت يداها فوق يدي و كبست عليا بالقوي .. بقات تطاوع فيا و صوت شهقاتها عمال تقوى .. اول ماخرجنا حسيت بيداها كيف ترخفت من يدي و سيبتني .. دورت براسي نغزرلها كيفاه كانت واقفة و شادة بيد عالحيط و يد فوق راسها .. صدرها كان يتهز و يتحط تخاول تاخذ في النفس .. قربتلها اكثر و طبست راسي ناحيتها دورت بعينيا على وجها نحكي
" قمر شبيك ؟"
حطت يداها على صدري و شدتني من الفازت متاعي بالقوي شهقت تحكي " الد.. الدنيا تدور بيا .. مان ..."
ماكملتش جملتها وساقها رخت باها طاحت في القاعة .. طبست فيسع قدانها و دورت بيديا علاها حملتها في حضني .. دورت يداها على رقبتي و حطت راسها فوق كتفي .. بقيت نسمع في صوت نفسها الي كان رزين .. دورت عينيا نغزر لوجها كيفاه اصفر و عيناها طايحة من التعب .. شفايفها كانت ترعش .. هاذي الحالة بذات الي خفت كان توصللها ..
قربت للكرهبة نعيط " ررفيقة حللل الباب فييسع "
اول ماتحل الباب حطيتها عالكرسي بعدت شعرها من على وجها و طبطبت على خدها نحكي
"قمر فيق .. حل عينيك " حلت عيناها شوي شوي تغزرلي من غير حتى كلمة .. غزرتها كانت ضايعة كانها مش ترا فيا و مش معايا ..خذيت دبوزة الماء بليتلها وجها شوي .. حطيت يدي وراء رقبتها و حاولت نشربها .. كملت شربت و رجعت تكات عالكرسي و غمضت عيناها بالساكتة .. طلعت بجنبها و خدمت الكرهبة نجري ثنية الدار .. بقيت كل مرة ندور براسي نغزرلها .. كيفاه كانت عاضة عل شفايفها و تقاوم في بكاها بسيف .. مانعرفش كيفااه سقت و لا كيفاه وصلت .. حالتها هاذي دخلتني بعضي لدرجة ماعرفتش شنوة نعمل و لا شنوة نحكي .. قد ما عملت بش نفسيتها تتحسن اما الي صار زاد هدها من جديد و يمكن اكثر من قبل ..
شديت فران وقفت الكرهبة دورت براسي نغزرلها كيفاه متكية راسها عالبلار و تغزر للدار من غير ما تهبط
.. خذيت نفي طويل و هبطت نجري حليتلها الباب و حملتها بين يديا لدار ..
اول ما دخلتها قعدتها عالفوتاي و نحيتلها كبوطها نحكي " قمر شبيك ؟ تحب نهزك للطبيب ؟"
مشافتنيش و بقات تغزر الفراغ ميلا راسها و مذبلة عيناها .. قلبت شفايفها تحكي " م.. مانحب شي خليوني وحدي .. ا ..ابعدوني "
طلبها كان مرفوض بالنسبة ليا مانجمش نبعد و نخلاها ورايا بحالتها هاذي طبست على ركايبي قدامها ضربتها على خدها بالشوي نحكي "قمر فيق .. اغزرلي فيييق "
هبطت عيناها غزرتلي و هبطو دموعها قدامي مديت يدي بش نمسحهم اما مانجمتش رويتهم برك حسيتها حرقتني فما بالك اني نمسهم .. رجعت قعدت بجنبها نحكي " يزي من لبكااا .. و حاول انك ترتاح شوي "
حطت يداها فوق صدرها تحكي " م.. ما مانجمش نرتاح
.. ناااار هنا شاعلة فيااا .. ن .. نار قاعدة تاكل فياا .. م .. ماهيش ماهيش بش تخليني نرتاااح "
فربتلها رفيقة و قعدت بجنبها من الطرف لاخر قربتها لها و حطتها على صدرها تحكي " علاه تحكي هكااا قمر
.. لازمك تفرح خاطر تشدو و بقاو في الحبس "
هزت راسها من علاها و تنهدت بالقوي غمضت عيناها تحكي " الي .. الي عملو ي.. يحيى فيا ما خلانيش نفرح .. يحيى قتلني.. قتلتني يا خالتي.. الرا .. الراجل الي حبيتو غرقني يا خالتي "
عينيا وساوعو من كلامها عليه و دموعها الي زادت قوات على خاطرو خلات دقات قلبي تقوى .. حسيت روحي بكشت
مانجمتش نزيد كلمة بعد كلامها و لاا نجمت نقوم نبعد علاها ساقيا تحشو و خانوني .. هزيت راسي نغزرلها مصدوم كيف تنطرت من بلاصتها و شادة شعرها و كابسة عليه تصيح و تبكي " علاااااه عمل فيااا هكااا .. كيفاه رضى فياااا .. كان يقلي نحبك و بش تولي مرتي .. كنت نرااا فيه راجلي و بو صغاااري " بقات تدور و تصيح دخلت في هستيريا كالعادة اما المرة هاذي مانجمتش نقوم و نهداها .. تصرفاتها هاذم عليه خلاوني عاجز و ضعيف .. شفتها كيفاه طاحت في القاعة و تحكي بالغصة " ي .. يحيى يحيى قتلني مرتين .. م ..مرة خلاني مرمية و مشااا و .. و تو فضحني .. ق..قدامكم الكل .. شنوة عمتلو انا .. ع.. علاه كفاني هكااا .. ع.. علاه مشافش حبي ليه .. و لا ولا شنوة عشنا مع بعضنا "
كلماتها لخرا كانو كيف الكف فيقوني و خلاوني نتطر من بلاصتي .. خليت رفيقة تهدي فاها .. هزيت روحي نكركر في ساقيا و خرجت من الدااار حبيت نبعد علاهااا .. رغم البرد الي لبرا اما حاسس بنار شاعلة فيااا و دمي مفور .. دموعها و كلامها عليه خلاوني نغزل علاها و علييه .. كبست عالبونية متاعي و رسيت على سنيا .. بقيت نتنفس مرة و اثنين محاولة مني بش نهدى اما شي .. الي صار قدام عينيا كان كافي بش يلهبني و يهبلنيي ..
طلعت في الكرهبة و طرت عجاجه خليت كان التراب ورايا .. كبست بيديا الزوز عالفولون كيف تعدات تصويرتها قدامي و هي تحكي علييه .. حسيت بوجيعة اول مرة نحسها وجيعة خلاتني نتخنق و النفس يغيب عليااا .. بقيت ندور و مش عارف وين نمشي حسيت الدنيا ضياقت بياا .. للحظة حسيت انو معادش عندي بلاصة انجم نمشيلها و هي مش موجوده فيها .. حسيت اني ضايع من غيرهااا و ضيعت الوجهة متاعي ..
شديت فران قدام لبلاصة الي جمعتني باها مرتين .. هزيت راسي نغزر للسماء لمغيمة و البحر الهايج .. حسيت حتى الدنيا حزينة عالي صار اليوم فينا .. نهار ليوم عذب كل واحد فينا بطريقة .. هي توجعت من الي صار في المحكمة و انا توجعت من كلامها و مش عارف شنوة سر لوجيعة هاذي ..
هبطت و بقيت نمشي بخطوات رزينة حتى وصلت للبلاصة الي وقفت فاها اخر مرة معاها .. غمضت عينيا و تفكرت تصويرتها وقتها .. شعرها الي كان يتطاير مع نسمة لبحر .. عيناها الي لونهم طغى على لون السماء و خلا الوان الدنيا الكل تطفى قدامو .. ريحتها الي مافرقتنيش من اول لحظة شفتها فاها .. ريحة عششت في جواجيااا .. تفاصيلها هاذم خلاوني غارق فيها .. حتى دموعها و نظرتها الضعيفة سيطرو علياا .. صوتها صار مايفارقنيش لا في النوم و لا في اليقظة .. ضحكتها الي ترد فيا الروح ونبدأ ملهوف بش نراها .. برائتها الحاجة الوحيدة الي تنجم تخليني نهداا و تخليني نفسخ الي تعدا قبلها الكل و مستعد نبدا من جديد على خاطرها ..
نفخت بالقوي و ضربت قلبي بيدي نحكي بصوت عالي " الي تحس فيييه هذااا الكل غااالط .. قمر ماتعنيلللك شي .. هي حتى شيييي .. لازمك تنساااهاااا و تبعد علاهااا "
خذيت نفس طوويل حسيت لكلام الي قلتو خنقني .. كلام خرج كيف الشوك في حلقي .. عديت بيديا الزوز على وجهي وطيت في صوتي نحكي " كيفاه بش نبعد .. كيفاه انجم نبعد علاهااا بعد ما خلاتني نحس مرة اخرى .. بعد ماخلااات لحياتي معنى.. كيفاااه نبعد بعد ما .. ماحبيتهااااا "
مع اخر كلمة هبطت دمعة من عيني كانت كيف الجمرة على خدي مسحتها فيسع و دورت بظهري نجري .. حبيت نهرب من لبلاصة هاذي الي زادت في عذابي.. حبيت ننسى الكلمة الي خرجت من فمي و خلاتني تايه فاها .. طلعت في الكرهبة و بقيت ندور حتى ظلامت الدنيا .. دورت راسي عالتليفون الي نوقز خذيت نفس و هزيت نحكي "وي رفيقة .. لا مانيش مروح خليك انت حذاهااا "
علقت علاها و سكرتت التاليفون و رميتو بعيد عليااا .. على قد مانحب نروح و نبقى نعس علاهااا كيفاه راقدة كيف لعادة على قد ما مانحبش نشوف وجهها و لانسمع صوتهااا .. بعدت من غادي و بقيت نسوق حتى وقفت لكرهبة قدام البار و دخلت لداخل .. بقيت نشرب في بالي بش ننساها بالطريقة هاذي اما لقيت روحي مع كل كاس نتفكرها هي .. فقت من سرحتي على يد طحت فوق خدي و يد فوق صدري .. هزيت عينيا نغرز لطفلة الي قربت مني و شفايفها قراب لشفايفي .. نفسها السخون خلاني نتقزز منها .. تحكي " تحب تمشي معايا ؟؟"
دورت بعينيا على وجها و دزيتها بيديا الزوز نحكي
" امشي من هنااا .. مانحب على حتى وحدة ابعد "
بقات تغزرلي من غير حتى كلمة تلفتلها نصييح " *** قتلك ابعد من هنااا "
هزيت الكاسة و شربت الي فاها لكل من غير نفس .. للحظة كرهت النساء الكل .. الي نحس فيه خلاني نعيفهم و نعيف روحي الي سمحتلها بش تحس هكااا .. مانجمش ننكر الي حسيتو و الي قلتو .. اما بش نتقوى على روحي و ندفن اي احساس يتملكني ناحيتها .. بش نتجاوزها كأنها ماصارتش في حياتي .. بش نمحاها من قلبي و نرجع ليث لقديم الي مايحس بشي و قمر بش ترجع بالنسبة ليا مجرد قضية من القضايا و اول ماتوفى بش نخلاها ورايا و مانتلفتلهاش .. بش نخلى طريقي يخالف طريقها مهما كان و صاار ..
VOUS LISEZ
#ليس_ذنبي ❤️🔥
Romantizm" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
