الحلقة29
#أيهم_يحكي
ليث اليوم خلاني نواجه الحقيقة الي بقيت ايامات و انا هارب منها .. من وقتها مانجمتش نسال شنوة كانت نتيجة عملتي .. موتها على قد ما كنت متوقعو على قد ما صدمني كيف سمعتو اليوم .. رغم الي عملتو الكل ما حبيتش يدي تتوسخ بالدم .. ماحبيتش نكون مجرم و نعيش بخوف من النهار الي بش تظهر فيه الحقيقة .. تهديد ليث و شكانو خلاني نتوتر و خايف من خطواتو الجايا .. كلامو و غزرتو كانو متبدلين لدرجة اني ماعقلتوش ..
بعد خروجو مانجمتش نتحرك من بلاصتي رغم الفوضى الي صارت دقايق التالي مانجمتش نرد الفعل الهدوء الي كان ظااهر عليا مخي كان فيه العكس.. تفكيري بعد ياسر و الف فكرة هدت عليااا .. فقت من سرحتي و هزيت راسي مع بابا و امي الي كانوا متوترين ويتناقشو في الي صاار
تلفت لبابا يحكي " مستحيل نخليه يوصل للي يحب عليه .. لازم يبعد عالطفلة هاذي قبل ما يغرق ويغرقني معاه "
قربتلو امي تحكي " ليث مش ناوي عالخير .. اسرار العايلة الكل عندو .. لازم تتصرف محمود و توقفووو "
نفخ بالقوي يحكي " كيفااااه تحبني نتصرف ؟؟ رغم الي عملو مانجمش نضروو "
" ماتضروش هو,, اما تنجم تضر قمر .. كان هي تبعد من ثنيتنا الكل وقتها كل شي يرجع لبلاصتو "
" نعرف لازم الطفلة هاذي تخرج من حياتنا باي طريقة .. انا تو لازم نرجع للشركة كان صارت اي حاجة كلمني "
هذا الكل سمعتو و صار قدامي و انا مانجمتش نحكي ولا نجاوب حسيت اني عاجز حتى بش ننطق حررف .. اول ما خرج بابا قربت مني امي و قعدت جنبي تحكي
" شبيك ساكت انت .. من وقت ليث هنا و انت في الحالة هاذي؟"
هزيت راسي معاها دورت بعينيا على وجها لميت الحروف بسيف نحكي " أ.. أمي انا قررت بش نسافر .. بش نرجع لأمريكا .. لازم نبعد من هنا "
عقدت حواجبها و غزرتلي مستغربة " فاش تحكي انت ؟ رجوع شنية الي تحكي عليه .. تعرف الي بوك مستحيل يقبل .. لذا شد بلاصتك و ريض "
تنطرت من بلاصتي و كبست على يديا الزوز نحكي
" امي انا لازمني نبعد من هنا .. افهم الي ماعادش نتحمل الضغط هذا الكل.. لازم نمشي قبل ما يفوت الفوت "
"مفهمتكش شنوة الي بش يفووت ؟؟ قتلك ماتخافش .. ما ينجمو يعملولك شي خلي عندك ثيقة فيا مستحيل نخلي واحد في الدنيا يضرك .. كيف ما خليتها تتنازل بش نخلاها تبعد على ليث "
هزيتلها براسي لاا و هبطو دموعي نحكي " لاااا .. انت مش فاهمة شي .. مش عارفة شي امي "
وقفت قدامي و حطت يداها على وجهي دورتني مقابلها تحكي " ايهم شفما ؟؟ شنوة الي انا ما نعرفوش تكلم حل فمك "
هبطت عينيا في القاعة وغمضتهم بلعت ريقي نحكي
" م .. ماقصدتش نعمل هكاكا .. هي الي قربتلي و شدتني .. ماقصدتش نعملها و الله"
صاحت بالقوي تحكي " هي شكووون ؟؟ ماقصدتش شنية؟؟ حل فمك ماتهبلنيشش"
عديت لساني على شفايفي حسيت حلقي شااح مانجمتش ننطق حرف تقويت على روحي نحكي
" ماقصدتش ن..نقتلها .. ساقيها الي رخت بيها و طاحت انا خطيني يا امي ماحبيتهاش تموووت "
حلت عيناها فيااا وخرت بخطواتها لتالي و ترمات عالفوتاي تحكي بسيف " ايهم انت شعملت ؟؟ ماتقليش الي حكاه ليث انت السبب فيه ؟؟؟ شعملت انتتت ؟؟"
هبطت على ركايبي مقابلها نحكي " مش بلعاني و الله .. سامحني خاطر مسمعتش كلامك .. امي والله لا قصدت اما خفت.. كان لازمني نرجع الشركة .. خفت من ليث و منها .. كان في بالي بش يصير هكاكا راني مامشيتش.. "
حطت يداها فوق صدري و دزتني بالقوي تحكي " قووم .. قوم و احكيلي شصار بالتفصيل "
هزيت روحي بسيف قمت و قعدت بجنبها مسحت دموعي و غمضت عينيا بالقوي كيف تفكرت الي صااار نهارتها نحكي " بعد .. بعد ما تعاركنا انا وياك .. خرجت و مشيت لدارها اما ملقيتهاش .. لقيت امها " خذيت نفس بالقوي و كملت نحكي " لحظتها حسيت بالدنيا ظلامت في عينيا .. كنت ناقم علاهم الكل .. ما نجمتش نخرج من غير ما ناخذ الشركة .. طلعت في الدروج بش نلوج علاها اما .. اما هي خلطت عليااا و شدتني .. بعدها مانعرفش شصار كيفاه انا دزيتها و كيفاه ساقها رخت باها مانعرفش .. حليت عينيا كيف سمعت صيحتهااا و ريتها طاحت و في لحظة دمها ساااح .. مانجمتش نقربلهاا خفت .. وقتها الي كان شاغلني اني ناخذ الشركة و نخرج و هذاكا الي صااار .. اول ما خذيتها هربت و خليتها ورايااا .. الايامات هاذي الكل و انا عايش بالخوف .. مانجمتش نسال علاها خفت من الي بش نسمعوو .. اما الي خفت منو صاار .. علا هذاكا لازمني نهرب .. امي امان خليني نمشي .. كان بابا و لا ليث يعرفو انا وقتها وفيت .. "
بقات تقحرلي من غير حتى كلمة هبطت راسي و هربت عينيا من الخوف منها قامت من حذايا تحكي " الي حكيتو هذا بش يموت هنااا .. و تنسى حكاية السفر وقتها الكل بش يشكو فيك اكثر .. هروبك مش وقتو .. و تو برا جيب الشركة بش تبقى عندي .. ماتخلي شي عندك يثبت عليك حاجة "
هزيتلها براسي باهي و طلعت لبيتي بش نهبطلها الشركة .. رغم خوفي اما عندي ثقة في امي نعرف الي مستحيل تسلم فيا .. كان سمعت كلامها و خليتها هي تتصرف راني ماوصلت لهنا .. رجعتلها و حطيت الشركة في يدها نحكي " شنوة بش نعملو في ليث ؟؟ هو ناوي عالشر مش كان معايا حتى معاكم .. ناقم علينا لدرجة انو نسى الي احنا عايلتو "
" خليه عليااا .. انت من اللحظة هاذي بش تنسى الحكاية و معادش تعمل شي من غير علمي .. الي صار و الي سمعتو تو بش نحاسبك عليه .. اما خليني نلقى حل قبل و بعد حسابك معايا يا ايهم .. اغلاطك صارت ما تتحسبش.. و كانك على ليث بش يرجع لعايلتو بسيف علييه.. و قمر و الله لاني بش نرحمها الي عملو ليث و الي قالو بش نخلاها هي تدفع حقوو "
هزيتلها براسي باهي عطاتني بظهرها بش تمشي اول ما بعدت وقفتها نحكي " امي .. فما حاجة ماقتلكش علاها "
غزرتلي تقحر تحكي " فما مصيبة اخرى نسيت ماقلتهاش "
رسيت على سنيا و قربتلها نحكي " لاا .. اما في النهار هذاكا قبل ما يصير الي يصير .. حكيت معا امها .. ليث طلع مخبي علاهم انو من العيلة .. قلهم الي هو محامي تابعنا و كهو .. وقتها امها تصدمت خاطر ماتعرفش .. و نتصور حتى قمر ما فيبالهاش لتو زادة "
تبسمت على جنب تحكي " باهي ياسر... عملت لمليح كيف قتلي و تو خليني انا نتصرف .. و انت ابعد برا اعمل اي حاجة تلهى فيها .. ارجع للسوسيتي اخدم .. ماتخلي حد يشك في حالتك .. تصرف نورمال فهمتني "
" باهي تهنى "
عطاتني بظهرها خرجت و خلاتني .. هزيت روحي حتى انا وخرجت لتراس بش نتنفس شوي .. حسيت الي صاار تعاود في لحظة قدامي و عشتو مرة اخرى كيف عاودت حكيتو .. حسيتو كبس على صدري و خنقني .. نعرف الي اغلاطي كثرت و صرت مجرم و قااتل اما مانجمش نستسلم .. لازمني نقاوم و المرة هاذي بش نمشي على خطى امي عندي ثقة فيهاا نعرفها بش تلقى حل و تخرجني من الوحلة هاذي .. و اول ما تتحل المشاكل هاذي و نعرف اني في بر الامان بش نبعد من هنااا بش نرجع لحياتي القديمة و نرمي هذا الكل ورايا كانو ماصارش و عمري لا عشتو ....
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
