حلقة 45
قمر تحكي
مانيش مصدقة الي انا عايشة نهار هذا .. للحظة نسيت كل شي صار معايا .. ليث كل مرة يعمل حاجة تخليني نرتاح و نرتاحلو اكثر .. بقيت نتدرجح مغمضة عينيا و نستحلى في النسمة الي تضرب في وجهي .. حاسة روحي خفيفة كأني طايرة..
حليت عينيا نشوف فيه كيفاه كان واقف و يغزرلي للحظة سرحت مع غزرتو الي كانت تلمع مافهمتش علاه ديما نضيع فيها نحس وراها برشة حكايات .. بقيت نغزرلو كيفاه عطاني بظهرو و بقى يمشي .. هبطت من الدرجيحة و خلطت عليه .. نلقاه قاعد على حجرة مقابلة لماء و ساكت .. قربت منو نحكي
" محلاها لبلاصة "
قام من بلاصتو من غير حتى كلمة و مدلي يديه بش نطلع نقعد حذاه .. بقيت نغزر ليديه المحلولة ناحيتي و نغزر لعينيه الي تاشرلي بش نشدو.. لحظتها مديت يدي و كبست على يدو من غير ما نخمم مرتين .. حسيت بقلبي رعش كيف شدني .. اول ما طلعت ووقفت قدامو تملكني احساس مافهمتوش .. قدمت معاه و قعدت بجنبو من غير حتى كلمة .. كنت كل مرة نطلع بعينيا و نغزرلو .. للحظة سرحت فيه .. و في كل لحظة عشتها معاه من اول مرة ريتو واقف قدام الباب و سمحتلو بدخول حتى لليوم ..
بعد الي صااار و الي تعديناه لقيت روحي واثقة فيه مانعرفش كيفاه اما هو قدر انو يكسب ثيقتي .. في الفترة الي تعدات انا شفت غشو و شفت حنيتو .. ساعات يكون قوي لدرجة مانخافش و انا بجنبو و ساعات كيف نغزر لعينيه نحسو ضعيف لدرجة نشك انو مش نفس الإنسان .. ديما نحسو انسان غامض و صعيب تفهم شخصيتو .. اما رغم هذا انا مرتاحة معاه و عارفة انو مستحيل كان يضرني الي عملو معايا الفترة القصيرة هاذي معملوش الشخص الي امانتلو على روحي من الصغرة و حبيتو .. ليث شدني من يدي رغم الي هو ما يعرفنيش مسحلي دمعتي قداه من مرة حتى بعد الكلام الي قلتهولو .. هو رجع و ماسلمش فيا بالعكس تحرم من راحتو و من نومو على خاطري .. هذا الكل خلاني انا معاه ليوم في البلاصة هاذي و انا عينيا مغمضة .. متاكدة انو مستحيل يضرني و لا يوجعني .. عضيت على شفايفي نحكي " زعمة شنوة يستنى فينا بعد الجلسة ؟ عمرك ما خممت كان نخسروها ؟؟"
غزرلي و هز بحاجبو يحكي " انا عمري ما خممت في الخسارة "
" اما الي داير بينا ليث يقول هذاكا شنوة ينجم يصير "
" مش صحيح .. ديما خمم انك تفك فرصتك من الي داير بيك و اعرف كيفاه ترجعها لصالحك "
خذيت نفس نحكي " ماعندش برشة حاجات في صالحي تو .. كان شهادتك انت و خالتي غير هذا ماعندي شي "
دور بعينيه على وجهي يحكي " و هذا مش شوي .. انا شديت قضايا كان نسبة نجاحها معدومة و بشهادة واحدة كل شي تقلب و نجحت "
ضحكت على جنب نحكي " معناها فما امل "
" اكيييد "
بلعت ريقي و غزرتلو نحكي " ليث .. اوعدني انك ما تجبدش حكاية التهديد الي صار اول مرة كيف تشهد "
ماعرفتش علاه طلبت منو هكا .. اما ماحبيتش بعد الي عملو معايا يتضر من جرايري .. الي صار انا سامحتو عليه و نحب نتعداه .. بقى يغزرلي من غير حتى كلمة .. قام من حذايا يحكي " هيا نمشيو وقيت "
قمت معاه و رجعنا للطاولة لمينا كل شي و مشينا للكرهبة طلعنا وشدينا الثنية .. بقينا ثنية كاملة ساكتين .. حسيت روحي ارتحت شوي .. كنت مستحقة نهار كيف هذا يخرجني من الي انا فيه .. غمضت عينيا و رقدت ماحسيتش بالثنية .. فقت على صوت ليث يحكي " قمر أيا فيق "
حليت عينيا نغزرلو و طلعت راسي نغزر احنا وين .. هزيت روحي شوي و هبطت من الكرهبة معاه .. وصلنا للباب اما وقفنا صوت الراجل الي واقف قدام لباب.. قرب من ليث ووشوشلو في وذنيه بالشوية .. غزرت لليث الي وجه تقلب و قربلي يحكي " برا ادخل قمر "
طلعت راسي و دورت بعينيا على وجهو و بعد على الرجال الي واقفين نحكي " شفما ليث ؟؟ شصار ؟"
علا في صوتو يصيح " قتللللك برااا ادخل "
حسيت بعينيا زغللت من صياحو عليا هبطت راسي و دخلت نجري لدار من غير حتى كلمة .. طلعت لبيتي و سكرت على روحي .. الي عشتو نهار كامل حسيتو طاح في الماء و رجعت كيف ماكنت .. مالقيتش قوة بش نقوم و نبدل دبشي و لا نغسل حالتي .. ترميت عالفرش و غمضت عينيا .. مانعرفش قداه بقيت هكاكا بين نومين حتى سمعت صوت الباب الي دق و صوتو يحكي
" قمر فايقة ؟؟ انجم ندخل "
هزيت روحي شوي و قعدت نحكي "ت .. تفضل "
حل الباب و دخل قدم بخطواتو ناحيتي و قعد على طرف السرير يحكي " ما قصدتش اني نصيح عليك"
بعدت غزرتي من عليه نحكي " عادي .. استانست "
" ما تقولش هكا .. تظغطت شوي على هذاكا غشي رجع فيك انت "
هزيت عينيا رجعت نغزرلو نحكي " شنوة قالك الراجل بش خلاك تتغشش هكاكا ؟؟"
عدا بيديه الزوز على وجهو يحكي " انسى شنوة قلي ماتحط شي في بالك "
هزيت براسي لا نحكي " مانجمش ننسى ليث .. شوف حتى كيف نسيت و عشت نهار طبيعي كيف الناس .. اخرتو كانت هكااا "
تنهد بالقوي يحكي " سامحني خاطر فسدتلك نهارك .. اما بلحق ماتخمم في شي كان ف الي عشتو اليوم .. خلي كل شي عليا انا و انسى "
عديت بلساني على شفايفي نحكي " باهي .. و عيشك على نهار ليوم .. مستحيل كان ننساه "
قام من بلاصتو تبسملي يحكي " ماعملت شي .. بش ترقد هنا الليلة ؟"
خذيت نفس طويل نحكي "اي .. لازمني نمحي الخوف هذا و نرجع كيف ماكنت "
" باهي .. و كان استحقيت اي حاجة انا في البيت بجنبك .. "
تبسمتلو و هزيتلو براسي باهي نحكي " نعرف .. تصبح على خير "
" و انت بخير "
عطاني بظهرو و خرج .. رجعت ترميت عالفرش و عنقت العبة الي خذاهالي .. غمضت عينيا و تفكرت نهار ليوم .. رغم الي صار تو .. لقيت روحي ناسية كل شي و متفكرة كان شنوة خلاني ليث نعيش ليوم .. نتمنى تبقى التصويرة هاذي في خيالي على طول و ماتتمحاش .. و ننسى كل شي صار
قبلها .. اما تفكيري في شنوة بش يصير بعد ثلاثة أيام غلب كل شي و سيطر عليا من جديد .. غمضت عينيا و استسلمت لنوم ..
#نهاية_الجزء_الأول ❤️
#ليس_ذنبي 🥺
#قمر_ليث ❤️🔥
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
