#وجيهة_تحكي
حليت عينيا بالسيف على وجيعة راسي الي سيطرت علياا..رجعت غمضتهم محاولة مني بش نتفكر شنوة صار..لقيت روحي مش منجمة نركز ف حتى شي..رجعت حليت عينيا على صوت الي بجنبي..تلفتت وين ريت طفلة حذاياا..بلعت ريقي بالسيف نحكي
انا :" انا..انا وين "
ريتها كيف قربتلي وحطت يداها على كتفي تحكي
هي :" ارتاح مدام.. انت ف المصحة ومازلت كيف خرجت من عملية ماتجهدش روحك "
ف اللحظة هاذي وين تفكرت كل شي صار لبارح..كيفاه دزني ورماني من غير حتى رحمة..خلاني وراه وماخممش فياا..دمعتي هبطت تحرق كيف تفكرت كيفاه عفس علياا وتعدا ماشافش انا شنوة عملت معاه و لا كيفاه ضحيت على خاطرو..قداه حسيت روحي كرهتو وكرهت كل لحظة عديتهاا معاه.. من وراه انا خسرت كل شي..اما مستحيل نخليه يتهنى بعد الي عملو فياا..بش اندمو ونحاسب كل حد وصلني للحالة هاذي..هزيت روحي بالسيف وغزرت للممرضة نحكي
انا :" نحب..نحب نقابل شكون "
هي :" فما شكون لبرا يحب يقابلك دقيقة اناديهولك "
عقدت بحواجبي مستغربة مش عارفة شكون الي واقف لبرا..شوي وقت وريت واحد مانعرفوش دخل..قربلي يحكي
رمزي :" الحمدالله على سلامتك مدام "
انا :" عيشك..شكون انت ؟"
رمزي :" انا من الشرطة..كانك مليحة تسمح نسألك شوي اسئلة "
هزيت راسي شوي وبلعت ريقي بالسيف نحكي
انا :" اسئلة بخصوص شنوة ؟ "
رمزي :" بخصوص الي صار لبارح.. وبخصوص زوجك سي محمود راجلك..ماعندكش فكرة وين ينجم يكون مشى ؟"
كبست بيدي عالملحفة نحكي
انا :" مانتفكرش شنوة صار و ماعنديش حتى فكرة عليه..حاسة روحي تاعبة نحب نرتاح "
هزلي براسو باهي يحكي
رمزي :" باهي ارتاح شوي وحاول تتفكر اي حاجة تنجم تفيدنا "
انا :" ت..تنجم تكلملي ليث..نحب نحكي معاه "
هز بحاجبو يحكي
رمزي :" شنوة بش تحكي معاه "
انا :" بخصوص صحتي.. انا ماعندي حد تو غيرو هو "
رمزي :" باهي شوي وليث يكون عندك "
هزيتلو براسي باهي من غير حتى كلمة ودورت وجهي لناحية لخرى..غمضت عينيا وبقيت نخمم ف الحالة الي وصلتلهاا و شنوة لازمني نعمل.. مانعرفش قداه تعدا علياا وقت وانا هكاا لانجمت نرقد و لا نتحرك.. تلفتت على صوت الباب كيف تحل وين ريت ليث دخل..هزيت راسي معاه وغزرتلو كيفاه كان واقف وعينيه ف عينياا.. حاولت نهز روحي شوي نحكي
انا :" ل..ليث "
ريتو كيف قدم ناحيتي وقعد عالكرسي مقابلني يحكي
ليث :" سمعت انك تحب تقابلني.. شفما ؟"
انا :" عندي مانحكي معاك "
ليث :" نسمع فيك "
خذيت نفس نحكي
انا :" محمود مخطط انو يهرب.. انا سمعتو يحكي ف التاليفون واتفاهم مع جماعة بش يهربوه بعد ثلاثة ايام "
عدا بعينيه عليا مستغرب يحكي
ليث :" وين بش يهرب ؟؟؟"
انا :" مانعرفش.. كل الي نعرفو تو لبلاصة الي هو متخبي فيها.. بش نقلك اما بشرط ماتخبرش الشرطة "
عقد بحواجبو مستغرب يحكي
ليث :" علاش ؟ "
انا :" الشرطة مالازمهمش يعرفو خاطر محمود عندو جواسيسو في كل بلاصة.. وهوما لي خبروه انكم بش تقبضو عليه لبارح.. على هذاكا حتى كيف سألني الشرطي قتلو مانتفكرش.. خاطر حبيتك انت تعرف قبل..مش تحب تخلص حق عايلتك واختك..هاني قتلك كل شي نعرفو "
عدا بيديه على وجهو وغزرلي درا كيفاه يحكي
ليث :" احكي هو وين ؟"
انا :" تلقاه ف دار ف الغابة لقريبة من *****.. هو خذاها وكتبها باسم الجناني بش حد مايشك فيه و لا يعرفها.. هو كان مخطط لكل شي خاطر عارف انو النهار هذا بش يجي..برا الحقو ليث قبل ما ينفذ بعملتو وقتها مستحيل تنجم تلقاه..هو مخطط يخلص عليكم لكل من بعيد.. كان تحب تحمي عايلتك برا ومتخليهش يهرب"
ريتو كيف كبس على وجهو الي حمار وعينيه الي تحلت فياا من الغش..قام من بلاصتو وخرج يجري من غير مايجاوبني بحتى كلمة.. تبسمت وانا نتخيل فيهم ف وجوه بعضهم..مديت يدي لرقبتي وخذيت سلسلة ايهم وين دموعي نزلو كبست عليهاا بالقوي نحكي
انا :" ارتاح تو ياروحي.. انا خذيت بحقك من لكل..انا حطيت نهاية للي كانو السبب ف موتك..بعثت الي قت••لك للموت.. مستحيل محمود يخلي ليث يخرج عايش و ليث مستحيل يخلي خالو عايش..الزوز بش يقت••لو بعضهم انا متأكدة..يستاهلو كل الي بش يصير فيهم "
مسحت دمعتي على صوت الباب كيف تحل وين ريت الدكتور دخل وقدملي..يحكي
الدكتور:" كيفاه تحس ف روحك مدام "
انا :" مليحة..غير حاسة بدني تاعب ومش منجمة نتحرك "
ريتو كيف بقى يفحص فياا..هز الملحفة من ساقيااا وبقى يشوف فيهاا..عقدت بحواجبي مستغربة كيف لقيت روحي مش حاسة بحركة صوابعو على ساقياا و لا لقيت قوة بش نحركهم.. عضيت على شفايفي نحكي
انا :" دكتور حاسة ساقياا كاني مخدرة "
عدا بعينيه عليا وغزرلي درا كيفاه..قربلي شوي يحكي
الدكتور:" مدام يؤسفني نقلك انك فقدت القدرة عالحركة..الوقعة كانت قوية عليك و الضربة كانت قوية على ظهرك "
حليت عينيا على وسعهم اول ما سمعت كلمو..حسيت دمي جمد في عروقي وماعرفتش نحكي من الصدمة الي كليتهاا.. ضحكت نحكي
انا :" م..مستحيل.. انا .. انا انجم نتحرك "
هزيت يدي وبقيت نحاول نقوم اما شي مالقيتش لا قوة و لا جهد حسيت ساقياا كاني مقصوصة..هزيت يدي وبقيت نضرب ف فخذي على قوة جهدي ونبكي بصوت عالي نحكي
انا :" لااااااا..لااا انا ملييييحة ساقياااا ملااااح.. مستحيييييل "
ريت الممرضين كيف دخلو يجريو وشدوني من يدي.. بقيت نفارع فيهم اما مانجمتش وين سلمت ليهم وتسطحت عالفرش وعينيا ف السقف كانو دموعي عمال ينزلو اكثر غير وجيعة قلبي الي قوات من خوفي و من قهرتي عالي صار فيااا..كيفاه نهايتي تكون هكااا كيفاه خسرت هكاااا..غمضت عينيا بالسيف على زريقة الي عملوهالي وين حسيت بدني ترخف وغفيت من غير ما نشعر...
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
