#ليس_ذنبي ❤️‍🔥

حلقة 28

الحلقة 28
#ليث_يحكي

الفترة هاذي كيف ما كانت صعيبة على قمر كانت صعيبة عليا انا زادا .. خلاتني في صراع مع روحي .. مشى في بالي الي انا عشت كل انواع الخوف بعد فقداني لعايلتي و مستحيل كان نتاثر و لا نخاف على انسان اخر بعدهم .. تصورت السنين هاذم الكل انو مشاعري ماتت معاهم و صرت ليث الي عايش من غير هدف .. ليث الي عاش اليتم من الصغرة و ذاق كل انواع الوجيعة مستحيل كان تهزو حاجة اخرى بعدهم .. اما دخول قمر لحياتي ألغا الفكرة هاذي و نفاها .. وجودها خلاني نعرف نوع اخر من الخوف خلاني نحس بقيمة حياتي انو ورايا شكون لازم نرد بالي عليه نهتم بيه و نتحمل مسؤوليتو .. خاصة بعد موت امها و الطريقة الي ماتت بيها خلاتني منجمش نغمض عيني غير ما نتهنى علاها .. مانجمش نخلاها ورايا بعد الي صاار..
اسبوعين تعداو على نقلتها حذايا هي و رفيقة .. وجودها معايا خلاني نركز معاها اكثر .. كيفاه الدنيا فرطت في طفلة صغيرة ببرائتها؟ .. رغم سكاتها و هدوئها اما وجودها زاد روح جديدة في الدار .. وجودها خلق ليث جديد .. و زرع فيا أحاسيس اخرى..
على خاطرها كان لازمني نواجه عايلة بن سعيد للمرة الثانية .. لازم يعرفو انو قمر خط احمر و كان الي صار عندهم دخل فيه حتى لو من بعيد انا بش نحاسبهم واحد واحد و بش ناخذ حق كل دمعة هبطت من عيناها كانو هوما السبب وراها من القديم لجديد .
اول ماتهنيت علاها مع رفيقة هزيت روحي و خذيت ثنية للفيلا طلعت في الكرهبة و شديت التاليفون بش نكلمو اول ماسمعت صوتو كبست عالفولون بيديا نحكي " وينك ؟؟..  انا في ثنيتي للفيلا نحب تكونو موجودين الكل .."
ماخليتوش يجاوبني و علقت عليه خذيت النفس و كملت نسوق .. اول ما وصلت زربت في خطوتي للباب نحب نحكي في الشي الي جيت على خاطرو و نرجع نبعد .. الفيلا هاذي كانت و مازالت جهنم متاعي .. الي عشتو فيها مستحيل ننساه .. معاملتهم ليا خلاتني نكبر و انا ناقم عالظروف الي وصلتني لاهم .. فقدان طفل صغير لأمو و بوه و حتى اختو ماشفعلهمش بش يرحموني .. فرق المعاملة كانت واضحة.. الوحدة الي عشتها بيناتهم و الخوف بقاو عايشين معايا .. حاولت نمحي الافكار هاذم الي هدو عليا فجاة  عديت بيديا الزوز على وجهي ودخلت نلقاهم يستناو فيا .. قربت ناحيتهم و دورت بعينيا على كل واحد فيهم.. غزرت لخالي الي وقف من بلاصتو و قرب ناحيتي يحكي
" انشالله تكون تراجعت عالشي الي في بالك و هذا سبب جيانك هنا "
تبسمتلو على جنب نحكي " مستحيل كان نتراجع على خطوة انا قدمتلها و انت تعرف الشي هذا مليح "
" شوف ليث .. انا خليتك على راحتك و ما عملت شي قلت تو عقلو يرجع اما الظاهر فيك عمال على قدام "
" انا ماجيتش بش نعاود نفس الموضوع .. رائي و قراري  عرفتوه المرة الأخرى ,, انا هنا بش نقول كلمتين و مانعاودش بعدهم "
هزيت راسي مع مرت خالي الي وقفت ربعت يداها تحكي " تفضل سي ليث شنوة اخر مازال ماقلتوش ؟؟"
" اكيد سمعتو بام قمر و الي صارلها .. و لا ... "
عاودت غزرت لخالي نحكي " ولا نعاود نحكيلكم انا .. امها توفات و سبحان الله بعد مواجهتنا بنهارين .. غريبة مش هكا ؟؟ "
" شقصدك ؟؟ انت هنا تتهم فينا الي احنا وراء موتها؟؟"
" ما نعرفش خالي ..اما تعرف الي انا عمري ما آمنت بالصدفة و كل حاجة تصير وراها و عندها سبب .. احساسي يقلي انو بش تطلع ريحة من الحكاية هاذي .. خاصة انو الي صار معاها ريتو قبل معاكم "
" صدقني كيف نكون انا سبب مانخافش منك و نقول الي انا عملتها .. و انت تعرفني مليح .. مش محمود الي يخاف و يتخبى .. الي صار قبل كنت مستعد نعاودو  في قمر متاعك و قدام عينيك مش في امها و من وراك.. رد بالك تنسى انا شكون و لا تفسر سكوتي لتو انو خوف منك .. "
" رد بالك تخمم تقربلها و لا تمسها .. انا هنا بش نقلكم انو قمر خط احمر و مانرحمش الي يقربلها مهما كانت صيفتو "
" نحب نعرف شنوة الي صار بش الطفلة قلبتك هكاا ؟؟ فهمني ؟؟ كيفاه تعادينا على خاطرها ؟؟ هه تطلعش حبيتها ؟؟"
سؤالو للحظة رهوجني خلاني ما نعرفش الاجابة متاعو حتى بيني و بين روحي .. انا علاه نعمل في هذا الكل ؟ علاه رامي روحي في النار و عايش في الخوف على خاطرها ؟؟
رمشت عينيا بزربة و بلعت ريقي لميت القوة الي عندي بش انجم نقول كلام صعيب نطقو و تخمامي فيه يكبس على صدري .. غزرتلو في عينيه  نحكي
" انا نعمل في هذا الكل خاطرني تعبت من الثنية الغالطة الي تابعتكم .. ثنيتكم هدتني .. خلاتني ننسى الشي الي تربيت عليه من بابا .. خلاتني ننسى تعب امي عليا .. انتوما شكلتو ليث اخر كيف ما حبيتو خليتوني نتجرد من انسانيتي .. تتفكر خالي اول نهار خليتني نشد فيه المسدس ؟؟
تتفكر شقتلي ؟؟ قتلي خلي كل احساس فيك يموت و ادفنو في بلاصة بعيدة ومهجورة و رد بالك ترجعلو .. الغي قلبك و انسى ليث الطفل الصغير.. باهي تتفكر شقتلي كيف وسخت يديا لأول مرة بالدم ؟؟ النهار هذاكا بقى راسخ في عقلي .. عينيه و هو يترجى فيا نراهم كل ليلة .. الكابوس هذا انا عايش عليه سنين تو ..  نهارتها جيتك نبكي خايف و نادم انت شقتلي؟؟ .. قتلي من اليوم هاذي ثنيتك و هذا انت اتقبلها و تعايش معاها .. خليتني عايش بذنب الف انسان تظلم على يدي .. تعبت خالي .. كان لازمني نبعد و نختار ثنيتي بش نلحق على الي بقى مني شوية .. مانجمش نخسر روحي اكثر من هكا .. كاره روحي لدرجة مانجمش نغزر لوجهي في المرايا .. شفت انت وين وصلتني .. تمنيتك نهار تعنقني و تقلي ماتخافش .. تمنيتك تحبني و تبعدني من الطريق هذا كيف ايهم "
مسحت دمعتي الي هبطت كانها جمرة تحرق و خذيت نفس بالقوي نحكي
" ..رغم الي عملتو عارف مستحيل كان ننساه  بش يبقى امارة كحلة في حياتي .. وصمة عاااار و عمري ما نسامح روحي اما بش نحاول نصلح الي صاار الكل مع قمر .. بش نكمل في ثنيتها خاطرها هي الصحيحة .. هي الي بش تخرج ليث الطفل الصغير الي تدفن اول مادخل للدار هاذي .. يمكن انا مع قمر تو خاطر انا مستحقلها اكثر ماهي مستحقتلي .. نتمنى نلقا شكون يمد يدو و يخرج الطفل الصغير من البلاصة الظلمة .. خايف لا يكون ضاع و انتوما السبب و وقتها مستحيل نسامحكم .. عرفت السبب تو ؟؟ .. انت السبب "
تلفت لمرت خالي الي كانت تغزرلي ساكتة تبسمتلها على جنب نحكي " و انت السبب زادة .. " هزيت صبعي الفوق ناشرلها عالبيت نحكي " انت السبب وقتلي خليتني وحدي نبكي في البيت هاذيكا من الخوف .. خليت طفل عمرو 10سنين يعيش الوحدة و هو بيناتكم ... عمرك ماحنيت عليا و لا طبطبت عليا بالعكس كنت كل مرة تفكرني في العيشة هاذي و الي انتوما سبب فيها .. تفكرني في فضلكم عليا و كيفاه انا مديون ليكم ... انا عملت هذا الكل بش نرد الدين الي عليااا و كان على حساب حياتي ... انتوما سلبتو مني صغري و برائتي .. خليتوني نكبر و انا نشوف انو ليث بن مراد موجود بفضلكم وصل لهناا بفضلكم .. خليتوني نعيييف روحي .. "
عديت بيديا على وجهي كملت نحكي " انا هنا بش نقلكم انو حقي و حق قمر بش ناخذو منكم ,, و نعاود نقولها كان انتوما السبب في الي صار لأم قمر وقتها ناري بش تشعل فيكم و انا وقتها بش ندفن الطفل الصغير بيديا و نكمل الي بديتو اما فيكم انتوما .."
دورت راسي لأيهم الي كان يغزر في القاعة و ساكت وجهو كان مايتفسرش قربت منو شوي نحكي " سمعت ايهم ؟؟ انت زادة رد بالك .. الي عملتو قبل فيها انا مانسيتوش و بش تتحاسب عليه تو و لا بعد و على يدي انا كون متاكد .. " درتلهم و عديت صبعي عليهم نحكي " كلكم بش تتحاسبو"
تلفت لخالي الي تكلم " كملت كلامك ؟؟ تو امشي و كمل في الثنية الي اخترتها اما رد بالك تندم و لا ترجع .. و كون متاكد الي احنا بش نتواجهو مرة اخرى .. اما في الوقت و البلاصة الي انا نحددها و بطريقتي انا  ووقتها بش ننسى اي حاجة تربطني بيك .. "
" و انا حاضر "
ماخليتوش يجاوبني هزيت روحي و خرجت .. على خروجي حسيت بالنسمة الي ضربتني حسيتها بردتلي النار الي شعلت فيا مع كل ذكرى تعدات قدام عينيا لداخل .. طلعت في الكرهبة وتكيت راسي لتالي هبطت دمعة من عيني من دمعة صارو دموع .. كل مانتفكر صغري و حياتي نعاود قوتي تنهااار و نتهد من جديد مانعرفش قداه بقيت عالحالة هاكي .. اول ماظلامت الدنيا خذيت ثنيتي لدار .. اول ماوصلت حليت الباب نلقى الدار رايضة و الحس بايت .. عرفت الي هي رقدت .. نحيت الفازت متاعي رميتها عالفوتاي هي و التاليفون .. طلعت في الدروج ماشي لبيتي بش نرقد و نرتاح  اما وقفني صوت بكاها .. رجعت بخطوتي و قدمت لبيتها .. دقيت الباب بشوية نحكي " ق.. قمر ؟؟ انجم ندخل ؟"
ما جاوبتنيش اما صوت بكاها قوى .. لحظتها حليت الباب بشوية و طليت علاها .. كانت راقدة اما تبكي في نومها .. قدمتلها بشوية و طبست على ركايبي مقابلها نثبت في ملامحها و حالتها .. دموعها حتى في نومها وراها .. الوجيعة بقات كيف اللعنة في حياتها حالفة متخليهاش ترتاح.. هزيت يدي و حطيتها على كتفها طبطبت علاها نحكي " قمر .. قمر فيق "
دموعها هبطو اكثر كبست على عيناها و تكمشت على روحها تحكي " قلو يسيبني امااان .. قلو ما يمسنيش.. ابعدنيييي .. "
عضيت على شفايفي و هزيت يدي بقيت نمسح على شعرها نحكي " قمر فيق .. ماتخافش حد ما يمسك و لا يقربلك .. انا معاك ما نسمح لحد يضرك "
حلت عيناها فيا شوي شوي بقات تغزرلي من غير حتى كلمة.. دموعها كانو اجابة كافية عالكابوس الي كانت تحارب فيه في نومها .. رمشت عيناها هزت روحها و قامت شوي عنقت روحها بيداها الزوز حاولت تقاوم شفايفها الي كانو يرعشو تحكي " خ.. خايفة.. خايفة من الدنيا الكل .. حا.. حاسة اني عايشة في كابوس و بش يبقى يتبع فيا حياتي كاملة .. ماعادش لاقية الراحة .. حتى في نومي .. حتى في نومي نرا فيهم و فالي عملوه.. ريحتهم و غزرتهم ساكنين فياااا .. و امي .. حتى هي في نومي نرا فيها بعيدة عليا "
تنهدت و غمضت عيناها تحكي بالشوي " نحب نرتااااح .. تعبت و الله تعبت .. هذا الكل فوق طاقتي معادش عندي قدرة بش نكمل .."
هزيت روحي و قمت قعدت على طرف السرير نغزرلها حطيت يديا على ركايبي و كبست علاها نحكي
"حاسس بيك .. كلامي مستحيل يخفف عليك .. اما صدقني قمر اول ما تستحقلي و الا تمد يدك ناحيتي بش تلقاني سابقك ب الف خطوة و نكون حذااك "
" علاه بش نأمنلك .. علاه بش نأمن لدنيا انها بلحق حطتك في ثنيتي بش تعاوني "
" لازمك تأمن.. خاطر هاذيكا لحقيقة .. انا مستحيل نضرك .. و لا نخلي مخلوق يضرك .. انا وعدتك و وعدت امك الله يرحمها انك أمانة عندي انا بش نستحفظ علاها لأخر نفس فيا "
" تعرف .. و الله نحب نصدقك .. و الله نحب نرجع ناثق في الناس.. نحب نبراا .. نتمنى نكمل حياتي كيف لبنات .. نحب نشوف الدنيا بعينيا لقديمة .. اما انا حتى روحي تخليت علاها .. الدنيا مش كاتبتلي الفرحة و لازم نرضى بالقدر متاعي "
" ماتقولش هكاا .. انت بش تبرا من هذا الكل و بش تتعداه لازمك تكون قوية .. حارب و واجه الناس الكل .. ميسالش طيح اما تعلم كيفاه تعاود تاقف على ساقيك .. الي صاار خليه نقطة قوة حتى لو كان صعيب اما حاول .. حاول في خاطرك و خاطر امك خلاها تكون  مطمانة عليك "
عدات بيداها الزوز على شعرها و تكات راسها لتالي تحكي " مانجمش .. كل طيحة نحسها تغرقني اكثر .. تعرف .. انا خسرت كل شي في ليلة و نهار .. الي تعديت بيه مفماش كتف ينجم يحملو .. انا طحت الف مرة و مالقيتش شكون يقومني .. طحت وقتلي اغتصبوني .. و وقتها قلت بالك .. بالك يحيى يقومني "
ضحكت و عضت على شفايفها هزت براسها لاا تحكي
" ههه اما لااااا هو حط يديه فوق راسي و زاد طيحني و غرسني في القاعة "
اول ما سمعت اسمو حسيت قلبي خظ رسيت على سنيا و حكيت جبيني بالقوي غزرتلها كيف كملت تحكي " و اول ما حسيت اني انجم نقوم مة اخرى كيف شكيت بيهم بش ناخذ حقي .. جيت انت و طيحتني كيف هددتني و قتلي مستعد نقدملك تقديم مادي و معنوي .. كانو فما حاجة فالدنيا قادرة تعوضني عالي ضاااع مني "
غمضت عينيا و دورت وجهي الناحية لاخرى مانجمتش نواجه عيناها الي تلوم فيا باهم قد ما حاولت نصلح غلطتي و انساها اما ما نجمتش خليتلها بصمة مني بش تبقى راسخة فيها حياتها الكل ..حليت عينيا معاها و تلفتلها كيف كملت تحكي
" و طيحتني امي معاك كيف قتلي اقبل بريان .. و طيحتني امو كيف هددتني و خلاتني نتنازل .. ريت قداه من يد هدتني .. ريت قداه من يد غرقتني .. كيفاه تحبني نأمن ليد اخرى .. يد تنجم تنهيني المرة هاذي .. كنت كل ما نتقوى ناكل كف منكم بالواحد بالواحد .. انتوما مارحمتونيش .. و زادت الدنيا على ما بياا كيف خلات الموت تزورني و تسرق مني امي .. كيفاه تحبني نخلق من هذا الكل قوة؟ اه قلي كيفااه ؟؟ .. انا اعلنت استسلامي و معادش هممني في الي يستنى فيا..  "
قربت منها شوي نحكي " حتى كان انت استسلمت انا بش نبقى وراك.. تحب تصدقني و لا ماتصدقش اما ورحمة بابا و امي الي ماعنديش ما أغلى منهم انا مستحيل نضرك و لا نسلم فيك لا لاهم و لا لدنيا الكل .. صحيح انا طيحتك معاهم .. و نادم و الله نادم و مانيش مرتاح و قد مانعمل ما نجمش نصلح غلطتي معاك .. اما انا بش نحاول نقومك و نخليك تتعدا هذا الكل .. بش نخليك ترتاح منهم و نرجعلك حقك بين يديك و هذا وعد مني و بش نبقى وراه حتى نوفي بيه لأخر نفس في حياتي "
دورت بعيناها على وجهي و هبطو دموعها تحكي " ي .. يعني كان نمدلك يدي ماتخلينش نندم ؟؟ توعدني انك ترجعلي حقي منهم ؟؟ توعدني انك تعاوني بش نقوم "
تبسمتلها نحكي " نوعدك قمر..  انا مستعد لكل شي كان اني نتخلى على يدك و لا نخليك تندم .. و انت زادة اوعدني انك تحاول تتخطى هذا الكل مهما كان صعبو .. اوعدني انك بش تعطي فرصة لروحك و ليا انو نتعداو هذا الكل .. اوعدني انك مع الوقت بش تحاول تاثق فيا"
رجعتلي التبسيمة بسيف تحكي " نو.. نوعدك نوعدك و الله .. ماعندكش فكرة قداه انا مستحقة كلام كيف هذا .. راضية بيه حتى و لو وهم المهم حاجة تطمني و تمحيلي خوفي .. راضية بكلمة تحررني من الشي الي انا محبوسة فيه "
" هذا مش وهم هذا حقيقة .. انت بش تتحرر و بش تطير و تجنح مرة اخرى و بش تضوى خاطرك تستحق هذااا بعد الي صار .. و هوما بش يتحبسو في نار جهنم و النهار هذا بش نخليه على قريب مهما يصير .. تفاهمنا ؟؟"
هزتلي براسها أي تحكي " باهي و انا بش نحاول نصدقك و نرضى اني نقاوم في سبيل نهار هذاا "
ضحكتلها نحكي " هكاكا نحبك .. كون قوية و ماتخافش انا معاااك و رفيقة معاك زادة "
" نعررف"
قمت من حذاها نحكي " اي امسح دموعك يزيك ما بكيت و حاول ارجع ارقد ارتااح و كان تستحق حاجة عيطلي "
رجعت تكات و غمضت عيناها هزيت الملحفة و غطيتها شوي عطيتها بظهري خارج وقفت على صوتها تحكي
" ليث .. عيشك "
" ماعملت شي .. تصبح على خير "
طفيت الضو و خرجت شديت بيتي .. ترميت عالفرش و غمضت عينيا .. جات تصويرتها قدامي و كلامها تعاود في وذنيا .. بداية خطوتها ناحيتي فرحتني خلتني و لاول مرة بعد فترة طويلة نرقد و انا مرتاح .. قد ما ننكر بيني و بين روحي اما سؤال خالي دخلني في متاهة خلاني بين المد و الجزر .. الي نحس فيه اتجاهها مالقيتلوش اسم اما الي متاكد منو انو قمر صارت حاجة مني .. و من غير استئذان دخلت و تربعت في حياتي و مانجمش نخرجها بسهولة .. رغم بعدها عليا نحسها قريبتلي بطريقة عاجز على تفسيرهاا ..
قمر هي نقطة التحول في حياتي هي الي بش تخليني نوصل لضو الي كنت نرا فيه بعيد عليااا.. هي اليد الي بش تحطني على الطريق الصحيح .. حكايتي مع قمر هي حياتي الجديدة و راضي بنهايتها مهما كانت ..