#ليث_يحكي
هزيت راسي معاها وبقيت نغزرلهاا كيفاه مازالت راقدة للوقت هذا.. من وقت خرجو الجماعة وروحوا وهي عالحال هذا مافقتش..قدمتلها شوي وشديتها من يداهاا حسيت روحي تهديت قدام حالتها هاذي مانجمتش نتحرك من بلاصتي ونخليها حتى ثانية وحدة خايف كان تفيق وماتلقانيش.. تكيت براسي بجنبها عالفرش وغمضت عينيا حاولت نتماسك على قد مانقدر ومانرقدش اما مانجمتش من التعب الي كنت حاسو..لي خلاني نغفى من غير ما نحس..
رجعت حليت عينيا على ضو الشمس الي سطع ف البيت.. هزيت روحي بالسيف واستويت ف قعدتي.. حسيت ظهري تقسم من النومة هاذي.. قمت من بلاصتي وقربتلهاا.. عديت بيديا على شعرهاا وين شفتها مازالت راقدة.. غطيتها مليح ودخلت لسال دوبان..قربت وين الرخامة حليت السبالة غسلت وجهي وبليت رقبتي وشعري بش نفيق شوي..سكرت السبالة بعد ماكملت..خرجت من السال دوبان ورجعت حذاها للبيت..وين شفتها كيفاه فاقت وكانت هازة روحهاا شوي وتبكي بالشهقة.. دموعها الي كانو نازلين على خدها وصوت شهقتها حسيتهم قسمولي ظهري.. .. قعدت بجنبهاا عالفرش وشديتها من يداهاا نحكي
انا:" قمر يزي من لبكا امان..يزي ماتعمل ف روحك هكاا "
هزت راسها معاياا شوي وغزرتلي بنظرة ذابلة.. وجهها كان احمر وجفونها مبلولين.. هزتلي براسها لا تحكي
قمر:" مانجمش حاسة روحي موجوعة برشة ليث..مانيش منجمة نتحمل الي صار فيا.. مانيش منجمة نتحمل خسارة صغيري والله "
قربتلها اكثر وحطيت يدي على خدهاا مسحتلها دموعها نحكي
انا :" نعرف ياروحي الي صار فيك مش شوي.. اما لازمك تكون قوية "
شهقت بالقوي وين دموعها نزلو اكثر..تحكي بصوت مخنوق
قمر :" انا..انا السبب ف الي صار..انا الي..الي وصلت روحي لهناا .. ياريتني ماطلعت ف التاكسي.. ياريتني استنيتك..... "
قصيت علاهاا نحكي
انا :" انت ماعندك حتى ذنب ياروحي..الحمل كان مش ثابت من الاول.. انت عملت كل شي بش تحافظ عليه اما مش مقدر.. ماتحملش روحك ذنب مش ذنبك "
كبست علاها بالقوي اول ماحطت راسهاا على صدري وطرشقت بالبكاء اكثر..تحكي
قمر :" دايما ه..هكا انا..دايما نوصل روحي ل..لشي هذا..ولمرة ه..هاذي انا تسببت في م..موت ولدي"
انا :"انت وين بش تعرف لي بش يصير..يزي متعذب في روحك هكا"
قمر:"ا انا كنت ن..نستنى فيه.. كنت نحلم ب..ن..نهار الي بش نشد فيه ص..صغيري بين يديا "
بقيت نسمع فيها كيفاه تبكي وتحكي حسيت روحي بلحق تهديت قدام حالتهاا هاذي والكلام هرب علياا ماعرفتش كيفاه نهديها ولا نواسيها وقتلي انا حاسس بنفس لوجيعة كيفها وممكن اكثر.. من خسارة صغيري لحالة مرتي.. مسحت بيدي على ظهرها وشعرها نحكي
انا :" يزي من لبكا تو تزيد تتعب "
بعدت علياا شوي وهزت راسها معاياا تحكي
قمر :" ن..نحب نمشي من هناا.. مانحبش نبقى اكثر "
حطيت يدي على خدها ومسحتلها دمعتها نحكي
انا :" كان بش تبقى تبكي هكاا مش بش تخرج.... "
قصت عليا تحكي
قمر :" امان..ل.. ليث راني تاعبة ووجودي هنا ت.. تعبني اكثر.. نحب نمشي "
عديت بعينيا عليهاا نحكي
انا :" باهي ياروحي نوعدك تو تخرج من هناا.. تو نكلم عمي ونخليه يخبر رفيقة بش نهزك حذاهاا "
هزتلي براسها لا تحكي
قمر :" لا.. لا مانحبش.. نحب نرجع لداري "
انا :" باهي الي تحب عليه بش يصير غير انت ارتاح ويزي من لبكا "
هزتلي براسها باهي من غير حتى كلمة.. طبست علاها بستها من راسها نحكي
انا :" خليني نمشي نشوف الطبيبة.. تجي تفحصك وكان هكاا نرجعو لدارنا اليوم "
قمر :" ب..باهي "
قمت من حذاها وساعدتهاا بش تسطحت.. غطيتهاا نحكي
انا :" ارتاح شوي حتى نجيك "
حشات راسهاا ف المخدة وغمضت عيناها من غير ماتجاوبني.. عديت بيديا على شعري وكبست على رقبتي من تالي.. خذيت نفس طويل وخرجت من البيت.. عطيت خبر للممرضة بش تنادي لطبيبة ورجعت حذاها فيسع.. قدمتلهاا وين شفتها كيفاه كانت سارحة بعيناها تغزر للفراغ هكاكا كاني مش حذاها.. غزرت للباب كيف تحل والطبيبة دخلت.. قربت لقمر نحكي
انا :" قمر أيا هز روحك خلي الطبيبة تشوفك "
دورت بيديا وراء ظهرها وساعدتها بش تقعدت.. وخرت بخطواتي لتالي وبقيت نتبع ف الطبيبة بعينيا كيفاه تفحص فيها.. شوي وقت وكملت معاهاا.. خرجت مع الطبيبة لبرا نحكي
انا :" شحالها تو ؟ تنجم تخرج ليوم ؟"
الدكتورة :" اي تنجم.. اما حالتها النفسية تاعبة شوي.. لازمها احاطة بش تنجم تتجاوز الحالة هاذي "
تنهدت بالشوي نحكي
انا :" فهمت عليك "
الدكتورة :" انا بش نكتبلها دواها وتنجم لعشية تخرج "
انا :" عيشك دكتورة "
رجعت حذاها للبيت وسكرت الباب وراياا.. ريتها كيف هزت راسها معاياا وغزرتلي تحكي
قمر :" ش..شقتلك الطبيبة؟ انجم نخرج ؟"
قريتلها وقعدت حذاهاا على طرف السرير نحكي
انا :" اي تنجم.. لعشية بش تخرج "
هزتلي براسها باهي ورجعت تسطحت.. تعدا شوي وقت قربت منها شديتها من يداها نحكي
انا :" أيا شرايك كان تقوم تغسل حالتك شوي وخليني نساعدك بش تغير ثيابك "
رجعت غزرتلي تحكي بالسيف
قمر :" ب..باهي "
قمت من حذاهاا وبعدت الملحفة من فوقها.. دورت بيديا وراء ظهرها وساعدتها بش نزلت ساقيهاا.. ريتها كيف عضت على شفايفها موجوعة.. كبست علاها أكثر وبقيت نمشي فيها بالشوي لسال دوبان.. اول مادخلناا قربتها وين الرخامة.. شديتها بيد وحليت السبالة بيدي لخرى.. بقيت نغسلها ف وجهها وبليتلهاا رقبتهاا.. لميتها شعرها لتالي وسكرت السبالة نحكي
انا :" هيا خلينا نرجعو للبيت "
عدات بعيناها علياا وغزرتلي درا كيفاه تحكي
قمر :" ع..عيشك ليث "
انا :" ماعملت شي ياروحي "
شديتها ورجعنا للبيت.. قعدتها عالفرش وقربت وين الفوتاي هزيت الساك الي بعثتها رفيقة مع الشوفور.. قربت لقمر نحكي
انا :" رفيقة بعثتلك حوايجك لبارح ف ليل مع الشوفور "
هزتلي براسها باهي من غير حتى كلمة.. لفيت وراهاا وبعدتلهاا شعرهاا.. فتحتها ازرار الروبة ونزلتها.. رجعت تلفتلها وبقيت نلبس فيهاا ف روبتهاا بالسياسة.. وفرد وقت نغزر لوجهاا كيفاه ساعات يتكبس من لوجيعة الي تحسهاا.. فردتلها شعرها ونبعد ماكملنا هكاكا وغزرت للممرضة الي دخلت عطاتني ورقة الدواء وخرجت.. غزرت لقمر نحكي
انا :" هيا خلينا نمشيو "
شديتها من يداهاا ساعدتهاا بش وقفت وهزيت الساك بيدي لخرى.. خرجنا من البيت وبقيت نمشي فيها بالشوي بالشوي.. طلعنا ف الاصونصير ونزلنا تحت.. خرجنا بعد ما الباب تفتح وخرجنا لبرا.. حليتهاا باب الكرهبة الي بعثهالي عم مصطفى الصباح.. ماحبيتش نخلي كرهبتي بش ماترجعش تشوف الدم عالكرسي وتتفكر الي صار..ساعدتهاا بش طلعت ريتها كيف تكات براسها لتالي وغمضت عيناها.. سكرت عليهاا الباب ولفيت من الناحية لخرى.. طلعت ب جنبها حطيت الساك ف الكرسي التلاني وغزرت لقمر نحكي
انا :" متأكدة ماتحبش تمشي حذا رفيقة؟"
دوب حلت عيناها شوي وغزرتلي تحكي
قمر :" اي.. نحب نروح لداري "
تنهدت بالشوي وقت شفتها لفتت راسهاا لناحية لخرى وبقات ساكتة. خدمت الكرهبة وشديت الثنية.. بقيت كل شوي نخطف نظرة منهاا.. وقفت لكرهبة قدام اول صيدلية عرضتني..شريت دواء في سع ورجعت شديت الثنية للدار..مسافة الطريق ووصلنا راكيت الكرهبة على جنب ودورتلها.. حطيت يدي على كتفها وطبطبت عليها بالشوي نفيق فيها نحكي
انا :" قمر.. هياا حل عينيك ياروحي هانا وصلنا "
حلت عيناها شوي وهزت روحها.. نزلت قبلها ودورتلها حليت الباب متاعها وساعدتها بش نزلت.. شديتها من مرفقها ودخلنا لدار.. حطيت الساك على جنب وغزرتلها نحكي
انا :" هياا اطلع ارتاح حتى نحضرلك حاجة تاكلهاا بش تشرب دواك "
هزتلي براسها باهي من غير حتى كلمة.. كبست على مرفقهاا وساعدتها بش طلعت ف الدروج.. بعدت عليا اول مادخلنا للبيت وغزرتلي تحكي
قمر :" بش نبدل دبشي ونرقد نحس ف راسي يوجع "
انا :" باهي ياروحي "
ريتها كيف قريت لدريسينغ وفتحتو بش تجبد حوايجهاا.. نحيت الفاست متاعي رميتها عالفوتاي وبقيت نحل في الشوميز .. وقفت على صوت شهقتها..تلفتللها شفتهاا تبكي بالغصة.. لحظتهاا قربتلهاا فيسع وين شفتهاا مازالت واقفة قدام الدريسينغ وف يداهاا اللعبة ااي هداتهالي اول ماخبرتني بحملهاا.. ريتها كيف كانت كابسة عليهاا وتبكي...قدمتلهاا وحطيت يدي وراء ظهرها نحكس
انا :" قمر يزي ..علاش عاملة ف روحك هكاا "
طرشقت بالبكا أكثر وعيناها باقي عاللعبة تحكي
قمر :" ال..اللعبة هاذي..خبيتها ب..بش نخليهاا لصغيري.... "
مديت يدي بش ناخذ اللعبة نحكي
انا :" هات خليني نخبيهاا وبرا ارتاح "
فكتهاا مني تحكي
قمر :"ل..لا خليها عندي امان "
تنهدت بالشوي نحكي
انا :" باهي خليها اما يزي من لبكا "
كبست بيداها لخرى عاللعبة.. عطاتني بظهرها ومشات ترمات عالفرش من غير ماتغير ثيابهاا.. ريتهاا كيف عنقت اللعبة وغمضت عيناها تبكي بساكتة.. بقيت واقف نغزرلهاا عاجز مش عارف شنعمل معاهاا.. حسيت قلبي تقطع وانا نشوف فيها هكا.. خايف لا تزيد تتعب اكثر من هكاا وحالتهاا تسوء اكثر...
حلقة 104
#ليث_يحكي
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
