#قمر_تحكي
ايامات عديتهم و انا بين الدار و الفاك .. مفما شي جديد ف حياتي .. بقيت مركزة ف القراياا و فرد وقت لاهية مع زكرياا .. بالوقت بديت نعرفو شوي شوي وهذا الي خلاني معادش متقلقة منو كيف الاول .. صرنا كل يوم نحكيو .. بدأ يفهم الدروس معاياا و قال انو فترة العلاج قريب تكمل .. و على قريب بش يكون معاناا ف الدروس ..
حليت عينيا على صوت الميساج الي وصلني .. مديت يدي لتابل دو نوي خذيتو و حليت بش نشوف من شكون .. لقيتو ميساج العادة من زكرياا .. كل يوم صار يصبح عليااا و يسألني شنوة بش نقراو اليوم .. كملت جاوبتو و قمت .. دخلت لبيت البانو عملت دوش خفيف و خرجت .. بدلت دبشي و حضرت روحي فيسع و هبطت .. لقيت خالتي و عم مصطفي يفطرو .. قدمت ناحيتهم نحكي " صباح الخير "
مصطفى :" صباح الخير بنتي "
رفيقة :" صباح النور قميرة .. هيا فيسع افطر قبل ما يجي ايمن "
هزيتلهاا براسي باهي و قعدت معاهم عالطاولة و مليت كأس قهوتي و بقيت نفطر ساكتة .. هزيت راسي على صوت خالتي كيف رجعت تحكي
" قمر ليوم انا و عمك ماشين لطبيبة .. بش نعرفو جنس الصغير "
" يعني سايي اليوم تنجم تعرف "
رفيقة :" اي بنتي .. تحب تمشي معاناا ؟"
هزيتلها براسي لا نحكي " لا خالتي امشيو انتوماا يكفي .. و انا نستنى تاليفون منك اول ماتخرج كلمني .. صدقني متحمسة بش نعرف "
تبسمتلي تحكي " باهي بنتي تو نكلمك "
تلفت لعمي يحكي " قمر ليوم فما حفلة .. شريكي بو رامي استدعاناا .. حبيت نقلك بش تحضر روحك "
" ميسالش نبقى انا ؟ مانحبش نمشي والله "
مصطفى :" علاش ؟ مش صحاب انت ورامي ؟ فما حاجة ؟؟"
هزيتلو براسي لا نحكي " لا والله مفما شي.. غير اناا نحب نروح بكري نقرأ.. كيف ما تعرف الامتحانات قربو "
مصطفى :" باهي بنتي على راحتك .. و تو نوصي خديجة مالا تبقى معاك هكا نطمن عليك "
" باهي عمي .. عيشك "
سمعت خالتي كيف تكلمت " مصطفى .. ليث بش يكون حاضر زعمة ؟ كلمتو ؟؟"
مصطفى :" حاولت نكلمو .. اما ماتحصلتش عليه.. حتى اني تعديتلو لدار و البيرو مالقيتوش .. شهرين تو مانعرف عليه حتى خبر "
رفيقة :" انشالله يكون بخير .. الي تعدا عليه مش شوي .. خليه اكيد تو يظهر "
مصطفى :" انشالله رفيقة انشالله "
بقيت مهبطة راسي و نسمع فيهم ساكتة .. مافهمتش علاه الاثنين يحكيو بالخوف هذاا .. و الغريب ف الحكاية أنو مش ظاهر .. فقت من سرحتي على صوت تاليفوني كيف نوقز .. هزيتو لقيت امنة تتطلب عرفتها الي وصلت .. قمت من عالطاولة نحكي
" انا بش نمشي .. آمنة وصلت .. ماتنساش تكلمني خالتي "
قربت بستها و خرجت نجري .. طلعت في الكرهبة بجنب امنة و شدينا الثنية للفاك .. بقينا نحكيو كل مرة ف حاجة حتى وصلنا قدام الفاك .. هبطت من الكرهبة و مشيت نجري لكلاسي .. دورت بعينيا نلوج على رامي مالقيتوش .. كالعادة اول حصة مايحضرهاش يصبح راقد و بعد يحبني انا نفهموو .. بقيت كالعادة ف طاولتي وحدي و بقيت نتبع ف الدرس حتى تعدا الوقت ..اول ماخرجت شفت رامي واقف هو صحابو .. قربت ناحيتهم و ناديتلو .. تلفت و قربلي يحكي
" صباح الخير قموور "
هزيت بحاجبي نحكي " مش قتلك معادش تقلي هكااا "
ضحك يحكي " اي قتلي .. اما انا مانسمعش لكلام "
" شبيك ماحضرتش الصباح للكور ؟؟"
حك على جبينو يحكي " قمت الصباح كملت شوي قضيات لأمي.. الليلة عندنا حفلة و عم مصطفي ف بالو "
هزيتلو براسي اي نحكي " اي في بالو قالي "
رامي :" و انت بش تحضر مش هكا ؟؟ "
" لااا "
عقد حواجبو يحكي " علاش لااا ؟؟ ايجاا تفرهد شوي تعرف الامتحانات قربت .. بدل شوي الجو معاناا "
" لااا رامي .. مانحبش والله "
" بصراحة قمر من غير غش .. انت ياسر معقدة "
حليت عينيا فيه نحكي " انا معقدة ؟؟"
هزلي براسو اي برشة مرات يحكي " اي و برشة زادة .. شوف روحك .. من وقت جيت للفاك و انا نحاول فيك بش تدخل ف جونا و انت مش عاجبك شي .. و تو عالحفلة ماتحبش .. و كل مانقلك على حاجة ترفض .. ديما وحدك و جابدة روحك .. مش فاهم شنوة مشكلتك "
ضحكت على جنب نحكي " ماعندي حتى مشكلة .. اما جو اصحابك مش جوي و الحفلة زادة مش جوي "
خليتو واقف و خرجت .. حسيت روحي غزلت من كلامو .. هاذي اول مرة رامي يحكي معايااا هكااا .. مديت يدي وقفت تاكسي وروحت .. معادش عيني بس نكمل بقية الدروس .. شديت الثنية للفيلا .. اول ماوصلت و حليت الباب عرضتني خالتي خديجة تحكي
" اهلا بنتي .. نحطلك تفطر ؟"
هزيتلها براسي لا نحكي " لا عيشك خالتي .. قلي خالتي و عمي هناا ؟"
" لاا .. مازالو مارجعوش "
" باهي خالتي "
طلعت البيتي و ترميت عالفرش .. بقيت نغزر لسقف و سارحة ف كلام رامي .. كلمة معقدة منو ماحبيتهاش .. مافهمتش كيفاه يراني هكاكا .. هزيت راسي عالباب كيف تحل .. تبسمت كيف ريتها خالتي .. قمت نجري نحكي " قلي خالتي .. شقتلك الطبيبة؟؟"
تبسمتلي تحكي " بش يجينا طفل "
عنقتها بالقوي نحكي " والله فرحتني خالتي "
بعدت علياا و حطت يدياها على وجهي تحكي " بش تكون انت احلى اخت ليه .. ربي يخليكم لياا "
" و يخليك ليناا خالتي .. قلي صحتك مليحة و صحتو هو ؟"
" احنا ملاح .. ماتخافش عليناا بنتي "
هزيتلها براسي باهي من غير حتى كلمة .. شفتها كيف غزرتلي تحكي " هياا معاناا قمر .. علاش حابسة روحك ف البيت "
رجعت قعدت عالفرش نحكي " لا خالتي خليني امان "
" على راحتك بنتي .. اما حاول انك تخرج و تبدل الجو .. هكا خير ليك انت صدقني "
هزيتلها براسي باهي نحكي " باهي خالتي "
ريتها كيف خرجت و سكرت لباب .. رجعت ترميت عالفرش .. بقيت بين كلام خالتي و كلام رامي .. يمكن بلحق لازمني نخرج و نبدل حياتي هاذي .. يكفي مابقيت ف البيت حابسة روحي نخمم .. هزيت روحي و دخلت لبيت البانو عملت دوش و خرجت .. قربت للخزانة حليتهاا .. دورت بعينيا عالروب الي كانو معلقين .. بقيت نغزر لروبة الحمراء .. مديت يدي و جبدتهاا .. حطيتها عالفرش و قربت للكوافوز .. حليت شعري .. نشفتو و بقيت نمشط فيه .. لميتو الفوق و عملت مكياج خفيف .. نحيت الكاب دو بان و لبست الروبة .. غزرت لروحي في المرايا و تبسمت .. الروبة كانت ياسر كلاس.. طويلة و عريانة من فوق .. الفونت اللي فيها واصلة لفخذي .. لبست الطالون و هزيت البوشات .. خذيت تاليفوني و طلبت تاكسي .. خاطر خالتي و عمي سبقو .. هبطت اللوطة و قعدت ف الصالة .. شديت تاليفوني و حطيت رقم زكرياا بش نبعثلو ميساج
" عسلامة زكرياا .. سامحني الليلة مانجمش نعطيك دروس .. خارجة مع دارناا "
ماستنتوش يجاوبني .. خرجت اول ماسمعت صوت التاكسي وقفت .. طلعت و عطيتو العنوان .. شوي وقت و التاكسي وقفت قدام فيلاا كبيراا .. حليت الباب و هبطت .. اول مادخلت عرضني رامي يحكي
" كنت مفكرك مش جاية "
غزرتلو على جنب نحكي " بدلت رايي ميسالش ؟"
ضحك يحكي " اي ميسالش ما قلنا شي .. اما طلعت ياسر محلاك "
تبسمتلو و بقيت نغزر للحضور الكل .. تلفتت على صوتو يحكي " ايجاا معاياا .. نعطيك تشرب حاجة "
هزيتلو براسي باهي و بقيت نمشي معاه و ندور بعينيا عالبلاصة .. قلبي خط بالقوي اول ما عينياا لمحتوو .. كان واقف بعيد و يغزرلي ..
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
