#ليس_ذنبي ❤️‍🔥

ليس ذنبي الحلقة الخامسة

الحلقة الخامسة
قمر تحكي
مانعرفش قداه تعدا وقت من وقت خروج يحيى .. مشى و هز قلبي معاه نحس في روحي مخنوقة و الدنيا ضياقت بيا .. غزرتو وهو يلوم فيا قطعتلي قلبي طروف .. أصلا عندو الحق كان سمعت كلامو راو هذا الكل مصارش .. عندي إحساس يقلي انو يحيى من باش يسامحني انو يحيى بش يتخلى عليا اما لا يحيى مستحيل يعملها .. هة تو مغشش و هذا حقو و اول ما يبرد بش يجيني و يبردلي النار الي شاعلة فيا .. بش يجي و يداويلي جروحي و يمسحلي دمعني كيف العادة .. تعدا برشا وقت و انا سارحة كل مرة نخمم في حاجة ساكتة اما مخي يحكي برشة يحكي في برشة حاجات ماحبش يسكت و يريحني شوي حاسة روحي بش نهبل نحب على يحيى نحب على ريحتو نحب انو يجي و يعنقني اما هو مازال ماجاش .. رقدو برشة مرات و كل مانقوم نقول بش نلقاه ما مجانيش .. تلفت نلقاء امي راقدة عالفوتاي وجهها احمر من النديب و عينيها منفوخة .. اه يا امي سامحني انا سبب في هذا الكل انا الي وصلتك للحالة هاذي .. كيفاه بش تخرج و تقابل لعباد كيفاه بش تهز راسك بيا كيف العادة .. انا ما دمرتش وحدي انا دمرتكم معايا .. فقت من سرحتي على الباب كيف تحل فرحت تلفت ملهوفة في بالي يحيى جاني اما فرحتي ماكملتش كيف ماريتوش .. ريتها قاعدة تقدملي نفسها المرا الي كل مانحل عينيا نلقاها نفسها المرا الي عاونتني
" قمر .. لباس بنتي تو ؟"
سرحت شوي ماعادش عرفة شمعناها كلمة لباس .. كل شي فيا مش لباس موجوعة و مخنوقة كل شي فيا قاعد ينزف
" لباس .. لباس عيشك خالتي رفيقة"
" كان تستحق حاجة انا معاك احسبني كيف امك .. انا بش نبقى هنا لين تخرج انت "
" عيشك .. اما ميسالش ما تعطلش روحك على خاطري انا لباس والله "
" لا هاني موجودة معاك مانيش ماشية لحتى بلاصة لين تقوم انت .. لازمك ترتاح عنا ما نحكيو قمر"
حاولت نهز روحي شوي و هي عاونتني غزرتلها متعجبة " فاش بش نحكيو ؟؟"
" في الي صارلك ."
" ما عندي مانحكي .. كل شي وفا .. حتى بش نحكي ما عندي مانقول مانعرفهمش مانعرفهمش "
" ارتاح تو و حاول تفكر أي حاجة تنجم تعاونك .. أي حاجة انت تراها بسيطة تنجم تاخذلك حقك "
" علاه تعمل معايا هكا ؟"
" خاطرك تفكرني في بنتي ياسر تشبهلها انت حطيت روحي في بلاصة امك و قررت نعاونك و ناقف معاك للخر .. كان انت تسمح بالطبيعة"
تبسمتلها و عينيا دمعت " بالطبيعة نسمحلك .. عيشك خالتي رفيقة .. اما بلحق انا مانتفكر شي "
" ميسالش ارتاح تو و تو بعد نلقاو حل .. انا حكيت مع الطبيبة بش تحضرلك شهادة طبية فاها الي صارلك الكل .. غير انت قوم و حاول تقوي روحك .. لازمك تأخذ حقك منهم و ترفع راسك بين العباد .. انت قوية قمر و شريفة هوما الي مسخين و لازمهم يتحاسبو .."
قداه عزت بيا و عز بيا كلامها يمكن الكلام هذا الي انا مستحة نسمعو تو و تمنيت كان سمعتو من عند يحيى
" خالتي رفيقة .. نطلب منك حاجة امان"
" تدلل بنتي قلي "
" يحيى نحبك تعيطلي ليحيى .. ملي مشى ما رجعش "
" خليه قمر خليه شوية الي صار هدكم الزوز .. خليه يصفي مخو شوي و تو يجي وحدو وحدو .. يحيى باين يحبك ريت الخوف في عينيه .. سمعت صوتو في التليفون كيفاه ملهوف عليك .. يحيى يحبك و مستحيل يسلم فيك "
تبسمت على كلامها محلاها هالمرا في لحظة طمنتني و الخوف مشى في لحظة قوتني و خلاتني نخمم بش ناخذ حقي قداه كنت مستحقتها .. غمضت عينيا و رقدت على على يدها و هي تمسح على شعري .. رقدت و انا مش خايفة و مطمانة ريحتها هداتني بصيفة غير عادية .. رقدت و انا على امل اني كيف نقوم بش نلقاء يحيى قدامي .
طلع الصباح حليت عينيا على صوت امي و الطبيبة
" تنجم تخرج اليوم مش هكا ؟؟"
" لا مدام حسنة لازمها تزيد نهار حذانا و بعد تخرج"
حسيت روحي فرحت اني مانيش بش نخرج و نقابل لعباد نحب نبقى هنا نحب نبقى بعيدة عالناس الكل نحب نهرب و مانراش غزرتهم الي بش تخليني نكره روحي و نشفق علاها .. دورت عينيا عالبيت نلوج عليه وشي ماجاش هزيت روحي شوي نتكلم " امي امان اعطيني تليفوني "
" حاضر يا ماما"
خذيتو من عندها و طلبتو نوقز نوقز و بعد تسكر هبطت دمعة من عيني حسيت انو يحيى يتهرب مني يحيى سلم فيا و كل شي وفا .. جات امي بجنبي تمسحلي في دمعتي و تحكي
" تو يجي وراس بنتي تو يجي .. يحيى وتعرفو كل ماتصير مشكلة يهرب و بعد يجي .."
قصيت علاها نبكي و نتكلم " اما هاذي مش مشكلة يامي هاذي فضيحة " عنقتني و انا اطرشقت بالبكا عندي إحساس خايب إحساس انو يحيى بعيد برشة عليا إحساس عمري ما حسيتو .
تعدا الوقت و جات حذانا خالتي رفيقة و صاحبتي اية كلهم حاولو يواسيوني حاولوني بش ناكل و نقوم شوي و انا مش منجمة حاسة بدني خايني حاسة روحي لا عندي لا قوة و لا طاقة .. في ليلة و نهار خسرت كل شي شرفي و حياتي و خسرت يحيى معاهم
ما حسيتش بروحي كيفاه رقدت .. حتى في نومي نلوج على يحيى ومالقيتوش حتى منماتي عاملة عليا بلعاني ماتحبنيش نرا يحيى موش موجود .. كان نخسرو هو يمكن نموت يمكن نضيع اكثر ما انا ضايعة تو
فقت على صوت امي الي تبكي و تحكي " كيفاه يعمل هكا ؟ كيفاه بنتي بش تتحمل هذا الكل "
قلبي دق و حسيت بدني رعش عرفتها تحكي على يحيى .. هزيت روحي ووقفت تحملت لوجيعة الكل أصلا ماحسيتش بيها خاطر وجيعة قلبي اقوى منها .. " كيفاه بش يمشي و يخلاها ؟ كيفاه بش نقوللها "
" شنية بش تقلي امي ؟" تلفتولي الكل مصدومين كلهم سكتو و انا صحت " شنية بش تقولي ؟؟ يحيى وينو"
جاتني خالتي رفيقة تجري عنقتني و تسكت فيا .. غزرتلها نترجى فيها " امان ما تقوليش يحيى مشى امان امان خالتي قلي يحيى وينو "
" يحيى بش يرجع للمهدية وين كان يعدي في الستاج "
على كلمتها طحت على ركايبي مصدومة حتى دموعي وقفو .. حسيت لكلام وحل في قراجمي .. صحت صحت بالقوي صحت بقوة الوجيعة الي حسيتها .. كيفاه بش يمشي من غير ما يقلي و يطل عليا كيفاه هنت عليه كيفاه رضا انو يخليني وحدي .. جاو الفرمليات هزوني للفرش و زرقولي و انا في دنيا اخري قداه مازلت بش نتحمل قداه مازلت بش نقاوم ماعادش فيا ماعادش انجم .. غمضت عينيا و انا نتمنى الي صار يكون كابوس و يتعدا وانا نعدي في ربي انو بكون معايا و يعطيني القوة رقدت و انا نتمنى اني ما نقومش مرة أخرى .. اما قمت لقيت الدنيا ضلامت و الناس الكل راقدين الدنيا ساكتة و باردة اما مخي يحطي و قلبي نار شاعلة فيه .. قمت نلقا امي و خالتي رفيقة راقدين .. تبسمت و انا نغزرلها .. مرا لا تعرفني لا نعرفها وقفت معايا و ما سلمتش فيا بقات مع امي تواسي فيها .. خرجت مالبيت بروبة البيطار حافيانة .. الي يغزرلي يبهت ف حالتي و انا ما يهمني في شي كان اني نخرج و نوصل ليحيى نمشيلو و نقولو ما تمشيش
خرجت مالسبيطار و بقيت نمشي ماحسيتش لا بالبرد و لا بالشتاء الي تقطر عليا .. نمشي و نبكي دموعي تخلطت مع المطر نمشي و انا سارحة ما فقت من سرحتي كان كيف وصلت لدارو .. نلقى تاكسي واقفة قدام الباب و امو خالتي منيرة واقفة ...
على تلفيتي نلقاء يحيى خارج من الدار وفي يديه فاليز
" يحيـــــــــــي يحيى "
تلفتلي بالوقت و غزرلي على ما قد غزرتو كانت باردة على ما نار الي في قلبي زادة شعلت
صحت وانا نبكي " امان يحيى ما تمشيش امان ما تسلمش فيا امان ما تعاقبنيش بالطريقة هاذي ايجا صيح عليا وعيط اضربني كان لزم خاطر مسمعتش كلامك اما ماتمشيش امان"
" امشي قمر امشي من هنا كل شي وفا مانجمش " قال هالكلمتين بكل بساطة وعطاني بظهرو
مشيتلو نجري عنقتو و دورة يدي على كرشو نحكي بالشهقة " لا يحيى ما تقولش هكا .. ما تقتلنيش كيف ما قتلوني هوما ما تعملش فيا كيفهم امان يحيى كان تمشي انا نموت والله نموت ماتسلمش في قميرتك امان ماتخلينيش وحدي ماعندي حد في الدنيا كان انت "
هبطلي يدي و تلفتلي " سامحني اما منجمش نكمل معاك انت دمرت كل شي "
تصدمت من كلامو و قتلو " انا ؟ انا الي دمرت كل شي ؟ شنية ذنبي انا اه؟ شنية ذنبي في الي صار؟ و الله ترجيتهم بش يسيبوني و الله قاومتهم والله دافعت على روحي لأخر لحظة أما .."
قص عليا يصيح " اسكت اسكت ما نحبش نسمع منك شي افهم سايي انت وفيت و كل شي وفا معاك"
كلمتو لخرا حاسيتها كيف الخنجر في قلبي خلاتني نطيح على سقايا خلاتني نكره روحي و نحقرها .. حسيتها ذلتني هزيت راسي نلقاه طلع في التاكسي و مشي .. يحيى مشي و هز كل شي معاه .. نسمع في امو طبست عليا تحكي
" هذا الي لازم يصير قمر "
" لا ماتقولش هكا خالتي .. انت اكثر وحدة تعرفني تعرف انا شنوة "
" أي نعرفك اما الناس ما ترحمش .. هز امك و امشي بعيد ابعد من كلامات الناس "
خلاتني غارقة في دموعي و مشات بقيت وحدي في الكياس مطيشة نبكي نبكي بقهرة بوجيعة .. يحيى قتل اخر حاجة كانت مخليتني نقاوم يحيى قهرني كيفهم .. اليد الي كان لازم تشدني زادت غرقتني .. اتكيت عالحيط و غمضت عينيا عالمطر الي قوات حسيت السماء بكات على وجيعتي حسيت بالدنيا حزنت عليا .. غمضت عينيا و انا متاكدة انو حياتي من اللحظة هاذي وفات