حلقة 79
#فريحة_تحكي
الي سمعتو من وراء الباب خلاني نتصدم .. متوقعتش الي خطيبها بش يرجع يحاول يتعدا عليها هو زادة .. بعد لي عشتو انا في هذيك الليلة انجمم نعرف حجم الرعب والخوف لي عاشتو هي .. رغم اني منطيقهاش .. اما سخفت علاها .. خاصة كيف عرفت الي هي حاولت تنتحر .. يمكن هي زادة معندهاش ذنب منعرفش ..
مشيت للبيت وبقيت جنب امي .. تعدا شوي وقت ولقيتها حلت عيناها وفاقت .. هزيت روحي وقربت منها نحكي " امي انت لباس مش هكا .. كيفاش تحس في روحك ؟؟'
دورت بعيناها عليا تحكي " لباس بنتي متخافش علياا "
طبست بستها من جبينها نحكي " حمد الله يا ربي ترعبت عليك و الله .. ماعنديش غيرك يا امي .. سامحني لي تعديت بيه كلو من تحت راسي انا "
" الي صار صار .. المهم انت بخير .. قلي شصارلي ما نتفكر شي "
قعدت بجنبها وشديتها من يدها نحكي " انت بديت تتعب ودخت .. وبعدها ماعاد حسيت على شي .. جبتك انا وليث لهوني "
ريتها كيف تبسمت تحكي " صاار هو لي جابني "
هزيتلها براسي اي نحكي " اي امي .. انا كلمتو .. وهو كثر خيرو جا "
" محلاه الولد هذاكا والله .. ربي يعطيه كل خير"
تبسمتلها نحكي " هيا تو ارتاح انا هاني بجنبك "
شفتها كيف غمضت عيناها و رجعت غفات .. قمت من حذاها و قعدت مقابلتها عالفوتاي .. تعدا وقت وانا منجمتش نرقد .. بقيت نفكر في كلشي صار .. حتى خذاتني عيني .. فقت على صوت الباب يدق .. هزيت روحي شوي .. شفت ليث كيف دخل .. والنهار طلع .. اصلا انا رقدت وجه الفجر .. قرب مني يحكي
" صباح الخير.. فيقتك ؟"
استويت روحي اكثر نحكي " صباح النور .. لا عادي "
غزر لامي و رجع غزرلي يحكي " شنحوال امك "
تلفت كيف ريتها بدات تفيق .. حلت عيناها .. قمت من بلاصتي و قربتلها نحكي " صباح الخير امي "
" صباح النور بنتي "
هزت عيناها لليث وتبسمتلو قرب منها هو زادة يحكي
" خالتي كيفاه تحس في روحك اليوم ؟"
بقات متبسمتلو تحكي " لباس ولدي .. الحمدالله "
" حمد الله على سلامتك .. ايا سايس روحك خالتي
.. ميجيش تعب روحك كل مرة هكا "
" عيشك ولدي ... وعيشك على كل لي عملتو معايا ومع بنتي فضلك كبير والله "
" ماتقولش هكا خالتي .. هاذا واجبي "
غزرلي يحكي " انا بش نمشي تو .. كان تحب ايجا للفيلا ترتاح نعرف لي مرقدتش "
" لا .. مانجمش نخلي امي وحدها .. خليني ميسالش "
تلفتت لامي كيف تكلمت " برا على روحك بنتي .. شنوة نومت السبيطار هاذي .. ارتاح وبعد ارجعلي .. انا هاني بخير وبش نرجع نرقد ماعندك ما تعملي "
شفتو كيف ضحك يحكي " هاي امك جاوبتك .. شنوة تو تحب تمشي ولا لا ؟ "
تبسمتلو نحكي " باهي بش نجي .. اما استناني نعطيها دواها ساعة "
" باهي .. هاني اللوطة بش نستناك في الكرهبة "
ريتو كيف خرج من البيت .. مشيت بش ناخذ الدواء نعطيه لامي .. تلفت على صوتها تحكي " شه شه محلاه هالراجل .. كيفاش متربي ووهرة ومال ومنصب .. هام الرجال الي بلحق "
عوجت فمي من كلامها .. فهمت لي تقصد في ريان .. قصيت علاها نحكي " امي امان يزي "
قحرتلي تحكي " شنوة غالطة ... تذكر كيف كنت نقلك يا بنتي سيب عليك .. اخطاك منو ريان .. مافيه حتى شي يصلح .. اما انت عاندت ...كان خيرت واحد كيف هذا من لول .. راو مصارش فيك هذا الكل "
نفخت نحكي " باهي امي شتحب تو ؟؟"
" نحبك تحل عينك ... انا من قبل قتلك بنتي انت ربي عطاك الزين .. متخليش النعمة هاذي تمشي هكاكا ..
بزينك تنجم تركح الراجل لي تحب عليه .. ومش بش تلقا احسن من ليث "
عقدت حواجبي مستغربة من حديثها نحكي " امي شقاعدة تخرف انت .. الراجل معرس وانا ماعيني في حتى شي منو "
" مش قتلي لي عرس بيها بش يعاونها كهو .. وقلت لي بقا راقد في الصالة كيف كنت عندهم .. ماعنتها مفما حتى شي بينهم .. انا هاني نصحتك .. بعمري هاذا انجم نعرف الراجل لي يهنيك .. و هو بش يهنيك "
" يزي امي امان .. منحب حتى شي .. الراجل قاعد يعمل في مزية معانا وكهو وانا لي فيا مكفيني "
" لا مش مزية وكهو .. هاو خمم عليك ويحبك ترتاح ... نعرف لي انت تاعبة .. من لي صارلك .. اما متضيعش فرصتك .. عيش بنتي لازم تخمم في روحك و في مستقبلك "
نفخت بالقوي نحكي " امي امان خو دواك خليني نمشي نرتاح "
رجعت قحرتلي تحكي " باهي ..هات عليك .. مصح راسك "
ماجاوبتهاش .. شربتها دواها وخليتها تتكا و خرجت .. هبطت اللوطة .. لقيتو يستنا فيا .. ركبت بجنبو نحكي
" ليث منحبش نقلقكم .. وصلني للمحطة تو نمشي نرتاح في دارنا "
غزرلي يحكي " مفما حتى قلق فريحة .. اصلا مناش قاعدين في الفيلا .. تنجم ترتاح فيها كيف ما تحب "
هزيتلو براسي وسكت .. خدم الكرهبة بقينا ساكتين الزوز .. غزرتلو وللحظة ضرب كلام امي في بالي ..
بلحق هو راجل مايتعوضش عاوني انا وقمر بلا حتى مقابل وقت لي حبيناهم غدرونا .. تبسمت على جنب كيف تذكرت ريان .. هو ما يتقارنش بليث حتى طرف ..
اما انا مانيش نخمم في الشي هذا تو .. اللي تعدا عليا خلاني نكره الرجال الكل .. نحب نرتاح وكهو ..
هزيت راسي كيف ركا الكرهبة يحكي " هيا اهبط "
هبطت وبقيت نمشي بجنبو .. حل الباب ودخلت وراه ..
دخلني للبيت يحكي " ارتاح هوني .. كيف ما قتلك الرجال لبرا .. كيف تحب تمشي لامك اطلبني بش نبعثلك الشوفور باهي "
هزيتلو براسي باهي و خرجت وراه للباب نحكي " انت بش تمشي ؟؟"
" ايه.. عندي خدمة لازم نكملها "
تبسمتلو نحكي " باهي ربي معاك ليث "
" عيشك .. كان تحتاج شي اطلبني تفاهمنا "
هزيتلو براسي باهي .. شفتو كيف حل الباب .. كان بش يمشي اما وقفتو نحكي " ليث دقيقة "
اول ما تلفتلي خرجت قربت منو وحضنتو نحكي
" عيشك على كل شي كان مش انت راني خسرت امي "
جبدت روحي منو .. طلع يديه مسح على راسي يحكي " ماعملت شي ومن ليوم اعتبرني خوك "
تبسمتلو و هزيتلو براسي باهي .. عطاني بظهرو وطلع في الكرهبة و مشى .. دخلت للدار .. ترميت عالفرش و حطيت راسي حاولت نرقد بش نهرب من الافكار لي قاعدة تدور في راسي .. اما مانجمتش كل مرة نخمم في حاجة و في حكاية .. زعمة شنوة يستنى فيااا و حياتي كيفاه بش يكون مصيرهااا ..
#قمر_تحكي
VOUS LISEZ
#ليس_ذنبي ❤️🔥
Roman d'amour" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
