الحلقة 17
#قمر_تحكي
الوقت وقف من اللحظة الي واجهة فيها ليث .. كلامو بقى يتعاود في وذنيا قوتي مش كافية بش ننساه ونتعدى، كل مواجهة كانت تصير مع واحد فيهم نطلع انا الخاسرة.. ومتأكدة اني مازلت بش نخسر.. فكرة اني نتنازل على حقى خلاتني نحس بضعفي ووحدتي وقلة حيلتي .. فكرة اني نعرس بواحد فيهم تخليني نعيف روحي لدرجة اني نتمنى الموت، الموت ارحملي على اني نحط يدي في يدهم و نواطي راسي ليهم، ارحملي من اني نعرس بواحد دمرلي حياتي، واحد حرقلي قلبي وعايشني في جهنم..
اليوم عرفت اسم الثاني "ريان" اسمو وحدو كافي انو يخنقني ملامحو لتو بين عينيا ريحتو لتو كابسة على صدري كلامو و ضحكتو ترسخو في عقلي .. نكرهم ونكره اللحظة الي خلات طريقي يتقطع مع طريقم..
من وقت خروج ليث و انا حاسة روحي خرجت معاه. جاء بش يسكتني ويخليني نرضخلهم جاء زاد هدني كيفهم وزاد في وجيعتي..
ماحسيتش بخالتي رفيقة وامي الي كانو يهديو فيا لحظتها غبت عالدنيا ومعادش حاسة بشي كنت نبكي بحرقة على روحي و عالي مازال يستنى فيا.. كل ما نتقوى نلقى روحي نرجع بالتوالي وخوفي منهم يكبر .. كنت نسمع في خالتي رفيقة تحكي معايا اما صوتها ياسر بعيد قربت مني و هزتلي راسي مسحتلي دموعي تحكي
" وفاات وفاات .. يزي عيش بنتي انسى الي سمعتو "
حطيت يدي علي صدري و بقيت ناخذ في النفس وراء بعضو مانجمت نرا شي من الدموع الي ملات عينيا " كيفااه ننسى يا خالتي .. كيفاه يحبوني نعرس بيه "
قربتلي وحطتليي راسي على صدرها بقات تمسحلي على ظهري وتحكي " ماكش بش تعرس بيه خلاهم يحكيو .. خطوتو هاذي تدل على انهم خايفين والله وراس بنتي لا نخلاهم يقربولك و لايضروك "
" اما انا خايفة خالتي .. هو قالها احنا طحنا مع ناس قوية .. مش بش يخلونا فحالنا رايضين بش يضرونا اكثر من هكا"
" ماينجموو يعملو شي ماعندك علاه تخاف .. انت كمل في الي بديتو وانا منخليش مخلوق يضرك مهما يصير .. امسح دموعك عيش بنتي راك وجعتلي قلبي يا قمر "
كلام خالتي رتحني شوي كل مرة نلقاها هي الي تلقفني اول مانطيح هي الي ترجعلي قوتي بعد مانضعف.. هي الصدر الحنين الي يخبيني من الدنيا الكل .. هزيت راسي وغزرت لأمي الي كانت تغزرلي ساكتة كان دموعها هابطة زادو قسمولي ظهري سكوتها خلاني نخمم فيها وننسى روحي اللحظة هاذيكا
" ا امي شبيك ساكتة قوول أي حاجة .. مستحقتك امي مستحقة منك أي حاجة تخفف عليا "
مسحت دموعها وقربتلنا قعدت حذايا وحطت يداها على حجري تنهدت تحكي
" قمر.. اقبل.. اقبل عيش بنتي"
هزيت راسي معاه للحظة تمنيت كان نكون سمعتها بالغالط كان نكون نهلوس من التعب ومش امي الي قالت هكاكا بقيت نغزرلها نستنى فيها تكمل كلامها تنفي الي قالتو و تخرجنى من الدوامة الي دخلتني فيها
لكلام و الحروف الكل غابو لحظتها قدام كلمتها.
نسمع في خالتي رفيقة الي بعدتني عليها تحكي " فاش تحكي حسنة واعية بالي قلتو ؟ تقبل شنية "
" تقبل تعرس بيه وتتلم الحكاية هنا.. يزي الي صار فينا "
" نورمال انت تضحي ببنتك ترضالها تأخذ واحد حطمها ؟ كيفاه قلبك طاوعك.. انت ام !!"
" انا نحكي هكا على خاطرني ام نحكي هكا على مصلحتها .. نخمم في مستقبلها .. شوف حالتنا هربنا من دارنا و من حومتنا.. معادش عندي وجه بش نخرج نقابل لعباد.. و كان لحكاية توصل للمحكمة شنوة بش يصير بش نزيدو نتفضحو اكثر بش نوليو سيرة في فام لعباد .. شكون بش يرحمنا اه؟ احنا ولايا وحدنا ما عندانا حد في الدنيا كان ربي كسيبتنا شرفنا وانا مش بش نعيش لقمر حياتها الكل.. لازمها تخمم في روحها وتخمم فيا .. كان خطيبها الي يعرفها مالصغرة ويعرف الي هي مظلومة هرب خلي الي ما يعرفهاش شكون بش يغزرلها.. كيفاه بش تكمل حياتها"
غمضت عينيا بالقوي على كلامها .. كل كلمة نطقتها امي كان كيف السكينة في قلبي كبست عالفوتاي و حاولت نقوم بسيف تقويت على روحي و تكلمت " يا ريتني مت و لا سمعتك يا امي .. وقتلي انا نستنى في كلمة منك كلمة وحدة تبردلي ناري نستنى فيك تمدلي يدك و تطبطب عليا شوف انت فاش تخمم.. تخمم في لعباد و في كلاماتهم و مخاممتش فيا انا.. في شنية حاسة و شنية بش نحس بعد كلامك هذا .."
ما خليتهاش تجاوبني مشيت نجري حليت الباب وخرجت ماتلفتش لخالتي الي كانت تعيطلي لحظتها حبيت نهرب نبعد على كل شي و ننسى الي سمعتو ليوم.. وقفت لبرا هزيت راسي وحطيت يدي على صدري ونبكي بكيت على قد لوجيعة الي حاستها .. الي عشتو ليوم كان كافي بش يخليني ننقم عالدنيا الكل نكرها ونكره وجودي فيها.
بقيت نمشي و مش عارفة ساقيا وين هازتني حاسة روحي وصلت لثنية مسكرة ثنية بقيت نتخبط فيها وحدي.. مبقالي حد الناس الكل سلمو فيا كلهم عطاوني بظهرهم .. حاسة روحي عاجزة حتى بش ناخذ نفس .. بقيت نمشي لين نلقى روحي وصلت لجبانة مشيت نجري لقبر بابا حطيت راسي عليه وغمضت عينيا تمنيت لحظتها كان ما نعاودش نفتحهم كان نكمل في الطويل ونلقى روحي مع بابا يمكن وقتها نرتاح و وجيعتي تخف .. يمكن كان نموت انا امي ترتاح و ماعادش تخمم في الناس سايي وقتها شرفها يرجع نظيف.. يمكن وقتها يحيى يندم على عملو فيا وقلبو يوجعو كيف ماوجعلي قلبي.. يمكن الي عملو فيا هكا قلبهم يسخف عليا حتى شوي.
شهقت شهقة حسيت روحي شوي وتخرج معاها لميت الحروف الي وحلو في حلقي و زادو خنقوني نحكي
" ب باباااا .. يا بابا تعبت ..حاسة روحي تاعبة ماعادش عندي قوة لحتي شي .. بقيت وحدي في الدنيا .. قووم بابااااا قوم راني مستحقتلك قوم وقولي شنعمل .. دمروني يا باباااا خلاوني نتمنى الموت خلاوني نتعذب بالحياااا .. قوم وشوف شعملو في قميرتك هدوها ومازالو يهدو فيهااا .. ما طلبت شي ما طلبت شي من الدنيا كان اني ناخذ حقي و نبرى اني نكمل حياتي و نعيش كيف بقية لبنات .. سرقو مني كل حاجة باهية في حياتيييي .. " تنهدت و كلمت نحكي " تعرف بابا هوما ما خذاوش كان شرفي هوما خذاو روحي خذاو مني يحيى .. يحيى الي مشا من غير ما يتلفتلي يحيى الي كمل غرقني معاهم و خلاني نضيع اكثر
و وليومم كملو سرقو مني امي .. قد ماحاولت نلقالها عذر مانجمتش .. كلام امي كان القطرة الي فيضت الكاس .. نحب نغمض عيني و نرتاح نحب ناخذ نفس جديد نحب نرتاح من العذاب هذا .. علاه انا صاير فيا هكا علاه حد ما حب يفهمني و يحس بيا .. كيفاه يحبوني نقبل بواحد اغتصبني واحد سلب مني شرفي وفضحني كيفاه بش نعيش معاه اه ؟ كيفاه بش نغزرلو كيفاه بش نتحمل قربو.. الموت اقربلي و ارحملي منو .. توحشتك بابا يا ريتك معايا تو وجنبي نحب نعنقك ونرتاح .. امي قالت الي احنا ما عندنا حد .. صحيح كلامها انا معاد عندي حد بقيت وحدي .. نتمنى نكون حذاك تو صدقني يمكن هذيكا لبلاصة الوحيدة الي مش بش تعذبني يمكن الموت بش تكون راحة ليا وليهم"
غمضت عينيا حبيت نرتاح شوي حسيت روحي تهديت ما نعرفش قداه تعدا عليا وانا عالحالة هاكي .. هزيت روحي شوي ووقفت تمنيت كان نبقى حذا بابا اكثر هو الوحيد الي بش يسمعني من غير ما يحكم عليا و يوجعني كيف ماعملو هوما.. عديت يديا على وجهي ومسحت دموعي خذيت نفس وشديت الثنية .. نمشي و مش عارفة الوجهة متاعي اول مرة نحس بالوحدة هكا.. انا تحكم عليا نعيش لعذاب هذا و نذوق مرارتو وحديي.. حتى اليد الي كنت طامعة فيها تشدني و تسندني تخلات عليا.. يا ريت كان جات عندي قدرة اني نهربت لبعيد لبلاصة مانعرف فيها حد بلاصة يمكن نجم نبدا فيها من جديد.. فقت من سرحتي على كرهبة وقفت قدامي و سكرت عليا الطريق .. لحظتها حسيت نفس الخوف و الرعشة الي بدات بيهم حكايتي.. حسيت روحي رجعت لنهار هذاكا و السيناريو بش يتعاود من جديد .. دقات قلبي قوات مع الباب الي تحل.. لحظتها ما خممت ف شي كان في شكون الي بش يهبط من الكرهبة و شنية بش يكون مصيري المرة هاذي.
ريتها هبطت من الكرهبة و قدمت بخطواتها ناحيتي .. حبيت نتحرك و نتفاداها اما مانجمتش كل مرة قوتي تخوني ونعجز عالحركة و الكلام .. وقفت قدامي بنفس الوهرة و الذخامة .. الي يراها من بعيد يقول محلاها اما كيف تقرب منها تحرقك بنراها غزرتلي بنفس الغزرة الي ذلتني و رخصتني بها كيف واجهتها بعملة ولدها .. أي حاجة من ريحتو هو و تخصو كافية بش تقتلني اكثر واكثر .. قداش نكرهم و نكره قربي منهم كل مرة.. تبسمتلي على جنب تحكي " عسلامة قمر .. لا زمنا نحكيو "
وخرت بخطوة لتالي و بلعت ريقي هزيتلها براسي لا نتكلم " ما عندنا فاش نحكيو .. الي عندي قلتو النهار هذاكا و كملتو في الشكاية الي قدمتها بولدك"
ميلت راسها و ضيقت عيناها تحكي " قمر .. صدقني انت في لعبة اكبر منك .. لا قوتك و لا مخك الصغير هذا قدها .. قد ماتحاول تثبتلي انك قد الي عملتو في الاخر بش تخرج خاسرة "
" صدقني خسارتي تو ماتجي شي قدام الي خسرتو قبل "
" و انا مستعدة نعوضك على خسارتك .. اما كان بش تصحح راسك الي بش نخليك تخسرو تو مستحيل كان يتعوض "
" فما تعويض عندكم على الشرف !! انتوما ناس تعرفوا شمعناها شرف من اصللو "
" ما تحكيش كلام أكبر منك و انجم نخليك تندم عليه .. هوما كلمتين .. بش تتنازل عالشكوي و بش تعرس بريان .. و الحكاية بش توفا هنا.. خلاها توفى بكيفي قبل ما نخلاها تبدا بكيفي انا ووقتها و الله ما تتمنى الرحمة مني و ما تلقاهاش "
" تهديدك هذا ما يخوفنيش.. و نتنازل على روحي و الشكوى ما نتنازلش علاها حط هذا في بالك "
قربت مني و تبسمت " و زعمة ترضى انك تتنازل على روح امك و المرا الي تعاون فيك .. هه بش تلقى روحك وحدك .. ما تكونش انانية خمم في الناس الي دايرة بيك قمور"
حليت عينيا فيها نحكي " تهدد فيا !! "
" امممم احسبها كيف ما تحسبها .. اما حطها في بالك الي انا قد كلامي و عمري ما نتراجع عليه .. ننصحك ما تلعبش معايا خاطر حاولو قبلك و خسرو .. نخليك تخمم دور كلامي مليح في عقلك و نستنى منك خبر "
كملت كلامها و عطاتني بظهرها تمشي لحظتها جات قدامي امي رغم الي صار اليوم اما تبقى امي و مانحبلهاش المضرة نبقى نحبها و نخاف عليها تعدات قدامي خالتي رفيقة الي تنجم تتضر من جرتي وتتوجع و هي ما تستحقش هذا ..
حسيت بغصة في حلقي خرجت مع صوتي الي خرج
" مم موافقة .. موافقة "
غمضت عينيا و هبطو دموعي الي كنت شادتهم قدامها اما في اللخر هبطو و حرقولي قلبي
دارتلي تضحك و عاودت قربتلي حبت تشدني من كتفي اما بعدت عليها مانيش حاملة لمستها الي كالسم مانيش حاملة النفس الي ناخذ فيه من بلاصة هي موجودة فيها .. دورت عيناها على وجهي تحكي " عرفتك طفلة ذكية .. وتو نحبك تكون قد كلامك و ما تجربش غشي باهي "
هزيتلها براسي باهي برشة مرات و دموعي عملو بلعاني ماحبوش يكفو .. الدموعي الي ما شافتهمش هي بعين الرحمة وسخفت عليهم.. دموعي كانو علامة انتصار بالنسبة ليها كانوا الدليل على ربحها هي و خسارتي انا .. هزيت عينيا فيها تحكي " تو بش تمشي تتنازل عالشكوي .. و تنسى الي صار و بعدها بش نحكيو في التفاصيل و رد بالك تعمل حاجة تخليني نتغشش .. ما تختبرنيش قمر "
" ب باهي "
قلت كلمتي و مشيت من غير لا نتلفتلها .. بقيت نمشي و انا نخمم في القرار الي خذيتو القرار الي من الصباح و الناس تجبر فيا بش نقبل بيه .. قد ما قلت لا في الاخر نلقى روحي قدامو .. كل حد فيهم جبرني بطريقتو رماوني في النار بيديهم.. القرار هذا بش يكون سبب في سعادة ايهم.. ريان ..ليث و امي .. و بش يكون الكفن متاعي انا بش يكون أول خطوة ليا لقبري..
هزيت راسي كيف وصلت قدام الفيرمة مشيت للعتبة متاع الباب طبست وقعدت حطيت راسي عالحيط وغمضت عينيا .. النهار هذا تعدا عليا كانو دهر .. كبرني خمسين سنة من عمري .. نهار سرق مني اخر امل كنت متشبثة فيه .. نتمنى كان يكون هذا اخر نهار ليا و اخر ليلة في تعبي .. نتمنى كان مانحلش عيني غدوة و نلقى راحتي بعيد على هنا و توفى حكاية قمر.
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
