حلقة 24
#ايهم_يحكي
بعد الي صار النهارين هاذم مع ليث حسيت روحي نقمت عليه و علاها هي معاه .. عرفت كيفاه تلعب و تخليه ياقف في صفها ..غايتها انا عارفها مليح ناوية تقرب للعيلة و تنتقم مني بطريقة هاذي اما النجوم السما اقربلها .. النهارين الي خلتني نعداهم بين اربعة حيوط و كلام ليث و الي عملو ما ناخذو منها ثاني و مثلث و مانخلاها تطلب الرحمة مني وماتلقاهاش .. اول خطوة ليا اني نتصرف و نرجع الشركة و نحرر روحي من القيد هذا وبعد حسابي معاها و الي عملتو فيها اول مرة ما يجي شي قدام الي يستنى فيها مني.
غزرت لوجهي في المرايا مسيت الضربة الي على شفايفي الي خلاهالي ليث غمضت عينيا وحلفت بيني و بين روحي انو الضربة هاذي بش نكلفهالو غالية وننسى رابط الدم الي بيناتنا و انو كان نهار من نهارات في مقام خويا.
خرجت من البيت حاسس راسي بش يطرشق هبطت في الدروج تلفت كيف سمعت امي تناديلي
" ايهم ايجا عندي مانحكي معاك "
قدمت ناحيتها وقعدت بجنبها من غير حتى كلمة هزيت راسي معاها تحكي
" شبي حالتك هكا ؟؟ كانو ماتلك شكون ؟ هز روحك وقووم لوقتاه بش تبقى هكا "
" تحكي بجدك امي؟؟ عجبك الي عملو سي ليث ؟ كيفاه وقف في وجهونا و بش يعادينا على خاطرها وتقلي شبي حالتك هكا ؟؟ انا هكا خاطرني مكتف مانيش عارف شنعمل "
نفخت بالقوي تحكي " بالطبيعة ماعجبنيش .. اما انا نعرف كيفاه نخليه يرجع لهنا ويطلب السماح منا و كانك عليها هي حسابها معايا موفاش تو نعرفها شمعناها تكسرلي كلامي "
" شنية بش تعمل قلي؟؟ ما تنساش الي الشركة متاعي الي عندهم.. ماتنساش تهديد ليث "
" مانيش ناسية .. تو بش نهديو اللعب خليه يعرس بيها .. هو في بالو هكاكا بش يحميها مسكين .. اما والله ما نخليه يطشها على طول يدو.. غير اصبر عليا وماتعمل حتى خطوة من غير علمي فهمت ؟؟"
قمت من بلاصتي نصيح " كيفااااه تحبني نصبر قلي ؟؟ رقبتي انا تحت يدين وحدة ** و تقلي اهدى واصبر .. لازمك تتصرف مكانش انا بش نتصرف .. مستحيل نخلاها تتدخل للعيلة هاذي و مانيش مستعد نرجع للبقعة الي كنت فاها "
وقفت قدامي تحكي " كيفاه بش تتصرف سي ايهم ؟ قتلك خلي الحكاية عليا انا اما بالشوي.. و على جثتي كان تدخل للعيلتنا و ما تخافش ماكش بس ترجع غادي .. لازمنا نخممو مليح مايجي شي بصياح هكاا افهممم "
هزيت براسي لا نحكي " مانجمش نصبر حاسس روحي بش نهبل نهارين مارقدتش عايش في الخوف من جرايرهم .. انت طمنتني امي قتلي الي هي قبلت تعرس بريان و بش تبعد من وجوهنا .. اما جاء سي ليث و دمر كل شي ببهامتو.. والله ماندمهم الزوز الي عايشو انا تو ما نخلاهم يعيشوه الدوبل هوما الاثنين"
" ايهم رد بالك تتصرف من راسك مانيش ناقصة مصيبة اخرى فهمت .. هذا الكل من عملتك المزبلة و هانا لتو واحلين فيها .. تزيد تعمل حاجة اخرى وقتها انا ندمك سمعتني .. خمم في بوك و في تصويرتنا قدام العبااد شوي مانيش مستعدة نخسر كل شي من جرت عمايلك .. دونك رييض و اسمع لكلام"
رسيت على سنيا و كبست عالبونية نتاعي نحكي " تخمم في تصويرتنا انت و شنية تنجم تخسر؟؟ انا نخمم في روحي و شنوة الي يستنى فيا و انت مخك في تصويرتك قدام الناس .. نقلك حاجة تو انا نتصرف و الشركة تو نرجعها بمعرفتي و هوما حسابهم معايا من اللحظة هاذي خليييك بعيدة انت"
كملت كلامي عطيتها بظهري و خرجت بقات تنادي عليا اما مغزرتلهاش حسيت الدنيا ظلامت في وجهي و نقمتي على قمر قاعدة تكبر مانجمتش نسمع كلام امي ونصبر لازمني نحاسبها و الي يصير خليه يصير و كان ليث بش ياقف قدامي بش نحاسبو معاها و مايهمني في حد كان في روحي المرة هاذي.
طلعت في الكرهبة وبقيت ندور نخمم كيفاه بش نعرف لدراس متاعها حتى تفكرت صاحبي ايمن الي يخدم في المركز كان ينجم يجيبلي عنوانها من المحكمة كلمتو وطلبت منو الخدمة هاذي بقيت نستنى فيه قريب الساعة لين وصلني ميساج من عندو فيها لدراس ضحكت و شديت ثنيتي لدارها مانعرفش كيفاه سقت و ثنية متاع ساعة وصلتها في نص ساعة .. قدام عينيا كان تصويرتهم و الي صار النهارين هاذم اول ما وصلت خذيت نفس و قدمت بخطواتي نجري ندق في الباب بالقوي و نعيط " قمرررر .. قمر حل الباااب ... "
هكاكا و تحل الباب لقيت قدامي مرا اول مرة نراها غزرتلها نحكي " قمر ويني ؟؟ هاذي دارها مش هكااا"
" تفضل انا امها .,. شكون سيادتك "
دزيتها بيديا نصيح و نحكي " قوللها ايهم جاك عندنا ما نحكيو بيناتنا حساب لازمو يتصفا "
قدمت ناحيتي تحكي " صااار انت ايهم ؟؟ .. اخرج من دااار و ابعد على بنتي احسنلك "
تلفتلها نحكي " بنتك حسابها معايا والله ماندمها على لعبها معايا في بالها هكا ربحت هيا اما تحلم.. رد بالك تفرح انت وياها كيفاه ليث صاار معاكم .. حد ما ينجم يمنعني على الشي الي انجم نعملو لا ليث و لا غيرو .. ماينجم حد يحميكم منييي "
قربتلي و دزتني بيداها على صدري " رد بااالك تخمم تمس بنتي فهمت.. احمد ربي الي هيا تنازلت باقيها راك في الحبس .. امشي و خليهااا في حالها يزي الي عملتو فيها حرااام علييك "
" الي عملتو فيها ما يجي شي قدام الي ناويهولها .. تنازلت ومشات رمااات روحها على ولد عمتي مش هكاكا ؟؟ بنتك لعبت فيها شريفة بنت الفاضل و غايضها شرفها اما طلعت تلعب عالكبير خاطرها وحدة ** "
حلت عينيها معايا تحكي "ش..شنوة؟؟ و.. ولد عمتتك ؟؟ ياخي مش هو المحامي متاعكم "
تبسمت نحكي " ههه صار مافيبالكمش ؟؟ ليث ولد عمتي و المحامي متاعي وبش يجي نهار يعرف غلطتو ويطيش بنتك ويرجع لعايلتو ووقتها بش نحاسبها انا كيف تبقى وحدهاا كالكلبة"
ماخليتهاش تجاوبني اعطيتها بظهري نصييح
" قمررر .. قمررر"
قربتلي وشدتني من يدي " قمر مش هنا اخرررج من الدار "
" مانيش خارج الا ما ناخذ الي جيت على خاطرو"
نطرتلها يداها و قربت من الدروج طالع للبيوت خلطت عليا تصيح وتحكي " وووين مااشي ؟؟ قتلك اخرج لا نطلبلك الحاكم و نرجعك وين كنت "
" جرب اطلب ترااه ووقتها تو تراني شنعمل فيك و في بنتك"
قدمت في خطواتي لدروج طالع خلطت عليا هي وشدتني من يدي تجبد فيا تحكي " اهبببط ويننن ماشيي .. اخررج من الداار "
وقتها حسيت الدنيا ظلامت في عينيا مخي فيه كان اني نلوج عالشركة و نخرج نطرتلها يدها ودزيتها لحظتها حسيت الدم جمد في عروقي و قلبي خظ بالقوي كيف ريت ساقيها الي رخت بيها و طاحت من الدروج و الدم سااح من راسها بقيت نغزرلها و نرد في النفس بالقوي غمضت عينيا بالقوي و حليتهم مانيش مصدق الي صااار بقيت ساق لقدام و ساق لتالي ماعرفتش شنعمل .. حطيت يديا على راسي و بلعت ريقي نخمم في المصيبة الي طحت فيها ..
اما مانيش بش نضيع روحي هكاكا و نخرج بيديا فارغة طلعت فيسع للبيوت بقيت ندور من بيت لبيت لين دخلت لبيت كانت فيها تصويرت لمرا الي ديما مع قمر بقيت نلوج في البلايص الكل و ما لقيت شي حسيت روحي بش نهبل خايف لا يدخل شكون و يلقاني و يلقى امها مطيشة هكاكا .. خرجت من البيت نجري و دخلت للباب الي حذاها اول ما دخلت و شميت ريحتها عرفت روحي الي انا في بيتها بقيت ندور و نلوج في القجرا الكل مالقيت شي لحظتها خفت لا تكون عطاتها لليث ووقتها مانجمش نرجعها مهما يصير و نبقى عايش تحت رحمتهم .. بقيت ندور بعينيا عالبيت حتى ريت صندوق صغير فوق طاولة الي جنب الفرش قربتلها نجري و حليتها حسيت الروح رجعت فيا كيف ريت الشركة خذيتها و خبيتها في جيبي رجعت كل شي كيف ما كان ماحبيتش نخلي حتى شي ورايا جبدت بابيي من جيبي و مسحت كل بلاصة حطيت علاها يدي و خرجت نجري مالبيت اول ما هبطت من الدروج ريتها كيفاه كانت غارقة في دمها قدمت ناحيتها شوي حاولت نقرب منهاا نمس نبضها اما ما نجمتش بقيت نغزرلها كيفاه مغمضة عيناها و مسلمة .. حاسيت روحي في دوامة تجبد فياا كل ما نخرج من مصيبة نلقى روحي نواجه في مصيبة اخرى ما اكبرر .. عديت بيديا على جبيني عضيت على شفايفي و خرجت نجري اول ما طلعت في الكرهبة بقيت نرد في النفس وراء بعضو خدمتها نجري خليت كان التراب ورايا حبيت نبعد من هنا قبل ما يراني حد .. بقيت نسوق و مخي مع امها الي بقات مطيشة و دمها ساييح خفت كان تموت و تتكشف عملتي بش نلقى روحي غرقت مرة اخرى و مستحيل كان انجم نخرج منهاا .. حياتي و مصيري المرة هاذي مجهولين الخوف سيطر عليا بقيت ندور مش عارف شنعمل و لا وين نمشي.. اما الحاجة الي مطمنتني شوي اني خذيت حاجتي منهم رغم أنها ممكن تتكلفلي برشة اما المهم اني تحررت من يدين ليث و هكاكا معادش عندهم حتى دليل ضدي و تو انجم نلعب معاهم على راحتى و بطريقتي انا ...
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
