حلقة 57
قمر تحكي
حليت عينيا شوي شوي على الضوء الي ضرب فيا .. هزيت روحي و بقيت نغزر للبيت الي انا فيها .. تفكرت لحظتها الي احنا جينا لبلاصة اما مانعرفش وين .. اخر حاجة نتذكرها اني رقدت في الكرهبة و بعدها ما حسيت على شي .. لميت شعري و تكيت براسي لتالي .. رجعت بذاكرتي لنهار البارح من اولو لاخرو .. بعد الي صار ماظنيتش الي انا بش نسامحو و نكون معاه تحت سقف واحد مرة اخرى .. اما كيف كل مرة نلقى روحي مسامحتو مانعرفش السبب .. فهمت الي هو خمم اني مشيت ليحيى بارادتي و اني مازلت نكنلو مشاعر .. بعد ماسمعتو عذرتو شوي .. يعني حتى انا غلطت كيف خرجت بلا علمو .. عندو لحق في خوفو عليااا .. بعدو هو شوف شصار .. يحيى عرضني و كان ممكن يضرني .. و .. و مش هذا برك الي خلاني نسامحو .. نظرة الندم الي ريتها ف عينيه و كلامو الي كان خارج بالغصة خلاوني نصدقو مرة اخرى .. حتى انو مارضاش فيا نبقى بحسرتي و بقى يحاول يرضيني .. الشي هذا خلاني نرتااح .. خلاني نقارن ليث بيحيى .. فرق كبير بيناتهم .. ليث عمرو ما خلاني نبكي .. كل مرة يمسحلي دموعي .. كيف يجرحني يطلب السماح و يعمل المستحيل بش يخليني ننسى .. رغم كسوحيتو اما قدامي يعترف باغلاطو .. هذا الكل يخليني نشفعلو و نرتاح معاه .. فكرة انو ديما ورايا و شادني من يدي مخليتني فرحانة .. هذااا الكل يخليني مانسامحش يحيى بالعكس بش ننقم عليه أكثر .. حتى بعد الي صار معايا و عملو فيا ماخممش انو يطلب مني السماح .. ماخممش ياخذ بخاطري و يحميني .. جاني بكل صحة رقعة هددني و خوفني اكثر ..
دورت راسي و غزرت للمنقالة الي بجنبي .. عضيت على شفتي كيف ريت الوقت قداه .. مانعرفش كيفاه رقدت للوقت هذااا .. تبسمت على صوت الي سمعتو اللوطة .. كيفاه هو فايق و انا لتو راقدة و مش حاسة بشي .. قمت فيسع من بلاصتي .. دخلت لتوالات ركحت اموري و خرجت .. اول ما رجعت للبيت لمحت بكوات الشكلاطة الي كانو على طرف السرير من الناحية الاخري .. قدمت نجري هزيتهم في يدي لزيتهم لصدري و ضحكت من قلبي .. هذا الي كنت نحكي فيه .. هو مانساش حتى الشكلاطة الي بقات في خاطري .. فرحتي باهم كانت ماتتوصفش .. ريتهم حاجة كبيرة منو .. هزيتهم في يدي و خرجت نجري من البيت بش نشوفو ..
اول ما خرجت بقيت نغزر للدار كانت محلاها وواسعة .. بقيت ندور في عينيا على كل بلاصة فيها حتى لمحتو هو من بعد .. خذيت نفس و قدت ناحيتو .. تبسمت كيف ريتو واقف في الكوجينة و غاطس يركض في العظم .. قربت ناحيتو اكثر نحكي " صباح الخير "
هز راسو غزرلي .. تبسملي يحكي " صباح النووور .. رقدت مليح ؟"
هزيتلو براسي اي و غزرت لشباك نشوف في لبلاصة نحكي " ليث ياخي احنا وين ؟؟"
غزرلي على جنب يحكي " هانا بدينا من الصباح "
ضحكت و قربتلو اكثر نحكي "هاني سكتت .. تحب نعاونك في حاجة ؟"
هزلي براسو لا يحكي " لا برا اقعد ابدا افطر .. انت من البارح ماكليت شي .. انا نكمل الاوملات و نجي نفطر معاك "
قعدت عالكرسي مقابلتو و حطيت الشكلاطة فوق الطاولة نحكي "ليث شوف شنوة ليقت كيف قمت .. انت جبتهم مش هكااا؟؟"
هز بحاجبو يحكي " مش انت بقيت تتحسر على باكو الشكلاطة متاع البارح ؟؟ اي هاني عوضتهولك الدوبل بش ماتبقاش تبكيلي عليه "
ضحكت نحكي " اي اي والله اشتهيت ناكلو .. عيشك ليث "
تبسملي و قدم لطاولة حط صحن الاوملات و قعد قدامي .. دورت بعينيا عالشي الي كان موجود نحكي
" محلاااه لفطووور .. تعرف الي انا ياسر جيعانة ؟"
عبالي كاسة العصير و حطها قدامي يحكي " الحمدالله .. هكاكا تفطر و مانبقاش نحاول فيك كيف الطفلة الغيرة "
حطيت شعري وراء وذنيا بش ناكل على راحتي نحكي
" لا بش ناكل وحدي سي ليث ماتخافش .. و معادش طفلة صغيرة انا "
تبسملي و حط قدامي قطعة جبن يحكي " خوذ هاذي ذوقها "
هزيتها و ذقت منها شوي .. غمضت عينيا نتبنن فيها .. غزرتلو نحكي " يااا ياسر بنينة .. عمري لاذقت كيفو "
تكا بظهرو عالكرسي يحكي " اي جبن إيطالي .. مازال كيف وصلني لبارح "
عضيت على شفايفي نحكي " م .. معناها انت كنت هنا الايامات الي فاتو؟؟"
هزلي براسو اي و رجع ياكل .. بلعت ريقي و بقيت نلعب بالمغرفة نحب نسالو اما خايفة لا يفد مني و يرجع ينبزني .. هبطت راسي بقيت ناكل و نتبنن في الماكلة الي قدامي .. ماتصورتوش بش يخرج طعام بنين كيف هذاا من تحت يديه .. في لحظة شبعت بعد ما كنت جيعانة .. بلعت اللقمة الي في فمي و هزيت راسي نغزرلو معادش انجم نتحمل اكثر " ليث ياخي الدار هاذي متاعك ؟"
حك على جبينو يحكي " لاا .. متاع العم مصطفى "
دورت بعينيا نلوج عليه نحكي "و هو هنااا تو ؟؟؟"
" لااا هاذي المزرعة متاعو مايجيش ديما هنا "
حليت عينيا فيه نحكي " يااااا .. ماعنتها احنا تو في المزرعة ؟"
ضحك يحكي " اي في المزرعة .. كمل افطر و بش نهزك تعمل دورة فيها "
هزيت بكتافي و صفقت بيديا نحكي " يااا جو .. هياا تو اماان "
اشرلي بيدو على صحني يحكي " تي كمل افطر "
قمت من بلاصتي نحكي " والله شبعت .. هيا تو اماان نحب نشوفها "
عطيتو بظهري نجري ما خليتوش يجاوبني مشيت لبست صباطي .. تلفت نغزرلو نحكي "تي هيااا فيسع يا ليث "
قربلي و قحرلي يحكي " تي اصبر نحضر روحي "
كتفت يدي و بقيت نغزرلو كيفاه يلبس في كبوطو .. اول ما كمل قربلي و حل الباب يحكي " أيا تحرك قدامي "
تبسمتلو و عطيتو بظهري و خرجت .. بقيت نمشي و نشوف في لبلاصة .. كانت يااااسر كبيرة و محلاهاا .. رغم الشتاء و البرد اما كانت مفتحة و زاهية .. هواها كان يرد الروح .. الهدوء الي فاها يخليك تحس انك في عالم اخر .. النسمة الي ضربتني خلاتني نبرد و نحط يديا على زنودي بش ندفا .
. وقف غزرلي يحكي " بردت ؟؟"
طلعت عينيا فيه نحكي " اي شوي "
هز يديه و نحى الكشكول من فوقو و قربلي حطو على رقبتي.. بقيت نتبع فيه بعينيا و ساكتة مانجمتش نتحرك و لا ننطق من قربو .. رمشت عينيا و رديت النفس كيف سمعتو يحكي " كان مازلت بردانه برا فيسع البس حاجة تدفيك "
هبطت راسي و بعدت عينيا من عليه نحكي " ل .. لا هكا سافا "
سبقني يحكي " هيا مالا "
بقيت نمشي جنبو .. مرة نغزر للمنظر الي قدامي و مرة نغرز ليه هو .. بلعت ريقي نحكي " ياسر محلاها لبلاصة "
" فرحت كيف عجبتك " ضحكت و دورت براسي نغزر لوين وقفنا .. اشرتلو بصبعي نحكي "يااا ليث شوف شجر البرقدان محلاهم و ماكثرهم "
قربلهم اكثر و تلفتلي يحكي " اي عم مصطفي يحب يزرعهم و لاهي باهم "
قربتلو ووقفت قدامو نترجى فيه بعينيا نحكي
" ميسالش ناخذ كعبة ؟؟ اشتهيتم و الله "
عدا بيديه على شعرو و ضحك بخبث يحكي " هو تنجم تاخذ بالطبيعة .. اما بطولك هذا منظنش"
قلبت شفايفي و بعدت عليه نحكي "بطلت معادش نحب .. اصلا انت ديما هكاا ليث "
قرصني من خشمي يحكي " باهي باهي تو نعطيك وحدة غير اسكت "
ريتو كيفاه قرب للشجرة و مد يدو قطفلي كعبة خذيتها من عندو .. ضحكتلو بتبهليل نحكي "زيدني كعبة اخرى"
عقد حواجبو يحكي " تحبش ناخذلك الشجرة الكل "
نفخت بالقوي و ربعت يدي نحكي " افف منك ليث مش لازم "
ريتو كيفاه مد يديه و قطف كعبة اخرى حطهم في يدي يحكي " شد برك .. كل مرة طالعتلي بطلعة انت "
تبسمتلو و شديتو من يديه حليتها و حطيت كعبة فيها
غزرلي مستغرب يحكي " شنوة هاذي ؟"
بعدت يديا من عليه نحكي " هاذي ليك انت "
بقا يغزرلي من غير حتى كلمة دور بعينيه على كامل وجهي .. تبسملي يحكي " عيشك قمر "
ضحكتلو من غير لا نجاوبو ورجعنا نمشيو ندورو في البلاصة وقفت على بلاصتي و شديتو من مرفقو بش ياقف معايا نحكي " الي نسمع فيه صحيح ؟؟"
عقد حواجبو و غزرلي مستغرب يحكي " في شنوة تسمع زادة "
حليت عينيا فيه نحكي " تي اسمع .. ياخي فما حصان هنااا ؟؟"
عدا بيديه على وجهو يحكي " اي فما حصان "
تنطرت ووقفت قدامو نحكي " نحب نشوفو اماااان .. هزني ليه "
اشرلي براسو يحكي " باهي هيا ايجا "
بقيت نمشي بجنبو نزرب بش نوصل حتى وقفنا قدام اسطبل دخلنا و بقيت نغزر و نحكي " يااا هاو فما زوز هنا مش واحد؟"
قرب ليث ناحية لحصان و بقى يمسح عليه يحكي " اي واحد متاع العم مصطفى وواحد متاعي "
غزرتلهم الزوز نحكي " و اناهو متاعك انت؟"
اشرلي بيدو عالي كان مقابلنا يحكي " هذاكا متاعي انا "
قربتلو نجري و بقيت نغزرلو و نضحك .. تلفت لليث نحكي " تو كيف انمسو ما يعملي شي مش هكا ؟؟"
ضحكلي و هزلي براسو اي .. خبيت البرقدانة في جيبي و بقيت نمسح على لحصان و نحكي " من امتى شريتو انت؟"
" ما شريتوش .. هذا هدية من عم مصطفى "
تلفتلو نحكي " ظاهر ياسر يحبك عم مصطفي؟؟"
دور وجهو يغزر للحصان يحكي " صحيح .. هو في مقام بابا "
هزيتلو براسي باهي " فهمتك .. ربي يفظلهولك "
تبسملي و بقى يلعب مع لحصان .. طبست براسي اللوطة خذيت السطل و بقيت نوكل فيه و نحكي
" تعرف الي انا حبيتو ؟؟ ياسر محلاه.. شنوة اسمو ؟؟"
هزلي بحاجبو يحكي " مانعرفش .. ماخممتش نسميه الحق "
قلبت شفايفي نحكي " يااا علاه هكااا ؟؟ مايجيش يبقى من غير اسم .. لازمك تسيمه ليث .. و لا شرايك نسميه اناا ؟"
ضحك يحكي " باهي يا للا شنوة تحب تسميه ؟؟"
دورت بعينيا نخمم في اسم .. " اممم شقولك في أسمر ؟؟"
قدم للحصان و بقى يلعب معاه و يحكي " اياا مبروك عليك الاسم جديد سي أسمر "
ضحكت على كلامو و بعدتو نحكي "ابعد خلي نكمل نوكلو ظاهر فيه جيعان مسكين "
ضحك على جنب يحكي " هه انت اتلهى بروحك الساعة و كول كيف الناس و بعد خمم فيه .. اسمر عندو شكون لاهي بيه "
غزرتلو على جنب نحكي " اي هاو باين .. تي شوف مسكين كيفاه ياكل .. الظاهر الي لاهي بيه مش يخدم في خدمتو مليح "
تهزيت و تحطيت عالصوت الي تكلم ورانا يحكي
" والله لا بنتي .. انا لاهي بيه اما الظاهر هو حبك على هذاكا قبل ياكل من عندك "
عضيت على شفايفي و هبطت عينيا في القاعة من الحشمة .. غزرت لليث كيفاه قربلو و سلم عليه .. يحكي " ما تاخذش على كلامها عم محسن .. فرخة على روحها "
حسيت روحي جمدت في بقعتي من الحشمة .. هزيت راسي كيف قربلي يحكي "اهلا بيك بنتي بحذانا "
عديت بلساني على شفايفي نحكي بسيف " ا ..اهلا عمي .. سامحني والله مانقصد ا.."
قص عليا يضحك " ميسالش .. " حط يديه يطبطب على كتفي يحكي " كان مش قلبك ابيض راك ماخممتش في الحصان ههه "
تبسمتلو و ريتو كيفاه تلفت لليث يحكي " هاذي اول مرة تجيب بنية هوني سي ليث .. ميسالش نعرفها شكون ؟"
قربلي ليث ووقف بجنبي يحكي " هاذي قمر عم محسن .. مرتي "
على كلمتو لخرا حسيت قلبي خظ بالقوي و بدني رجف .. توقعت بش يقول مان اسمي مش مرتي .. للحظة نسيت انو احنا معرسين .. كيف سمعت الكلمة منو المرة هاذي حسيتها متبدلة .. خلتني نتفكر شنوة الي يربطني بليث .. هزيت راسي بقيت نغزرلو كيفاه يضحك .. فقت من سرحتي فيه على صوت عم محسن يحكي " مالا عرست ؟ ايااا مبروك لولدي "
حك على جبينو و ضحكلو يحكي " عيشك عم محسن "
غزرلي ليا انا و تبسملي يحكي " اهلا ببنتي اهلا .. مالا انت مرت ولدنااا .. فرحتلكم "
حسيت بوجهي سخن من كلامو و حمار تبسمتلو نحكي
" عيشك عمي "
" اياا سي ليث تحب تركب عالحصان تحب نحضرهولك ؟؟"
" لااا عم محسن مش ليوم "
" نخليكم مالا على راحتكم .. فرحت الي ريتك قمر بنتي و مرحبا بيك حذانا "
ضحكتلو نحكي " و انا زادة عمي .. عيشك "
عطانا بظهرو و خرج .. خذيت نفس بعد ما حسيتو تقطع عليا و تلفتت لليث حطيت يديا على خدودي نحكي " ياسر حشمت .. الراجل سمعني نحكي عليه "
هز بحواجبو يحكي " باش معادش تتفلسف للا قمر "
ضربتو على صدرو بشوي نحكي " و انت زدت بهذلتني قدامو سي ليث "
حط يديه في جيبو و عطاني بظهرو يحكي " شذنبي انااا ؟؟ انت لسانك متبري منك .. هياا قدامي خلينا نخرجو "
حطيت السطل من يدي خلطت عليه و بقيت نمشي بجنبو و مخي يخمم في الي صار دقايق لتالي .. طلعت راسي معاه نحكي " علاش ق.. قتلو الي انا مرتك ؟؟"
وقف و غزرلي يحكي " مانقصدش اني نقلقك " ريت وجهو الي تبدل في لحظة و رجع يمشي و خلاني وراه .. عضيت على شفايفي نحكي " لاااا .. اما .. اما انا نقصد عرسنا عالورق وكهو ..و مش باش نبقاو معرسين ... فكرت لي انت متحبش يعرفو .. على هذاكا سألتك "
وقف و تلفتلي رجع قدامي تبسم على جنب و ضيق عينيه فيا يحكي " شنوة تحب نعرسو بلحق ؟؟"
ريقي وحل في حلقي من كلمتو حسيت روحي تربثت و بدني فور " ل.. لا منقصدش انا .. انا .."
قص عليا يحكي "حتى كان عرسنا عالورق انت تو على اسمي و مانحب حد يحكي عليك كلمة خايبة باهي ؟"
هزيتلو براسي باهي نحكي " اي باهي ف .. فهمتك "
عدا بيدو على شعرو و غزرلي بخبث يحكي " اما كان تحب نعرسو بالحق ميسالش " غمزني و بقى يغزرلي..
بلعت ريقي بالسيف و هربت عينيا من عليه نحكي " انا .. انا بش نمشي نشوف الشجر الي غادي "
ريتو كيفاه ضحك و سبقني .. بقيت نمشي بعيدة عليه شوي مانعرفش علاه حشمت منو و حشمت اني نغزر في وجهو .. تلفت نلقاه قعد قدامي عالطاولة .. تكا بظهرو عالكرسي و بقى يتبع فيا بعينيه .. كيفاه كنت شايخة عالوردات المفتحة في عز الشتاء .. لقيت روحي ناسية كل حاجة عشتها لبارح .. حسيت براحة بعد التعب الي هدني .. نهار ليوم نجم يعوضني على كل شي .. ليث خلاني نتجاوز كل حاجة خايبة عشتها في نهار واحد .. قدر انو يمحي من بالي كل حاجة و كل كلمة وجعتني و عوضهم بحاجات باهين خلاوني نفرح و نحس الي انا عايشة عيشة طبيعية كيف الناس ..
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
