حلقة 51
أيوب يحكي
جلسة كاملة كانت في صالحي مشى في بالي الي انا فايتو بخطوة و في الأخير بكلمة من سي ليث رجعت بعشرة خطوات لتالي .. اما الحكاية موفاتش هناا .. حسابي معاه حتى كان ماتصفاش في المحكمة انا مستعد نصفيه لبرااا .. لحكاية صارت اكبر من قضية عندي انا .. الي يستنى فيه مني بش يخليه يندم على كل شي صاار .. يش نخليه يتمنى انو خرج خاسر من المحكمة قدام لخسارة الي بش يعيشها لبرا منها ..
اول ماوفات الجلسة ريتو كيفاه قدملي و كالعادة قال كلامو الي يستفزني .. كل كلمة قالها حفظتها بش نرجعهالو في وقتها ..
هزيت راسي على سي محمود كيف قربلي ووجهو احمر يحكي " اخرج هاني لبرا نستنى فيك "
عطاني بظهرو و خرج من غير ما يخليني نجاوبو .. خذيت نفس بالقوي .. حليت فلس الشوميز بش نتنفس اكثر .. نحس في الخنقة مكنتني .. خلطت عليه نلقاه يستنى فيا في الكرهبة ..
طلعت بجنبو نحكي " نسمع فيك سي محمود "
قحرلي بعينيه يحكي " لااا .. انا الي نسمع فييك .. نحب نفهم الي صار لداخل شنوة ؟؟ مش على اساس ولدي بش يخرج و يروح معايا ؟؟ شصاار ؟"
عديت بلساني على شفايفي نحكي " مشى في بالي هذاكا شنوة بش يصير .. اما الي صار اخر حاجة خلى القاضي يشك "
صاح في وجهي يحكي " **** انااا ما يهمني في شي .. نحب لحكاية هاذي توفى .. فهمت ؟"
رسيت على سنيا من العصب الي ركبني نحكي
" ما نجم نعمل شي تو .. لازمنا نستناو نهار الجلسة الثانية .. و نوعدك ايهم بش يخرج وقتها .. خليني تو نتصرف "
تبسم على جنب باستهزاء يحكي " كيف ما تصرفت المرة هاذي ؟؟ كيفاه ماخممتش في حكاية الكاميرات؟؟ كيفاه تخلي ليث يكون سابقك ؟؟"
على كلمتو لخرا حسيت دمي فور و عروقي بش تطرشق كبست عالبونية متاعي نحكي
" ليث لازمو يبعد من ثنيتنا .. لازم نلقى حل و نخلي ليث يبعد "
عقد حواجبو غزرلي يحكي " وكيفاه بش تخلييه يبعد ؟؟ ليث انا نعرفو سي أيوب .. راسو كاسح ما يخاف من حد .. انا مربيه و نعرفو كان حط حاجة في راسو يعملها "
" حتى انا نعرفو .. و نعرف نقطة ضعفو تو .. بش ننزل علاها و نخليه يخرج من ثنيتنا "
غزرلي و طلع صبعو في وجهي يحكي " و الله يا أيوب غلطة اخرى لا نرحمك .. و كان ولدي ما يخرجش معايا المرة الجاي .. روحك ما نطلع باها فهمتني ؟؟"
هزيتلو براسي باهي نحكي " باهي تهنى سي محمود "
" اهبط تو من قدامي.. مانحبش نراك "
هبطت من الكرهبة من غير ما نقول حتى كلمة .. حسيت روحي تذليت من كلامو و عفس عليااا .. قدري الي طاح تو ما نخلي ليث و قمر يدفعو حقو الضعف .. راسي بش يترفع وقتلي هوما يوطيو ريوسهم و انا بش نعمل كل شي و نرا النهار هذا على قريب ..
طلعت في كرهبتي تكيت براسي لتالي و غمضت عينيا بقيت نخمم شنوة بش نعمل و خطوتي الأولى منين بش نبداها .. هزيت روحي و استويت في قعدتي خذيت التاليفون و طلبت نومرو نحكي " اسمعني .. نحبك تبقى تعس علاهم ..... نحب نعرف تحركاتهم الكلل .... اي حتى هو زادة .... اسمعني غلطة وحدة نكلفهالك غالية .. رد بالك "
علقت عليه ورميت التاليفون .. خذيت نفس و شديت ثنية البيرو .. خدمتي الصحيحة تو بدات .. و لحكاية هاذي بش توفى حتى كان بش يسيل فاها الدم .. انا مستعد لكل شي .. مانخلص فيه لقديم و الجديد و انسيه في كل حاجة باهية في حياتو..
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
