#ليس_ذنبي ❤️‍🔥

حلقة 107

#قمر_تحكي

نزلت من الكرهبة بعد ماوصلني ليث قدام الفاك..دخلت فيسع وين نقرأ الحصة الأولى ووقفت وحدي على جنب.. مازال الوقت وماحبيتش ندخل من تو..هزيت راسي نغزر للبنات كيف واقفين على جنب يغزرولي ماكلمونيش..اصلا من آخر مرة كيف ليث زلعهم انا مارجعتش وماشفتهمش..نفخت بالشوي كيف تفكرت انو اول حصة تو عند مهدي..حسيت روحي توترت قبل لا نشوفو..هزيت راسي على صوت رامي يحكي
رامي :" قمر وينك يا طفلة هالغيبة "
دوب تبسمت شوي نحكي
انا :" اهلا رامي..هاني رجعت "
رامي :" مرحبا بيك معانا.. قلي مشيت شفت نتيجتك ؟"
عقدت بحواجبي مستغربة نحكي
انا:" ياخي هبطت ؟"
هزلي براسو اي يحكي
رامي :" اي عندها نهارين.. برا شوفها "
هزيتلو براسي باهي نحكي
انا :" باهي هاني ماشية "
كبست على ساكي وقدمت بخطوات سريعة ناحية التابلو.. هزيت راسي وبقيت نشوف ف اسمي..تبسمت اول ماشفت المعدل متاعي الي كان باهي نوعا ما قدام الظروف الي عشتها وقتها نجمت ننجح..عضيت على شفايفي وعديت بعينيا على المادة الي تخص مهدي..هزيت بحاجبي كيف شفتو رجعلي كل النقاط كيف ماكانو.. بقيت واقفة مستغربة التصرف متاعو الي ماتوقعتوش خاطر ماحسبتش انو بش يرجعهم بعد آخر مقابلة بيناتناا..خذيت نفس ورجعت وين القسم ماركزتش برشة مع لحكاية اهم شي تو انو رجعلي النقاط متاعي وهكا انا بش نعمل الاختصاص الي نحب عليه..حليت عينيا على وسعهم كيف ريتهم دخلو وسبقوني..كبست على ساكي وجريت ناحية القسم..وقفت قدام الباب ننهج وهزيت يدي دقيت ريتو كيف دور راسو معاياا وغزرلي درا كيفاه..عضيت على شفايفي نحكي
انا :" س.. سامحني مسيو كنت..كنت نشوف ف النتيجة"
عدا بعينيه عليا واشرلي بيديه يحكي
مهدي:" تفضل مدموازل "
نزلت راسي دخلت طول وقعدت على طاولة وحدي كالعادة..حطيت ساكي على جنب وجبدت الأوراق الي بش نقرأ بيهم..رجعت هزيت راسي على صوتو يحكي
مهدي:" كل واحد يحط قدامو لبروجي الي طلبتو منكم آخر مرة "
بقيت نغزرلهم كلهم كيفاه حطو الأوراق قدامهم كان انا خاطرني مش عارفة شنوة هو اصلا.. رجعت تلفتت وغزرتلو كيف وقف من مكتبو ودار عالكل خذا الأوراق حتى وصل قدامي..عضيت على شفايفي كيف سمعتو يحكي
مهدي:" ويني خدمتك مدموازل قمر ؟"
فركت يديا ف بعضهم نحكي
انا :" مسيو انا..ماكنتش....... "
ضيق عينيه فيا وقص عليا يحكي
مهدي:" انت ماكنتش حاضرة كالعادة خاطرك وحدة كسولة.. العام قريب يوفى وانت ماحضرت حتى بروجي من الي انا طلبتهم.. ووقت تشوف نقاطك مايعجبكش كيف انقصلك وتعطيني كل مرة حجة بش نرجعلك النقطة و بعد ترجع تغيب مرة اخرى.. شنوة حجتك المرة هاذي ؟"
ضميت على شفايفي شديت دمعتي بالسيف حسيت روحي حشمت قدام زمائلي ولكلام هرب علياا ماعرفتش شنوة نقول..هزني وحطني بعينيه وعطاني بظهرو ماستنانيش  حتى نجاوبو..رجع للمكتب متاعو وبقى يحكي ف الكور..نزلت راسي وبقيت ساكتة حسيت بغصة شدتني من وراء الموقف الي تحطيت فيه..مانعرفش كيفاه تعدا لوقت عندو حسيتو ياسر رزين اصلا مانجمت نركز ف شي كلمة نسمعها وعشرة لا..تنفست شوي اول ماكملت الحصة لميت ساكي فيسع وقمت خرجت نجري بش نبعد عليهم..بلحق حسيت روحي تخنقت وغزلت من كلامو ماعرفتش كيفاه كملت الحصة ولا كيفاه بش نكمل بقيت الحصص بعد..سرعت ف خطواتي بش نخرج للكافتيريا الي بجنب الفاك ماحبيتش نبقى ف الفاك بش مانشوفش لبنات الي يقراو معاياا..بقيت نمشي وباقي مخي ف الي صار فقت من سرحتي على يد كيف تحطت على مرفقي..تلفتت وين شفت آمنة قدامي تنهج و تحكي
آمنة:" ياخي فاش سارحة عندي ساعة وانا نعيطلك "
رجعت شعري لتالي وقربت بستها من خدهاا نحكي
انا :" سامحني أمونة كنت سارحة شوي ماسمعتكش "
عدات بعيناها علياا تحكي
آمنة:"  انت مليحة ؟"
شديت دمعتي بالسيف نحكي
انا :" اي لباس.. كنت ماشية للكافتيريا الي لبرا بش ناكل حاجة "
شدتني من مرفقي تحكي
آمنة:" خلينا نمشيو مع بعضناا مالا "
تبسمتلهاا وهزيتلها براسي باهي..بقيت نمشي معاها حتى وصلناا للكافتيريا..اخترنا طاولة على جنب وقعدنا..حطيت ساكي بجنبي وغزرتلها كيف شدتني من يدي..تضحك و تحكي
آمنة:" ساعة مبروك قميرة.. قتلي امي انك حبلة والله كنت بش نكلمك ونجيك لدارك ف الويكاند نباركلك "
تبسمت نحكي
انا :" يبارك فيك امونتي..لعاقبة ليك ياربي وايجا مرحبا بيك ف كل وقت  "
آمنة :" انشالله عيش اختي.. اي احكيلي شنوة حاسة كيفاه لحباالة ؟"
ضحكت نحكي
انا :" حاسة روحي فرحانة.. اما ساعات نتقلق شوي "
عضت على شفايفها تحكي
امنة :" اي هكاا لوحم..يخليك كل مرة وانت بحال..لعاقبة لياا ياربي "
ضحكت وهزيت راسي مع السرفور كيف وقف قدامنا..خذا منا الطلبية ومشى..رجعت غزرت للأمنة تحكي
آمنة:" وقتاه تكمل ليوم؟"
انا :" 16 "
امنة:" فهمتك.. ساعة قلي شفت نتيجتك شعملت ؟"
رجعت شعري لتالي تنهدت نحكي
انا :" اي شفتهاا..سافا نجحت "
عقدت بحواجبها مستغربة تحكي
آمنة:" شبيني حاستك مقلقة ؟"
قربتلها شوي نحكي
انا :"آمنة تعرف نلقى مهدي رجعلي النقاط لكل "
حلت عيناها فيا تحكي
آمنة:" بلحق ؟ كسبة استرجل الساقط مش متعود يعملها "
عوجت شفايفي نحكي
انا :" ياريتو مارجعهم..تعرف هنتلني ليوم قدام زملائي "
آمنة:" علاش ؟ شبيه هذا ؟"
هزيت راسي مع سرفور كيف رجع حذانا..حط العصير  قدامناا ومشى..خذيت رشفة من كاسة العصير وغزرتلها نحكي
انا :" عالظاهر كيف انا كنت غايبة عطاهم مشروع آخر.. وانا ماخدمتوش ياخي قلي انت كسولة وتتسبب كل مرة بحاجة بش نرجعلك النقطة و شنوة عذرك المرة هاذي.... "
آمنة:" شيهمك فيه..خليه يحكي ماتركزش معاه وماتقلقش روحك انت حبلة تو مش باهيلك الغش..غير هكاا حاول تو معادش تغيب قمر..احنا ف اخر العام تو مش ف صالحك كان مهدي يركز معاك برشة "
تنهدت بالشوي وهزيتلها براسي اي نحكي
انا :" اي نحاول معادش نغيب..اما حشمت قدام الي يقرأو معاياا..كانو يستنالي فيهاا "
آمنة:" لاا هو هكاكا طبعو.. ماسط و لكزة "
ضحكت على كلمتهاا وهزيت راسي قلبي ضرب بقوة اول ماغزرتلو كيف دخل للكافتيريا مع صاحبو..غزرلي درا كيفاه وقعد عالطاولة مقابلتني..حسيت روحي توترت اكثر وانا نشوف فيه.. فقت من سرحتي على صوت التاليفون كيف نوقز..هزيتو وتبسمت اول ماشفت اسمو..رديت عليه نحكي
انا :" وي ليث "
ليث :" وينك قمرتي؟"
غزرت للامنة نحكي
انا :'" هاني ف الكافتيريا الي بجنب الفاك مع آمنة "
ليث :" تغذيت مليح مش هكا ؟"
عوجت شفايفي نحكي
انا :" ماعجبني شي هناا.. هاني نشرب ف عصير "
ليث :"باهي وقتاه الحصة الثانية متاعك؟"
غزرت للساعة الي ف يدي نحكي
انا :"بعد ساعة "
ليث :" باهي رد بالك على روحك "
انا :" باهي ياروحي وانت زادة "
ليث :" باهي "
علقت عليه وغزرت للامنة كيف تبسمت وذبلت عيناها تحكي
آمنة:" محلاكم انت وليث..تفكروني ف روحي انا وحمزة "
ضحكت نحكي
انا :" ههه انتوما احلى امونتي.. ساعة قلي حددتو موعد العرس؟"
هزتلي براسها أي تحكي
آمنة:" ايي.. بعد شهر ونص هكاكا مازلنا نخممو "
انا :" مبروك أمونة والله فرحتلكم ربي يهنيكم "
آمنة:" عيش أختي "
ريتها كيف طبست راسهاا وجبدت تاليفونها الي نوقز تحكي
آمنة:" ماطول عمرو هو يكلم فياا..خليني نهز عليه ونمشي للقسم تو عندي حصة "
انا :" باهي برا انت.. انا مازلت بش ناكل حاجة "
هزتلي براسها باهي وقامت من حذاياا تحكي
آمنة:" باهي نتقابلو بعد مالا.. باي قميرة "
تبسمت وهزيتلها براسي باهي بقيت نغزرلها كيف بعدت علياا.. رجعت طبست راسي وبقيت نقلب ف قائمة الاكل نشوف شنوة بش نختار.. بلحق حسيت ماعجبني شي ومعرفتش شنوة ناخذ..رجعت ناديت للسرفور طلبت منو سندويتش ورجعت تكيت براسي عالكرسي وبقيت نغزر من الشباك سارحة.. فقت من سرحتي على حس الكرسي الي تجبد قدامي.. حليت عينيا على وسعهم اول ماشفتو قاعد مقابلني..ضيق عينيه فيا يحكي
مهدي:" اهوكا نجمنا نشدوك..ساعة الجامعة هاذي تجيها سباحة ظاهرلي  "
عديت بعينيا عليه حسيت روحي تحطيت قدام الأمر الواقع كيف قعد قجامي  ومعرفتش كيفاه نتصرف.. بلعت ريقي بالسيف و هزيت راسي مع السرفور كيف حط الطلبية قدامي..غزرت لمهدي كيف طلب قهوة سادة ورجع غزرلي يحكي
مهدي:" حسك ماسمعتوش ليوم ف الحصة.. حتى انك محاولتش دافع على روحك...بالطبيعة خاتر تعرف لي انت غالطة..زيد عليها لا تقرأ و لا تشارك..علاش تحضر مش فاهم "
كبست عالبونية متاعي حاولت نهدي روحي شوي خاطر بلحق حسيتو غزلني عاللخر..خالط عليا حتى لهنا يهنتل فيا..رسيت على سنيا نحكي
انا :" نحضر خاطرني نحب نقرأ... "
تبسم باستهزاء وقص علياا يحكي
مهدي:" تحب تقرأ؟ ب دليل انك غايبة اكثر من شهرين.. شنوة الظروف الي عندك لمرة هاذي.. بش ترجع تكذب عليا كيف لمرة لخرى انك رقدت ف سبيطار؟"
انا :" مسيو انا ماكذبتش وقتها بلحق كنت مريضة "
مهدي :" باهي وقتها مريضة و تو شبيك ؟ "
عضيت على شفايفي نحكي
انا :" تو.. توو صارولي شوي ظروف زادة "
عدا بعينيه عليا وهز بحاجبو يحكي
مهدي :" شرايك كان تقبل دعوتي لمرة هاذي وتحكيلي ظروفك مالا.. خاطر صدقني قمر المرة هاذي مستحيل كان نقاطك يرجعو ماتنساش انت ماخدمتش مشروع ليوم.. ننصحك المرة هاذي فكر بلقدا "
حليت عينيا على وسعهم مصدومة من كلامو غير اني زادت غزلت عليه اكثر كيفاه يستغل ف الوضع.. هزيت ساكي وغزرتلو نحكي
انا :" ماعندي مانحكيلك.. وماعندي فاش نفكر زادة "
كبست على ساكي وقمت من حذاه بش نمشي.. وقفت على يديه الي شدتني وكبست علياا بالقوي..غزرتلو كيف قحرلي يحكي
مهدي:" اقعد مازلت ماكملتش كلامي "
حاولت نفك يدي منو وقبل مانحكي ونجاوبو.. سبقتني دقات قلبي الي قوات فجاة على صوت ليث وراياا..تلفتت بسرعة وغزرتلو كيف كان واقف ورانا وعينيه تدور علينا..بدني رعش وساقياا رجفو كيف شفت وجهو الي كان مكبوس..قرب ناحيتناا اكثر يحكي
ليث :"شفما هوني ؟؟؟؟؟"
ف لحظة هاذي لكلام هرب علياا حسيت كان بالخوف من شنوة يستنى فياا و شنوة بش يصير تو...