#ليث_يحكي
نحيت الفاست متاعي رميتها على جنب وقدمت وين البيرو.. ترميت عالكرسي وحطيت ملف القضية قدامي.. عديت بعينيا عليه حاولت نركز ف الخدمة ومانجمتش.. مخي كان سارح فيهاا هي وف حالتها.. تو ايامات عديتهم وهي بعيدة علياا قاعدة ف دار رفيقة.. حتى كيف نمشيلها ترفض انهاا تراني ولا تحكي معاياا قد ماحاولت معاهاا شي ماحبتش.. غير كلام رفيقة الي خلاني نزيد نتحير انها رافضة تاكل ولا حتى تحكي معاهاا.. قد ماحاولت نخبي عليهاا لخبر ف الاخير حصلت وخليتها تعرف ياريتني كان سكتت وقتها.. فقت من سرحتي على صوت الباب كيف دق وتحل.. شفت فريحة الي دخلت وف يداها فنجان القهوة.. قدمت ناحيتي وحطتو قدامي تحكي
فريحة :" هاذي قهوتك ليث "
هزيتلها براسي باهي نحكي
انا :" عيشك "
ريتها كيف قعدت قدامي وعدات بعيناها علياا تحكي
فريحة:" ليث سافا ؟؟
هزيتلها براسي اي نحكي
انا :" سافا "
فريحة :" مالا شبيني حاستك متقلق الايامات هاذم.. من وقت ما سقطت قمر وانت تاعب..ياخي قمر تاعبة لهالدرجة ؟؟ "
تنهدت بالشوي وغزرتلها على جنب نحكي
انا :" لباس "
فريحة:" فهمتك.. نخليك على راحتك مالا.. اما كان تحب تحكي ولا تكون محتاج لأي شي.. تفكر الي انا ديما معاك ف كل وقت "
هزيتلها براسي اي من غير ما نجاوبها وحاولت نركز مع الملف لي قدامي..تلفتت على صوت تاليفوني كيف نوقز.. هزيتو ورديت بسرعة اول ماريت رفيقة تطلب..نحكي
انا :" اهلا رفيقة "
رفيقة :" ليث قمر مفماش "
تنطرت من بلاصتي جيت واقف على كلمتها.. حسيت قلبي ضرب من الخوف.. حليت عينيا على وسعهم نحكي
انا :" شنووة..شمعناها قمر مفماش ؟؟؟"
رفيقة :" طلعت لبيتها بش نهزلها لفطور مالقيتهاش.. قلبت الفيلا وريحتها مفماش "
مديت يدي هزيت المفاتح و الفاست متاعي نحكي
انا :" باهي جربت طلبتها ؟"
رفيقة :" تاليفونها ف البيت "
ف اللحظة هاذي حسيت روحي دخلت بعضي اكثر مخي بقى يخدم ف وين زعمة مشات.. نحكي
انا:" هاني بش نخرج نلوج عليهاا وانت زادة شوفها ف الحي وكلمني "
رفيقة :" باهي ولدي "
علقت عليهاا وقدمت للباب بش نخرج اما وقفت على صوتهاا تحكي
فريحة :" ليث لباس شصار..شبيها قمر ؟"
عديت بيديا على وجهي فادد من اسئلتهاا.. دوب غزرتلها على جنب نحكي
انا :" ماصار شي "
خليتهاا وراياا وخرجت نجري للكرهبة.. طلعت وشديت الثنية اما مش عارف اما ثنية بالضبط.. كبست بيديا عالفولون حاولت نهدي روحي شوي بش نعرف نركز ونخمم.. اول ثنية شديتها هي ثنية دارنا خممت بالك ترجع غادي.. مسافة الطريق ووصلت نزلت من الكرهبة وبقيت نلوج اما شي مالقيتهاش.. رجعت طلعت ف الكرهبة وتكيت براسي لتالي نخمم ف زعمة وين تكون مشات وهي ف الحالة هاذي.. رجعت استويت ف قعدتي اول ماتفكرت المقبرة.. خدمت الكرهبة وطرت عجاجة.. كبست عالفيتاس أكثر بش نخلط قبل ماتظلام الدنياا.. درج من زمان وكنت قدام المقبرة.. راكيت الكرهبة ونزلت فيسع.. قدمت بخطواتي نجري وين القبر.. وقفت وتنفست براحة اول ما لمحتهاا قدامي.. اما شوفتهاا هكاا خلات قلبي يتقطع.. ريتها كيف كانت مطبسة ومتكية عالقبر.. صوت بكاهاا كان واصلي.. تنهدت بالقوي وقدمت بخطواتي ناحيتها.. عديت بعينيا على شعرها كيفاه كان هايج شوي وحالتهاا بالتراب.. بلحق حالة قمر خلاتني نحس روحي عاجز عاللخر.. طبست شوي مديت يدي وحطيتها على كتفها وطبطبت عليها نحكي
انا:" قمر ياروحي هياا قوم معاياا "
بعدت كتفها عليه تحكي
قمر :" م.. منحبش "
انا :" باهي هيا قوم خلينا نروحو "
كبست عالقبر اكثر تحكي
قمر :" م..ماعندي وين نروح ب..بش نبقى ح..حذا امي "
طبست بجنبهاا وحطيت يدي على شعرها نمسح علاهاا نحكي
انا :" الشتا بش تبدا تطيح تو.. هياا معاياا ونوعدك غدوة نرجعك "
هزيتلي براسهاا لا برشة مرات تحكي
قمى :" لا...لا مانجمش نخليهاا ليث.. مانجمش نمشي ح..حتي امي تسامحني "
انا :" ياروحي امك مسامحتك والله.. انت ماعندك حتى ذنب ف الي صار.. "
هزت روحها شوي وتلفتتلي.. طرشقت بالبكا أكثر تحكي
قمر :" ل..لا مش ص..صحيح.. ه..هي م..ماتت ب..بسبتي انا.. ب..برا خليني حذاهاا.. ن..نحب نبقى و..وحدي "
حطيت يدي على خدها ومسحتلها دمعتها نحكي
انا :" مستحيل نمشي ونخليك.. هياا اسمع كلامي خلينا نمشيو وغدوة نوعدك نرجعك "
بعدت وجهها عليااا وتنطرت من بلاصتها وقفت.. حلت عينيها فياا و علات في صوتهاا شوي تحكي
قمر :" تييي ابببعدنييي.. ع..علاااش ماتحبش تخليني على راحتي "
عديت بعينيا على وجهها الي كان احمر وعينياها كيفاه كانو تاعبين.. قربتلها شوي نحكي
انا :" قمر ياروحي انت هكااا قاعدة تضر ف روحك.. مانجمش نراك هكا ونخليك "
قمر :" شيهمك انت ف حالتي.. انا..انا بش نبقى هناا "
قدمتلها فيسع وشديتهاا من مرفقهاا قبل ماترجع تطبس عالقبر.. كبست علاهاا نحكي
انا :" لاا بش تمشي معايااا.. تحرك قدامي "
نطرت يداها مني ودزتني بالقوي تحكي
قمر :" قتللك لااا "
شهقت بالقوي وين دموعها رجعو نزلو من جديد تحكي
بالغصة
قمر :" م..مانحبش ن..نمشي.. معاك..ن..نحب نبقى..نبقى حذا امي "
ليث :" قمر..."
قوات ف بكاها وقصت علياا تحكي
قمر :" ا..امي بكري ماحبتش تقربلي ليث.. هي..هي هزتلي ولدي..هيا قتلي انها مغششة علياا "
غمضت عينيا بالقوي و رجعت حليتهم حسيت روحي تهديت قدام حالتها وتخنقت ماعرفتش شنعمل معاها.. قربت منها شوي ووطيت ف صوتي نحكي
انا :" قمر علاش عاملة هكاا ف روحك"
غزرت للقبر وهزت يداهاا الي كانت ترعش تحكي
قمر :" ه..هي قتلي ربي حرمك منو خاترك قتلتني.. مشات و..وهزتو معاهاا.. خ..خاطرني انا..انا السبب ف موتهااا ليث "
رجعت غزتلي تبكي وتحكي
قمر :" و..ولدنا..ولدنا زادة مات بسبتي انا زادة... كلهم ماتو بسبتي انا "
قربت منها وحاولت نحضنها نحكي
انا :"قمر يزي "
قربتلي وضربتني على صدري تحكي
قمر :"و..وانت زادة قا-تل..امي ماتت منك انتتت "
طرشقت بالبكا وغزرتلي ف عينياا تحكي
قمر :" ر..ربي عاقبنا الزوز وخذا..خذا ولدنا.. ولدنا هناا تو.. انا..انا ريتو بكري هي..هي هزتو والله "
هزت يداهاا وحطتهاا على وذناهاا تحكي
قمر :" انا..انا سمعتو كيفاه يبكي.. ي..هو..هو يحب علياا.. انا..انا بش نبقى هنا..حذاهم الزوز "
بقيت واقف نغزرلهاا مصدوم من الحالة الي وصلتلها.. حسيت بغصة شدتني قدام تصرفاتهاا.. حطيت يدي على زندوها نحكي
انا :" قمر ياروحي اهداا واسمعني.. الي تقول فيه مش صحيح صدقني.. ولدنا ماماتش منك انت..هذاكاا الي حبو ربي وانت... "
قصت علياا تحكي
قمر :" اششش اششش ليث.. انا..انا السبب ماتكذبش عليااا..وانت انت زادة السبب..ياريتني ماعرست بيك.. ياريتني ماعرفتك..ولا مشيت معاك يومها.. راي امي بقات معاياا تو.. انا خليتها وحدها خاترني مشيت معاك.. كان بقيت معاها راهو مق-تلهاش..راي بجنبي ومسامحتني.. اما..اما امي هناا منك ومني.. احناا نستاهلوو "
كبست علاها نحكي
انا :" باهي ..باهي انا السبب في كل شي انت ما عندك حتى ذنب ياروحي.. هياا معاياا وخليناا نكملو كلامنا ف دارنااا"
بعدت علياا ووخرت بخطواتها لتالي تحكي
قمر :" لالالا منجمش.. انا..انا بش نبقى حذا ولدي وامي "
طرشقت بالبكا أكثر تحكي
قمر :" بش..بش نبقى حتى..حتى امي تسامحني و..وترجعلي ولدي "
قربتلها اكثر وشديتها من يداهاا نحكي
انا :" قمر الدنياا بش تظلام مستحيل نخليك هناا..امشي وغدوة تو نرجعك "
تلفتتلي وبقات تضرب فيا على صدري وتبكي بالشهقة تحكي
قمر :" س..سيبني..ق..قتل..قتلك ما..مانحبش.... "
دورت بيديا فيسع وراهااا ولقفتهاا اول ما ساقيهاا رخت بيهاا.. هزيتهاا ف حملتي وعديت بعينيا عليهاا كيفاه كانت تبكي وتحكي
قمر :""امممي"
كبست علاهاا وقدمت نجري بيها للكرهبة.. حليت الباب وحطيتهاا عالكرسي..عديت بعينيا على وجهها كيفاه صفار فجأة وشفايفهاا شاحوو.. هزيت يدي ولميتلهاا شعرهاا.. تكيت بيها الكرسي لتالي وسكرت عليهاا الباب.. دورت من الناحية لخرى وطلعت بجنبهاا.. جبدت البرفان ورشيت شوي قدام خشمهاا وطبطبت على خدها نحكي
انا :" قمر..قمر ياروحي فيق "
شفتها بدأت تحل ف عيناهاا اكثر.. حطيت يدي على خدها نحكي
انا:" قمر ياروحي ابقا معايا.. تو نهزك للكلينيك"
تململت شوي وهزت روحها.. حطت يداها على راسهاا تحكي
قمر :" روح بياا.. هزني لخالتي "
انا :" شوف وجهك كيفاه تاعب.. خليي الطبيب يشوفك "
قمر :"مانحبش اماان.. نحب نروح "
انا :" باهي باهي.. اهدا وارتاح تو نروح بيك "
تكات براسها لتالي ودورت وجهها علياا بقات تغزر لطريق وتبكي.. بقيت نسوق وعينيا باقي معاهاا.. مسافة الطريق ووصلنا.. ريتها كيف حلت الباب ونزلت من غير ما تستناني.. نزلت فيسع معاهاا ودورت ناحيتهاا حطيت يدي على مرفقهاا نحكي
انا :" خليني نساعدك "
بقات تمشي بجنبي ساكتة ماجاوبتنيش.. دقيت الباب وين فتحتلنا رفيقة.. عدات بعيناها عليناا وغزرت لقمر تحكي
رفيقة :" قمر بنتي وين كنت.. حيرتني عليك "
انا :" خليها تدخل قبل رفيقة وبعد تو نحكيو "
هزتلي براسها باهي وحلتلنا الباب اكثر.. اول مادخلناا بعدت علياا وطلعت لبيتهاا من غير ما تحكي ولا تغزر لحد.. وقفت ف بلاصتي نغزرلهاا كيفاه طالعة ف دروج حسيت روحي مانجمتش نخلط عليهاا خاطر مش عارف كيفاه بش نتصرف معاهاا.. فقت من سرحتي على صوت رفيقة تحكي
رفيقة :" ليث.. فريحة هناا "
لحظتهاا وين تلفتت وغزرتلهاا كيفاه كانت واقفة ف وسطناا.. عقدت بحواجبي مستغرب ووجودها.. ريتها كيف قربتلي تحكي
فريحة:" ليث..بكري كيف سمعتك قلت قمر مفماش وخرجت تجري بقيت متحيرة.. جيت حبيت نطمن عليها "
هزيتلها براسي باهي من غير حتى كلمة وتلفتت لرفيقة تحكي
رفيقة:" ليث وين لقيتها ؟"
عديت بيديا على وجهي نحكي
انا :" ف المقبرة حذا امها "
رفيقة :" باهي وشنوة بش تعمل تو ؟ حالتها ماتعجبش.. كيفاه بش نخليوها هكا؟"
جبدت تاليفوني نحكي
انا :"هاني.. بش نكلم طبيبتهاا تجي تشوفها "
هزتلي براسها أي تحكي
رفيقة:" اي..اما الايامات لي تعداو مرضاتش تتجاوب معاها وانت تعرف "
ليث:"يمكن ليوم تتجاوب معاها خاترها حكات وبكات "
رفيقة:" فهمت عليك اطلبها مالا"
وخرت بخطواتي لتالي وخرجت لجنينة..حطيت رقم الطبيبة وطلبتها.. شوي وقت وردت علياا حكيت معاها على حالة قمر بالضبط وفسرتلها شنوة صار.. عطيتها العنوان ساعة وتكون هناا.. اول ماكملت معاهاا رجعت للدار دخلت للصالة وين شفت رفيقة وفريحة يحكيو.. ترميت عالفوتاي وغزرت لرفيقة تحكي
رفيقة :" شعملت ولدي؟"
انا :" الطبيبة ساعة وتكون هناا "
رفيقة :" أيا باهي "
غزرت لفريحة كيف تدخلت تحكي
فريحة :" انشالله لباس ليث.. متعرفش قداش سخفتني..قمر ما تستاهلش لي صار فيها "
هزيتلها براسي باهي نحكي
انا :" عيشك "
غزرت لرفيقة ورجعت نحكي
انا :" رفيقة طلعت تفقدتها مش هكا ؟"
هزتلي براسها أي تحكي
رفيقة:" اي اكيد.. لقيتهاا رقدت "
انا :" باهي.. خليني نمشي نشوفهاا حتى تجي الطبيبة "
رفيقة :" اي برا حذاهاا "
قمت من بلاصتي وطلعت نكركر ف ساقياا بالسيف.. حليت الباب ودخلت حذاهاا.. قدمت بخطواتي ناحيتهاا وين شفتهاا مازالت راقدة.. تنهدت بالشوي كيف ريتهاا ترمات بحوايجهاا بكلهاا.. طبست عليهاا نحيتلهاا صباطهاا ودخلت لسال دوبان خذيت منشفة مبلولة ورجعت حذاهاا.. قعدت بجنبهاا وبقيت نمسحلهاا بالشوي بالشوي التراب الي بقى عالق ف حوايجهاا و ف يداهاا.. رجعت المنشفة لسال دوبان وغسلت حالتي انا زادة ورجعت حذاهاا.. قعدت بجنبهاا حطيت يدي على شعرها نمسح علاهاا وفرد وقت نغزرلهاا.. عمري ماتخيلت قمر بش ترجع لحالتها متاع قبل وممكن اكثر المرة هاذي.. حسيت قلبي وجعني وانا نشوف فيها هكا.. قد ماحاولت نرتحهاا ونخليهاا ترجع تعيش حياتهاا نلقى روحي فشلت ف شي هذا.. تكيت بظهري لتالي وباقي يدي على شعرها.. ريتهاا كيف تململت شوي ودوب حلت عيناها ورجعت سكرتهم.. عديت بصوابعي على خدهاا نحكي
انا :" قمر ياروحي شحالك تو ؟"
حلت عيناها ودورت وجهها ناحية الشباك ساكتة.. هكاكا وسمعت صوت الباب كيف دق وتحل وين شفت رفيقة دخلت.. اشرتلي بعيناها تحكي
رفيقة :" ليث تنجم تجي؟"
هزيتلها براسي اي وقمت وقفت قدامهاا غزرتلي تحكي
رفيقة :" الطبيبة وصلت "
انا :" اي خليهاا تدخل ديجا قمر فاقت "
هزتلي براسها باهي وخرجنا من البيت.. سلمت عالطبيبة وخليتهاا دخلت حذا قمر.. سكرت الباب وراهاا..بقيت واقف قدام باب غرفتها على عصابي..حسيت روحي توترت اكثر من الحالة الي وصلتلها.. شوي وقت وهزيت راسي قدمت بسرعة اول ماريت طبيبتهاا خرجت من حذاهاا...وقفت قدامها وعديت بعينيا عليهاا نحكي
انا:"شحالها دكتورة ؟"
غزرتلي درا كيفاه تحكي
الدكتورة:"سي ليث مانيش بش نخبي عليك..مدام قمر حالتها النفسية تأزمت برشة..ومتجاوبتش مع العلاج جملة "
غمضت عينيا بالقوي و رجعت حليتهم حسيت روحي تهديت قدام الشي الي سمعتو.. ماتوقعتش بش يصير فيها هكا.. نحكي
انا :" اي وشنوة الحل دكتورة "
الدكتوره :" الحل انهاا تدخل للمصحة "
قلبي خض بالقاوي وقت سمعت جملتهاا.. اخر شي توقعتو انو قمر بش توصل للمرحلة هاذي...حاولت نهدا وغزرتلها مرة اخرى نحكي
انا :" مفماش حل اخر دكتورة..مرتي مستحيل تنجم تتقبل الفكرة هاذي"
الدكتورة:"والله حالتها قاعدة تتعقد منظنش فما حل اخر غير هكا"
هزيتلها براسي باهي نحكي
انا :" عيشك دكتورة..اما ياريت تحاول معاها اكثر المصحة نحبك تخليها اخر حل خاتر مستحيل ندخل مرتي غادي "
الدكتورة:"باهي سي ليث فهمت عليك..هاني بش نخليها ترتاح.وبش نرجع بعد يومين ونحاول معاها اكثر"
انا:"باهي دكتورة عيشك"
خليت رفيقة توصلها وحليت لباب دخلت طمنت عليها انها رقدت..وخرجت بسرعة منعرفش شباش نعمل تو اما مستحيل نفرط فيها بش نحاول قد ما نقدر حتى نخليها تبرا..
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
