الحلقة التاسعة
#رفيقة تحكي
بقيت قاعدة حذاها لين رقدت .. قداش قلبي واجعني علاها صغيرة و هازة حمل الدنيا فوق ظهرها .. كبروها قبل وقتها من الهم الي خلاوها تعيشو .. تظلمت و ما لقات حد ياقف معاها و يشدها من يدها و يطمنها .. كيف نغزرلها نتفكر روحي .. نرجع بسنين لتالي و العذاب و القهر الي عشتو .. نتفكر كل حاجة خسرتها .. اما الي ما توقعتوش انو سبب خسارتي و عذابي هو بيدو سبب عذابها .. نفس العيلة الي بكاتني بكري هي السبب في بكا قمر تو .. العيلة الي كل حاجة يقربو منها و يمسوها يدمروها بلا رحمة و لا شفقة .. انا تعذبت وحدي و رضيت بلي صار فيا اما مستحيل نخلاهم يعاودو نفش الشي في قمر .. بش ناقف معاها و ناخذلها حقها كان يكون اخر نهار في حياتي .. بش نرجع ناوجههم بلي صار قبل و صار تو .. بش نكون انا السبب في النهاية متاعهم و ناخد حق كل مظلوم عفسوه تحت ساقهم من غير مايرمشلهم شفر .. عيلة بن سعيد لازمها تتنفى من الوجود لازم الناس ترتاح من شرهم لازن نطفي ناري الي شاعلة سنسن تو و نطفي نار قمر .. بش نكونو احا دواء بعضنا .. انا بش نكون اليد الي تقوم قمر في كل مرة تطيح فيها و قمر بش تكون دوايا لجرح الي بقى ينزف .. جرحي على بنتي الي كيف خسرتها خسرت معاها كل حاجة حلوة في حياتي ..
خليتها راقدة و خرجت لجنينة حبيت ناخذ نفس بعد الشي الي تفكرتو .. شي نحب ننساه اما بقى محفور في ذاكرتي .. قعدت عالكرسي و تكيت راسي لتالي غمضت عينيا حبيت نرتاح و مانخمم في شي .. اما في كل مرة نغمض عينيا نري اكا النهار المشوم نرى الدم الي في كل بلاصة و صياح بنتي و هي تنادي عليا .. هبطت دمعة من عيني فيسع ما مسحتها .. لا مش انا الي لازم نبكي يزيني ما بكيت عديت عمري الكل نبكي تهديت و معادش فيا .. تو جاء الوقت الي لازم هزما يبكيو و يبكيو الدم في عوض الدموع .
فقت من سرحتي على صوت أختي حسنة
" اختي رفيقة هيا تعشى هاني حضرت لعشاء "
" لا ماعينيش تو عيش اختي .. هز لعشا لقمر خلاها تاكل و تشد قلبها .. لازمها ترجع صحتها شوي"
تنهدت و تحكي " هزيتلها اما محبتش .. بنتي قاعدة تذوب قدام عينيا يا اختي رفيقة .. قمر قاعدة تطفى و قلبي قاعد يطفى معاها .. " غمضت عيناها و تنهدت اكثر " الي صار في بنتي مفماش قوة في الدنيا تنجم تتحملو .. قمر كانت كيف القمرة بلحق اسم على موسمة .. عمرها ماهزت عيناها فيا كانت حنينة و تخاف عليا .. بعد موت بوها لقيتها هي الي تقوي فيا .. كانت كلها براءة قد ماتكبر كنت نرا فيها كيف الطفلة الصغيرة الي اقل حاجة تفرحها .. عمرها لا شكات و لا تشرطت كانت راضية بالقليل قبل لكثير .. حبت يحيى ملي هي صغيرة .. حلت عيناها عالدنيا معاه .. حبتو من عروش قلبها .. اما هو كمل على مابيها .. زاد غرقها .. حاسة روحي مكتفة منعرفش شنعمل بش بنتي تحيا من جديد .. حاسة روحي ضعيفة على ضعفها .. مقهورة على قهرتها .. بنتي ماتستاهلش الي صاير فيها .. ماتمنات شي الدنيا .. كان انها تعرس بالرجل الي حبتو و تعيش معاه فرحانة عمرها ماتمنات حاجة كبيرة احلامها كانت بسيطة .. في لحظة أحلام بنتي تلاشت من قدام عينيها .. قتلوها بالحيا و قتلوني معاها .."
بكيت و انا نسمع في كلامها كل كلمة قالتها كانت كيف السكينة في قلبي .. صحيح قمر ماتستاهلش هذا الكل .. حطيت يدي فوق يديها نطبطب عليها و نمسحلها في دموعها و نحاول نخفف عليها وجيعتها . انا اكثر وحدة تعرف وجيعة ام قلبها محروق على ظناها.. تكلمت
" ما تخافش قمر قوية و بش تتعدى هذا الكل .. و كانك على يحيى بالوقت تو تنساه و تعرف الي هو خسرها هو الي خسر مش قمر بالعكس قمر ربي حبها و ظهرلها حقيقتو .. واحد اناني خمم في روحو كهو جبان من اول مشكلة هرب ماعنوش الجراة بش يواجه الدنيا الكل على خاطر حبو .. قمر تو لازم تاقف لروحها و تبدا من جديد .. لازمها تاقف بش تأخذ حقها و تخرج قدام لعباد براس مرفوع"
هزت راسها و غزرتلي تحكي " كيفاه بش تأخذ حقها ؟؟ كيفاه واحنا مانعرفوش الي عملو ها العملة"
دورت عينيا على وجهها و تكلمت " انا نعرف ..و قمر تفكرت الاسم و انا نعرف الاسم هذاكا مليح"
غزرتلي متعجبة تحكي " شنوة الاسم و منين تعرفو .. شنية بش تعمل اختي رفيقة ؟"
" مش مهم تعرف تو انا منين نعرف .. اما تاكد الي انا بش ناقف مع قمر لأخر لحظة في عمري.. بش نبقى واقفة وراء ظهرها نحمي فيها .. وتو اول حاجة لازم نعملو محامي و نرفعو قضية بيهم "
حلت عيناها فيا تتكلم " قضية ؟؟ قمر في بالها ؟؟ اكيد بش تقول لا اكيد مش بش ترضى .. "
قص علاها صوت قمر الي كانت ورانا تسمع فينا .. تلفتنالها الزوز فرد وقت.. كانت واقفة بسيف وجهها اصفر و عيناها محوقة .. تكلمت بصوت يرعش " بش نرضى ... بش نشكي بيهم .. بش نرفع قضية "
تبسمتلها و قمت شديتها من وجهها نتكلم " صحيت قمر نحبك هكا قوية و ماتخافش .. حقك بش تاخذو عيناهم تغزر اما معاك بنتي .."
رجعتلي التبسيمة و عيناها تلمع بالدموع المحصورين " خـ خالتي .. سمعتك قلت الي انت تعرفهم .. صحيح كلامك ؟؟"
تربثت من سؤالها خرجت كلامي بسيف نحكي ' ا أي قمر نعرفهم .. ايهم بن سعيد و وولد محمود بن سعيد " حسيت اسمو خرج من حلقي كيف الشوك .. محمود بن سعيد اسمو وحدو كافي انو يخنقني .
مسحت بيداها على رقبتها و غمضت عيناها تحكي " هزني ليهم "
تصدمت من كلمتها نحكي " ش شنوة قمر شقلت ؟؟ "
غزرتلي في عيني تحكي " ن نحب نمشي نواجههم بلي عملو ولدهم .. نحب نغزر في عيناهم و نقلهم راني بش ناخذ حقي مهما يصير .. نحب نقولهم راي قوتكم مش كافية بش تهد قمر "
تبسمتلها و مسحت على خدها نحكي " باهي قمر نهزك .. امشي و اقف قدامهم و انا بش ناقف معاك و بجنبك .. الي تحب عليه الكل بش يصير."
في اللحظة هذيكا تمنيت كان انا زادة خذيت القرار هذا قبل و وقفت قدامهم و واجهتهم تمنيت كان تقويت على روحي كيف قمر و خذيت حقي .. اما ميسالش يمكن تو جاء الوقت و ربي حط قمر في ثنيتي بش نرجع حقي وحقها.
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
