#ليس_ذنبي ❤️‍🔥

حلقة 95

حلقة 95
#قمر_تحكي

كبست عالكاب متاعي وخرجت للبلكونة.. قعدت عالكرسي وبقيت نغزر قدامي و فرد وقت نخمم ف الوضع الي انا فيه.. اسبوع تعداا على اخر مرة حكيت فيها معاه و تعاركناا.. و من وقتهاا مارجعتش سمعت صوتو.. للحظة هاذي مافهمتش انا ف شنوة غلطت معاه كيما مافهمتش علاش خذا مني موقف علاش ماخممش للحظة انا شنوة حسيت ف بعدو علياا.. تمنيت كان رجع كلمني و خلاني نبررلو كلامي و تصرفي وقتها ممكن يفهمني و يفهم خوفي.. اما هو عمل العكس.. حتى كيف كلم عم مصطفى ما كلفش روحو يسأل عليااا و لا يحكي معاياا كيما نعرف و متأكدة انو حكاية تاليفونو الي تكسر مفماش منهاا.. حسيت روحي تخنقت من الأفكار الي بقاو يلعبو بيااا.. فكرة انو قاعد يتهرب مني خلات الخوف يسيطر عليا.. خفت لا الي صار قبل يرجع يصير تو.. كان يرجع و يخليني المرة هاذي وقتها مستحيل كان نتحمل لوجيعة هاذي.. فقت من سرحتي عالنسمة الي ضربت فياا و خلاتني نفيق شوي و نخرج من دوامة الأفكار الي حاصروني.. قمت من بلاصتي و رجعت للبيت.. قدمت بخطواتي ناحية التابل دونوي.. مديت يدي وخذيت التصويرة الي كانت فوقو و قعدت عالفرش.. بقيت نتأمل فبها و فرد وقت عديت بصوابعي عليهاا.. للحظة خفت لا نكون عشت حلمة معاه.. حلمة مزيانة ووفى وقتهاا و نلقى روحي رجعت بالتوالي وحدي.. غمضت عينيا بالقوي على دموعي الي نزلو.. رجعت حليتهم هزيت يدي مسحت دموعي و رجعت التصويرة ف بلاصتها.. قمت من بلاصتي و دخلت لسال دوبان غسلت حالتي و لبست البيجاما متاعي ورجعت للبيت.. لبست بيجامتي وخرجت قعدت قدم المراية نمشط في شعري.. بقيت نغزر لروحي في المرايا وتفكيري بعيد برشا.. فقت من سرحتي على صوت لباب كيف تحل.. قلبي خض بالقاوي اول ما ريحتو سبقتو ليا.. تلفت فيسع ريتو كيف دخل وسكر لباب.. للحظة حسبت روحي نتخيل.. مش مصدقة الي هو قدامي تو.. جمدت ف بلاصتي لا نجمت نقوم و لا نتحرك حتى النفس عجزت بش ناخذو و لا نجمت ننطق حرف.. بقات كان عينيا تدور عليه.. قدم مني وتبسم يحكي
ليث :" شنوة متوحشتنيش ؟؟"
رمشت عينيا برشة مرات نحكي
انا :" ياخي وقتاه رجعت ؟؟"
ليث :" ليوم "
انا :" شبيك ما قلتش انك مروح؟؟ "
عدا بيدو على شعرو يحكي
ليث :"نسيت"
هزيت بحاجبي نحكي
انا :"واضح.. صاير تنسى برشا الفترة هاذي"
عقد بحواجبو مستغرب يحكي
ليث :" شتقصد انت ؟ "
انا :" شي "
كملت كلامي وقمت من بلاصتي.. عطيتو بظهري بش نمشي للفرش اما وقفت على يديه الي شدتني من مرفقي.. دورني قدامو يحكي
ليث :" قمر شبيك ؟؟ علاش مكبرتها جيست متذكرتش نطلب ونقول لي مروح "
انا :" مليح لي تذكرت انك تروح اصلا "
ليث:" تو هاذا وقتوو... "
انا: " صحيح مش وقتو.. انا بش نرقد "
بعدت يدي من عليه و عطيتو بظهري قدمت لبلاصتي تلفتت كيف قربلي ورجع يحكي
ليث:"ياخي للدرجة هاذي مهمكش رجوعي.. هكا تستقبلني..شبيك تحكي معايا بالبرود هذا وتتهرب مني "
انا"والله لي يتهرب من يوم ما سافر هو انت.. حد نجم يحاسبك.. لا.. مالا متحاسبنيش على شي انت بديتو.. و تو بش نرقد "
ليث"مش قبل ما نحكو "
قمر :"مفما حتى شي يتحكى تو.. تصبح بخير "
تسطحت عالفرش و تغطيت ماخليتوش يجاوبني.. سمعتو كيف نفخ بالقوي ودخل لدوش.. شوي وقت وحسيت بيه كيف رجع حذاياا.. تسطح و طفى الضو.. خذيت نفس من ريحتو الي تسللت داخلي وين حسيت روحي رجعت حييت بعد ما متت ف غيابو.. رغم غشي منو الا اني حسيت براحة غريبة بعد رجوعو.. هزيت يدي ومسحت دمعة لي طاحت من عيني من غير ما نشعر.. متوقعتش بش يصير معانا هكا من اولها لدرجة انو راقدين في نفس السرير اما بعاد على بعضنا.. رغم كل شي حسيت روحي سخفت عليه كيف كلمتو هكاكا.. اما رغم عني حاجة اقوى مني.. هو جرحني برشا لفترة الي تعدات.. مانجمش نتصرف كانو شي ما صار.. غمضت عينيا حبيت نرقد و نرتاح شوي كيما حاولت ننسي الافكار لي تدور في مخي بقيت نخمم كان كيفاه وضعنا هذا بش يتصلح....
#ليث_يحكي