حلقة 52
ليث يحكي
تعداو ايامات وانا بعيد علاهاا .. ايامات و انا هارب منهاا .. مانجمتش نرجع و نشوفها .. حاجة اقوى مني مانعتني .. لكلام الي نحكيه و نوعد بيه روحي .. يتلغى قدام غزرة وحدة من عيناها .. الايامات هاذم عديتهم في المزرعة .. بقيت بالتليفون مع رجال الي قدام الدار نسال علاها كان صارت حاجة في غيابي .. مانجمتش حتى نطلبها ..صوتها بش يخليني نضعف اكثر و انا مانحبش نوصل للمرحلة هاذي .. بعدي علاها هو الحل مهما كانت قوة وجيعتو .. عندي انا المهم هي بخير و الباقي تو ينسى بالوقت .. تو نتجاوز هذا الكل .. بقيت نقنع في روحي بالكلام هذا .. رغم اني عارف الي هو مجرد كذبة .. كذبة قاعد نغرق فيها ..
بقيت في البيرو غاطس في الخدمة بين الأوراق يمكن هاذي الحاجة الوحيدة الي تخليني نبعد بفكري علاها شوي .. أصلا عندي قداه و انا مهمل الخدمة .. هزيت راسي عالتاليفون الي نوقز .. استويت في قعدتي و خذيت نفس نحكي " وي رفيقة "
" ليث تنجم تجي لدار ؟"
عديت بيديا على شعري و تكيت عالكرسي نحكي
" نخدم رفيقة مانجمش "
" حاول تعدا حتى شوي لازم نحكيو "
نفخت بالقوي نحكي " في شنوة بش نحكيو ؟؟ كان مستحقين حاجة كلم الراجل الي قدام الباب انا واسيه عليكم "
" ليث .. لازمك انت تجي .. نحب نحكي معاااك اكييد "
" باهي .. ساعة اخرى و نكون حذاكم "
علقت علاها و رميت التاليفون بعيد عليااا.. بعدت لاوراق من قدامي و تكيت براسي لتالي و غمضت عينيا .. بقيت بين نمشي و مانمشيش .. معادش عارف شنعمل .. رغم اني متوحشها.. و متوحش كل لحظة نعديها معاها .. اما فما حاجة مانعتني اني نراها .. نحب نبقى بعيد علاها و على كل تفصيلة صغيرة فاها قادرة تغرقني اكثر .. قمت من بلاصتي لبست الفازت متاعي.. هزيت مفاتحي و تاليفوني و خرجت .. طلعت في الكرهبة و شديت ثنية الفيلا .. كل مانقرب كل ما نتخنق .. حاسس اني بين نارين .. بين اللهفة علاها و بين فكرة ننساها .. ماعرفتش شنوة القرار الي بش نرسى عليه في الاخير .. فقت من سرحتي كيف وصلت قدام الفيلا .. خذيت نفس مرة و ثنين حتى هديت شوي .. و هبطت قدمت ناحية الباب و دخلت لدار .. عرضتني رفيقة تحكي " الحمد الله كيف جيت "
عضيت على شفايفي نحكي " احكي شنوة فما لازمني نمشي "
" ادخل لصالة .. مايجيش نحكيو هكا "
عطاتني بظهرها و سبقتني لصالة.. خلطت وراها نكركر في ساقيا بسيف .. قعدت عالفوتاي قدامها نحكي
" نسمع فيك "
" ليث قمر حالتها تاعبة .. لازمك تلقى حل معاها "
رسيت على سنيا نحكي " شنوة تحبني نعمللها ؟؟ انا حرت معاها و معادش فاهم شنعمل "
قربتلي و قعدت قدامي تحكي "عيش ولدي احكي معاها هي تسمع منك انت .. راهي ايامات هي لا تاكل و لا تشرب .. حالتها راجعة بالتوالي .. شكون عندها غيرنااا "
غمضت عينيا بالقوي و رجعت حليتهم نحكي " تو نطلع نشوفها شوي و نحكي معاها "
قمت من بلاصتي و قامت ورايا تحكي " لا مش شوي .. لازمك تبقى معاها .. انا كلمتني اختي و لازم نمشيلها .. بش نغيب نهارين .. و مانجمش نخلاها وحدها .. حاولت معاها بش تمشي معايا اما ماحبتش .. خليك معاها انت .. هكاكا انا نبدا مطمانة "
عقدت بحواجبي نحكي " رفيقة منين طلعت باها حكاية نهارين هاذم؟؟ انا مانجمش نبقى معاهاا "
حطت يداها على مرفقي تحكي " ليث .. لازمك تبقى معاها بوجودي و لا بلاش .. هي ترتاحلك و تسمع منك .. حاول تخرجها من الي هي فيه "
هزيتلها براسي باهي نحكي
" في بيتها هي تو ؟"
" أي برالها "
عطيتها بظهري و طلعت في الدروج اول ماوصلت لباب بيتها حسيت قلبي دق بالقوي .. نستنى في اللحظة الي نحل فيها الباب و نراها .. نخلي عينيا تشبع بشوفتها .. نملي رواريا بريحتها الي فقدتها الايامات هاذم .. ريحتها الي كل ما نبعد علاها نحس بالخنقة .. خذيت نفس ودقيت الباب بشوي نحكي " قمر .. ندخل "
بدني رعش على صوتها الضعيف الي سمعتو تحكي
" ا ..ادخل "
حليت الباب وقدمت بخطواتي ناحيتها .. اول ماريتها تصدمت من الحالة الي كانت فيها .. وجها اصفر .. عيناها محوقة و ذابلة .. شفايفها شايحة .. شعرها هايج .. وصلت لحالة خلتني ما نعقلهاش .. حسيت بوجيعة في قلبي كيف ريتها هكا .. قد ماتخيلت بش نراها تاعبة ماتصورتش لدرجة هاذي .. قربتلها اكثر نحكي " قمر قوم .. هز روحك شوي "
تململت شوي ريتها كيف كبست عينيها كيف حبت تقوم .. غزرتلها مستغرب نحكي " ياخي موجوعة ؟؟"
قعدت و تكات بظهرها عالفرش عدات بلسانها على شفافها تحكي " لاااا "
عقدت بحواجبي نحكي " مالا شبيك ؟؟ شباها حالتك هكا "
غزرتلي وذبلت عيناها تحكي " مانعرفش .. نحس في روحي تاعبة "
قربتلها اكثر ودورت بعينيا على وجها نحكي " بالطبيعة بش تتعب .. رفيقة قتلي الي انت ماكش تاكل "
قلبت شفايفها تحكي " ماعيني في شي .. نحب كان نرقد .. مانحبش نقوم "
" لا بش تقوم بالسيف عليك .. وبش تهز روحك شوف حالتك كيفاه .. هي قوم بش تخرج من البيت و بش تفطر "
رجعت تكات وحطت الغطا على راسها تحكي " قتلك معينيش .. خليني وحدي "
هديت عليها ونطرت الغطا من فوقها نحكي
" قتلك قوووم متهبلنيش .. معادش بش نتحمل تصرفاتك و دلالك هذا .. ماتختبرش صبري"
هزت روحها غزرتلي ف عينيا و حطت يداها على شعرها علات في صوتها تحكي
" قتلللك مانحبش نقوم.. امشييي من هنااااا .. انت ماكش مضطر تتحملني و لا تصبر علياااا "
حليت عينيا نغزرلها كيفاه صاحت اول مرة تعلي صوتها بالطريقة هاذي .. قربت منها وشديتها من مرفقها بالقوي قحرتلها نحكي
" اسمعننني اخر مرة تعلي صوتك عليا تفهم فياا .. اخر مرة تحكي معايااا هكاا "
هبطت راسها من غير ما تجاوبني .. لعنت روحي كيف سمعت شهقتها و شفت دموعها الي هبطو من صياحي علاهاا .. نفخت بالقاوي وعديت يدي على وجهي قعدت على طرف السرير .. خذيت نفس نهدي في روحي نحكي
" نحب نعرف علاه عاملة هكا في روحك ؟؟ فهمني شبيك ؟؟ .. مش كنت تحبهم يبقاو ف الحبس ؟؟ "
شهقت و هبطو دموعها تكلمت بصوت يرعش " ا .. انا .. انا مانيش نبكي منهم هوما .. ن .. نبكي خاطر نحس في قلبي واجعني يا ليث "
وطيت في صوتي نحكي "باهي احكيلي انت علاه هكا .. بالك انجم نعاونك "
هزتلي براسها لا برشة مرات تحكي " ماتنجمش تعاوني .. الي عملو يحيى فيا حد ما ينجم يعاوني عليه و لا ينجم يرتحني .. جرحي منو شي ما ينجم يداويه "
عينيا وساعت كيف سمعت اسمو .. حسيت بدني فور و ريقي وحل كيف الشوك في حلقي .. رسيت على سنيا نحكي " معناها انت هكا على خاطر يحيى ؟؟"
غطات وجهها بيداها الزوز تبكي وماجوبتنيش .. قربتلها و بعدتلها يداها من على وجها نحكي بالقوي
" حللل فمك ماتهبلش *** .. انت هكا على خاطرو .. حالتك هاذي منو هو؟؟ "
تكلمت بصوت يرعش تحكي " م.. مش بش تفهمني .. حد ماينجم يفهمني "
تنطرت من بلاصتي نصيح " شنوووة الي مانيش بش نفهمو ؟؟ اه قلي حللل فمك ؟؟ شادة الفرش على خاطرو و تنوح .. لا تاكل لا تشرب على خاطر واحد ماويسواش فرنك في سوق الرجال .. في عوض تفرح انك بش تاخذ حقك من لكلاب لخرين .. حالتلي ** منوحة عليه هووو "
سكرت وذناها بيداها الزوز تحكي " يزززي ليث يززي .. اسكتتت مانحب نسمع شي .. امشي من هناااا "
قربتلها وطيت ناحيتها و شديتها من مرفقها بالقوي ودورتها ناحيتي .. لحظتها الدنيا ظلامت في عينيا و ماعرفتش شنوة نعمل و لا شنوة نقول .. نحكي " شنوة الي ماتحبش تسمعو اه ؟؟ قوم شوف وجهك في المرايا .. شوف الحالة الي انت فاها .. حالتك صاارت تسخف .. تبكي على خاطر واحد ****.. خلاك مطيشة في الشارع و مكفاهوش هذا جاء باش يوسخك قدامنا الكل !!"
هبطت راسها وطرشقت بالبكا اكثر .. حسيت لعصب مكني .. معادش نعرف شنعمل معاها نحس في صبري وفى وبش نخرج من سينتي من جرتها .. سكتت شوية وبعد غزرتلها نحكي " تعرف حاجة !! خسارتك والله.. فما الف طفلة عانات لي عانيتو انت .. تمناو يد وحدة تشدهم بش تخرجهم من لي عاشوه .. يد توراهم الثنية لي لازم يمشيو فاها .. انت لقيت لي وقف معاك اما شعملت ؟؟... خالتك حالتها في الويل منك كلمتني لمرا متحيرة عليك و مش عارفة كيفاه تتصرف معااك .. وانا .. انا حرت وتعبت .. معادش عارف شنعمل معاك ..
في الوقت لي لازمك تقوم و تشوف الحاجات الي عندك و تحمد ربي علاها و تقاوم اكثر .. سيادتك شادة الفرش و قاعدة تبكيلي عالحاجات الي خسرتهم ..نحبك تعرف انو كان تبقا تبكي هنااا ميات سنة .. الي خسرتو ماهوش بش يرجعلك .. تعرف علاش خاطر هو اختار يمشي .. هو حب يبعد .. تعرف وقتاه لازمك تبكي؟؟ .. كيف تكون انت السبب في الخسارة الي عايشتها .. وقتها ابكي ولوم روحك .. اما خسارتك هاذي كانت قرار منو هو .. هو اختاار يبعد و يتخلى عليييك .. يعني بكاك هذا ضعف منك والضعيف مايعيشش وكان عاش بش يعيش ذليل "
كملت كلامي وعطيتها بظهري نحكي " انا هاني خارج وانت كمل نومك في راحتك معادش بش نقلقك .. ابقى هكاكا "
كبست على البواني بش نحل الباب اما وقفت كيف سمعتها تحكي بصوت يرعش "
" ا.. انا اصلا تذليت يا ليث .. صرت ذليلة وقت عملو عملتهم و .. وطولي راسي ... انت سمعتو بوذنيك .. سمعت يحيى شقال عليا .. قال .. قال الي انا صمعتي خايبة .. انت ريت التصاور بعينيك .. تصاور و انا ع.. عريانة فاهم بين يديك .. قالو الي انت عشيقي .. قالوهااا قدام الناس الكل .. وسخولي شرفي اكثر ماهو ماسخ .. وسخوني اكثر ما انا ماسخة .. حتى كان الي قالوه كان بالكذب اما انا تمنيت الموووت يا ليث .. عرفت علاه قتلك مش بش تفهمني ؟؟"
رجعتلها في لحظة عقدت بحواجبي نحكي " شنووووة؟ شقاعدة تخرف ياخي ؟؟ انت كيفاش تحكي على روحك الكلام هذا ؟؟"
ضحكت على جنب تحكي بالغصة " ش.. شنوة مش صحيح .. مش هذاكا الي صار .. انا راقدة هكاا و نبكي اما مانيش نبكي علييه .. نبكي على روحي الي وصلت لهناااا .. يحيى انا نكرهووو و نعيفووو .. اسمو وحدو يخليني نكره روحي و نكره عمري الي عديتو معاااه .. عايفة السنين الي ضيعتهم على واحد مايسواااش .. واحد باعني مرتين و ماهنتش عليه .. هو خلاني غامة على راسي و مانجمش حتى نغزر لوجهي في المراياااا .. عرفت انا علااه نبكي سي ليث .. نبكي على روحي .. مش علييه خاطر وليت نحشم بروحي نحشم نغزرلكم .. نحشم بش نهز عينيا فيكم .. خلاوني موطية راسي "
قلبي خض بالقاوي على الكلمة .. كلمتة نكرهو حسيتها بردتلي النار لي شاعلة فيا .. شفتها كيفاه دورت وجها عليا وصوت بكاها علا .. بقيت واقف في بلاصتي مانجمت نعمل شي و لا نقول شي.. بقيت ساكت نغزرلها عديت يدي على وجهي قربتلها و قعدت بجنبها دورتها ليا وهزيتلها راسها نحكي
" اششش .. شرفك عمرو ما توسخ خاطرك مسلمتش فيه بكييفك تسمع فيا .. معادش تخلوض ...وحد ما ينجم يذلك .. اللي صار في المحكمة كانت مذلة ليهم هوما .. هوما لي خرجو موطين رؤوسهم و يداهم مربوطة .. هوما لي لعبو لعبتهم بش ينهيوك .. اما اللعبة هاذي وسختهم اكثر .. قمر انت لازم تفهم الفرق .. انو المسخ هو لي يمشي في طريق الغالط بارادتو .. مش وقت يكذبو عليه الناس .. كان بش نسمعو لكلام الناس حد فينا مايقدم في حياتو بش نبقاو كلنا مسكرين على روحنا .. لازمك تتقوى و تخلي كل شي وراك و كل كلمة تسمعها لازمك تعفس علاهاا بساقيك و تتعدى "
هزيت راسي لقيتها تغزرلي غزرتلها في عينيها نحكي "صدقني قمر كلنا خسرنا في الدنيا هاذي .. كل واحد فينا عندو وجيعتو .. فما لي يتعلم يتعايش معاها وفما الي يبرا منها .. وانت بش تبرا خاطرك قوية رغم الضعف الي يبان عليك اما وقت جيت وحكيت معاك وشفت نظرة عينيك شفت فيهم قوة .. قوتك هاذي بش تخليك تتجاوز كل شي وتعيش الحياة لي تحب عليها"
شفتها كيفاه تبسمتلي وهزتلي براسها باهي مسحت دمعتها تحكي " عندك حق ليث .. ا .. انا بش نحاول ننسى لي صار وبش ن .. نحاول نكون قوية ونكمل في الطريق لي بديتو .. مانيش بش نسلم .. عندك حق "
قمت من بلاصتي مسحتلها على شعرها نحكي " ديما نحب نسمع لكلام هذا منك .. و تو بش تقوم يش تلبس دبشك و تهبط تفطر عندنا وين ماشين "
ميلت راسها تحكي " خليني ليوم اماان "
هزيت بحاجبي نحكي " لاااا .. تو بش تاقف بش تحضر روحك .. انا بش نخرج فيسع نكمل الخدمة الي خليتها في البيرو و نرجع نلقاك حاضرة .. فهمتني ؟؟"
هزتلي براسها باهي تحكي " باهي .. هاني بش نقوم "
عطيتها بظهري ورجعت وقفت غزرتلها نحكي " وحضر ساك فاها دبشك .. بش نبقاو وين ماشين "
" باهي "
حليت الباب و هبطت اللوطة .. خرجت طلعت في الكرهبة و شديت ثنية البيرو بش نكمل الي ف يدي و نرجعلها فيسع .. ما لازمنيش نخلاها وحدها اكثر .. بش نحاول انساها شنوة عاشت نهار المحكمة و الكلام الي سمعتوو .. بش نعمل المستحيل و نخلاها تبرا و ترتاح .. قلبي ما ينجمش يخليها و يسلم فاها .. خاصة بعد ما ارتاح و هدات دقاتو .. بعد ماشاف نظرت الكره الي ف عينيها ليحيى .. كلمة وحدة منها كانت كافية بش تخلي الروح و النفس يرجعولي ..
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
