حلقة 86
#ليث_يحكي
شهر تعدا علياا و انا متخبي .. لبلاصة الي حطني فيها مازن خنقتني .. بقيت مداري ف الظلام وقتلي انا مش عامل شي .. فكرة انو نبقى متخبي منهم زادت ف تعبي
.. من صغري تعلمت اني نواجه كل شي .. عمري ما خفت من حد ولا حاولت نتخبا .. و لا حتى نهرب ..
المرة هاذي رضيت و تنازلت على خاطر كلام مازن .. كيف قلي فماش طريقة اخرى بش نكشفوهم كان هاذي
.. تحملت كل شي المهم نعرف شنوة صاير و شكونهم .. لحكاية هاذي صارت اهم هدف عندي .. مستحيل نرجع خطوة وحدة لتالي .. بش نبقى وراهم لاخر نفس عندي
.. نعرف انو لحكاية تنجم تكون أكبر مني .. اما انا مستعد نموت و نهايتي تكون وراهاا .. المهم ناخذ بحق عايلتي .. و ننتقم من الي خلاوني نتيتم و نعيش لعذاب و الذل و انا صغير ..
هزيت راسي على صوت الباب كيف تحل .. شفتو دخل و قدملي .. تقعدت وبقيت نغزرلو كيف ضحكلي يحكي
" عسلامة سي ليث .. مازلت متقلق ؟"
" يسلمك .. مازن نحب نخرج .. معادش انجم نزيد دقيقة هكاا و يدي مكتفة"
رجع ضحك يحكي " ههه باهي مالا حضر روحك ليوم عندنا خرجة "
وقفت من بلاصتي فيسع وغزرتلو نحكي " بلحق ؟"
هزلي براسو باهي يحكي " اي .. نجمنا نحددو مكانهم .. و المداهمة بش تم ليوم .. كان لازم نصبرو بش نشدوهم متلبسين "
" باهي .. هاني بش نحضر روحي ونخلط عليك مالا "
ريتو كيف حط كيس عالفرش و غزرلي يحكي " البس السترة هاذي .. يمشيش نترزاو فيك "
ضحكت نحكي " والله الموت ارحملي من الكهف لي سكنتني فيه سيادتك "
ضحك و ضربني على كتفي يحكي " هاني نستنى فيك "
ريتو كيف خرج .. تحركت فيسع لبست السترة وكملت لبست دبشي فوقهاا وخرجت .. لقيتو هو زادة محضر روحو وواقف يستنى ..
قربتلو نحكي " تو شباش يصير ؟"
" هاني اتصلت مع المكتب الوطني لمراقبة للحدود .. احنا زودناهم بالمعلومات .. وبش نكونو حاضرين في العملية "
هزيتلو براسي باهي وقدمت معاه لكرهبتو .. طلعنا و شدينا الثنية للميناء .. ثنية كاملة و احنا نحكيو كيفاه بش نتصرفو .. شوي وقت ووصلنا .. بقينا واقفين بعاد شوي عالميناء نغزرو ..
تلفت لمازن نحكي " شنوة الشرطة مزال بش يجيو ؟؟"
" العملية تحدد وقتها على الساعة تسعة .. كان يوصلو تو مش بش نجمو نشدوهم متلبسين "
هزيتلو براسي باهي وبقيت نراقب ف الوضع .. شوي وقت ووصل ميساج لمازن ريتو كيف حل عينيه ..
عقدت بحواجبي نحكي " شفما مازن ؟؟"
" الجماعة وصللهم خبر لي فما مداهمة وبش يحاولو يهربو قبل ما نخلطو "
" شنوة الحل تو "
مد يديه جبد السلاح متاعو و غزرلي يحكي " يظهرلي بش نحلوهاا وحدنا .. لازمناا ندخلو قبل ما يهربو انا وياك ورجال لي معايا "
" و انا حاضر "
هبطنا من الكرهبة و بقيناا نقدمو بالشوي .. حليت عينيا كيف ريت نفس الراجل لي قابل جيهان واقف مع واحد .. وقفت مازن نحكي " استنى .. اهوكا نفس الراجل لي ريتو مع جيهان "
ضيق عينيه يغزرلو و رجع غزرلي يحكي " متاكد ؟؟"
" اي متأكد "
تقدم هو بالشوي وانا وراه .. عطى اشارة لرجالو بيديه بش يمشو من الجهة الاخرى .. غزرلي و اشرلي بعينيه عالبلاصة الي بش ناقف فيهاا .. هزيتلو براسي باهي و مشيت تخبيت ورا الصنادق لي غادي .. ومازن من الجهة الاخرى .. بقيت نمشي بالشوي حتى وصلت لراجل الي واقف يحرس ف السفينة .. وقفت وراه ودورت بيديا على رقبتو خنقتو .. ضربني براسو على خشمي بالقوي حتى وخرت لتالي .. دارلي و هز السلاح في وجهي .. كان بش يقوص اما وقف على سلاح مازن كيف تحط على راسو من تالي يحكي " نزل سلاحك ولا بش نفرغو في راسك "
طيش سلاحو وبقا يغزرلي .. شدو مازن دورلو يديه وبقى يكركر فيه لوراء الصنادق .. بش ميكشفوناش .. خلطت علاهم و شديتو معاه .. بقينا نحققو معاه ..
مازن :" الي معاك وين ؟؟"
هو :" انا وحدي هنااا "
رجع حط السلاح في فمو " مانعاودش سؤالي .. السفن لي هنا .. اي وحدة فيهم بش تم فيها العملية ؟؟"
هو :" ب ... باهي .. السفينة ****** "
قص علينا صوت الراجل الي ينادي " صقر وينك ياخي السفينة بش تتحرك ؟"
حليت عينيا كيف سمعتو صااح " سيف اهرب الشرطة هوني "
غزرلو مازن مصدوم وضربو على راسو .. هزيت روحي وقمت نجري بش نلحق على صاحبو قبل ما يهرب .. ريتو كيف جبد سلاحو وقوص ف لهواء .. وقتهاا فهمت لي هو هكاكا عطاهمم اشارة بش يهربو .. لحظتهاا صوت التقويص قوى بين رجالو و رجال مازن .. في لحظة الدنيااا تقلبت و الاصوات علات ..
دورت راسي على صوت محرك السفينة الي خدم و بش تتحرك .. ريت الراجل لي كان طالع ويقوص فرد وقت .. جريت ناحيتو و قوصت عليه .. اول ماوصلت لسلم الي طلع منو و طلعت وراه .. عرضني واحد منهم و هز يديه بش يضربني .. من غير تفكير قوصت عليه ف ساقو وتخبيت .. بقيت نمشي بالشوي و ندور بعينيا عالبلاصة .. وقفت و كتمت النفس متاعي كيف ريت الرجال خرجو يجريو ناحية صاحبهم الي قوصتوو .. اول ما بقاو لاهين بيه .. غفلتلهم ومشيت لغرفة القيادة .. عرضني واحد كان عاطيني بظهرو .. قربتلو و ضربتو على راسو من تالي ضربة خلاتو يدوخ بالوقت .. حليت الباب ودخلت .. غزرلي القبطان و تنطر من بلاصتو ..
وجهت السلاح ليه نحكي " وقف السفينة تو "
هزلي براسو باهي وطفا المحركات .. اول ما نفذ الامر .. سكرت باب غرفة القيادة و تلفت ليه جبدتو وضربتو نحكي " وتو دورك بش ترقد انت زادة "
هزيت تلفوني واتصلت بمازن نحكي " صايي السفينة مش بش تمشي اما نحتاج دعم هنا .. السفينة مليانة برجال "
" باهي هاني جايك "
بقيت نواقف و نخمم ف شنوة لازمني نعمل بش نخرج من هنا .. حتى سمعت صوت الشرطة كيف لحقت .. قربت لزجاج بقيت نشوف فيهم كيفاه بقاو هاربين في كل مكان .. و الطايح كان اكثر من الواقف .. اول ما ريت مازن ورجالو لحقو .. خرجت من الغرفة وبقيت نمشي بالشوي .. عرضني مازن يحكي " حاول متقتلهمش بش نحققو معاهم "
هزيتلو براسي باهي و كل واحد منا مشا في اتجاه .. غزرت لواحد من الرجال لي ريتهم مع جيهان زادة كيف حب يهرب .. بقيت نجري خلطت عليه جبدتو بالقوي .. ضربني بساقيه حتى نطرلي السلاح من بدي .. هزيت يدي وضربتو ببونية .. شد وجهو ووخر لتالي .. اول ما طبست بش نهز السلاح .. غمضت عينيا على الضربة الي جاتني في كتفي من تالي بحديدة .. من قوة الضربة حسيت ساقيا رخت بياا .. طلعت راسي نغزرلو .. لقيتو غارق في دمو بعد ما قوصو مازن
هزيت روحي وضحكت بالسيف نحكي " مش قلت متقتلهمش " عضيت على شفايفي من لوجيعة الي قوات كيف ضحكت و تكلمت ...
مازن :" قوصتو عند رجلو مش بش يموت الساقط "
تكيت بظهري عالباب و بقيت نغزر لرجال الشرطة كيف شدوهم الكل .. حليت عينيا على وسعهم كيف ريت رجال ونسا وولاد صغاار خارجين من المخزن الي تحت السفينة .. مفهمتش شيعملو هنا .. يبانو ناس على قد حالهم .. غزرت لمازن مستغرب نحكي " شنوة القضية هاذي ؟ و هاذم شيعملو هنااا ؟؟"
مازن :" بش تعرف بعد ما نكملو معاهم التحقيق "
هزيتلو براسي باهي .. هزيت روحي وقدمت بش ننزل
.. حسيت روحي تشليت بسبب لوجيعة الي عمال تزيد ..
شدني مازن من مرفقي يحكي " ليث انت مليح ؟"
" مش بش نجم ننزل هكا كتفي تهلك "
هزلي براسو باهي يحكي " اهوكا سيارة الاسعاف تو نجيبلك نقالة "
هزيتلو براسي باهي وبقيت نستنا .. شوي وقت و الممرضين طلعو ف السفينة .. قربولي زوز و عاونوني بش وقفت و هبطت .. طلعت عالنقالة بش نمشي مع الاسعاف .. شوي وقت ووصلنا للمستشفى .. كمل كشف علياا الطبيب و ضمدلي الجرح .. هزيت راسي على صوت الباب كيف تحل لقيتو مازن .. قدم ناحيتي يحكي " الحمدالله على سلامتك "
" عيشك مازن .. قلي شنوة بش يصير تو ؟"
مازن :" تو بش يتم التحقيق معاهم و نعرفو شكون الراس لكبيرة و بعد نحكيلك شنوة بش يصير "
" مازن نحب نكون على علم بكل شي .. اول ما يوفى التحقيق نحب نعرف الجماعة هاذم شنوة و شكون "
هزلي براسو باهي يحكي " تهنى ليث .. و تو نخليك ترتاح .. انشالله لباس "
" عيشك "
اول ما خرج مازن من حذاياا .. حاولت نتقعد شوي اما مانجمتش من قوة لوجيعة .. وجيعتي و حالتي هاذي خلاوني نتفكرهااا .. نتفكر لهوتها بيا وقت عملت الحادث .. وقتها اول مرة نحس في حياتي الي فما حد خايف عليا بلحق .. ويتوجع لوجيعتي غمضت عينيا و سرحت فيهااا .. صوتها و تصويرتهااا هدو عليااا .. حسيتهم خففو علياا لوجيعة ..
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
