حلقة 97
#قمر _تحكي
اسبوعين تعداو علياا و انا ف دار خالتي.. اسبوعين مانعرف عليه شي.. من آخر مرة تعاركناا فيهاا مارجعش لهناا و لا سأل علياا.. حتى كيف نطلبو يعلق ف وجهي و ساعات نلقاه مسكر.. و فوق هذاا الكل عديتهم اسبوعين و انا خايفة عليه مانجمتش ننسى تهديد ايهم ليناا.. حسيت روحي تضغطت من كل الجهات و ماعرفتش كيفاه نتصرف..
كبست عالتاليفون ف يدي وحطيت رقمو.. عضيت على شفايفي وبقيت نخمم كان نزيد نكلمو و لا.. تلفتت على صوت خطوات خالتي وراياا تحكي
رفيقة :" قمر شتعمل بنتي ف الكوجينة ؟"
حطيت التاليفون ف جيبي وغزرتلهاا كيف قعدت عالطاولة نحكي
انا :" شي خالتي هاني كنت نعاون ف خالتي فاطمة حبيت نلهي روحي شوي "
رفيقة :" ايجا حذاياا تراه "
هزيتلها براسي باهي و قدمت حذاهاا..قعدت عالكرسي بجنبهاا نحكي
انا :" نعم خالتي "
رفيقة :" ماكلمكش لتو ؟"
دمعتي رجعت نزلت بالوقت على سؤالهاا.. بلعت ريقي وهزيتلها براسي لا نحكي
انا :" لا.. حتى كيف طلبتو انا علق علياا.. خالتي نعرف اني غلطت اما انا عملت هكااا خاطرني خفت والله "
شدتني من يدي و غزرتلي تحكي
رفيقة :" نعرف وراس بنتي نعرف.. خليه يبرد و تو يكلمك.. الي عرفو مش شوي "
انا :" نعرف مش شوي.. اما تعداو اسبوعين يا خالتي.. ماخممش حتى انو يسأل علياا كيما حاسة روحي متحيرة عليه مش عارفة وينو و لا شنوة احوالو "
رفيقة :" لباس عليه ماتخافش.. كلمو مصطفى "
انا :" باهي "
رفيقة :" اياا امسح دموعك.. يزي من لبكاا.. شوف وجهك كيفاه صار وبرا حط تاكل حاجة تبقاش هكاا "
انا :" باهي خالتي "
قامت من حذاياا تحكي
رفيقة :" هياا حذانا لصالة "
انا :" لا خليني نكمل نساعد خالتي فاطمة "
هزتلي براسها باهي ومسحت على شعري وعطاتني بظهرها وخرجت.. قمت من بلاصتي وقربت لرخامة بقيت نلهي ف روحي بش ننسى الي صار.. خاطر بلحق حسيت روحي تعبت الفترة هاذي.. من جهة نادمة على عملتي ياريتني سمعت كلام خالتي و حكيتلو.. اصلا ياريتني حتى انا ماعرفتش لحقيقة هاذي.. و من جهة اخرى خايفة لا يبقى بعيد علياا هكاا و مايسامحنيش وقتهاا كيفاه بش نتحمل هذا الكل.. تلفتت وراياا على صوت خالتي فاطمة كيف دخلت للكوجينة.. قدمت شوي وغزرتلي تحكي
فاطمة :" قمر بنتي.. سي مصطفى يناديلك "
انا :" باهي خالتي "
خذيت نفس طويل وخرجت.. قدمت ناحية الصالة وين ريتو قاعد و بجنبو خالتي.. قدمت بخطواتي ناحيتو وقفت قدامو نحكي
انا :" تفضل عمي.. ناديتلي "
اشرلي بيدو يحكي
مصطفى:" اي اقعد بنتي "
هزيتلو براسي باهي من غير حتى كلمة وقعدت بجنبو.. غزرلي ودور بعينيه علياا يحكي
مصطفى :" شبيها حالتك هكاا ؟ رفيقة قتلي الي انت مقلقة شبيك ؟"
انا :" لا شي عمي.. جيست تاعبة شوي و ماعينيش "
مصطفى :" كان بخصوص ليث.. خلي لحكاية علياا انا و انا تو نحكي معاه.. اما قبلهاا لازمني نحكي معاك انت "
شبكت يديا في بعضهم وهزيتلو براسي باهي من غير حتى كلمة.. غزرتلو كيف رجع يحكي
مصطفى :" قمر انت غلطت كيف خبيت عليه حكاية كيف هاذي.. قداه من مرة نبهك يا قمر ماتعملش شي من راسك "
انا :" نعرف والله اني غلطت.. اما صدقني عمي انا تصرفت هكاا من خوفي.. خفت كان ليث ك يعرف يمشي يقتلو "
مصطفى :" ولو.. مكانش لازمك تتصرف هكاا و تخبي عليه.. عالاقل راك جيت وحكيت معاياا انا وقتهاا راني قتلك شتعمل و انا نعرف كيفاه نتصرف مع ليث "
ريتو كيف غزر لخالتي قحرلهاا يحكي
مصطفى :" حتى خالتك ماتفرق عليك شي تبارك الله.. ف عوض ماتجي وتحكي لياا انا مشات تحكيلك انت "
رجع غزرلي يحكي
مصطفى :" الزوز ماتعلموتش من اغلاطكم.. ماحبيتوش تفهمو انو مفماش سر يبقى مخبي.. كل شي مصيرو يتكشف ووقتها العواقب تكون وخيمة اكثر "
انا :" والله نعرف عمي.. نعرف اني غلطت و مانقصدش.. غير هكاا خالتي خاطيهاا هي قتلي احكي و ماتخبيش اما انا بقيت مصرة نخبي عليه.. خاطرني خفت.. ليث ك عرف حقيقة مقتل اختو وقتهاا قال الي هو بش يقتلك محمود.. خفت لا يزيد يعرف لحقيقة هاذي وقتهاا ينفذ الي ف بالو.. على هذاكا خبيت عليه "
مصطفى :" الي صار صار تو.. المهم نحبك توعدني ماتعاودش صنعتك.. ايجاا و احكي لياا انا و انا تو نتصرف قمر "
انا :" باهي عمي والله نوعدك اخر مرة "
مصطفى:" انشالله.. هاني بش نكلم ليث و نحكي معاه تو "
ريتو كيف جبد التاليفون يطلب فيه.. شوي وقت وهز عليه يحكي
مصطفى :" ليث وينك ؟... ايجاا لدار حاجتي بيك اكيد... باهي نستناك "
علق عليه وغزرلي يحكي
مصطفى :" هاو ف طريقو لهناا "
هزيتلو براسي باهي من غير حتى كلمة.. كبست بيداياا على ركايبي من التوتر الي حسيتو.. غير كرشي الي وجعتني من الخوف كيفاه بش نراه و شنوة بش يحكي.. حسيت روحي توترت قبل حتى مانراه.. هزيت يدي ومروحت شوي على وجهي الي حسيتو عرق وفور.. قلبي خض بالقاوي اول ماسمعتو وصل ويحكي مع خالتي فاطمة.. لحظتهاا تمنيت كان نقوم ونمشي نعنقو و نملي صدري بريحتو.. نعوض وحش ايامات و بعدهاا راضية انو يحاسبني و يعاتبني.. المهم مارجعش يخليني.. فقت من سرحتي على صوت عمي يحكي
مصطفى :" رفيقة انت اطلع.. نحب نحكي معاهم وحدي "
رفيقة :" باهي "
ريتها كيف قامت وخرجت من الصالة.. هكاكا وريتو كيف دخل وراهاا.. غزر لعمي وماغزرليش جملا كاني مش موجودة.. غمضت عينيا بالقوي نمنع ف دمعتي عالنزول.. حسيت روحي تخنقت من معاملتو هاذي لياا.. سمعتو يحكي
ليث :" تفضل عمي "
مصطفى :" اقعد عندي مانحكي معاك "
ليث :" باهي "
ريتو كيف قعد مقابلنا يحكي
ليث :" نسمع فيك عمي "
مصطفى :" وينك الفترة هاذي الكل.. ماتجي كان مانكلمك انا "
ليث :" تشديت ف الخدمة "
مصطفى :" اي تشديت ف الخدمة ماتنجمش تهز تاليفون و تسأل على مراتك تطمن عليهاا "
ليث :" هاي حذاكم مطمن عليهاا "
هزيت راسي على كلمتو وبقيت نغزرلو كيفاه يحكي ببرود كاني مش هاممتو.. رجعت نزلت راسي وهربت عينيا من عليه.. سمعت عمي يحكي
مصطفى :" ليث.. نعرف الي قمر غلطت اما مايجيش تتصرف هكاا.. احكيو و حلو مشاكلكم لوقتاه بش تخليها هكاا "
ليث :" ماعندي مانحكي.. غلطتها كبيرة و انا مانجمش نحسب كانو ماصار شي "
مصطفى :" نعرف انو غلطتها كبيرة.. اما هي خبات عليك من خوفهاا "
تهزيت وتحطيت على صوتو كيف علا يحكي
ليث :" عميي هذاا مش مبرر.. مش من حقهاا تخبي علياا حكاية كيف هاذي "
مصطفى:" نعرففف و عندك حقق.. و هاي نادمة على عملتهاا هاذي.. تو نحبك تهز مرتك تروح بيها وحلو مشاكلكم في داركم ميجيش تخليها وراك هكا.. بلا متسأل عليها "
نفخ بالقاوي غزرلو يحكي
ليث :" باهي"
ريت عمي كيف غزرلي يحكي
مصطفى :" بنتي قوم حضر روحك "
هزيتلو براسي باهي من غير حتى كلمة.. عضيت على شفايفي وغزرت لليث الي كان كابس على وجهو ويرعش ف ركبتو.. للحظة حسيت روحي خفت منو بلحق و ماحبيتش نروح معاه.. قمت من بلاصتي و خرجت.. رديت النفس بالشوي وطلعت لبيتي.. بقيت نحضر ف روحي ونخمم كيفاه بش نرجع معاه لدار و شنوة بش يصير عالظاهر مش حاملني و لا حامل وجودي.. غير عمي غصب عليه.. عمري لا تخيلت بش نوصل هكاا مع ليث يعني مهما صار بيناتناا عمرو لا خلاني هكاا و رفض وجودي معاه.. و لا حتى غزرلي بنظرة قبيلا.. نظرة كانت باردة و ما تعبر على شي.. هزيت ساكي ونزلت.. ريتو كيف كان عاطيني بظهرو وواقف ناحية الباب.. غزرت لعمي كيف قرب مني يحكي
مصطفى :" برا بنتي ارجع لدارك.. و كان فما اي حاجة كلمني.. و ماتنساش داري ديما مفتوحتلك "
عنقتو نحكي
انا :" عيشك عمي ربي يخليك ليااا و يطولي ف عمرك "
بعد علياا شوي يحكي
مصطفى:" عيش بنتي.. اياا برا "
هزيتلو براسي باهي وقدمت ناحية الباب.. ريتو كيف خرج و بقى واقف قدام الكرهبة يستنى فياا.. كبست على ساكي وخلطت عليه طلعنا مع بعضناا.. خدم الكرهبة وشدينا الثنية.. طريق كامل وهو مدور وجهو علياا ماغزرليش جملا و حتى كلمني.. تلفتت شوي غزرتلو حبيت نحكي معاه اما تراجعت كيف ريت وجهو كيفاه مكبوس وعروق رقبتو ظاهرة من الغش.. اصلا ماعرفتش شنوة بش نقول وهو ف الحالة هاذي..
مسافة الطريق ووصلنا قدام الدار.. راكا الكرهبة على جنب ونزلنا.. سبقني لدار حل لباب ودخل.. قدمت بخطوات رزينة معاه ودخلت.. سكرت الباب وراياا وين ريتو دخل لصالة سبقني.. حطيت ساكي على جنب وخذيت نفس خلطت عليه.. ريتو كيف كان عالفوتاي متكي براسو لتالي ومغمض عينيه.. فركت يديا في بعضهم وبلعت ريقي بالسيف نحكي
انا :" ل.. ليث ؟"
حل عينيه دوب غزرلي ورجع غمضهم يحكي
ليث :" شتحب "
انا :" ليث.. نحب نحكي معاك فلي صار "
حل عينيه و غزرلي.. هز بحاجبو يحكي
ليث :" شعندك تقول ..شنوة المبرر تاعك المرة هلذي قلي تراه "
قدمت بخطواتي شوي ناحيتو نحكي
انا :" ليث اناا عملت هكاكا خاطر خفت عليك والله "
قلبي ضرب اول ما ريتو غمض عينيه بالقاوي وووقف .. هز بيديه ف وجهي يحكي
ليث :" يزي ما تقول خفت عليك.. انا شنوة نبهت على ****.. قتلك مانحبك تخبي عليااا شي.. سكرت فمك قبل كيف خالي هددك و عديتهالك.. اما المرة هاااذي مستحيييل كان نعديهااالك "
قربتلو شوي نحكي
انا :" ليث سامحني امان راني والله لا قصدت.. ماكنتش بش نتحمل كان تصيرلك حاجة "
ليث :" مالا قررت تسكت و تخليني كيف ***** بيناتكم انت و رفيقة و مانعرف شي.. انت باي حق تتصرف هكااا.. باي حق تخبي عليااا و انت ترااا شنوة صار فيااا على أختي "
انا :" على هذاكااا انا سكتت خاطرني ريتك شصار فيك على اختك.. ريتك كيفاه توجعت عليها... وخفت..خفت كان وقت تعرف بلي قتل**هم تمشي لخالك وتقت**لو "
ليث :" كلامك هذااا ما يبررش عملتك.. يااخي شنوة ترا فيا..مجنون ولا بلا عقل خالي انا نعرف كيفاش نحاسبو.. انا كان عيني نقت**لو كان قت**لتو من اول مرة حرقلي فيها دار بابا..اما وقتها اخترتك انت.. متعرفش تجي تحكيلي.. متعرفش تهدديني.. انا راهو على خاطرك سلمت ف برشة حاجات..بلوقت لي كنت تنجم تخبرني.. اخترت تسكت.. خاطرك خايفة لا نقت**لو مش هكا.. نحبك تفهم..وقت قررت نعرس ونعمل عيلة نعرف لي عليا ولي بش نخليه ورايا..نعرف كيفاش نتحمل مسؤوليتي ومسؤوليتككك..اما انت لي ماكش فاهمة واجباتك ماكش فاهمة وقتاه لازم تحكي وتحل فمك..تعملي قيمة وتحترمني كيف ما انا محترمك.. راك عاملتني رجل كرسي .... "
قصيت عليه كيف نزلو دموعي على كلامو نحكي
انا :"ليث و.. والله عملت هكاك بش نحميك "
علا ف صوتو أكثر يحكي
ليث:"ماااا تحمينييش.. يااخي طرطور حتى نتخبى وراك..منيش راجل في عينك..المرة لي تعدات وصلت بيك لل***** يحيى على خاطر لكلمة هاذي وخليتني كيف الحمار وسطكم..الرجال يهددو في مرتي وانا لا خبر..وماازلت ما تعلمتش من غلطتك..يزي راهو فديت من مخك هاذا لي ميخدمش كل مرة وين موصلتنا "
انا :" "ل... يث"
هز بيديه ف وجهي يحكي
ليث :" اسككتت.. تعرف لي انا معادش عندي ثقة فيك.. كل مرة خايف لا تمشي من ورايا لبلاصة وتحط روحك في مصيبة جديدة ولا نعرف شي جديد مخبيتو علياااا..صحة راسك ملقيتلهاش حل.. عاملتتك بالمليح ما نفع..عيط وصحت ما نفع..انت وصلتني للحالة هاذي في كل مرة تكذب عليا وتعمل شي من ورايا..من قبل سامحتك برشا اما لمرة هاذي مش بش تتعدالك بالساهل تفهم فيااا.. بش تعرف مليح كيفاه تخبي عليا منا وجاي تو مدامك روحت معاياا تطلع لبيتك مانحبش نرا خليقتك"
شهقت بالقوي وين دموعي نزلو يجريو اكثر على خدي نحكي
انا :" ليث حرام عليك والله "
غزرلي على جنب يحكي
ليث :" تستحق هكاا و اكثر.. الي عملتو بش نحاسبك عليه..انا نعرف كيفاش نكسرلك راسك هذااا "
انا :" انا ... "
حل عينيه فيا يحكي
ليث :" كلمتييين اطلع لبيتك "
كمل كلامو و عطاني بظهرو.. وخرت بخطواتي لتالي وطلعت نجري للبيت.. ترميت عالفرش وطرشقت بالبكا لين حسيت روحي بش تطلع مني.. مهما يكون ماتوقعتش بش يتصرف معاياا هكاا.. للحظة حسيت روحي ندمت اني رجعت معاه.. خلاني نحس انو مجبور علياا.. نعرف اني غلطت اما علاش ماحبش يفهم اسبابي.. كيما ماتصورتتش مازال شايل مني حكايات قديمة لتو.. لقيتو يلوم فياا على حاجات انا عملتهم و ندمت علاهم..فرد وقت بقيت نخمم ف كلامو.. نعرف الي عندو حق ف برشة حاجات انا ديما نغلط و نتصرف من راسي اما من وراء خوفي..كيفاه يفسر تصرفاتي على اني مش حاسبتو..كلامو و غزرتو ليا قبيلا حسيتهم ذبحوني فكرة اني بش نخسر ثقة ليث حسيتها خنقتني..كيما انو ماخلانيش نبرر موقفي سكتني من غير لا يسمعني.. عمري لا تخيلت لحكاية بش توصل هكاا معاه.. اما رغم هكا جزء مني عاذرو خصوصا بعد كل شي هو عاشو و سمعو نعرف الي تعدا بيه صعيب و انا حاسة بيه.. كيما ممكن بلحق لحق الوقت الي لازمني نغير تصرفاتي خاطر هو عندو حق انا ديما نفكر بعاطفتي مش بعقلي.. المهم عندي تو مانخسرش ليث..خاطر الفكرة وحدها نحسها تخنقني.. مانجمش نعيش معاه و انا نشوف نظرة اللوم منو مرة اخرى.. حشيت راسي ف المخدة مع دموعي الي ماحبوش يكفو و بقيت نخمم ف شنوة مازال بش يصير ....
#قمر_تحكي
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
