#ليس_ذنبي ❤️‍🔥

ليس ذنبي الحلقة السادسة

#يحيى_يحكي

طلعت في التاكسي و مشيت و خليت قلبي معاها قلبي يبكي دم عالحالة الي خليتها فيها .. نعرف روحي تسوقط معاها اما حاجة اقوى مني .. مانجمش نكمل معاها مانحمش ندواها وانا بيدي مجروح .. ضعفها يضعفني .. نعرف خليتها بش تواجه الناس وحدها و هي صغيرة و ماتنجمش اما انا مش منجم نواجه روحي بالي صار و نواجها هي .. دمعتها تحرقلي قلبي كان لازم نهرب كان لازم نبعد .. نعرف الي زدت في وجيعتها وعمرها  لا بش تسامحني اما هكا خير لازمها تنساني نعرف روحي اناني و ماعندي حتى عذر اما لازمني ننساها .. حطيت راسي و رجعت بذاكرتي لليلة الي قبلها
فلاش باك
دخلت لدارنا .. الدار الي بنيناها مع بعضنا الي حلمنا شنية بش نعملو فيها .. كل تركينة فيها ريحة قمر .. كل حاجة في الدار هي ختارتها كل حاجة فيها لمستها .. كسرت كل شي بقيت نكسر و نصيح .. كل حاجة نكسرها تجرحني في قلبي قاعد نكسر في حلمت قمر الي حلمتها معايا .. اما مش احلامنا الكل يتحققو .. صحت صحت لين تهديت رميت روحي عالفوتاي و انا نخمم شنية بش نعمل .. خليتها مرمية في السبيطار حالتها تبكي الحجر اما مانيش منجم نرجع منجمش نشوفها في الحالة هذيكا .. صحيح وعدتها انو مهما يصير ما نبعدش عليها .. اما الي صار تو حاجة حتى الجبال متنجمش تهزها .. حاسس بحمل ثقيل فوق مني خانقني .. فكرة انو زوز مسوها زوز استفعلو فيها هدتني خلتني ننقم علاهم و علاها و على روحي .. حاسس روحي بين نارين بين اني نبقة معاها و نواجه بيها الناس الكل و بين اني نهرب و نبعد بالك ننسي و نرتاح بالك تنجم ناري تطفى .. في كل مرة نخمم فيها نلقى روحي في ثنية مسكرة لا نجم نبقى لا نجم نهرب .. فقت من سرحتي على صوت التاليفون خايف لا نشوف شكون و تطلع قمر .. ماعنديش جراءة اني نكلمها و نسمع صوتها .. خايف لا نضعف قدام صوتها .. ما رتحت كان كيف ريت امي هي الي تطلب
" وي أمي "
" وينك ياخي .. ايجا لدار عنا ما نحكيو "
كلمتها بنطرة " ما عنا فاش نحكيو اخطاوني "
" قتلك ايجا انا و بوك عنا ما نحكيو معاك . ياخي مخبي وجهك علينا فاش جين احنا .. راني ماشبعتش بيك ملي روحن و انت لاهي في حكاية قمر"
نفخت نحكي " باهي امي باهي هاني جاي "
هزيت روحي بسيف و وقفت منحبش نمشي مانحب نرا حد عارفهم بش يحكيو في موضوع قمر و انا مش مستعد لا نحكي ولا نسمع رايهم في الحكاية .. وصلت لدارنا نلقى امي و بابا و خواتي ملمومين باين هاللمة ما وراهاش خير
" تفضلوا هاني جيت "
تلفتولي الكل يغزرولي باهتين في الحالة الي انا فيها .. أصلا انا باهت في روحي لوين وصلت
تلفت لبابا الي يتكلم بغش " مرحبا سي الشباب وينك ياخي ملى روحت وانت ماتلهيتش بينا كانو ماعندكش عيلة "
ضحكت باستهزاء نحكي " تحكي بجدك بابا .. هههه كنت نحوس ماو اموري عال العال و بالي مرتاح كنت نحوس و شايخ .. ياخي تتمنيكو عليا ما تعرفوش شصار ؟؟ "
قامت امي تحكي " الي صار صار .. انت لازم تنسى و تمشي وين كنت ابعد من هنا و عيش حياتك "
تصدمت من كلام امي " تحكي بجدك ؟؟ قاعدة تطلب مني نبعد على قمر "
صاحت في وجهي تحكي " اما قمر اما قمر ؟؟؟؟ قمر سايي مستقبلها ضاع مانيش بش نخليك تضيع مستقبلك معاها .. مش انا نكبر و نقري و بعد تأخذ وحدة ... "
قصيت عليها نصيح " رد بالك تكمل كلامك رد بالك .. قمر اشرف طفلة في الدنيا و انت تعرف الشي هذا "
تنهد بابا و تكلم " نعرفو وراس ولدي نعرفو .. اما بعد الي صار ثنيتكم انت و قمر تفرقت .. ترضي روحك تأخذ وحدة اغتصبوها"
غمضت عينيا على كلام بابا .. مالقيت مانقول .. كلامو وجعلي قلبي هزيت عينيا و دموع محسورة فيها تكلمت بصوت مخنوق " نحبها يا بابا نحبها حاجة اقوى مني .. حرت يا بابا .. ولدك تهد في ليلة ونهار خذاو شرف ولدك يا بابا "
طلعلي راسي بيديه و مسحلي دموعي يحكي " ولدي راجل على هذاكا لازم تصون شرفك و تبعد علاها انت ما تستاهلش طفلة هكاكا و قمر ربي يسترها بعيد عليك .. خمم فينا عيش ولدي خمم في وجهنا و وجهك قدام العبد .. امشي ارجع وين كنت .. وجيعتك مع الوقت تو تخف و تنسى .. امشي على خاطري و خاطر امك عيش ولدي "
جات امي بجنبنا تحكي " عيش ولدي اسمع كلام بوك .. ما تنساس عنا خواتك الزوز صبايا .. بش تدخللنا طفلة هكاكا لدار الناس شبش تقول .. كيفاه ترضاها فينا و في خواتك "
غزرتلهم و هزيت براسي ب باهي و خرجت نجري نبكي نبكي على الوضع الي تحطيت فيه على القرار الي خذيتو الي بش يدمر قمر .. حسيت بشكون عنقني من تالي تلفت نلقاها يسر أختي عنقتها أكثر و طرشقت بالبكا كاني كنت نستنى في شكون يخفف عليا و يطبطب عليا
" أبكي يحيى ابكي .. اللطف على خويا"
" شنية بش نعمل يا يسر كيفاه بش نسلم فيها و هي هكاكا .. راي مازالت صغيرة راي مازالت ما تعرف شي .. كيفاه بش تواجه البلاد الكل "
" يحيى انا ضد كلام امي و بابا .. كان تحبها هزها و اهربو من هنا و ابداو من جديد .. كونو الدواء لبعضكم "
" منجمش يا يسر مانجمش راني بين نارين .. منجمش نغزرلها .. غزرتها قتعدة تقتل فيا كل ما نراها نتفكر الي صار و نتخيل شعملو فيها .. لازمني نهرب لازمني نبعد "
" بش تهرب و هي خممت فيها ؟؟ هروبك بش يكمل علاها يا يحيى "
" نعرف .. نعرف .. ياربي راني بش نهبل عاوني ياربي "
رجعت للواقع كيف التاكسي وقفت في المحطة ساي جاء وقت هروبي .. لازم نمشي و مانتلفتش ورايا لازم نعفس على قلبي .. طلعت في التران و انا عارف اني مستحيل نرجع لهنا و نعاود نغزر في عين قمر و نعرف الي قمر مستحيل تسامحني مها يصير .