#قمر_تحكي
رجعت حليت عينيا عالكرهبة كيف وقفت.. هزيت راسي شوي وغزرت لليث كيف مسح على شعري يحكي
ليث:"هيا اهبط...وصلنا"
انا :" باهي "
نزلت ونزل هو زادة..حسيتو تاعب علخر..لحظتها نسيت وجايعي وتحيرت عليه اكثر..وجهو كان مايتفسرش.. غزرت للكرهبة الي وقفت وراناا وين ريت مازن و البنات هبطو.. قرب ناحيتناا يحكي
مازن :" خليناا ندخلو فيسع"
هزيتلو براسي باهي من غير حتى كلمة ودخلناا وين عرضتنا الممرضة..تلفتت لليث كيف كبس علياا يحكي
ليث :" برا معاها خليها تشوفك "
عديت بعينيا عليه نحكي
انا :" لا ادخل انت قبل..انا مليحة "
ليث :" قمر اسمع لكلام خلي الطبيب يشوفك قبل.. هكا نطمن عليك "
هزيتلو براسي باهي من غير حتى كلمة..ماحبيتش اناقشو ياسر وهو ف الحالة هاذي كيما حسيت روحي معادش فياا حتى انا ساقياا تهدو معادش هازيني وبدني فشل اكثر..غير وجيعة راسي من الضربة الي بقات تستر علياا..ورغم هكا ماحبيتش نظهر قدام ليث خاطر حالتو كانت أسوء من حالتي..الي شافو و عاشو هو مايجي قدام الي عشتو انا.. قدمنا مع الممرضة ومازلت شادة ف ليث حسيت معدتي تقلبت وقلقتني..
اول ما وصلنا دخلت للغرفة وهو بقا يستنا برا.. قعدت عالفرش..قرب مني الطبيب الي دخل و بقى يفحص فياا.. مانعرفش قداه تعدا وقت واحنا هكاا اول ماكمل بقى يعقملي ف الجرح الي عندي.. ضميت على شفايفي اول ماحسيتو حرقني شوي..اول ما كمل ريتو كيف خرج..استويت روبتي وخرجت سمعت ليث كيف يحكي معاه..غزرلي ورجع غزر لطبيب يحكي
ليث :" شحالهاا دكتور ؟ هي مليحة مفما شي خطير ؟"
الدكتور :" لا جروحها سطحية ماتخافش.. جيست لازمها ترتاح شوي كهو"
ريتو كيف تبسم يحكي
ليث :" باهي عيشك دكتور "
اول ما بعد الطبيب.. قربلي اكثر وحط يديه على خدي يحكي
ليث :" الحمدالله تو اطمنت.. خفت لا تكون الضربة الي ف راسك قوية "
عديت بعينيا عليه نحكي
انا :" ماتخافش ياروحي.. قتلك انا مليحة ماحبيتش تصدقني "
تلفتنا الزوز على صوت مازن كيف قدم ناحيتنا يحكي
مازن :" الحمدالله على سلامتك مدام"
انا :" عيشك الله يسلمك "
غزر لليث يحكي
مازن:" ليث مدام اطمنت عليها والطبيب قال مفماش خطر.. لازم تمشي تقدم افادتهاا تو "
حسيت قلبي خض على كلامو منحب نمشي لحتى بلاصة تو.. ووحدي غزرت لليث نترجا فيه..ريتو كيف قدملو شوي يحكي
ليث :" وين عندها تمشي مازن..ماكش ترا فيها مضروبة ؟!"
مازن :" اي نعرف..جيست تقدم افادتها وترجع هنا "
حل عينيه فيه يحكي
ليث :" ماهيش بش تمشي مازن.. اهيكا تاعبة غير هكا منيش بش نخليها تمشي وحدها تو.. تنجم تصبر شوي على افادتها "
هزلو براسو باهي يحكي
مازن :" باهي اهدا ماتغشش روحك.. خلاها ليوم ترتاح و نطمنو عليك انت زادة اما غدوة لازمها تجي ليث"
تنهد يحكي
ليث :" باهي "
حسيت روحي نجمت ناخذ نفس كيف قلو هكاك قربت من ليث نحكي
انا :" ليث هياا امان خلي الطبيب يشوفك انت.. يزيك ماوقفت شوف حالتك "
هزلي براسو باهي يحكي
ليث :" باهي "
خرجنا مع بعضنا بعد مازن الي سبقنا بش يشوف الطبيب..اول ماوصلنا دخل ليث لغرفة الإشاعات بش يطمنو كان عندو كسور ولالا وانا بقيت واقفة لبرا نستنى فيه.. ترميت عالكرسي نستنى فيه وقتاه يخرج ونطمن عليه انا زادة..تكيت بظهري لتالي وين تعدا قدامي شريط الي صار لكل خلال النهايين هاذم.. من خوفي على ليث.. لحال لبنات لمساكن شنوة صار فيهم..بقيت نحمد ف ربي انو خلصنا كلنا من يدين الوحوش هذوكم.. فركت يديا ف بعضهم وهزيت راسي مع مازن الي كان مقابلني نحكي
انا :" مسيو مازن ميسالش نسالك ؟"
غزرلي وقدملي شوي يحكي
مازن :" اي اكيد "
انا :"البنات الي جاو معانا ملاح مش هكا ؟"
مازن :" ملاح ماتخافش..قابلت الطبيب وطمني علاهم جيست نفسيتهم تاعبة شوي..اما بالوقت تو يرتاحو "
انا :" فهمتك "
قمت من بلاصتي نحكي
انا :" بش نمشي نجيب دبوزة ماء ونرجع "
هزلي براسو باهي من غير حتى كلمة..عطيتو بظهري وقدمت شوي وين آلة البيع الذاتي.. خذيت دبوزة ماء وكنت راجعة وين ليث.. هكاكا ولمحت البيت الي كانت مقابلة وين شفت الطفلة نفسهاا مقابلتني.. قدمت بخطواتي ناحيتها ووقفت قدام لباب نغزرلها كيفاه متسطحة عالفرش تبكي بالسكات وغزرتها ضايعة لدرجة انها ماحستش بياا.. ف لحظة هاذي بقيت نخمم علاها شنوة بش يصير فيهاا بعد ماتخرج من هناا.. ياريتها هي زادة تلقى الي ياقف معاها كيفي انا.. ياريتها تلقى وحدة كيف خالتي تساعدها وتاقف معاهاا.. ياريتها تلقى كيف ليث يدافع علاهاا ويرجعلهاا حقهاا.. عديت بعينيا عليهاا حبيت نقدم نشوفهاا ونحكي معاهاا اما حاجة اقوى مني منعتني خاطرني بلحق مش عارفة كيفاه بش نخفف علاها.. رديت علاها الباب ووخرت بخطواتي لتالي فيسع بش نشوف ليث.. اول ماوصلت ريت مازن واقف يحكي مع الطبيب.. قربتلهم فيسع نحكي
انا :" ليث وينو ؟"
غزرلي الطبيب يحكي
الدكتور:"نقلناه لبيتو..خذا حقنة مسكنة للالم وهو راقد "
انا :" يعني هو مليح؟ مفماش حاجة خطيرة ؟"
هزلي براسو لا يحكي
الدكتور :" مفما شي خطير اما كيما قلت لمسيو مازن كتفو ليسار كان مخلوع وقمنا ب العلاج اللازم.. على هذاكا لازمو الراحة اللازمة و مايتحركش برشة و لا يهز حاجة ثقيلة "
حليت عينيا على وسعهم على كلامو. حسيت قلبي وجعني كيفاه كان متحمل لوجيعة متاع كتفو..شديت دمعتي بالسيف نحكي
انا:" باهي تهنى دكتور.. اما.. ميسالش نشوفو تو امان ؟"
الدكتور:" اي تنجم اما كيما قتلك هو راقد تو مش بش يقوم قبل ساعتين"
انا :"اي اي ميسالش المهم نكون معاه "
الدكتور:" باهي أدخلو "
عديت بعينيا علاهم نحكي
انا :" عيشك "
خليتهم واقفين وقربت فيسع للبيت.. حليت الباب ودخلت..تبسمت مع دمعتي الي هربت مني من غير مانشعر اول ماريتو متسطح قدامي.. سكرت الباب وراياا وقدمتلو نجري..قعدت بجنبو على طرف السرير وعديت بعينيا على وجهو الي كان مضروب وجبيتو الي كان بضمادة..شديتو من يديه..كبست علاهاا وهزيتهاا.. بستو من كفهاا نحكي
انا :" اللطف عليك ياروحي.. الحمدالله انك بخير.. ربي يخليك ليا ومايحرمنيش منك "
عديت بعينيا عليه ومسحت دمعتي الي رجعت نزلت.. قمت من حذاه وقربت الكرسي ناحية فرشو وقعدت بجنبو..رجعت شديتو من يديه وتكيت براسي حذاه.. سايي عينيا ثقلت معادش انجم نشد روحي اكثر.. غمضت عينيا وغفيت شوي..
رجعت حليت عينيا على يديه الي تحركت بين يديا وصوتو.. هزيت راسي وغزرتلو كيفاه كان مغمض عينيه ويهتري.. قمت فيسع وحطيت يدي على جبينو قلبي ضرب بقوة اول ماحسيت بحرارته كانت مرتفعة غير لعرق الي كان يعوم فيه.. خذيت منديل من فوق الطاولة و بقيت نمسحلو ف جبينو ورقبتو..رجعتها عالطاولة وبعدت عليه فيسع بش انادي لطبيب اما وقفت على صوتو الذابل يحكي
ليث:" ق.. قمر "
تلفتتلو فيسع ورجعت عندو.. حطيت يدي على شعرو وطبست عليه نحكي
انا :" انا هنا ياروحي "
حل عينيه فيسع وغزرلي مفجوع.. كان يلهث وصوت النفس متاعو مسموع و مقطع يحكي
ليث :" ق..قمرر "
مسحت على شعرو نحكي
انا :" هاني حذاك ياروحي.. ماتتحركش رد بالك "
عدا بعينيه عليا ودوب غمضهم شوي.. بلع ريقو وخذا نفس.. رجع حل عينيه وغزرلي يحكي
ليث: "حمد الله..ريت كابوس فكرت صرلك شي"
انا :" ماتخافش انا لباس..غير انت ارتاح قوم "
ليث :" انا لباس "
انا :" خليني نمشي اناديلك الطبيب يشوفك "
هزلي براسو لا يحكي
ليث :" لا "
انا :" ليث حرارتك مرتفعة لازم يشوفك الطبيب ويفحصك "
عدا بلسانو على شفايفو وحاول يهز روحو شوي بحكي
ليث :" قمر انا مليح.. اقعد بجنبي "
قعدت حذاه وحطيت يدي على كتفو نحكي
انا :" ماتتحركش ليث خليك متسطح..تو كتفك يرجع يوجعك.. انا هاني بجنبك ماتخافش مانيش ماشية لحتى بلاصة "
ليث :" انت مليحة ؟ وجهك تاعب برشة وعينيك ذابلين من قلة النوم "
تبسمت نحكي
انا :" انا لباس.. ماتخممش علياا ياروحي "
عدا بعينيه عليا يحكي
ليث :" تعرف لي خفت لا تصيرلك حاجة من وراياا وقتها ماكنتش بش نسامح روحي "
شديتو من يديه وكبست عليه نحكي
انا :" حتى انا ليث..خفت عليك..خفت لا يحرموني منك و يبعدوني عليك..خفت لا يضروك..نهارين تعداو علياا كاني ف جهنم.. انت مافرقتش خيالي ثانية وحدة "
تنهد بالشوي يحكي
ليث :" سامحني خاطر خليتك تعيش الكابوس هذاكا "
انا :" انت الي سامحني ليث.. كل مرة و انت متعذب من وراياا.. كل مرة وحاجة صايرتلك من جرتي.. سامحني على هذا لكل "
ضم على شفايفو وحاول يتحرك.. قمت فيسع وساعدتو تكا بظهرو لتالي وغزرلي يحكي
ليث :" انت ماعندك حتى دخل ف الي صار..يزي ماتلوم روحك قمرتي"
رجعت قعدت بجنبو نحكي
انا :" كل شي وفى مش هكاا ؟ بش نرجعو لحياتنا تو و نبعدو على هذا لكل "
هزلي براسو اي يحكي
ليث :" اي وفات..كابوس محمود وفى بموتو وبش نعوضك على هذا لكل..نحبك تنسى تو كل شي صار و ماتخمم ف شي كان ف حياتنا "
تبسمت نحكي
انا :" وجودك بجنبي يطمني ليث.. انا من غيرك نموت والله "
ليث:" اللطف على حبي.. هياا برا للفوتاي ارتاح متبقتش على لكرسي "
قمت من حذاه ومسحت دموعي نحكي
انا :"مرتاحة هكا والله "
ليث :" قتلك برا ارقد..انا لباس "
تبمست وهزيتلو براسي باهي نحكي
انا :" باهي.."
قربت استويتلو لمخدة وبستو من خدو نحكي
انا :" تصبح بخير "
تبسم يحكي
ليث :" و انت بخير "
عطيتو بظهري وقدمت للفوتاي..تكيت بظهري لتالي وغمضت عينيا ورجعت غفيت..
رجعت حليت عينيا على ضو الشمس لي ضرب فيا..هزيت روحي شوي وغزرتلو كيفاه كان مازال راقد مش حاسس ب شي.. قمت من بلاصتي وقربتلو حطيت يدي على جبينو لقيت حرارتو عادية وقتهاا وين اطمنت شوي..غطيتو مليح ودخلت لسال دوبان.. غسلت حالتي وريقلت اموري ورجعت للبيت وين ريت الطبيب دخل.. قدمتلو نحكي
انا :" صباح الخير دكتور "
الدكتور :" صباح الخير.. جيت بش نتفقد مسيو ليث "
انا :" اي تفضل "
ريت كيفاه قدملو وقتها ليث حل عينيه وبقى يحكي مع الطبيب..بقيت واقفة على جنب نغزرلو كيفاه يفحص ف يدو وكيفاه يحرك فيها بالشوي..قربت ناحيتهم شوي كيف سمعتو يحكي
ليث :" دكتور انجم نخرج ليوم مش هكا ؟"
قدمت شوي قبل مايحكي الطبيب وتكلمت
انا :" دكتور لبارح حرارتو ارتفعت شوي عادي ؟"
الدكتور :" اي عادي.. الحرارة بسبب الجروح العميقة لي في بدنو ومتعقمتش في الوقت لي تضرب فيه..اما بش نزيدو نطمنو لازمك تبقى الليلة زادة مسيو ليث و غدوة تروح.. كيما لازمك الراحة التامة.. ممنوع سياقة و ممنوع ترفع حاجات ثقيلة و لا تتحرك برشة..غير هكا بش تولي تعمل حصص تدليك بش يفيدوك "
ريتو كيف نفخ بالشوي ووجهو تقلب يحكي
ليث :" باهي "
انا :" عيشك دكتور "
الدكتور :" ماعملت شي "
اول ماكمل مع ليث عطانا بظهرو وخرج.. غزرت لليث كيف بقى يحاول يهز روحو شوي.. قربتلو نحكي
انا :"بالشوي.. استنى خليني نساعدك.. ماكنتش تسمع ف الطبيب شكان يحكي ليث "
هزلي براسو اي وغزرلي على جنب يحكي
ليث :" اي سمعتو بش نزيد ليلة اخرى هناا "
انا :" اي ميسالش ليث تحمل شوي..ليلة وتتعدا المهم نطمنو عليك "
ساعدتو بش تقعد وحطيت لمخدة وراه.. غزرلي يحكي
ليث :" انا مليح قمر..قعدتي هناا زايدة تعرفني نكره السبيطارات "
قعدت بجنبو نحكي
انا :" ليث ياخي صغير؟ ليلة وتتعدا غير هكا هاني انا معاك "
تبسم يحكي
ليث :" ك هكاا نولي نتحمل القعدة هنا ميسالش "
قمت من بلاصتي وتبسمت نحكي
انا :" انت تعودت ب الدلال ظاهرلي.. خليني نمشي نجيبلك فطورك "
ليث :" باهي قمرتي "
تلفتت نغزر للباب كيف تحل وين ريت خالتي وعمي دخلو.. تبسمت نحكي
انا :"صباح الخير.. تفضلوو "
ريت خالتي كيف قربتلي وعنقتني..بعدت علياا شوي وعديت بعيناها عليا انا وليث تحكي
رفيقة :"ليث ولدي شحالكم ؟ شصارلكم راني متت من خوفي عليكم "
حطيت يدي على زندها نحكي
انا :" احنا لباس خالتي تهنى "
غزرت لعمي الي كان واقف بجنبنا ويغزر لليث يحكي
مصطفى:" الحمدالله على سلامتك ولدي.. شحالك ؟"
ليث :" الحمدالله عمي..بخير "
غزرلي وحط يديه على شعري مسح علياا يحكي
مصطفى:" و انت بنتي شحالك؟ شقاللكم الطبيب؟؟"
انا :" احنا لباس والله.. الطبيب طمني قبيلا..فحصو وقال حالتو مستقرة الحمدلله جيست كتفو تخلع و لازمو يزيد اللية هناا بش نطمنو اكثر "
ريت خالتي كيف قعدت بجنبو على طرف السرير تحكي
رفيقة :"اللطف على ولدي.. الحمدالله ربي نجاكم و الباقي ساهل و يتعداا.. والله اول ماكلمناا حمزة خرجنا نجريو.. صار فياا بعدكم...دخلت فينا غولة "
ليث :" عيشك رفيقة..ماتخافش انا لباس تو "
هزت راسهاا معاياا بش تحكي..ريتها كيف حلت عيناها فيا تحكي
رفيقة :" شبيه راسك؟ شقلك الطبيب ؟"
انا :" شي خالتي ضربة صغيرة ماتشغلش بالك "
ريت عمي كيف قعد عالفوتاي حذا ليث يحكي
مصطفى:" برا بنتي مع خالتك ارتاح شوي و انا تو نبقى هنا الليلة "
هزيتلو براسي لا نحكي
انا :" لا عمي والله مرتاحة انا..ميسالش تو نبقى انا انت ماتخليتش خالتي وحدها "
مصطفى:" باهي على راحتك.. اما كان تحب ترتاح كلمني و انا نجيك "
تبسمت نحكي
انا :"نعرف عمي ربي يخليك لياا "
عديت بعينيا عليهن نحكي
انا :" انتوما خليكم انا نمشي نجيب فطور ليث ونرجع "
ليث :" قمر قتلك ماعينيش تو..تعرفني ماكلة السبيطارات نكرههاا "
رفيقة :"ولدي لازمك تاكل بش تهز روحك..تحمل ليوم ميسالش..وغدوة كيف تروح انا نطيب لولدي الي يحب عليه "
تبسم يحكي
ليث:" عيشك رفيقة "
مصطفى:" خليني نمشي معاك نشوف الطبيب "
هزيتلو براسي باهي من غير حتى كلمة وغزرت لخالتي نحكي
انا :" خالتي انت ابقى حذاه امان.. ماتخليهوش يتحرك تو يتوجع "
رفيقة :" باهي "
ريتو كيف غزرلي وتبسم..خرجت مع عمي فيسع هكاكا وشفت مرا وراجل قاعدين عالكرسي بجنب الغرفة الي كانت فيها الطفلة يبكيو.. باين انهم امها وبوهاا.. حسيت قلبي وجعني علاهم خاطرني نعرف مليح حرقتهم.. عشتهاا قبل كيف شفت امي تبكي مقهورة علياا وماتت بحسرتها.. لحظتهاا بلحق حبيت نمشي ونشوفها الطفلة حبيت نحكي معاهاا قبل مانخرج ونشوف حالتهاا.. تلفتت لعمي نحكي
انا :" عمي ميسالش انت تسبقني تشوف الطبيب.. انا عندي مانعمل "
عقد بحواجبو مستغرب يحكي
مصطفى:" وين ماشية ؟"
انا :" بش نشوف طفلة جات معاناا هنا نحب نطمن علاها قبل ماتخرج "
مصطفى:"باهي بنتي..رد بالك تخرج ولا تمشي لبلاصة "
هزيتلو براسي باهي نحكي
انا :" اي تهنى علياا"
ريتو كيف مشى لحظتهاا قربت للبيت وحليت الباب وين ريتهاا متقعدة عالفرش وحاضنة روحها تبكي.. هزت راسها معاياا وغزرتلي بنظرة قسمتلي قلبي ورجعت طبست راسهاا.. فركت يديا ف بعضهم من التوتر الي حسيتو من الشي الي تفكرتو وقربتلهاا.. قعدت عالفرش بجنبها وبقيت نغزرلهاا.. للحظة حسيت روحي مالقيت مانقول خاطر مفماش كلمات تنجم تعبر عالشي الي نحس فيه و لا كلمات ينجمو يخففو علاها.. تنهدت بالشوي نحكي
انا :" عسلامة.. ميسالش نحكيو شوي ؟"
هزت راسهاا معاياا غزرتلي من غير حتى كلمة..كان دموعها نازلين على خدها.. عديت بعينيا عليهاا نحكي
انا :" انا نعرف بلقدا انت ف شنوة قاعدة تحس تو.. نعرف مليح وجيعتك.. خاطرني انا عشت الي عشتو انت "
غمضت بالقوي و رجعت حليتهم حسيت روحي تخنقت كيف رجعت تفكرت الليلة هاكي من جديد.. جمعت طرف القوة إلي بقاتلي ورجعت نحكي
انا:"عام لتالي.. انا زادة تعرضت لعملية اغتصاب.. ف ليلة كنت ماشية بش نقابل خطيبي... وقتها عرضوني زوز "
عديت بيديا على رقبتي وخذيت نفس بالسيف..حسيت دموعي الي تجمعو ف عينيا حرقوني.. نحكي
انا :"شدوني بالسيف..هزوني لبلاصة خالية واغتصبوني.. وبعدها خطيبي سلم فيااا.. قال الي صار غلطتي اناا.. عطاني بظهرو ومشى وبقيت وحدي "
غمضت عينيا على دمعتي الي نزلت مني ورجعت حليتهم نحكي
انا :"اما بعد انا حبيت ناخذ حقي.. حبيت نرجع قيمتي وقدري قدام الناس..قدام الجيران... مشيت شكيت بيهم اما.. اما هوما هددوني وخوفوني ..جبروني نعرس ب واحد منهم.. ح..حتي امي وقتهاا قتلي عرس بيه.. قتلي ميسالش عرس واستر على روحك.. خير من كلام الناس وشنوة بش يقولو عليك وكيفاه بش نعملو وحدناا..وانا قبلت..اما..اما بعد عرفت انو كلامها غالط..خاطر كان خممت بلحق ف كلام الناس راني ماخذيتش حقي منهم تو.. راني بقيت عايشة ف جهنم معاه..صحيح لي تعديت بيه صعيب برشا وتعبت بش نجمت نتجاوز الي صار.. اما اهم شي اني ماخضعتلهمش..ووثقت ف الناس الي حبو يساعدوني "
مسحت دموعي وغزرتلهاا وين ريتهاا تغزرلي تبكي بالسكات.. حطيت يدي على خدهاا نحكي
انا :" وانت زادة لازمك تعمل هكاكا..مهما بش تشوف تو ومهما يش تعيش من ظروف..لازمك تاقف لروحك وتتقوى زادة..حتى كان الكل وقفو ضدك حتى كان الكل سلمو فيك انت رد بالك تسلم ف حقك..وقتها ربي بش يحط ناس ف ثنيتك يساعدوك..صدقني "
ريتها كيف هزت روحها شوي وشهقت وين دموعها نزلو اكثر.. شفايفها كانو يرعشو وبدنها زادة..تحكي
هي :" انا خايفة.. حاسة روحي كرهت حياتي.. مانعرفش كيفاه..ب..بش نقاوم هذا الكل و..وانا وحدي.. تصويرتهم قدامي الزوز..خايفة نشوف روحي ف المراياا..مانيش حاملة بدني..عايفة روحي منهم ومن كلامهم و غزرتهم ليا.. ك..كيفاه بش نحط عيني ف عين بابا و ا امي "
منجمتش تحكي اكثر وطرشقت بالبكاء..قربتلهاا اكثر وشديتها من يداهاا نحكي
انا :" نعرف.. نعرف انك خايفة..الي تحس فيه انت انا حسيتو قبلك.. لتو كيف نتفكر الي عملوه فيا نكره روحي.. اما ريت كيف نتفكر زادة شنوة صار فيهم نبرد شوي..واحد مات بطريقة ماتتمنهاش لكافر.. وواحد لتو ف الحبس ومش بش يخرج سنين.. انت زادة لازمك تحاسبهم وتخلص حقك منهم وقتهاا ممكن ترتاح شوي "
بقات تغزرلي ساكتة عديت بيدي على شعرها نحكي
انا :" انت ماكش وحدك..انا معاك و..وراجلي زادة بش ياقف معاك..هو محامي..هو الي خذالي حقي منهم قبل.. وتوبش نخليه ياقف معاك انت زادة..بش نساعدوك احنا الزوز..نوعدك بهذا "
هي :" و..وكان دارنا ماحبوش..انا شنعمل وقتها ؟"
انا :" انت بش تشد صحيح.. خاطر هاذي حياتك..هذا مستقبلك انت..بش تخرج وراسك مرفوع بين الكل.. رد بالك توطي راسك و تذل روحك لأي انسان مهما كان "
هبطت راسها وبقات تبكي حسيت قلبي تقسم عليها نعرف مهما قلت منجمش نواسيها..غزرتلها نحكي
انا :" ارتاح شوي..وانا بعد نرجعلك ونحكيو شنوة بش تعمل.. مانحبك تخمم ف حتى شي.. كل شي بش يتصلح هذا وعد مني.. "
هزتلي براسها باهي من غير حتى كلمة وتسطحت.. قمت من حذاها غطيتهاا مليح ريتها كيف غمضت عيناها وباقي تبكي..تنهدت بالشوي وخرجت من حذاهاا..تلفتت على صوت بكاء امهاا ريتها كيف كانت تضرب على ساقيهاا..لحظتهاا تعدات قدامي تصويرة امي ف السبيطار وشنوة صار فيهاا..حسيت قلبي وجعني من الشي الي عاشتو هي زادة مني وكيفاه ماتت محروقة علياا..ماتت متحيرة من غير ماتراني خذيت حقي..مسحت دموعي ورجعت غزرتلهاا كيف كانت تبكي بحرقة وتحكي
هي:"وين بش نخبي وجهي.. وين بش نهرب بيهاا ياربي.. علاش تفضحناا هكاا علاااش "
قربتلهاا وقعدت بجنبهاا عالكرسي..غزرتلهاا وحطيت يدي على كتفهاا نحكي
انا :" خالتي ماتقولش هكا امان..الي صار لبنتك مش بيداها..هي ماعندها حتى ذنب بش تسمع منك كلام ك هذاا.. هي تو رجعت من الموت..تخيل كان جابولك جثتها..شنوة كنت بش نحس وقتها؟؟..احمد ربي انها عايشة ومعاك..كل شي يتعوض والله..أقف معاها انت تو ماتخليهاش وحدها..هي تاعبة وحاسة دنيا لكل ضدها متكونش انت زادة معاهم ماتقت••لهاش بكلامك هذا امان..خفف عليهاا انت.هي بحاجتك تو "
غزتلي وهزتلي براسها باهي من غير حتى كلمة ورجعت طبست راسهاا..تنهدت بالشوي وقمت من حذاها حسيت روحي معادش انجم نبقى اكثر معاهم..لقيت روحي رجعت ضعت ف الليلة هاكي و كل شي صار بعدها..رغم كل شي انا فيه تو مازلت نحس بنفس لوجيعة الي حسيتهاا قبل..بقيت نمسح ف دموعي الي ماحبوش يكفو وخذيت نفس طويل محاولة مني بش نهدي روحي..رجعت للبيت وين ليث وحليت الباب..مانعرفش كيفاه تأخرت هكاا حتى ماودعتش خالتي وعمي الي لقيتهم روحو..وخليت ليث وحدو بالحالة هاذي.. عضيت على شفايفي ودخلت سكرت الباب وراياا وقدمتلو..ريتو كيف حل عينيه وغزرلي يحكي
ليث :" وين كنت قمر ؟"
عديت بيديا على وجهي وقربتلو قعدت بجنبو على طرف السرير ونزلت راسي نحكي
انا :" ه..هاني جيت..سامحني بطيت عليك "
شدني من يدي يحكي
ليث :" اغزرلي تراه.. شبيك ؟"
غزرتلو وهزيتلو براسي لا نحكي
انا :" شي "
عقد بحواجبو وحل عينيه فيا يحكي
ليث :" ياخي كنت تبكي ؟ شبيك شفما ؟"
دمعتي نزلت بالوقت على سؤالو..ضميت على شفايفي وقربتلو شوي نحكي
انا :" ل..ليث ا انا كنت حذا الطفلة الي جات معانا.. حالتها تقطع القلب..ت..تعداو عليها..و..وضربوها.. قلبي وجعني علاهاا..هي صغيرة برشة مانعرفش كيفاه بش تتحمل الي صار فيها"
حط يدو على جنبي وجبدني عندو يحكي
ليث :" اشش يزي من لبكا ياروحي..انت علاش حتى تمشيلهاا.. شوف كيفاه تعبت "
انا :" حبيت نحكي معاها شوي ونخفف علاهاا..هي وحدهاا حتى امها قاعدة بعيدة علاهاا..سخفتني والله "
عديت بعينيا عليه ورجعت نحكي
انا :" ليث..انا..انا عملت شي بلا مانسالك"
عقد بحواجبو وهز راسو غزرلي يحكي
ليث:"شعملت؟ "
انا:"انا وعدتهاا انو احنا بش نساعدوهاا..قلتلها راجلي محامي وبش ياقف معاك..امان ليث عاونهاا هي خايفة برشة..وانا حاسة بيها امان..عونها "
دور بيديه وراء رقبتي وجبدني عندو مرة اخرى.. باسني من راسي وغزرلي يحكي
ليث :" اكيد بش نعاونهاا وناقف معاهاا..ماتخافش الي تحب عليه انت بش يصير..غير يزي من لبكاا "
انا :" بلحقق ليث.. يعني بش تستلم قضيتها..بش تعاونها مش هكا ؟؟"
هزلي براسو اي من غير حتى كلمة وقتها ضحكت وقرب بستو من خدو
نحكي:" عرفتك ماتقولش لا..ربي يخليك لياا "
تبسم يحكي
ليث :" ويخليك لياا انت زادة "
مسحت دموعي وقمت من حذاه نحكي
انا :" خليني نمشي نطمنها هي مالا..ونخبر امهاا انك بش تاخذ انت قضيتها.. بالك هكاكا يطمنو شوي ومايضغطوش علاهاا و مايخافوش اكثر "
هزلي براسو باهي يحكي
ليث :" باهي برا.. اما ماتبطاش "
انا :" دقيقتين ونرجع "
ليث:" باهي "
عطيتو بظهري وخرجت نجري ناحية بيتهاا.. استغربت كيف مالقيتش امها قاعدة عالكرسي..وقتها عرفتها سمعتني ودخلت عندهاا..قربت اكثر وحليت الباب تبسمت كيف ريتهاا بجنب بنتها ومعنقتهاا راقدة بين يداها..دقيت الباب واستئذنت دخلت نحكي
انا :" انجم ندخل ؟"
هي :" اي بنتي تفضل "
قربت شوي نحكي
انا :" شحالها توو؟"
تنهدت بالشوي تحكي
هي :" هكاكا..تاعبة شوي "
هزيتلها براسي باهي وقعدت بجنبهم عالسرير نحكي
انا :" خالتي..انا حكيت مع راجلي تو..هو محامي وهو قرر بش يشد قضية بنتك..نوعدك انو احنا بش نساعدوها ونخليوهاا تأخذ حقهاا وترجع لحياتهاا..هي بش ترجع مليحة كيف قبل ويمكن خير "
عدات بعيناها علياا وتبسمتلي تحكي
هي :" عيش بنتي..يعطيكم الصحة ويكثر خيركم "
انا :" ماعملت شي خالتي.. اهم شي انك انت زادة تاقف معاناا وماتخليهاش وحدها..هي بحاجتك انت اكثر منا احناا "
هزتلي براسها أي وكبست علاهاا تحكي
هي :" اي مانيش بش نخلي بنتي..مستحيل نخليهاا وحدهاا "
عديت بعينيا عليهاا كيفاه حاضنتهاا وهي راقدة بين يداهاا..لحظتهاا رجعت تفكرت امي...مسحت دمعتي الي نزلت مني نحكي
انا :" نخليكم تو..تو نرجع نطل عليهاا بعد كان تسمح "
هي :" اكيد بنتي"
عطيتهم بظهري وخرجت فيسع..خذيت نفس طويل ورجعت للبيت وين ليث..اول ماحليت الباب حسيت روحي جمدت ف بلاصتي.. وانا نشوف فيهاا كيفاه قريبتلو وتحكي معاه..كبست عالبواني وانا نسمع فيها تحكي
فريحة :" حيرتني عليك ليث..ايامات وانا نسأل فيهم عليك وحد ماحب يخبرني شنوة صارلك يقولولي مفماش خبر..كان ليوم بش رجعت للفيلا وقتلي خالتي فاطمة انك هناا..جيت نجري ساقياا أعلى من راسي حبيت نطمن عليك "
ريتو كيف تبسملهاا يحكي
ليث :" عيشك فريحة..تعبت روحك "
رسيت على سنيا بالقوي وسكرت الباب وراياا وقتهاا وين حسو بياا حذاهم..ريتهاا كيف تلفتتلي وتبسمت على جنب تحكي
فريحة :" اهلا قمر "
انا :" اهلا "
خليتها واقفة وقربت لليث بش هي تبعد من قدامو شوي وتخليه يتنفس..استويتلو لمخدة شوي نحكي
انا :" مرتاح هكاا ياروحي ؟ مستحق حاجة ؟؟"
عدا بعينيه عليا وتبسم يحكي
ليث :"لا مرتاح ماتخافش.. المهم قلي انت شعملت ؟ "
هزيتلو براسي اي نحكي
انا :" خبرتهم..وامها ياسر فرحت...عيشك ليث "
ليث :" ماعملت شي..المهم انت يزي من لبكاا "
انا :" باهي "
هزيت راسي وغزرتلها..ريتها كيف كانت واقفة وتغزرلنا ساكتة..حسيت روحي غزلت من صحة وجهها ورقعتهاا.. هزيت بحاجبي نحكي
انا :" عندك برشة هنا ؟"
فريحة:" لا من شوي جيت "
انا :" تعبت روحك "
رجعت شعرها لتالي وغزرت لليث ورجعت غزرتلي تحكي
فريحة :" لا مفماش تعب..المهم اطمنت انو لباس "
ضيقت عينيا فيهاا نحكي
انا :" يعطيك الصحة طول عمرك صاحبة واجب "
تلفتنا على صوت الباب كيف تحل وين شفت الطبيب دخل بش يفحص ليث..لحظتهاا غزرت لليث نحكي
انا :" انا هاني لبرا.. اول مايكمل الطبيب نرجعلك "
هزلي براسو باهي من غير حتى كلمة..تنهدت وغزرتلهاا كيفاه مازالت واقفة.. خليت الطبيب يقرب لليث وغزرتلها نحكي
انا :" خلينا نخرجو احنا "
غزرتلي على جنب ورجعت غزرت لليث تحكي
فريحة :" انشالله لباس ليث.. انا بش نمشي تو واكيد تو نرجع نطل عليك كيف تروح "
ليث :" يعطيك الصحة فريحة "
كبست عالبونية متاعي بالقوي وحليت الباب خرجت معاهاا..عقدت بحواجبي مستغربة كيف ريتهاا قعدت عالكرسي وماروحتش..هزيت بحاجبي نحكي
انا :" مش قلت بش تمشي ؟"
فريحة :" اي اما حبيت قبل نعرف الطبيب شنوة بش يقول "
عديت بعينيا عليهاا من غير حتى كلمة..بلحق كل مرة نزيد نتصدم اكثر ف وجهها وصحة رقعتهاا..مش فاهمة على اي اساس قاعدة وتحب تطمن..وخرت بخطواتي لتالي نحكي
انا :" نمشي نغسل وجهي ونرجع "
هزتلي براسها باهي من غير حتى كلمة..عطيتها بظهري ومشيت فيسع لسال دوبان الي كانت لبرا..حليت السبالة وغسلت حالتي.. حسيت روحي توترت من وجودها كل ماندور نلقاهاا قدامي..ورغم هكا ماحبيتش نظهر قدام ليث ماحبيتش نزيد نتعبو و لا نحيرو اكثر من وراء حكاية تافهة..غير اني مازلت بلحق نحس ف روحي مقلقة على حكاية الطفلة..بالي بقى مشغول فيهاا هي..خذيت المنديل ومسحت وجهي وخرجت.. ريتها كيف مازالت قاعدة عالكرسي وعيناها على باب الغرفة.. عديت بيديا على وجهي وقربت قعدت عالكرسي بجنبهاا ساكتة نستنى ف الطبيب يخرج.. ريتهاا كيف دارتلي بكلهاا تحكي
فريحة :" قمر ياخي شبيك ؟"
غزرتلها نحكي
انا :" شبيني ؟"
هزت بكتافها تحكي
فريحة :" مانعرفش.. قلي انت علاش تبكي و بكري ليث يسكت فيك.. ياخي تعاركتو ؟"
عقدت بحواجبي مستغربة نحكي
انا :" لااا علاش حتى نتعاركو "
فريحة :" مالا شصايرلك..عينيك لتو منفوخين من لبكاا..احكيلي كان فما حاجة مقلقتك "
فركت يديا ف بعضهم نحكي
انا :" فما طفلة صغيرة جات معاناا لهناا..تعرضت للاغتصاب..وهي خايفة برشة ونفسيتها تاعبة عاللخر.. على هذاكا انا كنت نحكي معاها قلتلها ليث بش يعاونك وياقف معاك..حالتها توجع القلب مسكينة ومنجمتش نشد دموعي "
كبست على يدي بالقاوي وتنهدت بالقوي تحكي
فريحة :" اي طبيعي بش تحس هكا انت..خاترها مغتصبة كيفك..ماتنجم كان انت تحس بيهاا و ب شنوة قاعدة تعيش هي "
هزيت راسي معاها بالوقت وبقيت نغزرلها مصدومة.. حسيت سطل ماء بارد تكب فوقي من وراء كلامها لياا..عدات بعيناها علياا وضحكت تحكي
فريحة :" هههه اما رد بالك عاد..يمشيش ليث يحبها زادة "
حليت عينيا فيها نحكي
انا :" فاش تخرف انت ؟"
فريحة :" شي هههه جيست خاتر حكايتكم متشابهة "
قمت من بلاصتي وقحرتلها نحكي
انا :" تنجم تمشي.. ليث مليح تو نوصلو سلامك "
خليتهاا قاعدة ودخلت فيسع وين ليث..حسيت روحي تخنقت من طريقة كلامهاا و حديثها معاياا..كيفاه عندها الجرأة بش كل مرة تسمعني كلمة ك هكاا..خذيت نفس طويل حاولت نهدي روحي شوي ومانظهرش قدام ليث..شديت دمعتي بالسيف غير رعشة بدني الي حسيتهاا من الغش.. وقربت وين الطبيب نحكي
انا :" طمني دكتور..شحالو تو ؟"
الدكتور :" هو مليح ماتخافش "
تبسمت نحكي
انا :" الحمدالله "
اول ماخرج الطبيب قربت وين ليث وقعدت بجنبو ساكتة.. شدني من يدي يحكي
ليث :" وين كنت ؟"
انا :" ف التوالات..غسلت وجهي ورجعت "
عدا بعينيه عليا يحكي
ليث :" شبيك ؟ حاسك مقلقة ؟"
هزيتلو براسي لا نحكي
انا :" لا.. عادي "
كبس على يدي وجبدني عندو.. غزرتلو نحكي
انا :" بالشوي ليث تو كتفك يوجعك "
ليث :" انا لباس..اخطاك مني تو وقلي شبيك ؟"
طلعت حذاه اكثر ودوب حطيت راسي على صدرو.. غمضت عينيا نحكي
انا :" ليث انت بش تبقى تحبني ديما مش هكا؟"
حليت عينيا على شفايفو الي باستني من راسي يحكي
ليث :" بالطبيعة قمرتي.. للاخر لحظة ف حياتي بش نبقى نحبك "
هزيت راسي شوي وغزرتلو ف عينيه حط يديه على خدي ومسحلي دمعتي يحكي
ليث :" علاش الدموع تو ؟"
هزيت بكتافي نحكي
انا :" هكا كهو"
قرصني من خشمي وتبسم يحكي
ليث :" يا سيدي حياتي صارت ملكك تو..مش انا عايش بفضلك انت.. على هذاكا قرر انت انا شكون نحب و شنوة نحب زادة..يرضيك هكاا "
هزيت روحي شوي وقربتلو اكثر نحكي
انا :" كيفاش هكا ؟ "
هزلي براسو اي يحكي
ليث :" ساعة انا قلت مرتي كبرت وخلصتني من يداهم..كان مش السكينة الي حطيتها ف جيبي راني متت تو"
حطيت يدي على خدو نحكي
انا :" اللطف عليك ياروحي..انا كنت مستعدة نعمل اكثر من هكاكا "
ضيق عينيه فيا يحكي
ليث :" والله فاجاتني ..تو اطمنت شوي هاك صرت تعرف تخمم "
قحرتلو نحكي
انا :" يعني انا ماكنتش نعرف نخمم ؟"
ليث :" مكنتش تخمم جملة نظن "
انا:" اففف يزي ليث"
رجعت حطيت راسي على صدرو نحكي
انا :" ميسالش.. المهم تو انك رجعتلي و انت قول الي تحب "
عدا بعينيه عليا ودوب قربلي باسني من شفايفي.. غمضت عينيا بالقوي كيف حسيت شفايفي حرقوني من بلاصة الضربة كيف قوى في البوسة..بعدت عليه نحكي
انا :"آي..وجعتني ليث..بالشوي "
تبسم بخبث يحكي
ليث :" تحمل شوي حبي.. حتى انا هاني موجوع كيفك "
حطيت صبعي على شفايفي نحكي
انا :" اما حرقوني"
عدا بعينيه عليا وركزهم على شفايفي يحكي
ليث :" تو نخليك معادش تحس بيهم "
انا :" لاا...خليهم يحرقو احسن...بش توجعني هكاكا "
قرصني من كرشي يحكي
ليث :" اي اما وجيعة بنينة"
ضحك وغمزني قرب بش يرجع يبوسني..وقتها تخضيت كيف دق الباب قمت بسرعة وبعدت عليه..قمت من حذاه وين شفت مازن دخل ومعاه واحد آخر.. قرب منا يحكي
مازن :" الحمد لله على سلامتكم.. شحالك ليث "
ليث:" الحمدالله مازن عيشك.. تفضل اقعد "
عدا بعينيه علينا يحكي
مازن :" ليث كان تحس ف روحك مليح..خلينا ناخذو افادتكم "
هزلو براسو باهي يحكي
ليث :" اي مليح "
ريت ليث كيف استواء في قعدتو و مازن وصاحبو قعدو قدامنا.. بقاو يسالو فيناا شوي اسئلة بخصوص النهارات الي تعداو.. حسيت روحي رجعت تخنقت كيف استرجعت الي صار..اول ما كمل معاناا وقف يحكي
مازن :" انشالله لباس ليث.. و كيف تخرج وتسترجع صحتك لازمك تتعدي عليناا.. فما إجراءات اخرى لازمهم يصيرو "
ليث :" باهي مازن "
تبسملناا وخرجو الزوز..رجعت قعدت حذا ليث وغزرتلو نحكي
انا :" اياا ارتاح شوي..من الصباح وانت فايق مارقدتش "
ليث :" ماعنديش نوم..نستنى ف غدوة..تخنقت من السبيطار "
عديت بصوابعي على خدو نحكي
انا :" ما بقاش برشا ياروحي.. غدوة نرجعو لدارناا ونتهلى بيك أكثر "
تبسم يحكي
ليث :" والله مانقولش لا "
ضحكت نحكي
انا :" اياا ارقد "
هزلي براسو باهي وقمت من حذاه ساعدتو بش تسطح واستويتلو لمخدة..غطيتو وقعدت بجنيو عالفوتاي.. ريتو كيف غمض عينيه وغفى..تكيت بظهري لتالي انا زادة وغمضت عينيا..حتى انا حسيت روحي تخنقت من القعدة هناا و من كل شي صار ليوم..نستنى وقتاه نرجع للدار ونبدأ من جديد انا وليث ونخليو هذا الكل وراناا...
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
