#قمر_تحكي
حليت عينيا بالسيف ودورتهم عالبيت وين حسيت براسي ثقيل.. غير سخانة لي حستها طالعتلي وبدني لكل يوجع الشي لي خلاني مانجمش نتحرك.. تلفتت اول ماحسيت بيه قعد قدامي وحط يديه فوق يدي يحكي
ليث :" قمر..كيفاش تحس فروحك ؟"
على كلمتو حسيت قلبي خض بالقوي وين وقت استرجعت لي صار لكل..شديت دمعتي بالسيف وحطيت يدي على كرشي..للحظة منجمتش نسالو..
خفت نسأل ونلقى روحي رجعت نعيش نفس لوجيعة لي عشتها لمرة لي تعدات..غمضت عينيا وقت عدا بصوابعو على خدي يحكي
ليث:" قمر ياروحي تسمع فيا ؟"
حليت عينيا وحاولت نشد غصتي..غزرلتو نحكي
انا:" ا..انا رجعت خسرت صغيري مش هكا ؟"
حط يدو على خدي يحكي
ليث:" اهدا..متخافش..ماصار شي"
عديت بعينيا عليه وين حسيت بخنقة شدتني خاطر
حسيت روحي مصدقتوش..شديت ف يديو كبست عليه وحاولت نقوم نحكي
انا:" ليث أمان متكذبش عليا..قلي انا خسرت صغيري ؟"
حط يديه على كتفي ورجع سطحني يحكي
ليث:" قمرر..ارجع اتسطح ميجيش هكا..وراسك ماصار شي.. الصغير لباس ..اهدا ياروحي"
شهقت بالشوي على دموعي لي نزلو..حسيت روحي ارتحت كيف سمعت كلامو وريت تبسيمتو.. لي خلاني نصدق انو صغيري لباس..مسحلي دموعي يحكي
ليث:" يزي من لبكا..طبيبة قالت لازم ترتاح "
هزيتلو براسي باهي وحطيت يدي على كرشي.. غمضت عينيا وبقيت نحمد ف ربي اني مارجعتش عشت وجيعة قبل.. ماكنتش نعرف شنوة بش يصير فياا كان خسرت صغيري..عدا بيدو على شعري يحكي
ليث:"حمد الله على سلامتك "
بعدت عينيا من عليه ودورت وجهي نحكي
انا:" انت سبب فلي صار..انت بقيت تصيح عليا..قتتلك منحبش نمشي معاك "
ليث:" باهي ارتاح تو ميجيش تتعب "
هزيت راسي مع الباب لي تفتح وين ريت طبيبة دخلت.. قربتلي تحكي
طبيبة:" حمدالله على سلامتك مدام "
تبسمتلها بالسيف نحكي
انا:" الله يسلمك "
طبيبة:" مدام بش نسالك كم سؤال ونحبك تجاوبني عليهم "
هزيت لها براسي باهي وبقيت نجاوبها على حالتي..
عدات بعيناها علينا تحكي
طبيبة:" معنتها انت تعرف لي عندك خطر اجهاض.. لمفروض مكنتش تخلي روحك توصل لهنا..لازم تبعد على كلشي يقلقك..غير هكا انت مسيو كيفاش تعرف حالت مرتك وتوصلها تتغشش للدرجة هاذي..لفترة هاذي هي بسبب الهرمونات نفسيتها تصير متغيرة ومتقلقة..لازم تحاول تسايسها اكثر "
ريتو كيفاه دخل بعضو.. وهزلها براسو يحكي
ليث:" مفهوم"
تبسمت من غير مانشعر على وجهو وكيفاه قتلو هكا.. خليه يستهل بش المرة الجاية يعرف كيفاه يتصرف...تلفتلها تحكي
طبيبة:"وانت مدام..الفترة هاذي بش تكون حساسة وقت تخرج من هنا تو لازم تبعد على أي شي يقلقك..الحركة لا..ومتمشيش ب الكرهبة مسافات بعيدة..غير هكا لازم تتغذى مليح خاطر واضح لفترة لي تعدات مكنتش تاكل مليح..اي غلطة ممكن تشكل خطر على لجنين "
هزيت لها براسي باهي نحكي
انا:" باهي دكتورة فهمت"
رجعت قربتلي وقاستلي حرارتي تحكي
طبيبة:" غير هكا بسبت الحبالة مناعتك تضعف..هاك ماخذة برد حاول تدفا مليح وتلبس مليح..حرارتك مرتفعة..بش نحاولو نهبطوها ونكتبلك دوا لازمك تواظب عليه "
هزيتلها براسي باهي نحكي
انا:" وقتاه نجم نخرج ؟"
الطبيبة :" غدوة صباح الليلة بش تبقا عندنا بش نتاكدو لي كلشي لباس"
هزيت لها براسي باهي..ريتها كيف عطاتنا بظهرها وخرجت.. قحرتلو وقت غزرلي ودورت بوجهي عليه..سمعتو كيف تنهد وقعد على لكرسي بجنبي.. ماركزتش معاه ياسر وحطيت يدي على كرشي كاني مازلت نحب نتأكد انو هو مليح..مجرد اني نتخيل انو كان ممكن نرجع نفس لوجيعة لي عشتها وقت خسرت اول صغيرة نحس روحي نتخنق..اما بش نحاول نحافظ عليه ومعادش نقلق روحي كيف بكري..غمضت عينيا وحاولت نرقد ومنخمم فشي..بش منزيدش نتعصب..منعرفش كيفاش رقدت من غير منحس على شي..
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
