حلقة 26
#ليث_يحكي
اول ما تهنيت على قمر دخلت.. رجعت للكرهبة حبيت نمشي فيسع نكمل الخدمة الي تستنى فيا وبعد نرجع نطمان عليها مانجمش نخليها ورايا بعد تو.. حالتها ودموعها الي ريتهم في البلدية خلوني ناخذ عهد مع روحي بش مانسيبهاش مهما يصير و نكون معاها كل ما تحتاجني و مستحيل نخلاها تخاف مني و لا تندم عالخطوة هاذي .. رغم اني نعرف هي مجبورة عليا و انا حطيتها قدام الامر الواقع اما هذا ما يمنعنيش اني بش نكمل الي وعدتها بيه و اول ما نطمان عليها نخليها تمشي تشوف حياتها و نبعد علاها هكاكا نحس روحي رتحت ضميري و عملت اللازم معاها ..
اول ماطلعت في الكرهبة تفكرت انو بطاقتها بقات عندي .. كيف خرجت تجري بعد كتبان الصداق ما هزتهاش ونسيتها عندي.. هبطت فيسع بش نرجعهالها اول ماوصلت وين لباب وقفت على صوت بكا و صياح .. لحظتها صوت دقات قلبي سمعتهم من الخوف و مخي خمم في الف حكاية تنجم تكون صارت في قمر اول ما بعدت علاها .. بقيت ندق بالقوي ونعيطلهم هزيت راسي كيف حلتلي رفيقة الباب كانت وجهها احمر من البكا و تأشرلي بيداها على الداخل من غير ما تحكي دزيتها بيديا نصيح
" قمرررر ؟ قمر وينننك؟؟"
دخلت نجري لداخل تلفت نلقا قمر طايحة في القاعة على ركايبها وجهها كان اصفر وعيناها محلولة حتى الترميشة لا.. دورت عينيا وين كانت تغزر ريت امها الي طايحة و غارقة في دمها .. قربت منها نجري طبست علاها و حطيت يديا على رقبتها .. قلبي خظ بالقوي كيف ما حسيتش بنبضها هزيت راسي مع قمر لحظتها خفت علاها كان يصير الي في بالي لوين بش توصل حالتها؟ طلعت عينيا في رفيقة كيف قربت مني و حطت يداها فوق كتفي تحكي
" عايشة مش هكا .. حسنة عايشة ؟؟"
هزيتلها براسي اي بالسيف و جبدت التاليفون فيسع بش نكلم الإسعاف خذيت نفس نحكي
" الوو.. نسيبتي طاحت من الدروج و قاعدة تنزف .... نبضها ضعيف امان حاولو تلحقوها .. العنوان **** "
اول ما علقت التليفون تنطرت قدام قمر الي كانت مصدومة حتى دموعها ما نزلوش .. بقات تغزر لأمها من غير حتى كلمة و لا حركة .. طبست حذاها على ركايبي شديتها من اكتافها نحكي
" قمر .. قمررر فيق .. ماتخافش امك لباس هاني كلمت الأسعاف وجايين "
قمت شديتها و حاولت نقومها معايا بش نبعدها بقات تتطاوع فيا من غير حتى كلمة و لا ردت فعل .. قعدتها عالفوتاي و كنت راجع وين حسنة ورفيقة وقفت على صوتها تلفتلها نلقاها ترعش و تحكي " قتلي كيف ترجع تلقاني نستنا فيك .. قتلي بش نستناك علاه مشات .. علاه بش تخليني حتى هي .. علاه مكتوب عليا نبقى وحدي "
قربت منها قعدت بجنبها و حطيت يديا على يديها نحكي " ما تخافش ماهيش بش تخليك .. امك بش تقوم لباس و انت تو بش تستناها و هي بش ترجعلك.. امك ماهيش ماشية لحتى بلاصة .. حاول تشد روحك قمرر على خاطرهاا "
قص عليا صوت رفيقة تعيط " الاسعاف وصلت "
خرجت نجري وريتهم وين كانت حسنة اول ماخرجوها خرجنا وراهم غزرت لقمر الي تفادتنا و خرجت تجري تصيح
" نحب نمشي مع امي امااان ..." تلفتتلي تترجى فيا بعينيها " اماان ليث قلهم خليني نمشي معاها "
هزيتلها براسي باهي وقربتها للأسعاف نحكي
" هاذي بنتها خليها تمشي معا امهاا و احنا هانا وراكم بالكرهبة"
اول ما تهنيت عليهم مشاو طلعت في الكرهبة انا ورفيقة بقيت نسوق و مخي يدور في الف حكاية .. خسارة قمر المرة هاذي بش تكون كبيرة و حتى انا مش بمقدوري نقومها بعد الطيحة هاذي .. شنوة الي مازال يستنى فينا ؟؟ الف سؤال والف فكرة طرحتهم في بالي و مالقيتش حتى اجابة لاهم .. غمضت عينيا وحليتهم فسيع كبست عالفولون بيديا زوز كيف سمعت رفيقة تبكي و تحكي
" كيفاه طاحت ؟؟ شنوة الي صاار يا ربي ؟؟ "
لحظتها غطست اكثر وسط خوفي .. خفت لا الحكاية ماتكونش صدفة و انو الي صار يكون وراه شكون.. الفكرة وحدها رعبتني خلاتني نخاف على قمر و على حياتها الي بش تولي في خطر اكثر من قبل .. خفت لا مانجمش نحماها و ما نلحقش علاها حتى هي ..
وقفت اول ماوصلنا هبطنا نجريو وراها عرضنا الطبيب و دخلوها طول للبيت العمليات هزيت راسي مع قمر كيف كانت متكية عالحيط و تبكي قربت منها شديتها من مرفقها قعدتها بش ترتاح و مشيت خذيتلها ماء .. رجعتلهاا خليتها تشرب و قعدت حذاها غزرتلها نحكي
" بقدرة ربي لباس .. امك بش تخرج معانا من هنا و هي لباس.. خلي إيمانك بربي قوي "
قوات في بكاها و هزتلي براسها لا تحكي " امي زادة ماشية .. هي الصباح ودعتني.. " دورت راسها غزرتلي عينياها كانو حمر شاعلين حطت يداها فوق قلبها تحكي " حسيت بيها والله .. كيف بعدت علاها حسيت بقلبي وجعني .. حسيت بحاجة بش تصيير"
مديت يديا وشديتلها يداها حاوطتها بيديا الزوز وكبست علاها بالقوي نحكي
" امك مش ماشية بش تبقى معاك .. انت ادعيلها انها تقوم لباس وماتخافش.. شد روحك قمر "
قربت حذانا رفيقة مسحت دموعها تحكي " امك قوية و بش تقوم منها ما تخافش قمر وماتعملش هكا في روحك"
" خايفة لا نبقى وحدي مرة اخرى .. خايفة لا تخليني كيف ما خلاني بابا و خلاوني الناس الكل .. كيفاه بش نتحمل خسارة اخرى يا خالتي .. كان تصيرلها حاجة انا نموت "
قربتلها رفيقة و حطت يداها الزوز على راسها تمسح علاها تحكي
" ماكش وحدك احنا معاك و امك زادة بش ترجع معاك .. خليك قوية قمر "
غمضت عيناها و تكات راسها لتالي و دموعها باقي هابطين .. عديت بيديا على وجهي و قمت من بلاصتي غزرت لرفيقة و اشرتلها بعينيا بش تبعني .. بعدنا شوي على قمر .. قربت من رفيقة نحكي بالشوي " نبضها ضعييف وباين نزفت عاللخر .. صعيب كان تقوم منها "
تنهدت و غزرت لقمر من بعيد تحكي " نعرررف .. انا مخي مع قمر تو كيفاه بش تتحمل كان امها تموت ؟؟ الأمور عمالها تتعقد .. ماعادش لاقيا كلام نواسيها بيه و الله"
" ما نعرفش .. صدقني حتى انا مانعرفش كيفاه بش تتعدا هذا الكل .. حاسس روحي عاجز بش نعمل اي حاجة .. وفوق هذا.. خايف لا الحكاية ماتكونش مجرد حادث عادي "
هزت راسها معايا دورت عيناها على وجهي مستغربة تحكي
" شمعناها ؟؟ يعني ينجم فما شكون عمل هكااا ؟؟ فما شكون حب يقتلها ؟؟"
" ما نستغربش كان الحكاية يكون وراها شكون .. احساسي يقلي مستحيل تكون هاذي صدفة .. خايف لا يكونو هوما وراء العملة هاذي .. وقتها بالرسمي حياة قمر في خطر .. خايف لا الي صار تو يتعاود معاها وقتها مستحيل نسامح روحي "
"ياااربي.. كيفاه توصل بيهم لهنا؟؟ كيفاه يحاولو يقتلو..... "
قصيت علاها كيف حطيت صبعي على شفايفي نحكي " احكي بالشوي .. مالازمش قمر تشك في شي تو .. ماتخليهاش تخاف .. الي فيها مكفيها ماتخليش مخها يتشغل في حكاية اخرى.. خلينا نتأكدو قبل .. ومن هنا لوقتاها ما لازمش قمر تفارق عينيا و لا تبقى وحدها و انت زادة رفيقة رد بالك على روحك .."
دورت راسي مع قمر كيف قامت تجري ناحية الباب الي تحل و خروج الطبيب قدمت بخطواتي ناحيتها فيسع نسمع فيها تحكي بالغصة " ا .. امي لباس ؟؟ امي ويني ؟؟ هي حية؟ حية مش ه.. هكا؟؟"
هزلها براسها اي ودور بعينيه معانا يحكي
" حية .. اما ما نخبيش عليكم حالتها صعيبة .. الضربة الي في راسها قوية ياسر و زيد نزفت برشة .. كونو حاضرين للإحتمالات الكل.. انشالله لباس"
تلفتلها اول ما طاحت في القاعة كانت تبكي بالشهقة " لاااااا .. امي ما تخلينيش امااااان .. امي ماتخلينيش وحدييي .. "
هبطت حذاها و قربت منها دورت بيديا على ظهرها نحكي " يزي قمر .. خليك قوية و ادعيلها "
لحظتها قربت مني و حطت راسها على كتفي حسيت روحي جمدت لا عرفت نبعدها و لا نقربها اكثر .. دورت بيديا عليها اكثر وجبدتها ليا بقيت نمسح على ظهرها حسيت بدموعها الي هابطين فوقي يحرقو صوت شهقاتها حسيتهم كالوخزة في قلبي بقات تبكي و تحكي " خايفة لا .. لا نبقي وحدي .. امان ليث امان امان.. مانحبش نبقى وحدي نحب على امي امان "
كبست عليها اكثر و عديت بيديا على شعرها هبطت دمعة من عيني على كلامها اول مرة نحس بروحي عاجز هكا .. الطلب متاعها فوق طاقتي كان جاء بمقدوري مانخليهاش تعيش هذا الكل.. كل يوم نحس مسؤؤليتي تجاه قمر تكبر .. نعمل في هذا الكل و مانيش عارف السبب بالضبط خوفي علاها مافهمتوش حاسسها رغم بعدها اما قريبة مني .. شديتها من يداها و قومتها مديت يدي بش نمسحلها دموعها اما بعدت عليا اول ماتحل الباب ريناهم مخرجين حسنة للعناية مشات تجري ناحيتها قربت منها و ترمات علاها حطت يداها على راسها تمسح علاها تحكي " امي انا هنااا ..هاني حذاااك ياروحي .. هي قووم امان قوم نرجعو لدارنا .. نرجعو كيف ما كنا قبل مع بعضنا ديما هيا امان.. هيا و انا نوعدك ننسى كل شي و نبعدو من هنااا وحدناا ... المهم خلييك معايااا "
قربت منها رفيقة بعدتها و عنقتها من تالي " يزي عيش بنتي يزي "
بعدت علاها من غير ماتحكي كلمة و لا تغزرلها بقات تبع في امها وين ماشية خلطت علاها انا ورفيقة نغزرولها كيفاه واقفة قدام البلار تبع بعيناها الي صاير الداخل و تبكي .. ما نجمناش نقربولها و لا نواسيوها ماكانتش فما كلمة تنجم تخفف عليها الي حاستو هي.. احساسها ووجيعتها انا فاهمهم مليح عشتهم في صغري و كبرو معايا و جروح رغم السنين الي تعدات لتو لا براو امارتهم بقات فيا للحظة هاذي .. لحظتها بكيت على بكا قمر ووجيعتها اكثر ما بكيت على حالة امها..
الأول مرة بعد سنين طويلة نحس بالعجز هذا .. ضعفها حسيتو ضعفني معاها .. دموعها قبل ما تحرقها هي كانت تسبقها و تحرقني انا.. اللحظة هاذي ولأول مرة حسيت انو الي يربطني بقمر اكبر ببرشة من اني بش نحميها منهم .. احساس جديد نحسو كل ما نغزرلها، دقة جديدة حسيتها في قلبي كيف قربت مني لأول مرة.. كل حاجة فيها تخليني مربوط بالثنية هاذي ومستحيل كان نسلم و لا نبعد .. في اللحظة هاذي استعرفت بيني و بين روحي اني غرقت في بحر قمر و مهما كانت قوة وعمق بحرها و حتى كان اخرتو الموت انا راضي كان ماتكونش هي مرساتي في اللخر.
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
