#يحيى_يحكي
عديت بيديا على وجهي وحليت عينيا على ضو الشمس لي ضرب فيا.. هزيت روحي شوي وبقيت نغزر ناحية الشباك سارح كيف كل مرة..شهر تعدا على خروجي من الحبس.. شهر وانا ضايع وتايه مش فاهم روحي.. للحظة هاذي مانجمتش نستوعب ونتقبل حياتي كيفاه صارت.. كيفاه تقلبت ف ليلة ونهار.. ايامات عديتهم نعافر بش نخرج من الدوامة هاذي ونشد طريق جديد نسلكو وين مالقيت حتى حل قدامي كان اني نحرق لايطالياا ونبدأ من جديد.. اما قبلهاا لازمني نسكر الحساب لقديم.. لازمني نوفي بالوعد لي وعدتو لروحي وقت كنت بين القضبان..خذيت نفس طويل وقمت.. دخلت للسالدوبان وقربت وين الرخامة بقيت نغسل ف حالتي.. اول ماكملت حضرت روحي خرجت فيسع قبل ماتفيق امي خاطرها بش تمرجني كيف كل يوم..طلعت ف الكرهبة وطرت ناحية الثنية لي بقيت ايامات نخمم فيهاا.. ثنية بش تسهل علياا برشة حاجات وفرد وقت بش توصلني لشي لي نحب عليه من غير ما نتعب روحي.. مسافة الطريق ووصلت.. لحظتها جبدت تاليفوني حطيت رقم الطفل لي عرفتو وطلبتو..رسيت على سنيا بالقوي وقت سمعتو علق علياا..اول ماجيت بش نعاود نطلبو وقفت وقت ريتو بعثلي ميساج...
هادي [ مانجمش نجاوبك تو المدير هنا استناني ف الجهة الخلفية حتى نجيك ورد بالك يشوفك حد ]
رميت التاليفون على جنب وراكيت الكرهبة بعيد على كاميرات المراقبة.. تكيت بظهري لتالي وبقيت نستنى فيه وين حسيت روحي كرزت وانا واقف هكاا.. مانعرفش قداه تعدا وقت حتى سمعتو عيطلي.. هزيت راسي بالوقت وين شفتو واقف وراء شجرة..اشرلي بيديه يحكي
هادي:" يحيى اهبط تو "
هبطت ولطخت باب الكرهبة.. قربتلو فيسع نحكي
انا :" شبي *** لتووو.. ساعة نستنى فيك.. مش قتلي درج وندخلك "
عدا بعينيه عليا يحكي
هادي :" الله غالب مانجمتش.. هاو بزهرك المدير جاء اليوم وضرب نهار كامل "
نفخت بالقوي نحكي
انا :" باهي انجم ندخل تو ؟"
هزلي براسو اي يحكي
هادي :" اي هاني بش نسبقك انا تو تلقاني واقف بش ناخذ عليك البطاقة وكيف مافهمتك تقول لي أنت ولد اختها ورد بالك تعمل روحك عارفني "
انا :" باهي برك فهمنا "
هز بحاجبو يحكي
هادي :" اما قبلهااا وينو العربون..كيما تفاهمنا "
قحرتلو وجبدت لفلوس من جيبي..حطيتهم ف يديه نحكي
انا :" هاذم الشطر والشطر الثاني تاخذو بعد ما تكملي الخدمة "
خذاهم من يدي وضحك يحكي
هادي :" تهنى يا معلم "
كمل كلامو وعطاني بظهرو.. بقيت واقف نغزرلو حتى دخل.. دقيقتين من زمان وخلطت عليه وين الباب الرئيسي.. اول مادخلت شفتو واقف وين الاستقبال.. قدمت بخطواتي ناحيتو ووقفت قدامو.. جاوبت على اسئلتو لي وصاني عليها لكل وعطيتو بطاقتي.. اول ماكملناا مشيت معاه طول للبيت.. اول ماتحل الباب قدامي.. وقفت على بلاصتي وبقيت نغزرلها.. عديت بعينيا عليها وتبسمت على جنب وين استرجعت اول مرة ريتها فيهاا..غريبة كيفاه الدنياا تبدلت هكاا.. مرا كانت تبان بقوة لجبال ليوم صارت بلاصتها هنا بين لمجانين..وقت خرجت من الحبس وعرفت لي هي ف المصحة مصدقتش لا نهايتها ولا نهاية راجلها وولدها.. اما يمكن لي صار لكل لمصلحتي وانها بش تكون فرصتي بش ننهي اللعبة هاذي خاصة واني نعرف حجم كرها لليث وقمر..هزيتلو براسي باهي ودخلت.. سكرت الباب ورايا وقدمت بخطواتي ناحيتها وعينيا باقي علاهاا نغزرلها قاعدة ف كرسيها قدام الشباك.. وقفت بجنبها وطبست على وذنيها نحكي
انا :" مدام وجيهة"
تبسمت وقت تلفتتلي وعادات بعيناها عليا من غير ما حتى كلمة..جبدت لكرسي وقعدت مقابلها نحكي
انا :" مدام مزلت متذكرة اسمك معناه مزلت ف عقلك.. نظن انك عرفتني مش هكا ؟"
غزرتلي ورجعت تلفتت للشباك من غير ما تجاوبني.. تبسمت نحكي
انا:" انا خطيب قمر السابق..مازلت تتذكروالاسم هذاا مش هكا ؟"
تبسمت اكثر وقت ريتها تلفتتلي بالوقت.. حلت عيناها فيا وغزرتلي بنظرة ڤدحت فيهاا النار.. كبست بيداها ع الكرسي ونطقت تحكي
وجيهة :" قمر "
هزيتلها براسي اي وقربتلها.. عديت بعينيا عليها نحكي
انا :" امم قمر.. وانا يحيى.. راك تفكرتو الاسم هذاا زادة.. قبل 3سنين انتوما استغليتوني بش نشهد ضد خطيبتي حتى تخرجو ولدكم من الحبس..وانا مشيت معاكم ف كذبتكم اما حسب لي نشوف فيه تو انو انا وانتوما خلصنا وبالوافي زادة "
قمت من بلاصتي وقعدت نمشي قدامها نحكي
انا :" ف الاول ندمت خاطر تبعتكم..اما بعد عرفت لي الطفلة لي حبيتها وعشقتها هي لي باعتني وباعت روحها وعجبوها فلوس حضرة المحامي اكثر من حبي ليها "
رجعت قربت منها وطبست عليها غزرتلها ف عيناها نحكي
انا :" تعرفو المحامي مش هك.. كيفاش متعرفوش وانت ربيتو ف دارك ووكلتو من خيرك..اما ماكنتش عارلة انك مربية لي بش يكون قا_تل ولدك.. ريت كيفاه كفاكم "
عديت بعينيا عليها نغزر لدموعها الزاقفين بين رموش عيناها..نحكي
انا :" كلامي صحيح مش هكاا...يمكن كان عرفت انو الصغير لي ربيتو مع ولدك بش يجي يوم ويقت_لو راك رميتو للكلاب من صغرتو..اما تو فات الفوت..ولدك مسكين مات مقت_ول..حتى اني سمعت انو قطعولو يديه قبل...اخخخ قداش عانا مسكين.. مايستاهلش هذا لكل.... "
سكتت وقت ريتها طبست راسهاا وطرشقت بالبكا.. حطت يداها على وذناها تحكي
وجيهة :" اسكت اسكت "
مديت يديا ونحيتلها يداها بالسياسة نحكي
انا :" اشش بالشوي..مزال موفاش حديثنا..لازم تعرف الطفل لي ربيتو قداشو ساقط..بعد معرفوكم معاه شعمل قت_ل ولدك.. وماوقفش هناا مشى قت_ل خالو زادة..وانت.. اخخخ اانت مسكينة مايكفيش انو حرمك من عايلتك..حطك هنا بين لمجانين..بالطبيعة هاذي البلاصة ارحم ليك من الحبس مش هكا خاترك متورطة مع راجلك وتحكم عليك تعدي الفترة لي تحكم عليك بيهاا هنا ف المصحة يعني ممنوعة من الخروج حتى ولدك تحرمت انك تزورو..... "
عديت بعينيا عليها ومطيت شفايفي نحكي
انا :" وف المقابل..تعرف شصار.. ليث وقمر لي دمرولك حياتتك عايشين فلعسل..امورهم عشرة على عشرة..
ليث صار يخدم ف شركة عمو وصار لكل فالكل..وقمر.. قمر لي دخلت حياتكم على اساس ضحية.. اهيكا تكمل ف قرايتها وعايشة بفلوسكم لي رجع خذاها ليث ولي قال هي حقو وحق بوه..وشنوة زادة.... "
طرقعت صوابعي ورجعت نحكي
انا :" تفكرت...جاتهم بنية..تخيل لي قتلو_لك ولدك.. عايشين حياتهم وجابو صغير..وانت ولدك مسكين مات من غير ما ترا صغارو.. حرموه من شبابوو "
حطت يداها على وجها ورجعت طرشقت بالبكا تحكي
وجيهة :"اسكتتتت اسكتت سكر فمك... مانحبش نسمععععك "
انا :"علاش ماتحبش تسمع.. نعرف لحقيقة توجع اما هذا الواقع.. هاذم اخبار لي حرموك من ولدك وحريتك وفلوسك ولعز لي كنت فيه..ولا تخاف انك تتحرق هنا وانت تسمع ف اخبارهم وماك منجمة تعمل شي"
ميلت راسي ورجعت نحكي
انا :"اما انا جيت ليوم بش نعطيك فرصة..فرصة تنجم ترجع بيها حق ولدك لي غذبوه وتق_تل ورزاوه ف عمرو وحياتو..كان تحب تاخذ حق ولدك هز راسك وركز معايا"
تبسمت على جنب وقت ريتها هزت راسها وغزرتلي ف عينيا..حطيت يدي ورايا نحكي
انا:" ليوم جبتلك فرصة ماتتعوضش فرصة انك تاخذ بثارك..وزادة فرصة بش تخرج من هنا..انا بش نهربك ونعطيك فرصة انك تعيش حياة بعيد على الحبس هذا.. اما ف المقابل منحب حتى غلطة منك ولي بش نقلك عليه بش تعملو بالميلي غلطة لا..ولا انت لي بش تمشي فيها خاطر انا عندي شكون ورايا"
عدات بعيناها علياا وغزرتلي درا كيفاه تحكي
وجيهة :" نسمع فيك "
جبدت الكرسي ورجعت قعدت قدامها نحكي
انا :"أيا حمد الله لي سمعت صوتك..معناها انجم نبدا ونعطيك التعليمات تو"
عديت بعينيا عليها وبقيت نحكيلها ونشرحلها ف كل صغيرة وكبيرة انا حسبتها وخططتلها.. شهر كامل وانا مراقبهم وخططت لكل تفصيلة تنجم توصلني للي حابب عليه.. من اول نهار تحررت فيه من الحبس وخرجت لقيت ساقياا هازيني للفيلا متاعهم.. حبيت نشوف لي دمروني ودمرو حياتي كيفاه عايشين...
#فلاش_باك
وقفت وراء شجرة لكبيرة لي كانت قدام الفيلا وهزيت راسي نغزرلهاا.. عديت بعينيا عليها وين تفكرت كيفاه حرقناهاا قبل.. هاي رجعت احلى من قبل.. العزّ كان ظاهر من الفيلا والكرهبة لي الواقفة قدامهاا.. الطحان يطيح واقف طول عمرو.. هبطت ف الكسكات لي كنت لابسها وتخبيت اول ما ريت باب للفيلا تحل.. نزلت عالبونية متاعي بالقوي وقت ريتو خرج قدامي ويديه ف يداها.. حليت عينيا على وسعهم وقت ركزت فيهاا هي وشفت الصغير لي كان ف يداها.. رسيت على سنيا وضربت بيدي ع الشجرة نحكي
انا :"الق*** بدلتني بهذا على خاطر فلوسو وجايبة منو صغير...وانا لي دمرت روحي على خاطرها اما ولي خلقني ما ندفعها حق لي عملتو فيا ونخلاهاا تندم "
عديت بيديا على وجهي ورجعت طليت علاهم وين شفتو طلع فاليز من تالي وين عرفتو مسافر.. نار شعلت داخلي ك ريتو طبس باسهاا وباس الطفلة الصغيرة لي ف يداها..
غمضت عينيا بالقوي وقت سمعت صوتها تحكي
قمر :" ربي معاك ياروحي..اطلبني اول ما توصل متخلينيش متحيرة"
ليث :" باهي حبي تهنى"
قمر :"بش نتوحشك برشة ليث"
ليث :"حتى انا بش نتوحشك قمرتي وبش نتوحش بنتي زادة..رد بالك عليها وعلى روحك..عم مصطفى تو يجي يهزكم بحذاه.. "
قمر:"باهي..تهنى عليناا حبي"
عطيتهم بظهري نجري وبعدت علاهم قد مانجمت.. اول مابقيت وحدي هزيت البونية متاعي وضربت ع الحيط بالقوي وبقيت نصيح وننهج من القهرة لي مكنّتني.. تكيت بظهري ع الحيط نلهتذث وحكي
انا :"والله ما ندمك ياقمرر..والله ما نخليك تبكي الدممم.. انا..انا لي كنت تقلي نحبك.. انا لي كنت تقلي بش تصير بو صغاري..فضحتني ف الحومة وطيتلي راسي بين الرجال ودخلتني ف دوامة عمري ما كنت نتخيلها..ووقت سامحتك وقتلك ارجعلي راني قابلك حتى بوسخك.. اخترتو هو علياا..و قتلي ماكش راجل.. اما تو نوريك رجاال شتعمللل"
غمضت عينيا بالقوي وبقيت نرد ف النفس وراء وفرد وقت نخمم كيفاه بش ناخذ حقي منهم لكل....
#باك_اند
عديت بيدي على شعري وكبست على رقبتي بالقوي وقت تفكرت لي ريتو نهارتهاا وين رجعت النار لهبت فيا..اول ماكملت كلامي ليهاا.. هزيت بحاجبي نحكي
انا :" شقررت ؟"
هزتلي براسها باهي وغزرتلي ف عينيا تحكي
وجيهة :" موافقة بش نعمل لي قلتو الكل...اما بعد نحبك توعدني انك بش تهربني "
تبسمت على جنب نحكي
انا :" نوعدك..وحضر روحك ليلة عندنا طهور لازم نحضروه.. والرّمو متاعنا بش يكون غالي ياسر "
ضحكت وقمت من بلاصتي..عطيتها بظهري وخرجت وانا مقرر انو الليلة بش نحط اخر فصل ف الحكاية هاذي.. نهايتهم بش تتكتب بيدياا وعلى كيفي..ولي ناوي عليه بش نعملو ولو كلفني حياتي.. اصلا معاد عندي مانخسر.. فقت من سرحتي على صوت تاليفوني.. جبدتو وعديت بعينيا ع الميساج لي وصلني وين عرفت انو كل شي مشى كيما حبيت والامور كلها لصالحي.. الليلة كلهم بش يشوفو يحيى لي استهزءو بيه شنوة بش يعمل.. لعبي معاهم بش يوفى الليلة وبالقواعد لي بش نحطهاا انااا.. واكيد انا لي بش نكون رابح.. مش حد آخر...
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
