حلقة 23
#ليث_يحكي
بعد ما حكيت مع مدام رفيقة حسيت روحي ارتحت شوي رغم الي نعرف ثنيتي مع قمر بش تكون صعيبة و مسؤوليتي معاها بش تكبر خاصة بعد ما عطيت وعد لمدام رفيقة .. الي سمعتو اليوم الشي الي تعدات بيه قمر طول الفترة هاذي بش يخليها ما تعطيش الثقة في حد مرة اخرى بش تعيش بالخوف و الشك مسيطر عليها و هذا الي خلاني خايف اكثر ..
بعد ما عرفت قرار قمر جاء الوقت بش نخطي اول خطوة في الثنية هاذي و اني نواجه عيلتي بقراري بش يحطو حد للشي الي يخممو فيه و يعرفو انو من اليوم قمر في حمايتي ومش بش نرضى واحد فيهم يمسها .. بعد خروج مدام رفيقة خرجت وراها وشديت ثنيتي للفيلا .. بقيت نسوق وانا نخمم في المواجهة الي بش تصير معاهم و ردت فعلهم على قراري.. نعرف بش يرفضو و بش ياقفو في الثنية هاذي اما بش يلقاوني واقف قدامهم و بش نحاول نكون سابقهم في كل خطوة ناويين عليها من هنا لقدام.
اول ماوصلت خذيت نفس وهبطت من الكرهبة .. دخلت للفيلا نلقاهم قاعدين وايهم بيناتهم كانو ماصار شي بقيت نغزرلهم ساعات نحس روحي غريب علاهم لدرجة مانعرفش كيفاه يخممو خذيت نفس و قربت منهم غزرت لأيهم الي وقف و قدم ناحيتي يحكي
" ليث ويننك يا راجل ؟؟ ما تسالش على ولد خالك ؟"
بعدت عليه وقعدت عالفوتاي مقابل الجماعة نحكي " علاه بش نسال عليك ؟؟ كنت مسافر وانا مافيباليش ؟"
غزرتلي مرت خالي تحكي " شبيك تحكي هكا ليث ؟ ما تعرفش ايهم بشنوة تعدا ؟؟"
حطيت يديا على خدي ودورت عينيا فيهم الثلاثة نحكي
" بلاهي فكروني تراااه ؟ ايهم بشنوة تعدا ؟؟ حتى شي قدام الي تعدات بيه الطفلة نتصور "
تلفت لخالي الي نطر الجريدة من يديه و يحكي
" شنوة لحديث هذا ليث ؟؟ الموضوع هذا حكينا فيه وتسكر .. سيرة الطفلة مانحبهاش تتجد في داري .. ايهم غلط وتحاسب و الطفلة بش تعرس بريان و تبعد من هنا و اخر مرة نسمعك تحكي هكا "
تكيت بظهري عالفوتاي غزرتلهم نحكي
" قمر ماهيش بش تعرس بريان و ماهيش ماشية لحتى بلاصة "
غزرتلهم كيفاه هزو راسهم معايا لكل باهتين فيا بعد كلمتي.. تلفت لأيهم الي قرب مني يصيح ويحكي
" شنووووة ؟؟ فاااش تحكي انت ؟ نلعبو ولينا ؟؟ هي بدلت رايها مش هكااااا .. تو نمشيلها و نخلاها تعرف شمعناهااا اللعب معايااا "
عطاني بظهرو ماشي تنطرت من بلاصتي شديتو من مرفقو بالقوي ووقفت قدامو نحكي
" رد بالك تخمم تمشيلها و لا تقرب منها .. صدقني ما نخليك تندم كان تمسها يا أيهمم"
قام خالي يجري وقف قدامي وجهه احمر و عينيه محلولين فياا يصيح
" ليث فايق بروحك فاش تحكي ؟؟ انت تهدد في شكون و على خاطر شكون؟ مفهمتشش"
" نهدد في ولدك بش مايقربش من مرتي ..
كبست عالبونية متاعي نحاول نبرد في اعصابي كيف سمعت مرت خالي تحكي
" شنووة ؟ اكيد هبلت انت ؟؟ كيفاه مرتك ؟؟ "
" الي سمعتوووه .. قمر من اللحظة هاذي مرتي و مسؤولة مني ومستحيل نخليكم تمسو شعرة منها مكانش بش تلقاوني قدامكم الكل و عرسها بريان تنساااوه الناس الكل "
تكلم خالي يصيح
" ناوي تهبلني *** كيفاه بش تعرس بيها و تدخل وحدة كيفها لعايلتي ؟؟ مستحيل نخليك تعرس بيها مكانش وقتها والله لا نرحمك يا ليث و ننسى انك ولد اختي و الدم الي يربطنا "
تبسمت على جنب نحكي و قربتلو حطيت عينيا ف عينيه نحكي
" من وقتاه انت حاسبني ولد اختك اه ؟؟ من وقتاه راحمني انت ؟؟ انا هنا معاكم بش نلم وسخكم و ننفذ الي تطلبوه مني .. هذا الكل علاه؟؟ خاطر انتوما الي ربيتوني .. طول عمري وانا عايش ذليل تحتكم وساكت.. عمري ما ننسا كيفااه عشت في وسطكم .. عمركم ما حسبتوني من العيلة هاذي.. اما ساي لحق الوقت بش نخرج من تحت طوعكم و نبعد على وسخكم و اخر مرة تحكي علاها بالطريقة هاكي تهنى ماهيش داخلة لعائلتك مانيش مهبول بش نخليها تقرب من العيلة هاذي "
" صدقني كان تعرس بيها وقتها اقرا الفاتحة على روحها .. انت فيبالك هكا بش تحمها ؟؟ تحلم .. مانخليها تموت قدام عينيك وتعرفني الي انا قد كلامي"
" رد بالك سي محمود رد بالك تخمم تضر قمر وقتها نمشي انا بساقيا و نشكي بولدك و نخليه يتحاسب على عملو الكل "
"قربت منا مرت خالي تحكي " هذا كفونا معااك ؟؟ في عوض تعاونا .. بش تخون اليد الي تمدتلك و انت صغير و كبرتك ووصلتك لهنا ؟؟ "
" نعاونكم اني نظلم طفلة صغيرة ؟؟ اليد الي تحكي علاها خلتني نغرق في الخمج خلاتني نوسخ يدي .. منكم انتوما يدي توسخت بدم .. ريت انتوما وين وصلتوني ؟؟ مستحيل كان نسامحكم و لا نرضخلكم مرة اخرى .. قراري وقلتو و الي بش ياقف في وجهي انا المرة هاذي مانيش بش نرحمو .. و من اللحظة هاذي تنساو واحد اسمو ليث .. و حبلكم الرب انكم تمسو قمر "
هزيت راسي مع ايهم الي ضحك يحكي
" ههه خليوه ظاهرلي عجبتو القطوسة وحب يذوقهااا حتى هو .. ننصحك بيها خاطرها بنينة اسئلني انا كوزان "
حسيت بدمي فور و بدني رعش من كلامو و الدنيا ظلامت قدامي قربت منو نجري عطيتو بونية وشديتو من كول سوريتو نحكي " سكر فمممك يا ****** اخر مرة تحكي علاها يا ***** .. الطفلة انظف من انها تتجبد سيرتها على فم واحد مسخ كيفك ؟؟ مازلت نسمعك تحكي علاها ما نقتل **** بيديا و نحسب ربي ما خلقك"
قرب منا خالي و بعدني عليه يحكي " ابعددد علييه و اخررج من داري .. من اللحظة هاذي انت حليت باب جهنم عليكم الزوز .. وحتى البعد المرة هاذي مش بش يخليني نرحمها .. انت حكمت علاها تعيش في جهنم متاعي بقرارك هذا .. وانت تعرف اكثر واحد انا شنية انجم نعمل"
" جرب مسها ووقتها تو تشوف نار ليث بن مرااد الي بش تشعل فيكم .. ويديا الي تمسخت قبل مستعد نخلاها تتمسخ مرة اخرى "
" ليث متنساش انو رقبتك انت تحت يديا بكلمة مني ندمرك كيف ما وصلتك لهنا بيديا مستعد ننهيك بيديا زادة .. و بش نخليك تندم عالي صااار الدقايق هاذم و على كل كلمة قلتها "
" نعرفك شتقصدك وصدقني مانيش خايف منك و تهديدك ما يمشيش معايا سي محمود.. رقبتي تحت يديك صحيح و رقبت ولدك تحت يديا انا .. ماتنساش الدليل الي عند قمر.. بكلمة مني انا زادة نخليك تخسر ولدك و الصفقة والإنتخابات الي تستنى فيهم شهور تو .. ماتنساش اني محامي و تعلمت الشي هذا بفضلك انت خالي "
بقا يغزرلي من غير حتى كلمة قدمت ناحيتو وتفاديتو عطيتهم بظهري وخرجت حسيت روحي بردت نار سنين الي شاعلة فيا .. المواجهة هاذي نستنى فيها عندي قداه و الفضل يرجع لقمر الي خلاتني نخطي الخطوة هاذي و نختار ثنيتي ونبعد علاهم .. هوما عمرهم ما كانو عيلتي و عمري ماحسيت بالقرب معاهم بالعكس كنت مجرد وسيلة تحققلهم غايتهم ..
طلعت في الكرهبة وشديت ثنيتي للفيرمة .. بعد الي صار لازمني نكمل في طريقي و خطوتي الجايا بش تكون مع قمر .. نعرف بعد الي صار في الفيلا بش يخلاهم يشعلو اكثر و ممكن يضروها اكثر من اليوم قمر بش تولي تحت عينيا مانخليهاش تفرقني لحظة .. اول ماوصلت للفيرمة خذيت نفس و هديت روحي حاولت ننسى الي صار دقايق لتالي .. قربت من الباب دقيتو .. حلتلي مدام رفيقة تبسمتلي و دخلتني .. حسيت براحه المرة هاذي و فرحة كيف استقبلتني هكاكا قدمت معاها لصالة قعدت قدامها نحكي " مذابيا كان نحكي معاك و قمر تكون موجودة "
هزتلي براسها باهي تحكي " دقيقة نعيطلها "
" بااهي "
بقيت ثواني نستني فيها هزيت راسي معاها كيف قربت مني و قعدت مقابلتني من غير حتى كلمة بقيت نغزرلها حالتها ما تحسنتش بالكل وجها مازال ذابل عينيها محوقين رغم هذا الكل اما فيها حاجة تخليني مانجمش نبعد عينيا من علاها بقيت سارح فيها و فكل حركة تعملها .. فقت من سرحتى على مدام رفيقة تحكي " ماقتليش مسيو ليث تشرب حاجة ؟؟"
هزيتلها براسي لاا نحكي " لا مرسي .. انا هنا بش نحكي معاكم كلمتين ونمشي .. "
" نسمعو فيك "
بلعت ريقي و عديت يديا على جبيني نحكي
" قمر !! عرفت من مدام وجيهة انك قبلت عرضي ؟"
هزت راسها معايا غزرتلي تحكي " ا.. أي موافقة اما شنوة بش نعمل في حكاية .. حكاية لاخر "
تبسمتلها نحاول نطمن فيها نحكي " ما تخافش مفماش لاخر .. انا حكيت معاهم ماكش بش تعرس بريان .. مانخليكش تقربلو تهنى "
هبطت دمعة من عينيها مسحتها فيسع وغزرتلي تحكي " كي.. كيفاه حكيت معاهم .. شقالولك ؟؟ اكيد رفضو !"
" انسى شنية قالولي انت ما تخمم في شي .. و حتى كان رفضو ماعندهم ما يعملو..حاول انك تاثق فيا .. نعرف طلب متاعي صعيب .. اما انا وعدت مدام رفيقة و نوعدك انت تو قدامها مستحيل نخلاهم يضروك "
عضت على شفايفها و وطات في صوتها تحكي " و و انت ؟ بش يخليوك تخدم عندهم حتى بعد قرارك هذا ؟؟ بش تبقى قريب منهم و معايا فرد وقت.. ك كيفاه بش نطمان هكا ؟؟"
" انا و انت بش نحاولو نبعدو علاهم .. انا من اللحظة هاذي بش نبعد علاهم و ثنيتي تفارق ثنيتهم.. نعرف ماهمش بش يسكتو و مش بش يخلونا في حالنا .. اما ماتخافش مدام انا معاك.. ماتخمم في شي .. انت و داركم في حمايتي مستحيل كان نضرك قمر .. "
تلفت لمدام رفيقة الي حطت يداها على ظهر قمر و غزرتلها تحكي " ماتخافش علينا قمر .. خمم في روحك تو .. خمم انك بش ترتاح من الساقط لاخر و ماتتجبرش تعرس بيه خمم انك بش تبقى بيناتنا.. امحي الخوف هذا و اعطي فرصة لروحك .. انا بش نبقى وراك .. و وليث زادة وعدني انو بش ياقف معانا " هزتلها براسها باهي و تلقتتلي تحكي " شنية بش يصير تو ؟"
" اول حاجة بش نكتبو الصداق فيسع بش نحاول نسرع في الإجراءات.. لازمك تولي تحت عينيا و قريبة مني .. خاطر متأكد انهم بعد الي صار في اول فرصة بش يلقاوها بش يحاولو يضروك .. نحبك تبدا قريبتلي هكاكا نطمان اكثر و الخطوة الثانية مازال عليها وقت .. "
" شنوة الخطوة الثانية ؟؟"
" بش تأخذ حقك منهم .. صحيح انت تنازلت اما تنجم ترجع و تأخذ حقك منهم و المرة هاذي انا بش نعاونك و ناقف في صفك "
تبسمتلي ووقتها حسيت روحي ضعت في تبسيمتها بقيت نثبت في ملامحها الي تبدلت في لحظة و الفرحة الي بانت في عينيها .. قمر فيها حاجة غريبة تخليك ماتنجمش تبعد عينيك من علاها كل حاجة فيها تحسها تجذبك .. بعدت عينيا من علاها فيسع و عديت بيديا على وجهي كيف سمعتها تحكي " بلحق بش تعاوني؟ ب... بش تخليني نحاسبهم ؟؟"
رجعتلها التبسيمة نحكي " بلحق .. و هذا وعدي الثاني ليك "
هزتلي براسها باهي و غزرت لمدام رفيقة و تبسمت اكثر حسيتها ارتاحت شوي كيف حكيت معاها .. كل مرة نتأكد اني خذيت الخطوة الصحيحة لأول مرة في حياتي.. قمت من بلاصتي نحكي " نخليكم تو .. قمر تو نتعدالك غدوة بش نحضرو الأوراق .. ورد بالك تخرج من الدار .. "
هزتلي براسها باهي .. و خرجت من الصالة معايا مدام رفيقة تحكي " عيشك مسيو ليث .. الي عملتو مستحيل ننساه .. وقفتك مع بنتي بش تبقى دين على رقبتي طول عمري "
" ما تحكيش هكا .. هذا اقل شي انجم نعملو معاكم
.. عينيك على قمر و ماتخليهاش تخرج .. محمود ماهوش بش يسكت صدقني "
ضيقت عينيها معايا تحكي "كيفاه ؟ شنوة قلك ؟"
" ما تخممش فيه .. انت عينيك على قمر و كان فما اي حاجة رقمي عندك كلمني .. لازمنا نكونو حاضرين لكل شي .. و ماتخليش قمر تخاف بالعكس طمناها "
تبسمتلي تحكي " تهنى .. مرسي على كل شي "
خرجت من الدار رغم اني فرحان و مرتاح بعد الي صار مع قمر كيفاه تقبلتني حتى شوي ووافقت على عرضي اما حاسس بخوف كبير .. خوفي علاها قبل ما نخاف على روحي.. تخمامي الكل معاها لازمني نكون قد الوعود الي عطيتهملها و نوفي بيهم .. نعرف الي يستنى فيا اكبر من الي تعديت بيه اما انا حاضر لكل خطوة قادم عليها .. و قمر من اللحظة هاذي خط أحمر و الي بش يقربلها بش نحاسبو و نخليه يندم ..
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
