حلقة 63
أيوب يحكي
الفترة هاذي الكل سلمت في كل القضايا الي عندي و تفرغت كان للقضية هاذي .. الي صارت بالنسبة ليا هي محور حكايتي .. شهر عديتو وانا غاطس و نخمم في كل خطوة ناوي نعملها .. درست الحكاية مليح و المرة هاذي مستحيل بش نخرج خاسر .. الي ناوي عليه المرة هاذي .. ليث ما ينجمش يمنعني عليه و لا يبين دليل ضدي .. لعبي المرة هاذي بش يكون من بعيد .. بش نكون فايق و دارس كل خطوة..
هزيت راسي مع التاليفون الي نوقز .. خذيت نفس طويل و هزيت نحكي " وي سي محمود تفضل "
"ماتنساش الموعد متاعنا تو .. بش نبعثلك العنوان في ميساج نحبك تكون غادي في الوقت "
" باهي سي محمود .. تهنى "
علقت عليه و قمت لبست الفازت متاعي .. هزيت المفاتح و التاليفون و خرجت .. طلعت في الكرهبة و هكاكا ووصلني ميساج .. قريت العنوان و شديت الثنية ليه .. ثنية كاملة و انا مخي سارح مع كل حاجة ناوي عليها .. لكلام الي سمعتو من سي محمود اخر مرة وجعني .. وجعني لدرجة خلاني نزيد ننقم من ليث و حياتو .. حتى النفس متاعو ووجودو في الدنيا صارو مقلقيني .. وقفت الكرهبة قدام المركز وهبطت .. هزيت راسي شفت سي محمود الي هبط من كرهبتو زادة و قدم بخطواتو ناحيتي .. قربلي ووقف قدامي يحكي " نتمنى انك تكون حاضر سي أيوب "
هزيتلو براسي اي نحكي " متخافش سي محمود "
عطاني بظهرو من غير ما جاوبني ودخل .. خلطت عليه ووقفت قدام العون نحكي " نحب نقابل سي هارون .. قلو سي ماتر أيوب "
" لحظة "
ريتو كيفاه دخل بش يخبرو .. تلفتت لسي محمود كيف غزرلي يحكي "انت ضامنو ؟؟"
تبسمتلو على جنب " انا ضامنو صحيح .. اما وجودك انت معايا و مركزك يخليني نضمنو اكثر .. على هذاكا متخافش "
غزرلي على جنب يحكي " انا عمري ما نخاف .. كان تطلع لحكاية وراها مضرة ليا و لا لولدي .. ننهيكم في زوز ز نحسب ربي ماخلقكمش .. فهمت أيوب "
كبست على البونية متاعي من العصب الي مكني من وراء طريقة كلامو نحكي " فهمت سي محمود"
تلفت على صوت العون يحكي " سي هارون يستنى فيكم "
خذيت نفس و استويت الفازت متاعي و دخلت .. اول ما شافني وقف سلم عليا يحكي " مرحبا سي أيوب .. عاش من شافك .. تفضلو "
قعدت عالكرسي مقالبني سي محمود .. غزرت لهارون نحكي "الله غالب صاحبي .. تعرف الدنيا تلاهي "
تبسملي يحكي " صحيح .. مش بش تعرفني "
اشرتلو بيدي على سي محمود نحكي " هذا سي محمود بن سعيد .. اكيد تعرفو اسمو غني عن التعريف "
" بالطبيعة نعرفو .. مرحبا سي محمود "
مد يدو وسلم عليه يحكي وكمل يحكي " شرف ليا اني بش نخدمك "
ريت سي محمود كيف اتكا بظهرو عالكرسي و حط ساق على ساق يحكي " عيشك سي هارون .. و انا الي يخدموني نفرح بيهم و يصيرو من رجالي "
" قلي فاش نقدر نعاونك "
عديت بيديا على وجهي و تلفتلو نحكي " شوف هارون.. ولد سي محمود في الحبس .. و الجلسة متاعو على قريب .. القاضي في الجلسة الأولى حكم بمراجعة تسجيلات التليفونات متاعو .. و انا جيت هنا خاطر نعرف الي انت يدك واصلة و تعرف مليح مع شكون تتعامل .. نحب التسجيلات تتزيف و لا تتمحى .. الي تقدر عليه "
حك على جبينو يحكي " هاذي حكاية صعيبة أيوب .. و الي بش يخدموها بش يطلبو برشة فلوس و .."
قص عليه محمود يحكي " و انا حاضر للي يطلبوه .. المهم نحب لحكاية هاذي توفى "
" باهي كيف هكا .. انا عندي شكون ينجم يقضيهالك في نهار لحكاية .. المهم اعطيني نومرو التاليفون و اسم ولدك كامل و التواريخ الي طلبها القاضي "
حطيت يدي في الفازت من داخل و جبدت ورقة من جيبي حطيتها قدامو عالطاولة نحكي " كل شي تلقاه هنا .. هارون الجلسة معادش علاها بكري .. نحب لحكاية توفى النهارات هاذم و التقرير يخرج فيسع "
" ماتخافش أيوب .. عمرك عملت عليا في حاجة و انا ما قضيتهاش .. اما انا نحب عالنسبة متاعي كل حاجة في بقعتها "
ضحك سي محمود على جنب يحكي " تهنى .. حسابك مضمون "
ريتو كيفاه جبد شاك من جيبو و عمرو قدامنا .. حطو قدام هارون يحكي "هذا المبلغ الأول .. المبلغ الثاني يوصلك مع ايوب كيف يحضر التقرير .. و يكون فيه لكلام الي نحب عليه انا "
خذا الشاك و غزرلو تبسم و رجع غزر لمحمود يحكي
" احسب التقرير وصلك "
قام محمود من بلاصتو و قمت وراه نحكي
" أيا هارون بيناتنا تاليفون .. بسلامة تو "
مديت يدي و سلمت عليه يحكي " بسلامة أيوب .. بسلامة سي محمود "
كملنا معاه وخرجنا .. كنت مقدم ناحية كرهبتي اما وقفت على صوت سي محمود يحكي " اطلع معايا لازم نحكيو "
هزيتلو براسي باهي و قدمت معاه .. طلعت بجنبو .. ريتو كيف تلفت لشوفور يحكي "انت اهبط "
اول ما هبطت الشوفور غزرلي يحكي " لحكاية هاذي و ارتحنا منها .. شعملت في لحكاية لخرى ؟"
" تهنى سي محمود .. تقضات "
هز بحاجبو يحكي " تعرف يا أيوب اقل غلطة ما نكلفهالك بروحك .. نحب لحكاية توفى في الجلسة هاذي فهمت ؟"
رسيت على سنيا نحكي " الجلسة هاذي ايهم بش يروح معاك .. متخافش "
ضيق عينيه فيا يحكي " حكيت معاه ؟ تفاهمتو ؟؟"
تبسمت على جنب نحكي " تفاهمنا مليح .. المرة هاذي الأمور لصالحنا .. ماتخافش .. ايهم بش يروح و لحكاية بش توفى "
عدا بيديه على شعرو يحكي " شي ماهو بش يوفى .. انا ما عملت شي يا أيوب .. ساكت لتو خاطر ولدي محبوس .. اما اول ما نضمن خروجو وقتها بس نبدا لعب .. ليث بش يخلص حق عمايلو الكل هو اكا الفرخة .. بش نرباهم و يعرفو شكون هو محمود .. و انت مازلت حاجتي بيك .. بش تبقى معايا حتى بعد الجلسة فهمتني ؟ "
كلامو خلا ضحكتي توساع مني نحكي " بالطبيعة سي محمود.. في اي وقت .. اما في شنوة تخمم انت ؟"
تبسم تبسمية كلها شر يحكي " الي نخمم فيه تو مع الوقت تعرفو .. الي لازمك تعرفو انو نهاية ليث بن مراد قربت .. و حساب ال ****** الي معاه بش يبدأ تو .. انت كون حاضر .. بش نبعثلك وراق و حاجات نحبك تخلاهم عندك .. تجبدهم في الوقت المناسب .. عملت كيف ما وصيتك ساعة ؟"
عديت بلساني على شفايفي نحكي " بالطبيعة .. هوما غادي .. خلي كل شي علياا "
"باهي .. تنجم تهبط تو .. كان صارت الي حاجة كلمني "
" باهي سي محمود .. بسلامة "
هبطت من حذاه و طلعت في كرهبتي .. فكرة انو سي محمود طلع يخمم في نفس تخمامي زادتني قوة .. كيف نحط يدي في يدو وقتها بلحق ليث بش يتدمر .. كان خالو مارحموش .. بش نرحمو اناا .. اهم شي تو اني ضمنت ربحي نهار الجلسة و الباقي مع الوقت تو يتحل .. ووقتها اسم أيوب رحماني هو الي بش يكون في القمة و تحت صباطي اسم ليث بن مراد ..
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
