#ريان_يحكي
نزلت الكابوش من فوق راسي ونزعت الكمامة معاهاا اول ما دخلت للخربة الي عايش فيهاا حالياا.. سكرت الڤراج وراياا وحطيت الكسكروت الي دبرتو بش نتعشاه على جنب وقربت فيسع ناحية لحطب بش نشعل النار اول حاجة بش ندفى شوي.. اول مالهبت قدامي وحسيت بحرارتهاا ترميت عالقاعة مقابلهاا وخذيت الكسكروت حليتو وخذيت قضمة منو بش نسد جوعي رغم اني ماعيني ف شي اللحظة هاذي.. تكيت براسي لتالي وتنهدت بالقوي مش عارف قداه بش نبقى عالوضع هذا.. عيشتي وعيشة لكلاب واحد صارت.. بقيت من خربة لخربة متخبي ومانخرج كان وقت الي نجوع فيه.. وحتى ماكلتي يانسرقهاا يا نطلبهاا من الناس.. كبست على عينيا بالقوي اول ما استرجعت الي عملتو انا والي صار مرة اخرى.....
#فلاش_باك
وقفت من الفرش اول ما باب الزنزانة تحل وين دخل العون يحكي
العون :" وقت الفسحة.. تحركو قوموو "
غزرتلو على جنب وخرجت مع بقيت المساجين للساحة لكبيرة.. خذيت نفس طويل من النسمة الباردة الي ضربتني وين حسيت روحي تنفست شوي من خنقة ريحة الزنزانة الصغيرة.. عديت بعينيا عالي كانو يتمشاو قدامي وركزتهم على اللمة الي كانت على جنب.. عديت بيديا على وجهي وقدمت بخطواتي ناحيتهم.. وقفت قدام لمعلم الي كان الي قاعد النص و المساجين الي يخدموه كانو محاوطينو.. تلفتت لواحد منهم يحكي
ولد صليحة :" اا انشالله خير سي ريان تفضل بابا "
قحرتلو نحكي
انا :" مانيش جاي نحكي معاك ولد صليحة.. انا هناا حاجتي بالمعلم "ولد المكي" "
غزرتلو كيف حط ساق على ساق وغزرلي يحكي
ولد المكي :" احكي نسمع فيك "
قربتلو اكثر ولميت طرف القوة إلي عندي نحكي
انا :" معلم مش جاء الوقت الي بش تنفذ فيه وعدك ليا.. محسوبك هاني خدام تحت يديك ليا شهور تو وعمرك لا ريت مني حاجة و لا رفضتلك طلب..... "
قص علياا كيف صاح شوي يحكي
ولد المكي :" لخصصص "
بلعت ريقي بالسيف نحكي
انا :" حاضر حاضر.. مش انت قتلي اول ماتق-تل اكا الطحان " شبروش " وتخلصني منو بش تعاوني وتخليني نخرج من هناا مش هكا ؟"
عدا بعينيه عليا وغزرلي درا كيفاه يحكي
ولد المكي :" هكاا "
انا :" وانا هاني خلصتك منو ومن الريحة متاعو.. ماعاش الي يحط راسو ب راسك هناا.. انت الكل ف الكل ف الحبس هذاا وكلنا خدامينك "
هز بحاجبو يحكي
ولد المكي :" صحيح انت خلصتني منو و عجبتني خدمتك نظيفة ماخليت شي وراك.. على هذااكا خممت نحطك واحد من رجالي هناا ويدي ليمين كان لزم وانسى الهربة "
حليت عينيا على وسعهم فيه نحكي
انا :" لا لا.. "
ولد المكي :" لا شنوة ماتحبش تولي يدي ليمين "
انا :" لا اكيد نحب ويشرفني هذاا يا معلم.. اما انا لازمني نخرج.. محسوبك عندو ثار ولازم يخلصو لبرا "
ضيق عينيه فيا يحكي
ولد المكي :" انت شاور برك و ثارك يخلص وانت هنا "
كبست عالبونية متاعي بالقوي نحكي
انا :" المشكلة اني نحب انا الي نخلص ثاري.. نحب نطلع بروح الي رماني هناا وخلاني نخلص هذاا لكل "
ولد المكي :" مش قتلك عجبتني وبلاصتك بجنبي.. باهي ك هكاا بش نعاونك هناا و لبرا زادة.. اما على شرط بش تصير واحد من رجالي لبرا زادة ورد بالك تلعب معاياا.. خاطر مازلت ماتعرفش ولد المكي.. قرصتو والقبر "
هزيتلو براسي لا نحكي
انا :" لا لا نعرف راك سيد المعلمين.. غير انت عاوني وانا مستعد نضحي بروحي على خاطرك "
تبسم يحكي
ولد المكي :" باهي شوف.. اول ماتوفى الفسحة بش يجيك شكون.. يعطيك حربوشة اشربهاا وهي بش تسببلك حالة تسمم.. ووقتها اكيد بش ينقلوك للمستشفى لبرا "
انا :" اي وكيفاه بش نهرب من المستشفى؟ اكيد بش يبعثو معاياا اعوان "
تكا بظهرو لتالي يحكي
ولد المكي :" لا هكا ماتخافش.. بش تلقى ممرض تابعني هو بش يخرجك بطريقتو الخاصة وبش تلقى كرهبة تستنى فيك زادة بش توصلك وين ما انت تحب كمل خدمتك و بعدها نبداو خدمة "
هز يديه ورجع يحكي
ولد المكي :" عداني العيب هكا واكثر ومشيت معاك برجلة مالا اقل غدرة منك رحم على روحك "
تبسمت نحكي
انا :" طول عمرك معلم وسيد المعلمين يا ولد المكي "
ضرب على كتفي يحكي
ولد المكي :" اياا تحرك لزنزانتك تو تلقى شكون يستنى فيك "
اشر بعينيه لواحد من رجالو يحكي
ولد المكي :" حروز برا معاه وخليه كان وهو دايخ ومادد لربعة وبعد تصرف انت وصل لخبر للعوان "
حروز :" حاضر معلم "
قمت مع حروز ورجعت معاه لزنزانة وين عرضناا مسجون واحد من رجال ولد المكي يستنى فيناا.. عدا بعينيه عليناا يحكي
شفشا :" ااا حروز هذا لحبيّب الي ناوي يفصع "
حروز :" اي هو "
غزرلي وضحك باستهزاء يحكي
شفشا :" وانت قداها الحربوشة هاذي.. ظاهر فيك مازل حليب امك بين سنيك.. نخاف لا تموتلي هناا "
رسيت على سنيا بالقوي نحكي
انا :" لا ماتخافش غير انت مدهاا وشدخلك "
هز بحاجبو يحكي
شفشا :" لا قبيح مش ظاهر عليك ريانو "
دمي فور مني اول ماريتهم كيفاه ضحكو.. عليت ف صوتي شوي نحكي
انا :" تو بش تمدهاا ولا نمشي لولد المكي "
حروز :" اياا اعطيه وفك عليناا منو "
ريتو كيف حط يديه ف جيبو وجبد منها حربوشة يحكي
شفشا :" شد و ابلعهاا طول.. درجين من زمان وبش تحس بدوخة وبعدها تيدا الاعراض تظهر اكثر وقتها انت صيح والباقي خليه علينا "
حسيت بخوف غريب سيطر عليااا وانا نغزر للحربوشة ف يديه.. للحظة خممت نتراجع خاطر الروح مافيهاش لعب اما لحظتهاا تفكرت الطحان ايوب والي عملو فياا وكيفاه رماني هناا وين مديت من غير مانفكر خذيتها ورميتها طول ف فمي.. بلعتهاا ورجعت لزنزانة ترميت عالفرش وغمضت عينيا وانا نستني.. رجعت حليتهم على وجيعة كرشي الي شدتني فيسع.. تنطرت من بلاصتي اما رجعت قعدت كيف حسيت بدوخة لعبت بياا.. كبست بيديا عالمخدة اول ماحسيت بالخنقة مكنتني.. هزيت راسي مع المساجين الي دخلو اما مانجمت نركز فيهم تصويرتهم كانت مشوشة قدامي وعرقي بدا يقطر ف وجهي ونازل على عينيا.. لحظتهاا خذيت نفس و صحت على قوة جهدي وين قوتي وفات وطحت ف القاعة نطبربس.. كبست على كرشي وصحت نحكي
انا :" اااااه كرشييي.. بششش نمووووت حد يععععااونيي "
دوب فتحت عينيا شوي على شفشاا الي قربلي يجري وحملني فرد ضربة ووشوشني يحكي
شفشاا :" زيد صيح خلي العون يسمع "
انا :" ااااااه بش نمووووووت اهههه "
سمعت العون الي حل الباب وقربلنا يحكي
العون :" شبي امو هذاا زادة شبيه يصيح "
شفشاا :" ظاهر كلا حاجة فاسدة.. هاو كان يطبرطس ك العلوش المذبوح "
العون :" هاتو وايجا وراياا خلي الطبيب يشوفو "
غمضت عينيا ورسيت على سنيا بالقوي من لوجيعة الي حسيتهاا.. صحت على علووو صوتي كيف شفشاا رماني عالفرش وين الطبيب.. قحرتلو وغزرت لطبيب الي بقى يفحص فياا.. شوي وقت وريتو كيف غزر للعون يحكي
الطبيب :" حالة تسمم لازم يمشي للمستشفى "
العون :" باهي خليني نكلم المسؤول "
حسيت ب شفشاا كيف طبس عليااا ووشوشني يحكي
شفشاا :" شاخت عندك.. كفارة ياا.. ريانوو "
دورت وجهي لناحية لخرى وبقيت نتوجع ونصيح.. شوي وقت وجاو الاعوان الي حملوني وخرجوني لبرا وين كانت سيارة الإسعاف واقفة.. شفت الطبيب واقف بعد ماركبوني وحطوني عالنقالة.. قعد بجنبي وحطلي الاكسجين ف وجهي و السيارة تحركت.. قلبي ضرب بقوة اول ما حسيتها تحركت وشدينا الثنية.. الثنية الي بقيت نستنى فيهاا شهور وعملت كل شي بش نخرج ونشدهاا.. ضربت وقتلت بعت الزطلة و الحرابش عملت الي عمري ماخطر على بالي نعملو.. غمضت عينيا وين دمعة نزلت مني وانا نتفكر ف روحي كيفاه كنت ووين وصلت روحي.. للحظة نسيت لوجيعة الي تقطع فياا وبقيت نخمم كان ف الي عملتو من اول الليلة هاكي لغاية ليوم.. فقت من سرحتي على صوت الكرهبة الي وقفت.. نزلوني فيسع ودخلوني لداخل وين عرضونا الممرضين وطبيب اخر.. دخلوني فيسع لغرفة العلاج فحصوني وعملولي غسيل معدة.. اول ماكلمت حطوني ف غرفة اخرى وركبولي السيرو والاعوان لبرا واقفة تعس.. شفت الطبيب كيف غزرلي يحكي
الطبيب :" الحمدالله على سلامتك.. نهارين وتقوم لباس مفماش حاجة كبيرة.. عطيتك حقنة تو بش تخليك ترتاح "
هزيتلو براسي باهي من غير حتى كلمة وسطحت راسي لتالي.. غمضت عينيا وين غفيت من غير مانحس.. رجعت حليت عينيا على صوت الباب الي تحل.. غزرت للشباك و شفت الدنياا كيف ظلامت لحظتهاا عرفت الي رقدت برشة.. تلفتت للممرض الي قرب مني.. نحى الكمامة وغزرلي يحكي
الممرض :" حاضر "
كبست بيديا عالملحفة وهزيت روحي نحكي
انا :" انت ؟"
الممرض :" انا بعثني ولد المكي.. اياا هز روحك واعمل الي بش نقلك عليه.. مانحبش تكسير راس خير مانتكشفوو.. مفهوم ؟"
تبسمت نحكي
انا :" مفهوم صاحبي "
لحظتهاا خذيت نفس مرتاح شوي وماخممت ف شي كان ف خروجي من هناا.. خاطرني مش مستعد نرجع للحفرة هاكي قبل ماناخذ بحقي...
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
