حلقة 82
#قمر_تحكي
للحظة هاذي مش مصدقة الشي الي انا عايشتو .. ليث خلاني نحقق كل حاجة حلمت بيها .. عاود بنالي مستقبل جديد .. وكتبلي فرحة جديدة .. نتمنى الي انا فيه تكون مايكونش حلمة .. حلمة مزيانة ونفيق منهااا .. نحب حياتي تكمل بالشكل هذاا .. تكمل وانا قريبة من ليث .. هو صار محور حياتي و سعادتي .. بعدي علييه كافي انو يهدني من جديد و يرجعلي كل إحساس خايب انا دفنتو ..
حليت عينيا على نهار جديد .. نهار واحد يفصلني على عرسي بليث .. من غدوة بش نصير معاه على طوول .. نعيش معاه في دارناا الي هو ختارهااا .. من غدوة بش نصير نرقد بين يديه و انا مطمانة وحاسة بالدفااا ..
هزيت روحي وقمت .. دخلت لبيت البانو و دخلت تحت دوش .. اول مرة نحس روحي متفرهدة هكااا و خفيفة بالطريقة هاذي .. كملت غسلت لفيت روحي بالمنشفة .. ووقفت قدام لمراياا وبقيت نغزر لروحي ونتبسم .. ليث خلاني نرجع نحب روحي و نحب نشوفهااا .. نحب نتمعن في كل حاجة فيااا و نشوف روحي بغزرتو هوو الي تطيرني فوق سحاب .. تبسمتي تمحات على الضربة الي حسيتها في قلبي كيف خظ بالقوي .. حطيت يدي فوق صدري و بقيت نرد في النفس .. مش عارفة علاه حسيت هكااا .. اما في لحظة حسيت دموعي تملاو في عينيي و جاتني رغبة في البكااا .. حليت السبالة و بليت وجهي .. خذيت نفس و خرجت للبيت .. تبسمت كيف ريتو قدامي قاعد عالسرير .. لحظتها الخوف سرا في بدني اكثر و تمكن فيااا .. قربتلو نحكي " صباح الخير ليث .. شتعمل هناا "
قام ووقف قدامي باسني من خدي يحكي " صباح النور .. توحشتك "
شديت دموعي بالسيف نحكي " حتى انا ليث توحشتك برشة "
طبس راسو ناحيتي يحكي " شبيك "
هزيتلو براسي لا نحكي " لا شي .. قلي شنوة بش نعملو اليووم ؟"
" تو بش نهزك للفاك .. لازمك تمشي تاخذ جدول الاوقات و تشوف الأساتذة و بعد نتعادللك عندي ليك مفاجأة حبي "
بقيت نغزرلو يحكي كلمة نسمعها وكلمة لا .. مانعرفش كيفاه نطقت نحكي " ليث"
"ممم" قربت منو وحطيت راسي على صدرو "ليث...عنقنني "
عالكلمة حسيت بيديه دارت وراء ظهري وجبدني عندو .. كبست عليه بيديا الزوز وقتها دموعي هبطو يجريو على خدي .. بعدت عليه و غزرتلو في عينيه .. و من غير ما نتردد و لو لحظة حطيت شفافي فوق شفايفو و غطست فيهم .. بستو بلهفة .. بعمق كل احساس قاعدة نعيش فيه الوقت هذا .. حسيت بدفا يديه الي طلعت وتحطت وراء رقبتي .. جبدني ليه اكثر حتى تضربنا في بعضنا و صرنا زوز في بدن واحد و انفاسنا تخلطت مع بعضها .. رعشة قوية سرات في بدني مع بوستو الي قوات .. الشي الي خلاني نشد في سوريتو أكثر .. لحظتها محيت من بالي اي حاجة صارت و لا تنجم تصير .. خممت كان في حياتي الجديدة الي بش تبدا مع ليث من اللحظة هاذي ..
بعد علياا و تبسم على جنب يحكي " هاذي المرة الثانية الي تبوسني انت يا فرخة "
حط يديه على خدي و مسحلي دموعي ورجع يحكي
" علاه لبكا تو.. شوصيتك انااا ؟"
عديت بلساني على شفايفي نحكي " حاجة اقوى مني .. دموع الفرحة "
باسني من جبيني يحكي " انشالله ديما فرحانة قمرتي .. اياا برا بدل منظرك هكاا قدامي بش يخليني نشدك بالسيف "
هبطت راسي وشفت روحي كيفاه بالمنشفة .. وقتها وين فقت على روحي .. حسيت وجهي فور نحكي " يااا برا اخرج ليث اماان "
غزرلي بخبث يحكي " هاني خارج .. اما من غدوة معادش بش نخرج هاو في بالك "
ضحكت نحكي " والله لا تحشم انت "
عدا يدو على شعرو وهزني وحطني "والله لتو نعتبر مزلت حاشم " غمزني و عطاني بظهرو .. ريتو كيف خرج و سكر الباب وراه .. بقيت واقفة في بلاصتي مش فاهمة شبيني .. عديت بيديا الزوز على شعري و قدمت للخزانة .. بدلت حوايجي و حضرت روحي وهبطت .. لقيتو قاعد مع خالتي يستنى فيااا .. قربت ناحيتهم نحكي " صباح الخير خالتي "
تبسمتلي تحكي " صباح النور عروستنااا "
تبسمت على كلمتها من غير حتى كلمة .. ماعرفتش علاه بقيت ساكتة مانجمتش ننطق .. تلفت لليث كيف قام يحكي " كان حاضرة خلينا نمشيو "
هزيتلو براسي باهي و خرجت معاه .. طلعنا في الكرهبة وشدينا ثنية الفاك .. ثنية كاملة و انا متكية براسي عالبلار و نغزر لطريق .. فقت من سرحتي على صوتو يحكي " قمر شبييك ؟ لباس ؟"
تلفتلو نحكي " شي يا روحي .. انا مليحة جيست متوترة خاطر ليوم اول نهار في الفاك "
عدى بدو على شعري يحكي " ماتتوترش .. انت ركز و كل شي يكون مليح "
هزيتلو براسي باهي و بقيت ساكتة .. شوي ووصلنا .. راكا الكرهبة و تلفتلي يحكي " أيا اهبط تو .. انا عندي شوي خدمة نكملها حتى تكلمني نجيك "
" باهي نتقابلو بعد مالا " كملت جملتي وقربت منو .. حطيت يدي على رقبتو وشفايفي على خدو .. غمضت عينيا وبستو بالقوي .. بعدت عليه شوي و غزرت ف عينيه نحكي " نحبك برشة ليث "
دور بعينيه على وجهي و ضحكلي يحكي " و انا نعشقك .. أيا اهبط معادش عليك وقت "
بعدت عليه هزيت ساكي و حليت باب الكرهبة وهبطت .. دخلت للفاك وبقيت ندور بعينيا عالبلاصة .. للحظة هاذي مش مصدقة اني رجعت نقراا .. الدنياا في ليلة و نهار خذات مني كلل شي .. و في ليلة و نهار زادة رجعتلي كل شي و أكثر .. مشيت للادارة و خذيت الجدول شفت وين و شنوة نقرأ تو .. ومشيت للصال .. لقيت برشة بنات و اولاد لداخل .. حطيت شعري لتالي و دخلت .. اخترت بلاصة و قعدت وحدي .. بقيت نسمع في الأستاذة تحكي و تعرف بروحها و بالمتيارر متاعهاا .. ساعات نركز معاها و ساعات نسرح في الفراغ هكاكا ..لين تعدا الوقت .. هزيت ساكي و خرجت نجري .. مشيت للكافيتيرياا حبيت نرتاح شوي و نصفي ذهني ..
طلبت ماكلتي من السرفور و قعدت نستنى .. شوي وريتو حط الطبق قدامي .. هزيت راسي معاه يحكي " هاذي ليك "
شفتو كيف حط ورقة في الطبق و مشى .. ماخلانيش حتى نسالو .. حسيت يدي رعشت اول ما مديتها ناحية الورقة و حليتها ..
" كان تحب ليث يبقى عايش .. ايجا للباب الخلفي متاع الجامعة "
اول ما قريت الي مكتوب حسيت ريقي وحل في حلقي و الدم جمد في عروقي من الخوف .. شديت الورقة و كمشتها بديا و قمت نجري .. مانجمت نشوف شي قدامي بقى كان لكلام الي فالورقه بين عينيا .. اول ماوصلت قدام الباب .. وشفت الكرهبة حسيت بساقيا رخت بيا.. دورت بعينيا عليه ريتو كيف واقف و يتبسم .. نفس الخوف الي حسيتو قبل رجع تمكن فياا تو .. غزرتو و ابتسامتو خلاوني نوخر بخطواتي لتالي .. اما وقفت على صوتو يحكي " شبيك خايفة .. انا هنا بش نحكي معاك مش اكثر "
ريتو كيف حل باب الكرهبة يحكي " اطلع .. لاازمك تسمعني "
لميت طرف القوة الي بقاتلي نحكي
" شنوة تحب مني سي محمود "
تبسم على جنب يحكي " اطلع و تو تعرف "
طلعت في الكرهبة و طلع بجنبي .. ريتو كيف أمر الشوفور بش يهبط .. رجع غزرلي يحكي " عندنا برشة متقابلناش "
هزيت بحاجبي نحكي " و علاه بش نتقابلوو .. الي كان يربطني بيكم سايي وفااا "
ضحك بالقوي يحكي " ههه لا موفاش .. ماتنساش انك مرت ولد اختي .. يعني احنا عيلة"
تبسمت على جنب نحكي " عيلة؟؟ لا انا و لا ليث يشرفنا نكونو فرد من عيلتك .. و تو احكي شنوة تحب مني "
ضحك باستهزاء يحكي " شنوة تعرف انت على ليث ماضيه؟ .. شغلو!؟ منظنش لي تعرف برشا.... اما انا .. بش نكون فاعل خير و نوريك اليوم حقيقة راجلك الي بش تعاود تاخذو و فرحانة بيه "
ريتو كيف جبد تاليفون من جيبو و حط فيديو يحكي " تفرج .. شوف ححقيقة راجلك"
مديت يدي بالسيف و خذيت التاليفون من يديه ...حليت الفيديو وبقيت نغزر .. دموعي هبطو و انا نراا فيه كيف شاد السلاح في وجه راجل و يصيح على علو صوتو
" موووتك على يديي تووو بش يكوون دررس لأي واحد يخوون خااالي و لا يخوني انااا "
حطيت يدي على فمي و تهزيت و تحطيت على صوت السلاح الي ضرب .. دموعي قواو كيف شفت الراجل طاح ميت من الطلقة الي تلقاها في راسو .. يدي ترخف و طيحت التاليفون .. هزيت راسي معاه كيف رجع يحكي " شفت ليث .. سمعتو كيف قال خالي .. هو تابعني وولدي .. و انا نعرفو مليح .. و صدقني مصيرو يرجع هكاكا "
بقيت نسمع فيه و انا مش مصدقة .. مانجمت نستوعب حتى كلمة من كلامو .. حسيت لكلام هرب علياا ماعرفتش شنوة نحكي قدام لي ريتو.. كان دموعي عمال ينزلو اكثر ....هزيت روحي ونزلت من الكرهبة.. بقيت نكركر في ساقيا بالسيف .. منعرفش ليث كيفاش نجم يعمل هكا .. فكرة انو يكون قاتل حسيتها خنقتني .. كانو مش نفس الشخص لي نعرفو .. كيفاش نجم يقتل شخص بالطريقة هاذي .. للحظة حسيت روحي كرهت كل لحظة جمعتني بيه .. يا ريتني بقيت وحدي اهون اني نعيش العذاب هاذا من جديد ..
في لحظة حسيت روحي طفيت مرة اخرى .. كل شي وفى قبل حتى ما يبدأ .. بقيت نمشي ومش عارفة وجهتي .. رجعت ضعت من جديد .. الدنيا تسكرت في وجهي و سلبت مني فرحتي في لحظة .. المرة هاذي وصلت لنهاية .. نهاية عكس الي تخيلتها انا و ليث ..
بقيت هايمة هكاكا منعرفش وين بش نمشي ولا شنوة بش نعمل .. الجو كان مغيم والريح قوية .. حسيتها عاصفة تشبه للي انا فيه تو .. قعدت قريب من الشط .. نفكر في لي بش نعملو .. جبدت تلفون من جيبي وغزرت لنومروه كيف قاعد يطلب فيا .. هزيت عليه .. سمعتو يحكي " وينك قمر .. جيت للفاك ملقيتكش "
غمضت عينيا على دمعتي كيف هبطت نحكي " انا قدام الشط .. مستنيتك هوني "
" شنوة شتعمل غادي انت .. وكيفاش تخرج وحدك "
نزلت التلفون وعلقت عليه حسيت بدموعي قواو اكثر .. بعدما سمعت صوتو .. بقيت هكاكا نبكي ونغزر للبحر
حتى سمعت صوتو وراياا يحكي
" انت شتعمل هوني ... علاش مستنيتنيش "
هزيت روحي وقمت تلفتلو وبقيت ساكتة .. ضيق عينيه فيا يحكي " انت قاعدة تبكي ياخي ؟"
قدم مني بسرعة ورجع يحكي " شبيك شفما قمر ؟"
هز يدو بش يحطها على خدي رجعت لوراء بخطوة نحكي " متمسنيش "
ريتو كيف كبس على يدو وغزرلي مستغرب يحكي
" شبييك شصاار ؟؟"
هزيتو وحطيتو بعينيا نحكي " الي صاااار اني عفتتك .. كرهتكك وكرهت الثانية لي دخلت فيها لحياااتي وتو " مديت يدي للخاتم نحيتو من صبعي ورميتو على الارض نحكي " كلشي وفا بيناتنا "
ريتو كيف بقا يغزلي مصدوم .. جيت بش نمشي... مد يدو جبدني من مرفقي بالقوي يحكي " انت شقااعدة تخرف اه شنوة كلشي وفا ... بالسااهل هي فهمني شفمااا "
" نحي يددك عليااا "جبدت يدي منو وقربت منو ضربتو على صدرو نحكي " معااادش نحب نبقى معاااك .. معاااد نحب شي يربطني بييك ....فهمممت ... انا عرفت غلطتي... اما نحمد ربي لي عرفتها قبل ما نربط روحي بيك...هزيت عينيا قي وجهو وتبسمتلو
"خالك ليوم جا للجامعة .. تعرف شقلي!؟ قالي انت شنوة تعرف على ليث "
ضحكت على جنب وكملت نحكي "و انا بلحق طلعت منعرف شي ... مثلا.... منعرفش لي انت زادة مجرم"
ريتو كيف حل عينيه على الكلمة بقا يغزرلي جامد في بلاصتو
رحعت بعدت عليه نحكي "انا لحمارة لي صدقتك ونسيت لي انت في الاخير من عيلتهم .. كلكمممم نفس الشيي .. انت وولد خالك مجرمين .. الفرق الوحيد بينكم هو نوع الجريمة .. اخر حاجة ممكن نفكر فيها اني نربط روحي بواحد قتااال ارواااح تسمع فياا"
ريتو كيف بقا يغزرلي ساكت ودمعة نزلت من عينو .. دورت وجهي وعطيتو بظهري بعدت من غادي بسرعة... بقيت نمشي ونبكي .. كلشي وفا و من اليوم معادش فما شي اسموو ليث وقمر يمكن هكا احسن شي ...
ماعرفتش كيفاه وصلت لدار عم مصطفى
.. دخلت وطلعت لغرفتي نجري .. ريت خالتي كيف دخلت ورايا تحكي " وينك انت...هاي جات الخياطة بش تعدلك الروبة "
غزرتلها وتبسمت على جنب نحكي " مفماش داعي ... العرس تلغى "
حلت عيناها فيا تحكي " شنوة قاعدة تخرف انت .. شنية لعرس تلغى هاذي "
" الي سمعتو خالتي "
جبدتني من يدي تحكي " قمرر متهبلنييش.. لعبة هي "
غزرتلها و عليت في صوتي نحكي " يزيييي قتلك صايي .. ليث معادش نحب نسمع اسمو ... مفما شي يربطني بيه مانحبكمش تحكو عليه قدااامي "
خليتها واقفة و مشيت ناحية الروبة شديتها نحكي
" كل شي وفااااا .. معادش لا عرس و لا ليث "
كملت كلامي و شقيت الروبة على قوة قوتي .. ريت خالتي كيف قربتلي شدتني من مرفقي تحكي
" شصااار .. علاه هذا الكل؟"
بعدت عليها نحكي " نحب نبقى وحدي "
" قمر .. "
قصيت علاها نحكي " امااان خالتي خليني وحدي "
ريتها كيف خرجت وسكرت الباب .. حسيت ساقيا خانوني و طحت في القاعة .. حطيت الروبة فوق صدري و كبست عليهااا و طرشقت بالبكا .. حسيت بحرقة في قلبي موتتني بالحيااا .. النفس ضاق علياا و تخنقت .. خسارتي المرة هاذي هدتني بقوة .. يا ريتني لا حبيتو و لا تعشمت فييه .. يا ريتني متت و لا عشت النهار هذااا
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
