#قمر_تحكي
رجعت حليت عينيا بالسيف على ضو الشمس لي ضرب فيا..عديت بعينيا عالبيت مالقيتوش حذاياا عرفتو مشى يخدم..هزيت روحي شوي وغزرت للساعة.. حليت عينيا على وسعهم كيف لقيتها قريب الساعتين فات نص نهار وانا راقدة.. ماعرفتش كيفاه رقدت للوقت هذاا من غير مانحس..اول ماتحركت شوي بش ناقف حسيت الدنيا دارت بياا.. عديت بيديا الزوز على وجهي وقمت.. لازمني نشد روحي على خاطر اليوم نهار طويل يستنى فياا.. اصلا حسيت روحي توترت اكثر..دخلت لتوالات غسلت حالتي وريقلت اموري ورجعت للبيت..بدلت حوايجي ورجعت قعدت على طرف السرير هزيت تاليفوني وحطيت رقم ايمن..شوي وقت ورد علياا يحكي
ايمن :" بونجور قمر "
انا :" بونجور ايمن.. حبيت نسألك وصلت ليث ؟"
ايمن :" اي وصلتوا وقال بش نرجعلو مع لعشية يتعدا للطبيب وبعد يروح "
عضيت على شفايفي ورجعت غزرت للساعة..نحكي
انا :" ايمن كان متفاضي ميسالش تتعدالي بعد ساعة.. نحب نقضي شوي حاجات "
ايمن :" باهي كيف تجهز روحك اطلبني نكون عندك "
انا :" عيش خوياا "
علقت عليه وقمت فيسع.. حضرت ساكي..حطيت فيهاا روبة وحاجات نستحقهم.. هزيت مخادد وفرش وشوي حاجات للسهرة.. نزلت فيسع لمكتب ليث..دخلت وقربت لبيروه حليت الدرج خذيت المفاتح ورجعت لبيتي حطيتهم ف الساك.. دخلت خذيت دوش وخرجت شيحت شعري..غزرت للساعة وطلبت ايمن بلوقت.. كملت حضرت روحي فيسع وخرجت بعد ماسمعت صوت التزمير كيف ايمن وصل.. خرجت فيسع وطلعت ف الكرهبة غزرت للايمن نحكي
انا :" اهلا ايمن "
ايمن :" اهلا.. شحالك قمر؟"
انا :" الحمدالله عيشك خاطر جيتني.. سامحني ف تعبك "
ايمن :" مفماش تعب.. قلي وين تحب تمشي ؟"
انا :" خلينا نمشيو للسوق بش نقضي شوي وبعد تو نقلك وين توصلني "
هزلي براسو باهي من غير حتى كلمة وخدم الكرهبة شدينا الثنية للسوق.. مسافة الطريق ووصلنا.. نزلت للاول محل وبقيت نقضي.. خذيت ورود و شموع و شوي حاجات بش نستحقهم ورجعت للكرهبة وين ايمن.. غزرتلو نحكي
انا:" سامحني خليتك تستنى برشة "
ايمن:" لا ميسالش "
انا :" تو بش توصلني ل ****.. و نحبك بعد توصل ليث لغادي "
تبسم يحكي
ايمن:" باهي "
خدم الكرهبة وشدينا الثنية للفيلا.. طريق كامل عديتو وانا متوترة للتحضيرات و متحمسة لرايي ليث.. كل مرة نتخيل ف ردة فعل ليه.. اصلا مش عارفة كيفاه بش نتصرف بلحق حسيت روحي دخلت بعضي.. فقت من سرحتي على صوت الكرهبة كيف وقفت.. سلمت على ايمن وهزيت القضية ونزلت.. اول مانزلت هزيت راسي وبقيت نغزر للدار كيفاه صارت بعد آخر مرة.. خذيت نفس طويل وقدمت للباب حليتو و دخلت.. سكرت الباب وريااا و دخلت.. حطيت القضية على جنب وبقيت ندور نشوف ف الدار ونخمم كيفاه بش نزينهاا ووين بش نقعدو..حليت عينيا كيف شفت الصالة الي كانت فيهاا شباك بلار كبير ومقابلتها الجنينة الخلفية.. بقيت نغزر للمنظر كيفاه كان محلاه من وراء الوردات الي كانو مفتحين و لخضار الي كان مالي الجنينة..قربت حليت الشباك وين هبت نسمة خفيفة خلاتني نتفرهد شوي.. رجعت وخرت بخطواتي لتالي وجبدت تاليفوني اول شي بش نكمندي الماكلة ماحبيتش انا نطيب حسيت روحي مقلقة وماعينيش ناقف ف الكوجينة.. كمنديت الماكلة ورجعت وين القضية.. هزيتهاا وخرجت للجنينة.. على قد ماعجبني المنظر غير الطقس الي كان محلاه حبيت السهرة تكون هناا.. فرشت زربية وحاوطتهاا ب مخادد كبار.. طبست فرشت الورد و حطيت الشموع ف الوسط و بقيت الشموع عالارض.. تبسمت وحدي كيف تفكرت اخر مرة حضرت فيها جو كيف هذاا صحيح وقتها فسدت كل شي اما كانت احلى ليلة ف عمري.. رجعت للكوجينة خذيت الاصحنة و الكاسات ورجعت للجنينة حطيتهم عالطاولة ورجعت للصالة خدمت الموسيقى وعليت شوي ف الصوت.. هكاكا وسمعت صوت الباب كيف دق عرفت انو الأكل وصل.. خذيت لفلوس من ساكي وخرجت استلمت الأكل ورجعت دخلت حطيتهم ف المكروند ورجعت للصالة هزيت الساك الي كانت فيها حوايجي ودخلت لسال دوبان نحيت حوايجي وجبدت الروبة الي جبتها معاياا.. لبستهاا وغزرت لروحي ف المراياا..
عديت بعينيا عليهاا كانت روبة بيضاء قصيرة شوي فيهاا اكمام لحد المرفق و صدرها عريان شوي..حطيت يدي وعديتها على الحزام الي كان ف الوسط الي حدد بين الصدر و الكرش.. خذيت نفس وطلعت يدي فردت شعري على كتافي وخذيت تروس المكياج..عملت حاجة خفيفة وروج غامق ..لميت كل شي ورجعت للصالة.. تلفتت على صوت تاليفوني هزيت لقيت ايمن بعثلي ميساج انهم ف الطريق كيما وصيتو انا.. عضيت على شفايفي وكبست على يدي بش نسيطر على روحي شوي من قوة التوتر الي حسيتو تو.. مشيت نجري للكوجينة سخنت الماكلة هزيتهاا لجنينة.. شعلت الشموع خاطر الدنياا ظلامت ورجعت للصالة.. هزيت الصندوق الي حضرتو مخصوص لليث.. الصندوق هذاا اكثر شي مميز ف السهره.. كبست عليه وخرجتو لجنينة حطيتتو على جنب وقعدت عالكرسي نستنى ف وصول ليث واتا نغزر للسماء كيفاه كانت صافية ومستحلية لنسمة وريحة الورد الي هبت ف البلاصة لكل..فقت من سرحتي على صوت الباب كيف تحل.. قمت فيسع ودخلت سمعتو كيف يحكي
ليث :" قمر وينك ؟"
دخلت للدار وين ريتو يدور بعينيه يلوج علياا.. هز راسو معاياا وغزرلي.. هزني وحطني بعينيه وقربلي يحكي
ليث :" قمر شبيك جيت هنا..شفما ؟"
قربتلو اكثر وطلعت على طراطيش صوابعي بستو من جنب شفايفو نحكي
انا :" ايجا معاياا تو تعرف "
ليث :" وين ؟"
شديتو من يديه وخرجناا لجنينة.. وقفناا ريتو كيف غزر وين انا محضرة لعشاء ورجع غزرلي وتبسم يحكي يحكي
ليث :" شنوة هذا الكل ؟"
حطيت يدي على صدرو وهزيت راسي معاه غزرت ف عينيه نحكي
انا :" توحشتك ليث..على هذاكا حبيت نحضر سهرة خاصة بينا.. حبيت نبعدو على كل شي ونبقى معاك شوي "
عدا بعينيه عليا وحط يديه على جنبي جبدني عندو شوي حتى ضربت ف صدرو وحسيت ب ريحتو تغلغلت فياا.. كبس على ظهري من تالي يحكي
ليث :" والله احسن ماعملت.. اما علاش هناا ؟علاش مش ف دارنا "
تبسمت وقربتلو دوب حطيت شفايفي على شفايفو نحكي
انا :" ممنوع الأسئلة ياروحي.. السهرة مازلت طويلة و بش تعرف كل شي "
ضيق عينيه فيا يحكي
ليث :"منعرفش علاش حاسك مخبية حاجة؟ "
بعدت عليه شوي ورجعت شديتو من يديه نحكي
انا:" ههه.. هياا ايجاا شوف شنوة حضرت "
ليث :"استنى..نحب نغزرلك ليك قبل "
عدا بيدو على روج وقربلي اكثر يحكي
ليث :"شاهي نحيه "
بعدت عليه فيسع نحكي
انا:"مش تو ليث..مزالت السهرة اماان "
تنهد بلقاوي يحكي
ليث"باهي لالة هاني بش نزيد نصبر"
انا:" هيا ايجا"
كبس على يدي وبقى يتبع فياا وين حضرت لعشاء.. عدا بعينيه على كل شي وضحك يحكي
ليث :" انت حضرت هذا الكل ؟"
انا :" اي عجبك ؟؟؟"
قربلي وعدا بصوابعو على خصلات شعري يحكي
ليث :"علخر "
ميل راسو وعدا بعينيه علياا من فوق للوطة ورجع غزر ف عينيا يحكي
ليث :" اما بصراحة أكثر حاجة عجبتني هناا.. انت.. محلاك طلعت بالابيض "
عضيت على شفايفي وحطيت يدي على خدو..نحكي
انا :" هياا خلينا نقعدو "
تبسم وهزلي براسو باهي.. ريتو كيف قعد..حطيت لمخدة وراه بش كتفو مايتعبش وقعدت بجنبو.. ريتو كيف غزر للماكلة يحكي
ليث :" الريحة تشهي "
غرفتلو ف صحنو نحكي
انا :" هو لحق مش انا حضرتهاا.. مالقيتش وقت والله "
شدني من يدي و باسني من كفها يحكي
ليث:" ميسالش قمرتي..المهم حضرتلنا سهرة..عنا برشا على جو هكا "
انا :" اي صحيح منيش مصدقة لي خلصنا من كابوسهم وبش نعيشو مرتاحين"
ليث:"من ليوم بش نعيشو كل شي تحرمنا منو وبلا خوف..وانت بش ترجع لجامعتك وانت مرتاحة "
تبسمت نحكي
انا :" اي حمد الله"
رجع غزر قدامو وين الورد و الشموع ورجع غزرلي يحكي
ليث:" ساعة يطلع منك انت.. كل مرة وانت محضرة سهرة هكاا.. بش تخليني نتعود "
انا :" والله نحبك تتعود المهم تكمل السهرة على خير.. ليلتها انا فسدت كل شي "
عدا بعينيه عليا يحكي
ليث :" بالعكس انت وقتها خليتني نعيش احلى ليلة ف حياتي "
طبست راسي وتبسمت من غير حتى كلمة..حسيت روحي حشمت من غزرتو و كلامو كيف تفكرت الليلة هاكي.. رجعت هزيت راسي على صوتو يحكي
ليث :" حل فمك "
تبسمت وحليت فمي كليت من يدو
ليث:"صحة لحبي "
قمر:"عيشك ياروحي"
خذيت السكينة وبقيت ناكل وساعات يوكلني هو.. خذيت رشفة من كاسة العصير وغزرتلو نحكي
انا :" ماسالتكش..كيفاه عديت نهارك ليوم ؟ ماتقلقتش ب كتفك ؟"
هزلي براسو لا يحكي
ليث :" لا لباس "
تبسم بخبث ورجع يحكي
ليث :" و نتصور كان ترجع انت تدهنلي الليلة وتبوسني كيف لبارح تو نتحسن اكثر "
ضحكت نحكي
انا :" ههه والله هذاا شنوة ناوية نعمل من غير ما تقلي "
ليث :" خلينا نكملو لعشاء فيسع مالا وندخلو اما الليلة بش نكملو مش كيف البارح هاني خليت الطبيب يفكلي يدي على خاطرك "
كمل كلامو وغمزني.. حليت عينيا على كلامو وبقيت نغزرلو نحكي
انا :" ليثث ياخي هبلت كيفاش تفكها انت"
ليث:"تو وين فقت حبي..هاني من قبيل بجنبك"
بقيت نغزرلو مصدومة بلحق من التوتر ماخذيتش بالي لي نحاها..ذبلت عينيا فيه نحكي
انا"ليث امان والله ما انتبهت سامحني ياخي شبيك نحيتها"
ليث:"يزي قمرتي خليني شايخ بالسهرة.. الطبيب قالي عادي لمهم ما نهزش الثقيل"
هزيتلو براسي باهي
انا :" باهي هاني بش نخليك.. اصلا السهرة مازلت طويلة الليلة "
هز بحاجبو يحكي
ليث :" علاش ؟"
انا :" كمل عشاك قبل "
ليث :" باهي هاني نتبع فيك "
ضحكت وبقيت نغزرلو كيف كان ياكل ويحكي كل مرة ف حاجة.. حيست روحي بش نطير من الفرحة وقلبي شوي وياقف.. مانجمتش نبعد عينيا من عليه و لا نجمت نشبع من صوتو وحديثو.. غزرتلو يحكي
ليث :" كملت.. أيا قلي شفما ؟"
كشبرت وجهي نحكي
انا :" شبيك مزروب ليث.. اصبر "
قمت من بلاصتي ولميت الاصحنة نحكي
انا :" خليك هناا هاني راجعة "
هزلي براسو باهي من غير حتى كلمة..دخلت الاصحنة وخذيت التحلية زادة الي وصيت عليهاا ورجعت لجنينة.. حطيتهاا قدامو وقعدت بجنبو نحكي
انا :" هاذي التحلية الي انت تحبهاا "
قربلي شوي ودور بيديه وراياا جبدني عندو وغزر ف شفايفي يحكي
ليث :" والله مفماش تحلية نحب عليهاا تو من غيرك "
انا :"هأه نحبك تاكل "
ليث :"باهي لالة ذوّقني"
تبسمت وحطيت الملعقة في فمو كلاها ورجع غرفلي ليا زادة حطها في فمي..حليت عينيا كيف حسيت بشفافو وسط شفافي غمضت عينيا وبقيت نطاوع فيه.. اول ما بعد عليا تبسم يحكي
ليث":مبنها التحلية هاذي"
تبسمت وعديت بعينيا عليه ساكتة.. قمت من حذاه نحكي
انا :" هاني راجعة "
بقى يتبع فيا بعينيه ساكت..خذيت الصندوق الي حطيتو على جنب ورجعت حذاه..قعدت بجنبو نحكي
انا:"هذاا ليك "
عقد بحواجبو يحكي
ليث:"شنوة هاذا..جايبتلي هدية "
انا :" مش انت سألتني علاش احناا هناا ؟"
خذيت نفس طويل و حاولت نشد دموعي نحكي
انا :" اخر مرة كنا فيها هنا..انت عشت اسوء ليلة في حياتك وخسرت اغلى شي بقالك من عيلتك..ليلتها رغم قهرتك عليهم ورغم لي انا سبب ف الشي الي عشتو.. انت مغزرتش لخسارتك وحسستني اني اهم شي عندك رغم لي ليلتها انا تقهرت برشا.. بلوقت لي انت كنت سبب في فرحتي انا ديما سبب مشاكلك..ليلتها خفت انك تسلم فيا..تفد مني وتخليني..اما لقيت لعكس..انت طلبت يدي و قتلي لي انا عيلتك وانا كل شي عندك.. حسيتني لي عندي قيمة بلحق بعد ما فكرت اني خسرتها بعد لي تعدا عليا الكل..وقتها انا حبيتك اكثر وتمنيت كان جا عندي شي نجم نعطيهولك ونردلك شوي من مزيتك.. اما انا ما كان عندي حتى شي.. الليلة بش نعطيك حاجة نتمنى انها تفرحك وترجعلك ولو شوي من لي انت فقدتو "
تبسمت وهزيت يدي مسحت دموعي وعطيتو الصندوق نحكي
انا :" هذا ليك انت "
بقا يغزرلي وبعد مد يدو خذاه وطبس راسو.. قلبي ضرب بقوة وكرشي وجعتني اول ماريتو رفع لغطاء.. ضميت على شفايفي و انا نغزرلو كيفاه مستغرب.. هز اللعبه الي كانت الي ف وسط الصندوق وغزرلي تبسم على جنب يحكي
ليث :" شنوة هذا ؟ ظاهرلي لخبطت بيني وبينك يافرخة "
غزرتلو على جنب نحكي
انا :" يزي ليث.. ساعة انا ماجبتهاش ليك انت ؟"
عقد بحواجبو مستغرب يحكي
ليث :" مالا لشكون ؟"
انا :" جبتهاا بش تلعب بيها مع الصغير "
عدا بعينيه عليا يحكي
ليث :"هذا لكرم ؟"
بعدت الصندوق من فوقو حطيتو على جنب وقربتلو اكثر.. خذيت اللعبة من يديه وغزرتلو نحكي
انا :" لا..لولدنا "
عدا بعينيه عليا وحلهم يغزرلي..نظرة الصدمة والدهشة قريتهم من غير ماينطقو شفايفو.. شدني من يدي يحكي
ليث :" قمر.. ش شقصدك ب..ولدنا ؟"
حسيت روحي توترت اكثر خذيت نفس وحاولت نمنع دموعي نحكي
انا :" ان انا.. حبلة "
تبسمت ورجعت نحكي
انا :"عيلتنا بش تكبر"
دمعتي طاحت بقيت نغزلو حسيت بدني لكل يرجف وانا نستنا فيه يجاوبني....
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
