#محمود_يحكي
وخرت بخطواتي لتالي وترميت عالكرسي مقابلو.. شوفتوا قدامي و كلامو على عايلتو حسيتهم كرزوني اكثر وين لقيت روحي تفكرت الي صار ف الماضي بالتفصيل الممل..حطيت ساق على ساق وتبسمت نحكي
انا :" حق بوك وامك ؟ على اي حق تحكي؟؟ صدقني الي عملتو فيهم مايجي شي قدام الي عملوه هوما.. انا هو الي خذيت بحقي منهم يستاهلو الشي الي صار فيهم واكثر "
ريتو كيف يحرك ف يديه بش يفكهم يحكي
ليث :" تحبني نصدق لي انت الضحية في الحكاية ؟"
هزيت بحاجبي نحكي
انا :" مانيش ضحية اما انا حاسبت بوك.. حرمتو من كلشي يملكو كيف ماحرمني قبل من كل حاجة انا حبيتهاا.. خليتو يخسر بالضبط كيف ماخلاني نخسر.. بوك الطحان حسبتو صاحبي.. حطيتو ف مقام خوياا عطيتو مريم اختي الي كانت بالنسبة لياا أغلى ماعندي.. اما هو خلاني نخسر كلشي كلشي "
قمت من بلاصتي وقربت منو غزرتلو في عينيه نحكي
انا :" انت وقت حبيت بعتنا لكل خاطر مرتك..الحب هو لي يحييك وهو لي يقتلك...وانا مت وقت خسرت لي حبيتها...بوك لي قتلني..ومن يومها حلفت بش نخليه يعيش اللي عشتو اضعاف...انا حبيت مرة وحدة يا ولد اختي..جريت وراها حتى حفيت كانت صحبة مريم امك..كانت تجي عندنا للدار...وقت كنت نراها نحس روحي طاير في السماء...بقيت وراها حتى وافقت تعطيني فرصة... وافقت انها تكون ليا اما في ليلة وحدة بوك قلب كلشي على راسي "
#فلاش_باك
#قبل_30سنة
اول مادخلت للفيلا لمحت مريم قاعدة ف الصالة وبجنبها فتون.. قلبي ضرب بقوة اول ماريتهاا قدامي تضحك.. مانعرفش كيفاه قدمت بخطواتي ناحيتهم ووقفت نغزرلهاا كيفاه تتصرف هاذي اول طفلة نحس روحي ملهوف عليها بالطريقة هاذي..ماعرفتش كيفاه و لا وقتاه حبيتها وين لقيت روحي مستعد نعمل كل شي على خاطرهاا المهم هي ماتبعدش علياا لحظة وحدة.. اول ما ريت مريم قامت وخرجت من حذاهاا دخلت فيسع وقربتلها نحكي
انا :" فتون...؟ "
ريتها كيف هزت راسها معاياا وغزرتلي تبمست تحكي
فتون :" محمود.. وينك لتو ؟ من بكري نستنى فيك "
ضعت في تبسيمتها وقربت منها.. قعدت بجنبها وشديتهاا من يداهاا..هزيتهاا وبستها من كفها نحكي
انا :" كان جاء ف علمي انك هنا راني سلمت ف كل شي وجيت على بكري "
ضحكت تحكي
فتون :"ميسالش..المهم قلي شحالك وشحال خدمتك ؟"
انا :" انا مليح كيف ريتك.. غير هكا الأمور الكل ماشية كيف ما انا نحب.. انا وعدتك بش نخدم ونضمن مستقبلي ونصلح من روحي على خاطرك.. مانحبك تخمم ف شي "
كبست على يدي وعدات بعيناها عليا تحكي
فيروز :" و انا وعدتك كيف تصلح من روحك بش نستناك وناقف قدام الكل على خاطرك محمود "
انا :" نعرف.. على هذاكا على قريب بش نجي نطلبك حضر روحك "
فتون :" بلحق ؟"
هزيتلها براسي اي نحكي
انا :" اي بلحق.. ماتقليش بدلت رأيك ؟"
ضحكت تحكي
فتون :" اكيد لاا يا روحي "
طبست عليهاا شوي وبستها من خدها نحكي
انا :" ربي يخليك لياا "
قص علياا صوت باب الدار الي تلطخ بقوة ومعاه صوت كمال ينادي باسمي على علو صوتو.. ريتها كيف حلت عيناها فياا خايفة تحكي
فتون :" محمود شفما ؟"
هزيتلها براسي لا بمعنى مانعرفش نحكي
انا :" مانعرفش هذا صوت كمال راجل مريم "
وقفت من بلاصتي اول ماريتو دخل هادد للصالة ..تلفتتلها كيف وقفت هي زادة وبقات تغزرلنا باهتة مش فاهمة شي ف اللحظة هاذي بالذات اول مرة نحس بخوف كيف هذاا.. خوفي من اني نتكشف قدام الطفلة الي حبيتهاا.. فقت من سرحتي على صوتو كيف رجع يصيح
كمال :" محمووووود انت كيفااااه تعمل هكااا.. كيفاه ؟؟؟"
بلعت ريقي بالسيف نحكي
انا :" فاش تحكي كمال ؟"
غمضت عينيا بالقوي اول ما رمى لاوراق ف وجهي يحكي
كمال :" شووووف وحدك تو تعرف انا فاش نحكي "
هد عليااا و شدني من الفاست متاعي ورجع يحكي
كمال :" نعرفك طووول عمرك مسخ.. اما توصل تخدم ف أعمال مشبوهة باسم الشركة متاعي هنااا ويكفي معادش انجم نتحملك اكثر من هكاا "
تلفتت على صوت شهقتهاا الي طغات على صوتو.. قلبي وجعني اول ماشفت دمعتهاا الي نزلت منهاا.. رجعت غزرتلو يحكي
كمال :" من اليوم معادش تحط ساقك ف الشركة.. يزي مافضحتني ووسختلي اسمي بعمايلك و طيشك.. مانيش ناوي نتفضح اكثر من ورااك "
هز صبعو ف وجهي ورجع يحكي
كمال :" كان ماجيتش نخمم ف بوك و اختك المسكينة راني باصيتك ورميتك ف الحبوسات يا كلب "
بقيت واقف ف بلاصتي ساكت ماعرفتش كيفاه نتصرف ف الموقف هذاا كيفاه تفضحت قدامهاا وهديت كل شي بنيتو على خاطرهاا..قلبي وجعني اول ماريتهاا خرجت تجري من غير ماتتلفت وراهااا وين لقيت روحي عاجز اني نخلط عليهاا و لا نفسرلهاا خاطر نعرفهاا مش بش تصدقني و مش بش تسامحني.. عديت بيديا على وجهي نحكي
انا :" كمال نقص من صوتك وخليني نفهمك "
قص عليا صوت بابا كيف دخل يحكي
" لي يقووول فييه صحييح؟"
ريتو كيف غزرلي يحكي
كمال :" جاوبو تراه "
ريتو كيف غزرلي يحكي
" محمود حل فمك واحكي شعملت.. ياخي انا شنوة نبهت عليك "
حسيت روحي كرزت من الي صار.. مانعرفش كيفاه تعديت بابا وهديت على كمال..كبست على وجهي نحكي
انا :"مارتحت الا ما فضحتني عند بابا مش هكا ؟؟ "
علا ف صوتو اكثر يحكي
كمال:" بوك مصيرو يعرف حقيقة ولدو..الشركة لكل يحكيو عليك "
انا :" شنوة مازلت تحب مني انت.. خذيت بلاصتي ف الشركة وبلاصتي عند بابا.. خليت اختى تكرهني و تو فتون تغششت "
هز بحاجبو يحكي
كمال :" متأكد انا لي عملت هكا؟؟ ننصحك حاسب روحك محمود و شوف عمايلك.. طول عمري و انا ننصح فيك و نقلك يزيك من التصرفات هاذم.. وانت راسك صحيح"
حليت عينيا فيه نحكي
انا :" مانيش صغير بش نسمع كلامك.. انا نعرف كيفاه نتصرف.. وننصحك يا كمال ابعد على ثنيتي خيرلك.. المبادئ و القيم متاعك خليهم عندك انت "
كمال :" واضح انك تعرف "
غمضت عينيا على صوت بابا كيف صاح من تالي يحكي
" محموووود سكر فممممك وأخرج عليااا من ليوم لاك ولدي و لا نعررررفك "
رجعت حليتهم من غير مانتلفتتلو.. غزرت لكمال كيف عطاني بظهرو وخرج.. حليت فلس الشوميز وحاولت نتنفس ونخمم شنوة بش نعمل مع فتون..خرجت نجري فيسع وين عرضتني مريم قدامي.. قربتلها نحكي
انا :" مريم ويني فتون ؟ "
حليت عينيا على الكف لي جاني من عندها وين ريت دمعتها نزلت قحرتلي تحكي
مريم :"انا وقفت في وجه بابا وراجلي.. راهنت عليك قتلهم محمود بش يصلح من روحو ماهوش فاشل ماهوش كلب... علاش عملت هكا... علاش خيبت املي فيك..علاش حشمتني مع راجلي"
انا "مريم صدقني انا"
مريم"اسكتت... من ليوم معادش نحب نسمع شي منك... من ليوم انت وفيت خويا صغير لي نسلم في الدنيا على خاطرو ليوم انا سلمت فيه"
انا"مريم... شقاعدة تحكي انت.. انت اختي"
مريم"مانييش اختككك..منتشرفش تكون خوياا تسمع فياا.. والطفلة ابعد عليها ماهيش متاع واحد كيفك"
انا :" فاش تحكي انت ؟؟؟ انا نحبهاااا "
مريم :" كان جيت تحبهاا راك ماخليتهاش تخرج تبكي من عمايلك.. "
عليت ف صوتي نحكي
انا :" مش خاطرها صاحبتك بش تقرر انت ف بلاصتهاا "
تبسمت تحكي
مريم :" بلا منبعدها... هي اصلا معادش بش تغزرلك جمملة "
كبست عالبونية متاعي نحكي
انا :" الساقط راجلك عمرلك مخك علياا و خلاك تحقد عليا انت زادة "
مريم :" كمال بقى ينظف وراك.. كل مرة... اما انت طعنتو استغليت اسمو وتخدم في اعمال مشبوهة... انت متحشمش.. كيفاش ترضا لروحك الشي هذا شنية ناقصك بش تمشي للخدمة هاااذي...هاك خسرت كلشي حتى بابا تبرا منك.. ارتحت توو"
نزلت راسي وكبست على لبوتية متاعي نحكي
انا :" خبر راجلك لي انا مستحيل ننسى الي صار ليوم .. كيما مستحيل تنساوه انتوما زادة "
خليتها واقفة وخرجت نجري حسيت روحي غزلت ودمي فور منهم لكل من وراهم هوما انا ليوم خسرت اكثر حد حبيتو ف حياتي...
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
